Read KO E TOH TAPU KATOA TONGA KO 2 SĀMIUELA 11 Bible Online

KO 2 SĀMIUELA 11 - KO E TOH TAPU KATOA TONGA bible

KO 2 SĀMIUELA 11

¹PEA ‘i he faifai pea hoko ‘a e fa‘ahita‘u ‘oku ‘alu atu ai ‘a e ngaahi tu‘i ki he tau, na‘e fekau atu ‘e Tēvita ‘a Sioape, ke ō mo ‘ene kau tamaio‘eiki, mo ‘Isileli kātoa; pea nau nuiki ‘a ha‘a ‘Āmoni, mo ‘ākolo‘i ‘a Lapa. Ka ka nofo ‘a Tēvita ‘i Selusalema.

²Pea ko e efiafi ‘e taha na‘e tu‘u ‘a Tēvita mei hono mohenga, ‘o hā‘ele ‘i he tu‘a fale ‘o e palasi; ‘o ne sio mei ai ki ha fefine ‘oku pālutu; pea ko e fefine matamatalelei? ‘aupito.

³Pea fekau ‘e Tēvita ke fehu‘i pe ko hai ‘a e fefine. Pea tali ‘e ha taha, ‘Ikai ko Pātisepa ia, ko e ‘ōfefine ‘o ‘Eliami, ko e uaifi ‘o e motu‘a Heti ko ‘Ūlaia?

⁴Pea fekau atu ‘e Tēvita ha ni‘ihi, ‘o ‘omi ia; pea ne ha‘u kiate ia, pea ne mohe mo e fefine; (he kuo ne fai hono fakama‘a) pea ne foki ki hono fale.

⁵Pea feitama ‘a e fefine; pea ne fekau ke fakahā kia Tēvita ‘o ne pehē, Kuo u feitama.

⁶Pea ‘alu ‘a e fekau ‘a Tēvita kia Sioape, Tuku mai ‘a ‘Ūlaia ko e motu‘a Heti. Pea fekau ‘e Sioape ‘a ‘Ūlaia ke ‘alu kia Tēvita.

⁷Pea ‘i he a‘u mai ‘a ‘Ūlaia, na‘e ‘eke ‘e Tēvita pe kuo fēfē ‘a Sioape, pea fēfē mo e kakai, pea kuo fēfē ‘a e tau.

⁸Pea toki lea ‘a Tēvita kia ‘Ūlaia, ‘Alu hifo ki ho fale, ‘o fufulu ho va‘e. Pea hū atu ‘a ‘Ūlaia mei he fale ‘o e tu‘i, pea muimui atu ha ‘inasi mei he tu‘i.

⁹Ka ka mohe pē ‘a ‘Ūlaia ‘i he hū‘anga ‘o e palasi ‘i he kau tamaio‘eiki ‘a hono ‘eiki, ‘o ‘ikai te ne ‘alu hifo ki hono fale.

¹⁰Pea na‘e fakahā kia Tēvita, ‘o pehē, Na‘e ‘ikai ‘alu hifo ‘a ‘Ūlaia ki hono fale; ko ia na‘e pehē ‘e Tēvita kia ‘Ūlaia, ‘Ikai ko ho‘o toki a‘u mei ha fononga? Ko e hā na‘e ‘ikai te ke ‘alu hifo ai ki ho fale?

¹¹Pea fakatau folofola ‘a ‘Ūlaia kia Tēvita, ‘Oku nofo fale lou‘akau ‘a e ‘A‘ake, mo ‘Isileli, mo Siuta; pea ko hoku ‘eiki ko Sioape, mo e kau tamaio‘eiki ‘a e ‘afiona, ‘oku nau ‘apitanga ‘i he ‘ata‘atā; pea te u hū koā au ki hoku fale, ke kai mo inu, mo mohe mo hoku finemotu‘a? Tangi ‘a e mo‘ui ‘a e feitu‘u na, pea tapu mo e lākoifie ‘a e ‘afiona, ‘ilo ‘e au ‘o kapau te u fai ha me‘a pehē.

¹²Pea pehē ‘e Tēvita kia ‘Ūlaia, Nofo heni he ‘aho ni foki, pea ‘apongipongi te u tuku atu koe. Ko ia na‘e nofo pē ‘a ‘Ūlaia ‘i Selusalema ‘i he ‘aho ko ia mo e ‘apongipongi.

¹³Pea ‘i he ui ange ia ‘e Tēvita, na‘a ne kai mo inu ‘i hono ‘ao, pea ne fakainu ia ke ne hu‘akava‘ia: pea ‘i he‘ene efiafi, na‘a ne ‘alu atu ke tokoto ‘i hono mohenga[27] fakataha mo e kau tamaio‘eiki ‘a hono ‘eiki, ka ko hono fale na‘e ‘ikai te ne ‘alu hifo ki ai.

¹⁴Pea pongipongi hake na‘e fai tohi ‘e Tēvita kia Sioape, ‘o ne tuku kia ‘Ūlaia ke ne ‘ave.

¹⁵Pea ne tu‘u ‘i he tohi, ‘o pehē, Tuku ‘a ‘Ūlaia ke fehangahangai mo e potu tau ‘oku mālohi, pea mou holomui meiate ia, kae te‘ia ai ke ne mate.

¹⁶Pea ‘i he fai ‘e Sioape ‘ene ngāue ki he kolo, na‘a ne tuku ‘a ‘Ūlaia ki he potu na‘a ne ‘ilo ‘oku ‘i ai ha kau to‘a.

¹⁷Pea fai ‘a e fakapuke mei he kolo, ‘o nau tau mo Sioape: pea na‘e tō ha ni‘ihi ‘o e kakai, ‘io, ‘i he kau tamaio‘eiki ‘a Tēvita; pea na‘e pekia foki ‘a e Heti ko ‘Ūlaia.

¹⁸Pea fekau ‘a Sioape ke fakahā kia Tēvita ‘a e ngaahi me‘a kehekehe ‘o e tau;

¹⁹pea ne fale‘i ‘a e talafekau, ‘o pehē, Ka ‘osi ho‘o fakahā ki he tu‘i ‘a e ngaahi me‘a ‘o e tau,

²⁰pea ka ‘iloange ‘e langa ai ha tuputāmaki ‘a e tu‘i, ‘o ne folofola mai, Ko e hā na‘a mou ofi pehē ai ki he kolo ke tau? ‘Ikai na‘a mou ‘ilo te nau fana mei he funga ‘ā?

²¹Ko hai na‘a ne taa‘i ‘a ‘Apimeleki foha ‘o Selupēseti? ‘Ikai na‘e lī hifo ki ai ‘e ha fefine ha maka toka ‘olunga mei he funga ‘ā, ‘o ne pekia ‘i Tēpesi? Ko e hā na‘a mou ofi pehē ai ki he ‘ā? Pea te ke toki pehē, Kuo pekia foki mo ho‘o tamaio‘eiki ko ‘Ūlaia Heti.

²²Pea ‘alu ‘a e talafekau ‘o ne a‘u atu, ‘o ne fakahā kia Tēvita ‘a e me‘a kotoa pē kuo fekau ai ia ‘e Sioape.

²³Pea fakamatala ‘e he talafekau kia Tēvita, Na‘e mālohi ‘a e kau tangata kiate kimautolu, pea nau hū ki tu‘a ki he vao, pea na‘a mau tata‘o kiate kinautolu ‘o a‘u ki he matanikolo.

²⁴Pea na‘e fana mai ‘a e kau fana mei he funga ‘ā ki ho‘o kau tamaio‘eiki, pea kuo tō ha ni‘ihi ‘i he kau tamaio‘eiki ‘a e ‘afiona, pea kuo pekia foki ho‘o tamaio‘eiki ko ‘Ūlaia Heti.

²⁵Pea folofola ‘a Tēvita ki he talafekau, Ko eni ‘a e lea te ke fai kia Sioape, ‘Oua te ke hoha‘a fau ‘i he me‘a ni, he ‘oku keina tavale ‘e he heletā: fai mālohi ho‘o tau ki he kolo, ‘o fulihi ia: ‘o ke poupou kiate ia.

²⁶Pea ‘i he fanongo ‘e he uaifi ‘o ‘Ūlaia kuo pekia ‘a ‘Ūlaia ko hono husepāniti, na‘a ne tēngihia hono hoa.

²⁷Pea kuo hili ‘a e tēngihia, na‘e fekau ‘e Tēvita, ‘o ‘omi ‘a e fefine ki hono fale, pea ne hoko ko hono uaifi, pea ne fā‘ele‘i kiate ia ha tama. Ka ko e me‘a kuo fai ‘e Tēvita na‘e tau kovi ki he finangalo ‘o Sihova.