Read KO E TOH TAPU KATOA TONGA KO 2 SĀMIUELA 22 Bible Online

KO 2 SĀMIUELA 22 - KO E TOH TAPU KATOA TONGA bible

KO 2 SĀMIUELA 22

¹PEA fai ‘e Tēvita ki he ‘Eiki ‘a e ngaahi lea ‘o e ta‘anga ni, ‘i he ‘aho na‘e fakahaofi ai ia ‘e Sihova mei he nima ‘o hono fili fua pē, kae‘uma‘ā mei he nima ‘o Saula: pea ne lau ‘o pehē.

²Ko hoku mo‘unga ‘a Sihova, mo e kolo kiate au; Ko hoku hao‘anga foki — ‘io, ‘o‘oku;

³Ko hoku ‘Otua Makatu‘u ia, ‘a ia ‘oku fai ki ai ‘eku falala; Ko ‘eku pā, mo hoku nifo fakamo‘ui ia, Ko hoku fu‘u taua mo hoku hola‘anga; Ko hoku Taukapo; ‘Oku ke taukapo‘i au mei he fakamālohia.

⁴Ko Fakamālō‘ia — ‘oku fai ki ai ‘eku tautapa — ‘a e ‘Eiki: Ko ia ‘oku fakahaofi au mei hoku ngaahi fili.

⁵He na‘e ha‘o au ‘e he ngaahi ngalu ‘o Mate, Ko e ngaahi vaifā ‘o e pau‘u na‘e fakatupu ‘eku manavahē.

⁶Na‘e takai au ‘e he ngaahi kafa ‘a Hētesi: Ko e ngaahi tauhele ‘a Mate na‘e fakafetaulaki mai.

⁷‘I he fa‘aki mai ‘a e faingata‘a na‘a ku tautapa kia Sihova, ‘Io na‘a ku tautapa ki hoku ‘Otua: Pea ne ongo‘i hoku le‘o mei hono temipale na, ‘Io, na‘e a‘u ‘eku kalanga ki hono fofonga.

⁸Ngaue ai leva mo ngalulu ‘a e fonua, Pea ngatōtō ‘a e ngaahi tefito ‘o e langi na: ‘Io, na‘e ngaueue, he kuo ne ‘ita.

⁹Na‘e ‘alu hake ha kohu mei hono ihu, Pea keina atu ‘e ha afi mei hono ngutu: Kae tutu ‘aki ‘ani maka ‘afu.

¹⁰Na‘a ne ofe‘i ‘a e langi, ‘o ne ha‘anu hifo: Pea na‘e ‘i hono lalo va‘e ‘a e ‘ao fatu.

¹¹Pea ne heka selupimi,[65] ‘o ne puna mai: ‘Io, na‘e hā ia ‘i he kapakau ‘o e matangi.

¹²Pea ne ngaohi ‘a e fakapo‘uli ko hono tēniti takatakai, Ko e fokotu‘unga ‘ao, ko e ‘ao matolu[66] ‘o langi.

¹³‘I he maama na‘e ‘iate ia Na‘e tutu ha‘ane maka vela.

¹⁴Na‘e mana mei langi ‘a Sihova, Pea ‘ai atu ‘e ‘Elioni ‘ene lea.

¹⁵Pea ne ‘ai atu ‘ene ngaahi ngahau, ‘o veteki kinautolu; ‘A e ‘uhila, ‘o nuiki kinautolu.

¹⁶Toki hā ‘a e ngaahi kilisitahi, ‘I he fai ‘a e valoki ‘a Sihova, ‘I he māfulu ‘a e manava ‘o hono fofonga.

¹⁷Na‘a ne mafao hifo mei ‘olunga, na‘a ne puke mai; Na‘a ne toho au mei he ngaahi vai lahi.

¹⁸Na‘a ne fakahaofi au mei hoku fili fu‘u mamalu, Meiate kinautolu na‘e fehi‘a kiate au, He na‘a nau mālohi fau.

¹⁹Na‘a nau fakafetaulaki mai ‘i he taimi ‘o ‘eku ‘efitu‘ua; Ka na‘e ‘i ai ‘a Sihova mooku pāletu‘a.

²⁰Pea na‘a ne fakahū mai au ki he potu ‘atā fau; Na‘a ne huhu‘i au koe‘uhi na‘a ne mamana kiate au.

²¹Kuo fai ‘e Sihova kiate au ke hoa mo e totonu ‘o ‘eku fai anga; Kuo ne totongi kiate au ‘o taau mo e ma‘a ‘o hoku nima.

²²He kuo u tauhi ‘a e ngaahi ‘alunga ‘o Sihova, Pea kuo te‘eki ke u hiki kovi mei hoku ‘Otua.

²³He ko ‘ene konisitūtone kotoa na‘e feangai mo au: Pea ko ‘ene ngaahi lao — na‘e ‘ikai te u afe meiate kinautolu.

²⁴Kuo ta‘emele foki ‘eku fakafe‘ao kiate ia, Pea kuo u mata‘ofi au mei ha‘aku ni hia.

²⁵Ko ia kuo totongi mai ‘e Sihova ke hoa mo e totonu ‘eku fai anga; Ke tuha mo ‘eku ma‘a ‘i he‘ene vakai ‘a‘ana.

²⁶‘I he fai mo e kakai lelei te ke takataka fai lelei, ‘I he fai mo ha‘a fita[67] ta‘emele te ke takataka ta‘emele;

²⁷‘I he fai mo ha‘a ta‘efioa te ke takataka ta‘efioa, Pea ka fai mo ha fa‘ahinga mamio te ke tau‘aki fangatua.

²⁸Pea ko ha‘a ta‘eliekina te ke fakamo‘ui, Ka ‘oku ke fofonga ki he hīkisia ke fakatōkilalo‘i.

²⁹He ko koe, ‘Eiki, ‘eku maama: ‘Io, ‘e huluhulu ‘eku po‘uli ‘e Sihova.

³⁰Seuke, ‘oku ou ‘ohofia[68] ha kongakau ‘i he ‘afiona, ‘Oku ou hopokia ha puke ‘i he kau ‘a hoku ‘Otua.

³¹Ko e me‘a ki he ‘Otua — ko hono ‘alunga ‘oku haohaoa: Ko e folofola ‘a e ‘Eiki kuo ‘osi-‘a-sivi ia; Ko e fakaū ia ki he kakai ‘oku hūfanga kiate ia.

³²He ko hai ha ‘Otua, ‘oka tuku ‘a Sihova? Pea ko hai ha mo‘unga, ‘oka ne ta‘e‘oua hotau ‘Otua?

³³Ko hoku mālohinga mālohi ‘a e ‘Otua: ‘Oku ne taki ‘a e haohaoa ‘i hono ‘alunga.[69]

³⁴‘Oku ne ngaohi hoku va‘e ke hangē ko e motu‘a tia: ‘O ne ‘ai ke u matu‘u ‘i hoku ngaahi potu mā‘olunga.

³⁵‘Oku ne ako ki he tau hoku ‘ulu‘ulu nima; Ko ia ai, ‘oku mateke ‘e hoku ongo nima ni ha kaufana ukamea.

³⁶Pea kuo ke ‘omi kiate au ho pā fakamo‘ui. Pea ko ho‘o fakaalaala kuo u hoko ai ‘o fu‘u lahi.

³⁷Kuo ke fakalaulahi ‘a e potu ‘oku ou laka ai, Ko ia kuo ‘ikai ke fengatāliaki ai ‘a hoku tunga‘i va‘e ni.

³⁸Na‘a ku tuli hoku ngaahi fili, ‘o u faka‘auha foki; Pea na‘e ‘ikai te u liu mai kae‘oua ke nau ‘osi.

³⁹‘Io, kuo u faka‘osi mo have‘i kinautolu, ‘O ‘ikai te nau matu‘u hake: ‘Io, kuo nau tō ki hoku lalo va‘e.

⁴⁰He na‘a ke no‘o ‘aki au ‘a e mālohi ki he tau: Ko e kakai na‘e tu‘u mai kuo ke lolo ki lalo ‘iate au.

⁴¹Ko hoku ngaahi fili foki na‘a ke ‘ai ke nau sītu‘a, Mo kinautolu na‘e fehi‘a kiate au te u faka‘auha.

⁴²Na‘a nau tautapa, ka na‘e ‘ikai ha tokoni; Na‘a nau fai kia Sihova, ka na‘e ‘ikai te ne tali.

⁴³Pea u toki momosi kinautolu ke hangē ko e efu ‘o e fonua, Na‘a ku laiki mo fakamafola hangē ko e pela ‘o e hala.

⁴⁴Kuo ke fakahaofi au foki mei he ngaahi fakafekāke‘i ‘a hoku kakai; Kuo ke tauhi au ke ‘ulu ki he tukui pule‘anga muli: ‘Oku nofo kiate au ha kakai ‘oku ‘ikai te u ‘ilo‘i.

⁴⁵Ko e hako‘i kehe te nau fakamalua kiate au: ‘I he ongoongo atu au ki honau telinga te nau tali leva ‘eku fekau.

⁴⁶Ko e hako‘i kehe te nau vaivai maha, Pea te nau ha‘u tetetete pē[70] mei honau talitau‘anga.

⁴⁷‘Oku mo‘ui ‘a Sihova; Pea ‘oku fakamālō‘ia hoku Mo‘unga: Pea ‘oku hākeaki‘i hoku ‘Otua-makatu‘u Fakamo‘ui‘anga:

⁴⁸‘a e ‘Otua ‘oku ne fai sauni ma‘aku, Mo ne lomi kakai ‘iate au. ‘Oku ke hamusi au mei he tangata fakamālohi.

⁴⁹Mo ne fakahaofi au mei hoku ngaahi fili, Mo ne fakamā‘olunga au ‘i he kakai ‘oku tu‘u mai:

⁵⁰Ko ia ai, ‘e Sihova, Te u fakafeta‘i ki he ‘afiona ‘I he ‘ao ‘o e ngaahi pule‘anga: ‘Io, te u hiva fakamālō ki ho huafa.

⁵¹‘a e ‘afiona ‘oku ne fakato‘omata‘u ‘a e fakamo‘ui ‘ene tu‘i: Pea ‘oku ne fai ‘ofa ki he‘ene pani, Kia Tēvita mo e hako ‘o‘ona, ‘E fai pē ‘o lauikuonga.