Read KO E TOH TAPU KATOA TONGA KO SĒNESI 5 Bible Online

KO SĒNESI 5 - KO E TOH TAPU KATOA TONGA bible

KO SĒNESI 5

¹KO E tohi to‘utangata eni ‘o e hako ‘o ‘Ātama. ‘I he taimi na‘e fakatupu ai ‘e he ‘Otua ‘a ‘Ātama, na‘a ne ngaohi ia ‘i he tatau ‘o e ‘Otua:

²na‘a ne fakatupu ‘a kinaua ko e tangata mo e fefine; pea ne tāpuaki‘i ‘a kinaua, pea ne fakahingoa ‘a kinaua ko ‘Ātama, ‘i he ‘aho ‘o hona fakatupu.

³Pea kuo mo‘ui ‘a ‘Ātama ko e ta‘u ‘e uangeau mā tolungofulu, pea ne ma‘u ha foha na‘a ne hokosi ia, pea ‘i hono ‘īmisi; pea ne fakahingoa ia ko Seti:

⁴pea ko e fuoloa ‘o ‘Ātama hili ‘ene ma‘u ‘a Seti ko e ta‘u ‘e fitungeau: pea ne ma‘u mo ha ngaahi foha mo ha ngaahi ‘ōfefine.

⁵Pea ko e fuoloa ‘o e mo‘ui ‘a ‘Ātama ko e ta‘u ‘e hivangeau mo e ta‘u ‘e tolungofulu; pea pekia.

⁶Pea kuo mo‘ui ‘a Seti ko e ta‘u ‘e uangeau mo e ta‘u ‘e nima, pea ne ma‘u ha foha ko ‘Īnosi:

⁷pea mo‘ui atu ‘a Seti hili ‘ene ma‘u ‘a ‘Īnosi ko e ta‘u ‘e fitungeau mo e ta‘u ‘e fitu, pea ne ma‘u mo ha ngaahi foha mo ha ngaahi ‘ōfefine:

⁸pea ko e fuoloa ‘o Seti ko e ta‘u ‘e hivangeau mo e ta‘u ‘e hongofulu mā ua; pea pekia.

⁹Pea kuo mo‘ui ‘a ‘Īnosi ko e ta‘u ‘e teau mo e ta‘u ‘e hivangofulu, pea ne ma‘u ha foha ko Keinani:

¹⁰pea mo‘ui atu ‘a ‘Īnosi hili ‘ene ma‘u ‘a Keinani ko e ta‘u ‘e fitungeau mo e ta‘u ‘e hongofulu mā nima, pea ne ma‘u mo ha ngaahi foha mo ha ngaahi ‘ōfefine:

¹¹pea ko e fuoloa ‘o ‘Īnosi ko e ta‘u ‘e hivangeau mo e ta‘u ‘e nima; pea pekia.

¹²Pea kuo mo‘ui ‘a Keinani ko e ta‘u ‘e teau mo e ta‘u ‘e fitungofulu, pea ne ma‘u ha foha ko Mahalaleli;

¹³pea mo‘ui atu ‘a Keinani hili ‘ene ma‘u ‘a Mahalaleli ko e ta‘u ‘e fitungeau mo e ta‘u ‘e fāngofulu, pea ne ma‘u mo ha ngaahi foha mo ha ngaahi ‘ōfefine:

¹⁴pea ko e fuoloa ‘o Keinani ko e ta‘u ‘e hivangeau mo e ta‘u ‘e hongofulu; pea pekia.

¹⁵Pea kuo mo‘ui ‘a Mahalaleli ko e ta‘u ‘e teau mo e ta‘u ‘e onongofulu mā nima, pea ne ma‘u ha foha ko Sēleti:

¹⁶pea mo‘ui atu ‘a Mahalaleli hili ‘ene ma‘u ‘a Sēleti ko e ta‘u ‘e fitungeau mo e ta‘u ‘e tolungofulu, pea ne ma‘u mo ha ngaahi foha mo ha ngaahi ‘ōfefine:

¹⁷pea ko e fuoloa ‘o Mahalaleli ko e ta‘u ‘e valungeau mo e ta‘u ‘e hivangofulu mā nima; pea pekia.

¹⁸Pea kuo mo‘ui ‘a Sēleti ko e ta‘u ‘e teau mo e ta‘u ‘e onongofulu mā ua, pea ne ma‘u ha foha ko ‘Īnoke:

¹⁹pea mo‘ui atu ‘a Sēleti hili ‘ene ma‘u ‘a ‘Īnoke ko e ta‘u ‘e valungeau, pea ne ma‘u mo ha ngaahi foha mo ha ngaahi ‘ōfefine:

²⁰pea koe fuoloa ‘o Sēleti ko e ta‘u ‘e hivangeau mo e ta‘u ‘e hongofulu mā ua; pea pekia.

²¹Pea kuo mo‘ui ‘a ‘Īnoke ko e ta‘u ‘e teau mo e ta‘u ‘e onongofulu mā nima, pea ne ma‘u ha foha ko Mētuisela:

²²pea takaua ‘a ‘Īnoke mo e ‘Otua hili ‘ene ma‘u ‘a Mētuisela ‘i he ta‘u ‘e uangeau, pea ne ma‘u mo ha ngaahi foha mo ha ngaahi ‘ōfefine:

²³pea ko e fuoloa ‘o ‘Īnoke koe ta‘u ‘e tolungeau mo e ta‘u ‘e onongofulu mā nima.

²⁴Pea takaua ‘a ‘Īnoke mo e ‘Otua; pea ‘iloange kuo ‘ikai; he na‘e ‘ave ia ‘e he ‘Otua.

²⁵Pea kuo mo‘ui ‘a Mētuisela ko e ta‘u ‘e teau mo e ta‘u ‘e valungofulu mā fitu, pea ne ma‘u ha foha ko Lēmeki;

²⁶pea mo‘ui atu ‘a Mētuisela hili ‘ene ma‘u ‘a Lēmeki ko e ta‘u ‘e fitungeau mo e ta‘u ‘e valungofulu mā ua, pea ne ma‘u mo ha ngaahi foha mo ha ngaahi ‘ōfefine:

²⁷pea ko e fuoloa ‘o Mētuisela ko e ta‘u ‘e hivangeau mo e ta‘u ‘e onongofulu mā hiva; pea pekia.

²⁸Pea kuo mo‘ui ‘a Lēmeki ko e ta‘u ‘e teau mo e ta‘u ‘e valungofulu mā ua, pea ne ma‘u ha foha:

²⁹pea ne fakahingoa ia ko Noa [ko Mālōlō], he‘ene pehē, Ko eni ia te ne fakafiemālie kitautolu mei he‘etau ngāue mo e mamahi ‘a hotau nima, ‘a ia ‘oku tupu mei he kelekele ne fakamala‘ia ‘e Sihova.[20]

³⁰Pea mo‘ui atu ‘a Lēmeki hili ‘ene ma‘u ‘a Noa ko e ta‘u ‘e nimangeau mo e ta‘u ‘e hivangofulu mā nima, pea ne ma‘u mo ha ngaahi foha mo ha ngaahi ‘ōfefine:

³¹pea ko e fuoloa ‘o Lēmeki ko e ta‘u ‘e fitungeau mo e ta‘u ‘e fitungofulu mā fitu; pea pekia.

³²Pea kuo fe‘unga ‘a Noa mo e ta‘u ‘e nimangeau: pea ne ma‘u ‘e Noa ha ngaahi foha ko Semi, mo Hami, mo Sēfeti.