Read KO E TOH TAPU KATOA TONGA KO SĒNESI 7 Bible Online

KO SĒNESI 7 - KO E TOH TAPU KATOA TONGA bible

KO SĒNESI 7

¹PEA folofola ‘a Sihova kia Noa, Hū koe mo ho fāmili kotoa ki he ‘a‘ake; he ko koe kuo u mamata ki ai ‘i he to‘utangata ni ‘oku tonu ho‘o fakafeangai kiate au.

²‘Ilonga ‘a e fa‘ahinga manu ngofua te ke hanga ‘o ma‘u mei ai ‘o taki fitunga‘ahoa, ko e manu tangata mo ‘ene fefine; kae tautau toko ua pē mei he manu ‘oku ‘ikai ngofua, ‘a e tangata mo ‘ene fefine.

³Ko e manupuna foki ‘o e ‘atā te ke taki fitunga‘ahoa mei ai, tangata mo fefine; mo fakaili ki he ngaahi fa‘ahinga ke nofo ‘i he funga fonua kotoa.

⁴He ‘oku toe pē ‘a e ‘aho ‘e fitu, pea u faka‘uha ki he fonua ‘o ‘aho fāngofulu mo pō fāngofulu; pea te u tafi mei he funga kelekele ‘a e me‘a mo‘ui kotoa pē kuo u ngaohi.

⁵Pea na‘e fai ‘e Noa ki he me‘a kotoa pē kuo tu‘utu‘uni ‘e Sihova kiate ia.

⁶Pea kuo a‘u ‘a Noa ki hono onongeau ta‘u, pea hoko ‘a e lōmaki vai ki he fonua.

⁷Pea hū ‘a Noa ki he ‘a‘ake, mo hono ngaahi foha mo hono uaifi mo e ngaahi uaifi ‘o hono ngaahi foha, telia ‘a e ngaahi vai ‘o e Lōmaki.

⁸Pea ko e ni‘ihi ‘i he manu na‘e ngofua, mo e ni‘ihi ‘i he manu na‘e ‘ikai ngofua, mo e ni‘ihi ‘i he manupuna, mo e ngaahi fa‘ahinga kehekehe ‘oku totolo ‘i he kelekele,

⁹na‘a nau hū tauhoa kia Noa ki he ‘a‘ake, ko e tangata mo e fefine; ‘o hangē ko e tu‘utu‘uni ‘a e ‘Otua kia Noa.

¹⁰Pea hili ‘a e ‘aho ‘e fitu, na‘e toki hoko ki he fonua ‘a e ngaahi vai ‘o e Lōmaki.

¹¹‘I he ta‘u ko hono onongeau ‘o e mo‘ui ‘a Noa, ‘i hono ua ‘o e māhina, pea mo hono ‘aho hongofulu mā fitu ‘o e māhina, ‘i he ‘aho ko ia na‘e fakapā ai ‘a e ngaahi matavai ‘o e moana lahi, pea na‘e tangaki ‘a e ngaahi kātupa ‘o e langi.

¹²Pea na‘e lōvai ki māmani ‘o ‘aho fāngofulu mo pō fāngofulu.

¹³Ko e ‘aho pē ko ia kuo hū ‘a Noa ki he ‘a‘ake, pea mo Semi mo Hami, pea mo Sēfeti, ko e ngaahi foha ‘o Noa, pea mo e uaifi ‘o Noa, mo e ngaahi uaifi ‘e toko tolu ‘o hono ngaahi foha;

¹⁴pea na‘e ‘i ai mo kinautolu ‘a e manu kaivao kehekehe ‘o fakafa‘ahinga, mo e ngaahi manu lalata, fakafa‘ahinga, mo e manu kehekehe ‘oku totolo ‘i he funga fonua ‘o fakafa‘ahinga, mo e ngaahi manupuna, fakafa‘ahinga, ‘a e fanga ki‘i manupuna kehekehe, ‘io, ‘a e me‘a kotoa pē ‘oku kapakau.

¹⁵Pea na‘a nau hū kia Noa ki he ‘a‘ake, ko e tautau toko ua mei he kakano kotoa pē ‘oku ‘i ai ha mānava mo‘ui.

¹⁶Pea ko kinautolu na‘e hū na‘a nau hū ha tangata mo ha fefine mei he kakano kotoa pē, ‘o hangē ko e tu‘utu‘uni ‘a e ‘Otua kiate ia. Pea ko ‘ene hū leva, pea tāpuni ‘e Sihova.

¹⁷Pea na‘e lolo ki he fonua ‘a e lōmaki, ‘o ‘aho fāngofulu; pea na‘e hake ‘a e vai, ‘o fakama‘anu ‘a e ‘a‘ake ke mama‘o mo e funga fonua.

¹⁸Pea hu‘a ‘a e vai, pea ne fu‘u hake ki he fonua; pea na‘e tēkina ‘a e ‘a‘ake ‘i he fukahi vai.

¹⁹Pea hu‘a ‘aupito ‘a e vai ki he fonua; pea na‘e lōfia kotoa pē ‘a e ngaahi mo‘unga mā‘olunga ‘i lalo langi kātoa.

²⁰Pea hu‘a pē ‘a e vai ‘o faai hake, ko e kiupite ‘e hongofulu mā nima, hili ‘a e lōfia ‘o e ngaahi mo‘unga.

²¹Pea na‘e mate ‘a e kakano kotoa pē na‘e ngalengale ‘i he fonua; pe ko e manupuna, pe ko e manu lalata, pe ko e manu kaivao, pe ko e manu kehekehe ‘oku totolo ‘i he fonua, kae‘uma‘ā ‘a e tangata kotoa pē.

²²‘Ilonga ha me‘a ‘i he mōmoa, ‘a ia na‘e ‘i hono ava‘i ihu ‘a e mānava mo‘ui ma‘u mei he matangi, na‘e mate ia.

²³‘Io, na‘e matafi ‘a e me‘a mo‘ui kotoa pē na‘e ‘i he funga kelekele, fai mei he tangata ki he manu, mo e me‘a totolo, mo e manupuna ‘o e ‘atā; ‘io, na‘e matafi kotoa pē mei he fonua; pea na‘e fakatoe ‘a Noa pē, mo kinautolu na‘e ‘iate ia ‘i he ‘a‘ake.

²⁴Pea ko e hu‘a ‘a e vai ki he fonua ko e ‘aho ‘e teau mā nimangofulu.