Read KO E TOH TAPU KATOA TONGA KO SĒNESI 48 Bible Online

KO SĒNESI 48 - KO E TOH TAPU KATOA TONGA bible

KO SĒNESI 48

¹PEA hili ia na‘e fakahā kia Siosifa, Kuo vaivai ho‘o ‘eiki; pea na‘a ne ‘alu mo ia ki ai hono ongo foha ko Manase mo ‘Ifalemi.

²Pea na‘e fakahā kia Sēkope, ‘o pehē, Ko ho foha ko Siosifa kuo ha‘u kiate koe: pea fai ‘a ‘Isileli ‘aki ‘a e toe ‘o hono ivi, ‘o ne nofo hake ‘i he mohenga.

³Pea pehē ‘e Sēkope kia Siosifa, Ko e ‘Otua ko Sātai na ne hā kiate au ‘i Lusa ‘i he fonua ko Kēnani, pea na‘a ne tāpuaki au, pea ne folofola mai,

⁴Ko au eni te u ngaohi koe ke fai hako, pea te u fakauōuōtu‘u koe, pea te u tuku ke ke hoko ko e koto kakai, pea te u ‘atu ‘a e fonua ni ki ho hako ‘amui ko e tofi‘a ta‘engata.

⁵Pea ko eni ko ho ongo foha na‘e fanau kiate koe ‘i ‘Isipite, ‘i he te‘eki te u ha‘u kiate koe ki ‘Isipite, ‘oku ‘o‘oku ‘a kinaua; ‘e ‘o‘oku ‘a Manase mo ‘Ifalemi, ‘o hangē ‘oku ‘o‘oku ‘a Lūpeni mo Simione.

⁶Ka ko ho hako ‘a ia te ke ma‘u ‘amui, ‘e ‘o‘ou ia; ‘e ui ‘a kinautolu ‘aki ‘a e hingoa ‘o honau ongo ta‘okete ‘i honau tofi‘a.

⁷Pea ko au ‘i he‘eku ha‘u mei Mesopotēmia, na‘e pekia ‘i hoku tafa‘aki ‘a Lesieli ‘i he fonua ko Kēnani, ‘i he fononga, ‘i he toe pē ha vaa‘i hala pea mau a‘u ki ‘Efalata: pea na‘a ku tanu ia ‘i he hala ki ‘Efalata (‘a ia ko Pētelihema).

⁸Pea sio ‘e ‘Isileli ki he ongo foha ‘o Siosifa, pea ne pehē, Ko hai ‘a kinaua na?

⁹Pea tali ‘e Siosifa ki he‘ene ‘eiki, Ko ‘eku fānau ia kuo foaki kiate au ‘e he ‘Otua ‘i he potu ni. Pea ne pehē, ‘Omi mu‘a kinaua kiate au ka u tāpuaki‘i kinaua.

¹⁰Pea kuo nenefu ‘a e fofonga ‘o ‘Isileli ko e me‘a ‘i he‘ene motu‘a, pea na‘e ‘ikai te ne lava ke sio. Ko ia na‘a ne fakaofiofi kinaua kiate ia; pea na‘a ne ‘uma kiate kinaua, mo fā‘ofua ki ai.

¹¹Pea lea ‘a ‘Isileli kia Siosifa, Na‘e ‘ikai te u ‘amanaki te u sio ki ho mata; ka ko eni kuo tuku ‘e he ‘Otua ke u sio ki ho hako foki.

¹²Pea ‘omi kinaua ‘e Siosifa mei hono vaha‘a tui: pea ne tulolo ‘o punou ki he kelekele.

¹³Pea puke ‘a Siosifa kiate kinaua, ko ‘Ifalemi ‘i hono to‘omata‘u fe‘unga mo e to‘ohema ‘o ‘Isileli, pea ko Manase ‘i hono to‘ohema ke fe‘unga mo e to‘omata‘u ‘o ‘Isileli, pea ne ‘unuaki atu kiate ia.

¹⁴Pea mafao atu ‘e ‘Isileli hono nima to‘omata‘u, ‘o ne ai ki he ‘ulu ‘o ‘Ifalemi ‘a ia ko e tehina, pea ne ‘ai hono to‘ohema ki he ‘ulu ‘o Manase; ‘o ne ‘ai ‘ilo pē hono nima ke pehē, neongo ko Manase ko e ta‘okete.

¹⁵Pea na‘a ne tāpuaki‘i ‘a Siosifa,[100] ‘o ne pehē, Ko e ‘Otua, ‘a ia na‘e taka ‘i hono ‘ao ‘a ‘eku mātu‘a ko ‘Epalahame mo ‘Aisake; ko e ‘Otua kuo ne tauhi au talu ‘eku ‘i ai, ‘o a‘u ki he ‘aho ni;

¹⁶ko e ‘Āngelo kuo ne huhu‘i au mei he kovi kotoa pē, ‘ofa ke ne tāpuaki‘i ‘a e ongo tama ni; pea ke ui‘aki ‘a kinaua hoku hingoa, mo e hingoa ‘o ‘eku mātu‘a ko ‘Epalahame mo ‘Aisake: pea ke na tupu hangē ko e ika, ‘o opeope ‘i he fonua.

¹⁷Pea ‘i he vakai ‘e Siosifa kuo ‘ai ‘e he‘ene ‘eiki hono nima to‘omata‘u ki he ‘ulu ‘o ‘Ifalemi, na‘a ne kovi‘ia ai: pea na‘a ne puke ‘a e nima ‘o ‘ene ‘eiki ke hiki mei he ‘ulu ‘o ‘Ifalemi ki he ‘ulu ‘o Manase.

¹⁸Pea ne pehē ki he‘ene ‘eiki, ‘Alā, ‘oua ‘e pehē: he ko eni ‘a e ta‘okete; ‘ai ho to‘omata‘u ki hono ‘ulu ‘o‘ona.

¹⁹Ka ka fakafisi ‘e he‘ene tamai, ‘o ne pehē, ‘Oku ou ‘ilo pē, nga‘ata, ‘oku ou ‘ilo pē: ‘e hoko mo ia foki ko e kakai, pea te ne mā‘olunga foki: ka neongo ia ka ‘e hulu atu hono tehina ‘iate ia, pea ‘e hoko hono hako ko e koto kakai.

²⁰Pea ne tāpuaki‘i kinaua ‘i he ‘aho ko ia, ‘o pehē, ‘E lea‘aki koe ‘e ‘Isileli ‘i he‘enau fai tāpuaki, he‘enau pehē, ‘Ofa ke ngaohi koe ‘e he ‘Otua ke hangē ko ‘Ifalemi mo Manase: pea ne tuku kimu‘a ‘a ‘Ifalemi ‘ia Manase.

²¹Pea lea ‘a ‘Isileli kia Siosifa, Ko eni kuo u mate au: ka ‘e ‘iate kimoutolu ‘a e ‘Otua, pea te ne fakafoki kimoutolu ki he fonua ‘o ho‘omou ngaahi kui.

²²Pea kuo u ‘atu kiate koe ha konga fonua ‘e taha ‘o lahi hake ‘i ho ngaahi tokoua, ‘a e konga ne u to‘o mei he kau ‘Āmoli, ‘aki ‘eku heletā mo ‘eku kaufana.