Read KO E TOH TAPU KATOA TONGA KO SĒNESI 8 Bible Online

KO SĒNESI 8 - KO E TOH TAPU KATOA TONGA bible

KO SĒNESI 8

¹PEA manatu ‘a e ‘Otua kia Noa, pea ki he ngaahi manu kaivao mo e ngaahi manu lalata na‘e ‘iate ia ‘i he ‘a‘ake: pea na‘e fakaangi ‘e he ‘Otua ha matangi ki he funga fonua, pea taumatala ai ‘a e vai;

²pea na‘e tāpuni ‘a e ngaahi matavai ‘o e loloto mo e ngaahi kātupa ‘o e langi, pea na‘e tuku ‘ene lōvai mei langi;

³pea na‘e foki atu ‘a e vai mei he fonua, ‘o fai ma‘u pē ‘ene foki; pea ‘i he ‘osi ‘a e ‘aho ‘e teau mā nimangofulu kuo si‘isi‘i ai ‘a e vai.

⁴Pea toka ‘a e ‘a‘ake ‘i hono fitu ‘o e māhina, ‘i hono ‘aho hongofulu mā fitu ‘o e māhina, ki he ngaahi mo‘unga ‘o ‘Alalate.

⁵Pea ko e vai na‘e faka‘a‘au hifo ai pē ‘o a‘u ki hono hongofulu ‘o e māhina: ‘i hono māhina hongofulu ‘i he ‘uluaki ‘aho ‘o e māhina, na‘e toki hā ‘a e ngaahi tumutumu‘i mo‘unga.

⁶Pea kuo hili ha ‘aho ‘e fāngofulu pea to‘o ‘e Noa ‘a e kātupa ‘o e ‘a‘ake kuo ne ngaohi;

⁷pea ne tuku atu ‘a e lēveni, pea ‘alu atu pē ia mo foki, kae‘oua ke mātu‘u ‘a e vai ‘i he fonua.

⁸Pea ne tuku atu ‘a e lupe, ke vakai pe kuo manifinifi ‘a e vai ‘i he funga kelekele;

⁹ka na‘e ‘ikai ‘ilo ‘e he lupe ha potu ke tu‘u ai hono ‘aofiva‘e ke ne mālōlō, pea ne foki kiate ia ki he ‘a‘ake, he ko e vai na‘e kei ‘i he funga fonua kotoa: pea ne ala ‘o puke ia ‘o ne fakahū mai ki he ‘a‘ake.

¹⁰Pea toe tatali ia ke hili mo ha ‘aho ‘e fitu; ‘o ne toe tuku atu ‘a e lupe mei he ‘a‘ake;

¹¹pea ha‘u ‘a e lupe kiate ia fe‘unga mo ‘ene efiafi; pea tā kuo ‘i hono ngutu ha lou‘i ‘ōlive mata: pea ‘ilo ai ‘e Noa kuo manifi ‘a e vai ‘i he fonua.

¹²Pea toe tatali ia ke hili mo ha ‘aho ‘e fitu; ‘o ne tuku atu ‘a e lupe; pea na‘e ‘ikai toe foki ia kiate ia.

¹³Pea faifai pea ‘i hono onongeau mā taha ta‘u ‘i he ‘uluaki ‘aho ‘o e ‘uluaki māhina, kuo mātu‘u ‘a e vai ‘i he fonua: pea tatala ‘e Noa ‘a e ‘ato ‘o e ‘a‘ake, ‘o ne fakasio, pea tā kuo mātu‘u ‘a e funga kelekele.

¹⁴Pea ‘i hono ua ‘o e māhina, ‘i hono ‘aho uofulu mā fitu ‘o e māhina, kuo mōmoa ‘a e fonua.

¹⁵Pea folofola ‘a e ‘Otua kia Noa, ‘o pehē,

¹⁶Hū atu koe mei he ‘a‘ake, pea ō mo koe ‘a ho uaifi, mo ho‘o fānau, mo e ngaahi uaifi ‘o ho‘o fānau.

¹⁷Pea ko e fanga manu kotoa pē ‘oku ‘iate koe, ‘a ia ne ‘omi mei he fa‘ahinga kakano kehekehe, ‘a e manupuna mo e manu lalata, mo e me‘a kotoa pē ‘oku totolo ‘i he fonua, te ke ‘alu atu mo koe ki tu‘a; pea, ke hangē ha neveneve ‘enau tupu ‘i he fonua, pea ke nau mafola ‘i māmani.

¹⁸Pea ‘alu ki tu‘a ‘a Noa, pea ō mo ia ‘a ‘ene fānau, mo hono uaifi, mo e ngaahi uaifi ‘o ‘ene fānau:

¹⁹ko e fanga manu kehekehe, ‘a e manu totolo, mo e manupuna, ‘a e me‘a kehekehe ‘oku ngalengale ‘i he funga fonua, ‘i honau ngaahi fa‘ahinga, na‘a nau ‘alu atu mei he ‘a‘ake.

²⁰Pea na‘e fokotu‘u ‘e Noa ha ‘ōlita kia Sihova, pea ne to‘o ha ni‘ihi ‘o e fa‘ahinga manu kehekehe na‘e ngofua, mo e ni‘ihi mei he fa‘ahinga manupuna kehekehe na‘e ngofua, ‘o ne fai‘aki ha ngaahi feilaulau ‘i he ‘ōlita.

²¹Pea na‘e nanamu ‘e Sihova ki he ngangatu fakahōifua; pea pehē ‘e Sihova ‘i hono finangalo, ‘E ‘ikai te u toe fakamala‘ia ‘a e kelekele koe‘uhi ko e tangata, he ko e filio‘i ‘a e loto ‘o e tangata ‘oku kovi mei he‘ene tamasi‘i; pea ‘e ‘ikai te u toe taa‘i ‘a e me‘a mo‘ui kotoa pē, ‘o hangē ko ia kuo u fai.

²²Lolotonga ‘a e tu‘u ‘a māmani, ko e tō ta‘u mo e ututa‘u, mo e momoko mo e pupuha, mo e fa‘ahita‘u māfana mo e fa‘ahita‘u momoko, mo e ‘aho mo e pō, ‘e ‘ikai ngata ia.