Read KO E TOH TAPU KATOA TONGA KO SĒNESI 49 Bible Online

KO SĒNESI 49 - KO E TOH TAPU KATOA TONGA bible

KO SĒNESI 49

¹PEA ui ange ‘e Sēkope hono ngaahi foha, ‘o ne pehē: Mou fakataha mai, ka u ‘a‘au ‘a e me‘a ‘e hoko kiate kimoutolu ‘I he kuonga mama‘o atu.

²‘a e fānau ‘a Sēkope, mou kātoa ‘o fanongo mai; ‘Io, fanongo kia ‘Isileli ko ho‘omou tamai.

³Lūpeni, ko koe ko hoku ‘uluaki, Ko hoku mālohi, mo e fuatapu ‘o hoku ivi, Mu‘omu‘a he nofo, mu‘omu‘a he angi.

⁴Lilingofua hangē ko e vai, ‘E ‘ikai te ke ‘uluaki; He na‘a ke kākā he mohenga ho‘o tamai: ‘Ā, na‘a ke hanga ‘o ‘uli‘i ia. Na‘a ne ‘alu hake ki hoku fala!

⁵Ko ongo takaua ‘a Simione mo Līvai, Ko ‘ena heletā ko e mahafu ‘o e fakamālohi.

⁶Hoku laumālie, ‘oua te ke ‘alu ki he‘ena fa‘ufa‘ufono; ‘Oua te ke kau he‘ena fakataha, ‘a hoku loto: He ‘i he‘ena ‘ita na‘a na tāmate‘i tangata, ‘O na hoka pulu mo kau he‘ena loto fīta‘a.

⁷Ke mala‘ia pē ‘ena ‘ita, he na‘e kakaha; Mo ‘ena tautea, he na‘e fefeka: Te u tufaki kinaua ‘i ha‘a Sēkope, Pea te u vete kinaua ‘i ha‘a ‘Isileli,

⁸‘E Siuta, ko koe ia ‘E fakamālō ki ai ho ngaahi tokoua: Te ke puke ‘a e kia ho ngaahi fili; Pea ‘e hū kia koe ‘a e fānau ‘a ho‘o ‘eiki

⁹Ko e laione mui ‘a Siuta; Tama, ‘oku ke ‘alu hake ki ‘ana, Ko ho‘o tulimanu kuo lava: Si‘ene taulalo, si‘ene tokoto ‘ena, ‘O hangē ha laione motu‘a, ‘O hangē ha laione toutama! Ko hai te ne fa‘a ue‘ia?

¹⁰Ko e sēpita meia Siuta ‘e ‘ikai ‘ave, Mo e tokotoko mei hono vaha‘a va‘e, Kae‘oua ke ha‘u ‘a Sailo,[101] Pea ‘e fai kiate ia ‘e he ngaahi kakai ‘enau tukulolo.[102]

¹¹‘Ene no‘otaki ki he vaine ‘ene ki‘i ‘asi, ‘Io, ‘a e ‘uhiki ‘o ‘ene manu ki he vaine fungani; ‘Ene fō hono vala ‘i he uaine, Mo hono kofu ‘i he toto ‘o e kālepi:

¹²‘E kulokula hono mata ‘i he uaine, Pea hinehina hono nifo ‘i he hu‘akau.[103]

¹³Ko Sepulone te ne nofo ki matātahi na, ‘Io, ki he matātahi vaka‘ia; Pea ‘e a‘u ki Saitoni hono tafafonua.

¹⁴Ko ‘Īsaka ko e ‘asi mālohi ‘Oku tokoto ‘i he vaha‘a loto‘ā sipi;

¹⁵Pea ne sio ki he mālōlō ko e me‘a ia, Pea ki hono fonua ‘oku faka‘ofo‘ofa; Ko ia na‘a ne tuku hifo ki he ha‘amo hono uma, Pea ne tali fatongia.

¹⁶Ko Tani te ne fakamaau hono kakai, ‘O hangē ko e ngaahi matakali kehe ‘o ‘Isileli,

¹⁷‘E hoko ‘a Tani ko e ngata ‘i he hala; Ko e kēlasa ‘i he ve‘e ‘alu‘anga, ‘A ia ‘oku ne u‘u ‘a e va‘e ‘o e hoosi, Ka e tō fo‘ohake ‘a ia ‘oku heka ai,

¹⁸Ko ho‘o fakamo‘ui kuo tatali ki ai, ‘e Sihova.

¹⁹Ko Kata ‘e tata‘o ‘e ha kongakau; Ka te ne tata‘o ‘a e tukutau.

²⁰‘Oku meia ‘Āseli ‘a e ngako ko ‘ene me‘akai: Pea ‘oku fakatupu ‘e ia ‘a e me‘a fungani kai ‘a hou‘eiki.

²¹Ko Nafitalai ko e fu‘u ‘akau mā‘olunga,[104] ‘Oku faka‘ofo‘ofa hono funga.[105]

²²Ko Siosifa ko e hako ‘o e ‘akau fua, ‘Akau ‘i ha ve‘e vai mapunopuna ‘Oku laka atu hono ngaahi va‘a ‘i he funga ‘ā.[106]

²³Pea nau fakamamahi ki ai ‘o fana‘i ia, ‘Io, ko e kau to‘o ngahau na‘a nau ‘ohofia.

²⁴Ka na‘e ma‘uma‘uluta ‘ene kaufana, Pea na‘e ngāue mālohi hono nima,[107] Ko e poupou he nima he to‘a ‘o ha‘a Sēkope Mei he feitu‘u ‘oku ‘i ai ‘a e Tauhi, Ko e Maka ‘o ‘Isileli,

²⁵Mei he ‘Otua ‘o ho‘o tamai — ‘io, te ne tokoni‘i koe; ‘Io, ko Sātai — te ne tāpuaki‘i koe ‘Aki ‘a e ngaahi tāpuaki ‘o Langi ‘i ‘olunga, Mo e ngaahi tāpuaki ‘o e moana ‘oku toka ‘i lolofonua, Ko e ngaahi tāpuaki ‘o e huhu mo e manava.

²⁶Ko e ngaahi tāpuaki ‘o ho‘o tamaí, ‘a ia kuo hulu atua[108] ‘I he ngaahi tāpuaki ‘o e ‘otu mo‘unga ta‘engata,[109] Mo e ngaahi mālie ‘o e ngaahi mo‘unga tuputupu‘a — Te nau tō ki he ‘ulu ‘o Siosifa, ‘Io, ki he tumu‘aki ‘o ia na‘e makehe mo hono ngaahi tokoua.

²⁷Ko Penisimani ko e ulofi ‘oku halu, Pongipongi te ne kai ‘ene ‘a‘alu, Efiafi te ne tufa ‘a e me‘a kuo ma‘u.

²⁸Ko kinautolu ni ko e ngaahi matakali ‘o ‘Isileli, ko e hongofulu mā ua; pea ko eni ‘a e lea na‘e fai kiate kinautolu ‘e he‘enau tamai, ‘i he‘ene tāpuaki‘i kinautolu, ‘o takitaha ma‘ana hono tāpuaki.

²⁹Pea ne tu‘utu‘uni kinautolu, ‘o ne pehē ki ai, Ko au eni ka ului ki hoku kakai: ke mo tanu au mo ‘eku mātu‘a ‘i he ‘ana ‘oku ‘i he ‘api ‘o ‘Efiloni ko e Heti;

³⁰‘i he ‘ana ‘oku ‘i he ‘api ko Makipila, ‘a ia ‘oku tu‘u ki he hahake ‘o Mamilī ‘i he fonua ke Kēnani, ko e ‘ana na‘e fakatau ‘e ‘Epalahame fakataha mo e ‘api meia ‘Efiloni ko e Heti, ko e tofi‘a mōno fa‘itoka.

³¹Ko e potu ko ia na‘a nau tanu ai ‘a ‘Epalahame mo hono uaifi ko Sela; ko e potu ko ia na‘a nau tanu ai ‘a ‘Aisake mo hono uaifi ko Lepeka; pea ko e potu ko ia na‘a ku tanu ai ‘a Lia.

³²Ko e fakatau ‘o e ‘api mo e ‘ana ‘oku ‘i ai meia ha‘a Heti.

³³Pea kuo ‘osi ‘e Sēkope ‘ene fai tu‘utu‘uni ki hono ngaahi foha, na‘a ne ‘ohake hono va‘e ki he mohenga, ‘o ne hokotaki; ‘o ne ului ki hono kakai.