Read KO E TOH TAPU KATOA TONGA KO 2 SĀMIUELA 15 Bible Online

KO 2 SĀMIUELA 15 - KO E TOH TAPU KATOA TONGA bible

KO 2 SĀMIUELA 15

¹PEA hili leva ia tokua na‘e ma‘u mai ‘e ‘Apisalome ha‘ane sāliote, mo e fanga hoosi, mo e toko nimangofulu ke lele mu‘omu‘a.

²Pea tu‘u hengihengi ‘a ‘Apisalome, ‘o ne tu‘u ‘i he tafa‘aki hala ‘o e matanikolo: pea ka ‘iloange ‘oku ai ha tangata ‘oku ‘i ai ‘ene me‘a ke fakamaau ki he tu‘i, pea ui ki ai ‘e ‘Apisalome, ‘o ne pehē, Mei he kolo fē koe? Pea te ne tali, Ko ho‘o tamaio‘eiki ko au kuo u ha‘u mei he matakali ko ē ‘o ‘Isileli,

³pea ‘e toki pehē ange ‘e ‘Apisalome, ‘Āua, ‘oku lelei mo totonu ho‘o me‘a; ka kuo ‘ikai tu‘utu‘uni ‘e he tu‘i ha taha ke tali koe.

⁴Na‘e lea foki ‘a ‘Apisalome, ‘o pehē, Taumaiā ne fakanofo au ke fai fakamaau ‘i he fonua, kae ha‘u kiate au ‘a e kakai kotoa ‘oku ‘i ai ‘enau me‘a ke fakatonutonu pe fakamaau, te u taukapo‘i ‘ene totonu.

⁵Pea ka ‘iloange foki ‘e ‘unu‘unu mai ha taha ke faka‘apa‘apa ki ai, na‘a ne ala ‘o puke ia, ‘o fekita ki ai.

⁶‘Io, na‘e pehē ‘a e fai ‘a ‘Apisalome ki he ‘Isileli kotoa na‘e ha‘u ke fakamaau ki he tu‘i; ko ia na‘e kaiha‘asi ‘e ‘Apisalome ‘a e loto ‘o e kau tangata ‘Isileli.

⁷Pea ‘i he faifai pea ‘osi ‘a e fāngofulu‘i[42] ta‘u, pea fakatau folofola ‘a ‘Apisalome ki he tu‘i, Ka u ‘alu mu‘a, ‘o fakaai ‘i Hepeloni ‘a e tukumo‘ui na‘a ku fai kia Sihova.

⁸He na‘e fai ‘e ho‘o tamaio‘eiki ko au ha tukumo‘ui lolotonga ‘eku nofo ‘i Kēsuli-Sīlia, ‘o pehē, Kapau ‘e fokifā kuo toe ‘omi au ‘e Sihova ki Selusalema, te u fai ha fatongia kiate ia.[43]

⁹Pea folofola ki ai ‘a e tu‘i, Lelei, ‘alu. Pea ne tu‘u ‘o ‘alu ki Hepeloni.

¹⁰Ka na‘e fekau atu ‘e ‘Apisalome ha kau mataki ki he ngaahi matakali kotoa ‘o ‘Isileli mo e fekau ko eni, Ka mou ka fanongo ki he ifi talupite, mou pehē leva, Ko ‘Apisalome ‘oku hau ‘i Hepeloni.

¹¹Pea na‘e ō mo ‘Apisalome mei Selusalema ha tu‘unga me‘a ‘e toko uangeau na‘e tala ki ai ‘a e kātoanga: ka na‘a nau ō noa pē, ‘o ‘ikai te nau momo‘i ‘ilo ‘a e me‘a.

¹²Pea ‘alu ‘a e fekau ‘a ‘Apisalome ke ui mai mei hono kolo ko Kilo ‘a e motu‘a Kilo ko ‘Ehitofeli, ko e fale‘i ‘o Tēvita, ‘i he‘ene fai ‘a e ngaahi feilaulau. Pea na‘e tu‘u kaukaua ‘a e fakaaoao; pea na‘e fakautuutu ai pē ‘a e tokolahi ‘o e kakai ‘a ‘Apisalome.

¹³Pea ha‘u ha taha ongoongo kia Tēvita ke fakahā, Tokua kuo tō kia ‘Apisalome ‘a e loto ‘o e tangata ‘Isileli.

¹⁴Pea me‘a ‘a Tēvita ki he‘ene kau tamaio‘eiki na‘e ‘iate ia ‘i Selusalema, Mou tu‘u ka tau hola; na‘a ‘ikai hatau taha ‘e hao meia ‘Apisalome: fai to‘oto‘o ‘etau ‘alu, na‘a vave ‘ene tuli, ‘o ma‘u kitautolu, ‘o ne tataha ‘aki mai ‘a e kovi, mo taa‘i ‘a e kolo ‘aki ‘a e mata ‘o e heletā.

¹⁵Pea tali ‘a e kau tamaio‘eiki ‘a e tu‘i ki he‘ene ‘afio, Ko e me‘a kotoa ‘e fili ki ai ‘e he ‘afio ‘a e tu‘i ko kimautolu eni ke fai.

¹⁶Pea ‘alu atu ‘a e tu‘i, pea muimui ki ai hono fale kotoa. Pea tuku ‘e he tu‘i ha tu‘unga fafine sinifu ‘e toko hongofulu ke tauhi ‘a e fale.

¹⁷Pea hā‘ele ki tu‘a ‘a e tu‘i, pea muimui ki ai ‘a e kakai kotoa; pea nau tatali ‘i fale taupotu.

¹⁸Pea ko ‘ene kau tamaio‘eiki ē ‘oku laka[44] ‘i hono tafa‘aki, pea ko ha‘a Kēliti mo Pēleti ē, mo ha‘a Kati (ko e toko onongeau na‘e ha‘u mo ia mei Kati) ‘oku laka mu‘omu‘a ‘i he tu‘i.

¹⁹Pea me‘a ‘a e tu‘i ki he Kati ko ‘Ītai, Koe‘uma‘aki ‘etau ō fakataha mo koe? Foki ‘o nofo mo e hau: he ko e ‘āunofo koe, mo e fakahee‘i; foki ki hao potu.

²⁰Ko e ‘aneafi pē ho‘o ha‘u, pea te u ‘ave leva koe ke ō holo mo kimautolu; ‘osi, ko ‘eku ‘alu ‘aku hei‘ilo pe te u ‘alu ki fē? Foki koe, ‘o ‘ave ho kāinga; pea ke ‘iate koe ‘a e ‘alo‘ofa mo e mo‘oni.[45]

²¹Pea tali ‘a ‘Ītai ‘o ne fakatau folofola ki he tu‘i, Tangi ‘a e mo‘ui ‘a e ‘Eiki, pea tangi ‘a e mo‘ui ‘a e feitu‘u na, ko e potu ‘e ‘i ai ‘a e ‘afio ‘a e tu‘i, pe ko e mate pe ko ha mo‘ui, ko e potu ia ‘e ‘i ai ho‘o tamaio‘eiki ko au.

²²Pea me‘a ‘a Tēvita kia ‘Ītai, ‘Alu pē, ‘o laka atu. Pea laka atu ‘a e Kati ko ‘Ītai, mo ‘ene kau tangata, mo e kau tamaiki na‘e ‘iate ia.

²³Pea ko e fonua kotoa ē ‘oku tangi le‘o lahi, pea ko e kakai kotoa ē ‘oku laka atu, pea ko e tu‘i ē ‘oku a‘a ‘i vai Kitiloni, pea ko e kakai kotoa ē ‘oku a‘a atu, ‘o fou ‘i he hala toafa.

²⁴Pea ‘iloange ko Sātoki foki ‘oku omi mo e kau Līvai, ‘oku nau kauala ‘a e ‘A‘ake ‘o e Kovinānite ‘o ‘Elohimi; pea na‘a nau tuku hifo[46] ‘a e ‘A‘ake ‘o ‘Elohimi, ka ka ‘alu hake ‘a ‘Āpaiata, kae‘oua ke ‘osi a‘a atu ‘a e kakai mei he kolo.[47]

²⁵Pea folofola ‘a Tēvita kia Sātoki, Fakafoki ‘a e ‘A‘ake ‘o ‘Elohimi ki kolo: kapau ‘e toe fofonga ‘ofa mai ‘a Sihova, te ne toe ‘omi au, ‘o tuku ke u toe mamata ki ai, pea ki hono ‘afio‘anga:

²⁶ka ‘o kapau te ne finangalo ‘o pehē, ‘Oku ‘ikai te u hōifua ‘iate koe; ko au eni, tuku ke ne fai kiate au ‘a e me‘a ‘oku hā lelei ki hono finangalo.

²⁷Pea fai atu ‘e he tu‘i ‘ene folofola ki he taula‘eiki ko Sātoki, Ko e matalōloa koe, ‘inē?[48] ‘Oku ou fiemālie ‘i ho‘o foki ki kolo, pea ō mo koe ho ongo foha, ko ‘Ahima‘asi ho foha ‘o‘ou, mo Sionatane ko e foha ‘o ‘Āpaiata.

²⁸Vakai, te u tatali mei he a‘a‘anga ‘i he toafa, kae‘oua ke ha‘u ha lea meiate kimoua ke ongoongo mai kiate au.

²⁹Ko ia na‘e fakahā‘ele ‘e Sātoki mo ‘Āpaiata ‘a e ‘A‘ake ‘o ‘Elohimi ki Selusalema: ‘o na nofo ai.

³⁰Pea hā‘ele hake ‘a Tēvita ‘i he hakenga ‘o ‘Ōlive, ‘o ne ‘alu hake tangi pē; pea pūlou hono fofonga, pea ne ‘alu ta‘esū: pea ko e kakai kotoa na‘e ‘iate ia, na‘a nau pūlou takitaha, ‘o ‘alu hake tangi pē.

³¹Pea na‘e fakahā kia Tēvita,[49] ‘o pehē, ‘Oku kau ‘a ‘Ehitofeli ‘i he fakaaoao ‘a ‘Apisalome. Pea pehē ‘e Tēvita, ‘E Sihova, ‘oku ou kole kiate koe, ke ke liliu ‘a e fakakaukau ‘a ‘Ehitofeli ke hā vale pē.

³²Pea kuo a‘u ‘a Tēvita ki he tumutumu, ‘a e potu na‘e fa‘a fai ai ‘a e lotu ki he ‘Otua, ‘iloange na‘e fakafetaulaki mai ‘a Husai, ko e motu‘a ‘Āleki, kuo hae hono kofu, pea kuo ‘ai ki hono ‘ulu ‘a e kelekele.

³³Pea me‘a ‘a Tēvita ki ai, Kapau te tau ō mo koe te ke hoko ko e kavenga kiate au:

³⁴ka ‘o kapau te ke foki ki he kolo, pea ke pehē kia ‘Apisalome, ‘Ēī, te u nofo kia koe; na‘a ku nofo mo‘oni ki ho‘o tamai ‘i mu‘a, ka ‘oku taha kehe eni, pea te u nofo kiate koe: te ke toki le‘ei ma‘aku ‘a e fakakaukau ‘a ‘Ehitofeli.

³⁵Pea ‘ikai ‘oku mau ‘i ai mo e ongo taula‘eiki ko Sātoki mo ‘Āpaiata? Ko ia ‘ilonga ha me‘a te ke fanongo ki ai mei he fale ‘o e hau, te ke fakahā kia Sātoki mo ‘Āpaiata ko e ongo taula‘eiki.

³⁶Eni, ‘oku nau ‘i ai mo hona ongo foha, ko ‘Ahima‘asi ‘a Sātoki mo Sionatane ‘a ‘Āpaiata; pea te mou ongoongo mai ‘iate kinaua ‘a e me‘a kotoa te mou fanongoa.

³⁷Ko ia na‘e hū ‘a Husai ko e takanga ‘o Tēvita ki he kolo, fe‘unga mo e hū mai ‘a ‘Apisalome ki Selusalema.