Read KO E TOH TAPU KATOA TONGA KO SĒNESI 6 Bible Online

KO SĒNESI 6 - KO E TOH TAPU KATOA TONGA bible

KO SĒNESI 6

¹PEA ‘i he faifai pea faka‘a‘au ‘o tokolahi ‘a e kakai ‘i he funga fonua, pea ai ha‘anau fu‘u fānau fefine.

²Tā na‘e sio ‘e he ngaahi foha ‘o e ‘Otua[21] ki he ngaahi ‘ōfefine ‘o e Tangata ‘oku nau hōihoifua; pea nau hanga ‘o mali mo ha ni‘ihi, ‘a ia pē na‘a nau loto ki ai.

³Pea folofola ‘a Sihova, ‘E ‘ikai nofo ma‘u ai pē hoku Laumālie mo e tangata, ke fiu hono o‘i, he ko e kakano foki mo ia: ka ko hono fuoloa ko e ta‘u ‘e teau mo e ta‘u ‘e uofulu.

⁴Ko e taimi ko ia na‘e ‘i māmani ‘a e kakai lalahi, kae‘uma‘ā hili ‘a e ‘alu ‘a e ngaahi foha ‘o e ‘Otua[22] ki he ngaahi ‘ōfefine ‘o e Tangata, pea nau fānau kiate kinautolu; ko e kau to‘a ia ‘o ono‘aho, ko e fa‘ahinga ongoongo.

⁵Pea na‘e ‘afio‘i ‘e Sihova kuo fakautuutu ‘a e kovi ‘a e tangata ‘i māmani, pea ‘oku kovi ‘atā ‘a e filio‘i kotoa pē ‘o e ngaahi fakakaukau ‘a hono loto ma‘u ai pē.

⁶Pea na‘e fakatomala ‘a Sihova ‘i he‘ene ngaohi ‘a e tangata ‘i māmani, ‘o ne fakamamahi ‘i hono finangalo.

⁷Pea folofola ‘a Sihova, Te u tafi mei he funga ‘o māmani ‘a e tangata kuo u fakatupu; ‘o fai mei he tangata ki he manu, ‘io, mo e me‘a totolo, mo e manupuna ‘o e langi; he kuo u fakatomala ‘i he‘eku ngaohi kinautolu.

⁸Ka ko Noa na‘e ‘ilo ki ai ha hōifua ‘i he finangalo ‘o Sihova.

⁹Ko e tohi eni ‘o e hako ‘o Noa. Ko Noa ko e tangata angatonu: na‘a ne haohaoa pe ‘i he ngaahi to‘utangata na‘e fe‘unga mo ia: na‘e takaua ‘a Noa mo e ‘Otua.

¹⁰Na‘e ma‘u ‘e Noa ha foha ‘e toko tolu, ‘a Semi, ‘a Hami, pea mo Sēfeti.

¹¹Pea kuo ka‘anga ‘a māmani ‘i he fofonga ki ai ‘a e ‘Otua, pea kuo opeope ‘i he fonua ‘a e fakamālohi.

¹²Pea na‘e ‘afio ‘a e ‘Otua ki māmani, pea tā kuo ka‘anga; he kuo fakaka‘anga ‘e he kakano kotoa pē hono ‘alunga ‘i māmani.

¹³Pea folofola ‘a e ‘Otua kia Noa, Kuo ongo mai kiate au kuo a‘u ‘a e kakano kotoa pē ki hono ngata‘anga; he ko e me‘a ‘iate kinautolu kuo opeope ‘i he fonua ‘a e fakamālohi; pea ko eni, te u faka‘auha kinautolu fakataha mo e fonua.

¹⁴Ke ke fa‘u mo‘ou ha ‘a‘ake ‘aki ‘a e ‘akau ko e kofa; te ke ngaohi ‘a e ‘a‘ake ke ‘ana‘ia, pea te ke vali ‘aki ha pulu mei loto mo tu‘a.

¹⁵Pea ko eni ‘a e me‘a te ke fai ki ai ‘i ho‘o fa‘u: Ko e lōloa ‘o e ‘a‘ake ko e kiupite ‘e tolungeau, ko e māukupu ko e kiupite ‘e nimangofulu, pea ko hono mā‘olunga ko e kiupite ‘e tolungofulu.

¹⁶Te ke ngaohi hano māma‘anga[23] ‘o e ‘a‘ake, pea te ke fai hake ko e kiupite ‘e taha, pea ‘osi; pea ko e matapā ‘o e ‘a‘ake te ke ‘ai ‘i he kaokao; pea te ke ngaohi hono funga vaka lalo, mo hono ua, mo hono tolu.

¹⁷Pea ko au ē ‘oku ou teu ‘omi ‘a e lōmaki, ko e fu‘u vai ke ‘ufi‘ufi ‘a e fonua, ke faka‘auha ‘a e kakano kotoa pē ‘i he lalo langi ‘a ia ‘oku ‘i ai ha mānava mo‘ui: ‘ilonga ha me‘a ‘oku ‘i he fonua ‘e mate.

¹⁸Ka te u fakapapau ‘eku fuakava mo koe; pea te ke hū koe ki he ‘a‘ake, pea ‘e hū mo koe ho ngaahi foha, mo ho uaifi, mo e ngaahi uaifi ‘o ho ngaahi foha.

¹⁹Pea ko e me‘a ki he ngaahi me‘a mo‘ui kehekehe, ‘io, ‘a e ngaahi fa‘ahinga kakano, te ke fakahū ki he ‘a‘ake mei ai kotoa pē, ‘o tautau toko ua, ke fakamo‘ui kinautolu fakataha mo koe; ko e manu tangata mo ‘ene fefine.

²⁰Ko e manupuna, fakafa‘ahinga, mo e manu lalata, fakafa‘ahinga, ‘a e me‘a ‘oku totolo ‘i he kelekele, fakafa‘ahinga, ko e toko ua mei ai takitaha ‘e ha‘u kiate koe ke fakamo‘ui.

²¹Pea ke ke hanga ‘o to‘o ma‘au ‘a e ngaahi fa‘ahinga me‘akai kehekehe, pea ke fa‘oaki atu ma‘ao me‘akai, ma‘au mo kinautolu.

²²Pea fai ‘e Noa; ‘ilonga ha me‘a na‘e tu‘utu‘uni kiate ia ‘e he ‘Otua, na‘a ne fai ia.