Read KO E TOH TAPU KATOA TONGA KO 2 SĀMIUELA 23 Bible Online

KO 2 SĀMIUELA 23 - KO E TOH TAPU KATOA TONGA bible

KO 2 SĀMIUELA 23

¹PEA ko eni ‘a e lea tuku ‘a Tēvita: Ngonengone ‘a e foha ‘o Sese ko Tēvita, Ngonengone ‘a e tangata ne hiki ki ‘olunga, Ko e pani ‘a e ‘Otua ‘o Sēkope, Mo e mālie ‘i ‘Isileli ‘i he fai Saame.

²Laumālie ‘o Sihova ne folofola ‘i hoku loto, Pea ko ‘ene fakapū ki tu‘a na‘e ‘i hoku ‘elelo.

³Na‘e pehē ‘a e ‘Otua ‘o ‘Isileli, Ko Makatu‘u ‘o ‘Isileli ne folofola mai: Ko ha pule ki ha tangata — ko ha faitotonu ena, Ko ha pule ‘apasia ki he ‘Otua.

⁴Hangē leva ‘a e maama ‘o e pongipongi he ‘alu hake ‘a e la‘ā, Ha pongipongi ta‘e‘ao‘aofia, ‘Atētea hili ‘a e ‘uha, Fisiki ai ‘a e mohuku he fonua.

⁵He ‘ikai ‘oku pehē ‘a e tu‘u hoku fale ki he ‘Otua? He kuo ne fai mo au ha fuakava ta‘engata, Kuo ma‘u ‘i he me‘a kotoa, mo ma‘uma‘uluta: He ko hoku fakamo‘ui kotoa mo e kotoa ‘o e ‘ofa — He ‘ikai te ne fakamuka?[71]

⁶Ka ko e faka-Pileali ‘oku hangē kotoa ko e talatala ‘oku fai ke teke, He tala‘ehai ko e nima ‘oku puke ‘aki:

⁷Ka ko e tangata ‘oku ala ki ai, Ke ne teu mu‘a ‘aki ‘a e ‘aione mo e ‘esia ‘o e tao lahi; Pea ‘e mātu‘aki tutu ‘i he potu ‘oku ‘i ai.[72]

⁸Ko e ngaahi hingoa eni ‘o e kau helo na‘e ‘ia Tēvita: ko ‘Iasopeami ko e hako ‘o Hakamoni ko e ‘ulu ia ‘o e ngaahi kapiteni.[73] Na‘a ne ‘ohofi ‘aki hono tao[74] ha toko valungeau ‘o tāmate‘i kotoa.

⁹Pea hoko mo ia ‘a ‘Eliesa foha ‘o Tōtai, ko e hako‘i ‘Ahoa‘a, ko e taha ‘i he Tolu‘i Helo na‘e ‘ia Tēvita, he‘enau luki ki he kau Filisitia kuo fakatefua ki ai ke tau, pea kuo ‘alu hake ‘a e kau ‘Isileli;

¹⁰tu‘u ia ‘o ne taa‘i ‘a e kau Filisitia kae‘oua ke mamate hono nima, ‘o pipiki ki he heletā: pea fai ‘e Sihova ha fakamo‘ui lahi ‘i he ‘aho ko ia; pea foki ‘a e kakai, ‘o muimui kiate ia ke vete pē.

¹¹Pea hoko mo ia ‘a Sama foha ‘o ‘Ake ko e ha‘a Hālali. Pea kuo fakatefua mai ‘a e kau Filisitia ke pāpani, pea na‘e ai ha konga vao na‘e ‘akau ‘aki ‘a e letili; pea na‘e feholaki ‘a e kakai mei he ‘ao ‘o e kau Filisitia.

¹²Ka ka fakama‘u hifo ‘e ia ‘i he loto kongavao, ‘o ne fakahaofi ia, ‘o te‘ia ‘a e kau Filisitia: pea na‘e fai ‘e Sihova ha fakamo‘ui lahi.

¹³Pea ‘alu hifo ha toko tolu ‘i he Tolungofulu‘i Kapiteni, ‘o nau a‘u kia Tēvita ki he ‘ana ‘Atulami fe‘unga mo e ututa‘u;[75] pea ‘oku ‘apitanga ‘a e pāpani Filisitia ‘i he lautoka ‘o Lefaimi.

¹⁴Pea ko e taimi ko ia na‘e ‘i he talitau‘anga ‘a Tēvita, pea ko e le‘o ‘a e kau Filisitia na‘e ‘i Pētelihema.

¹⁵Pea holi ‘a Tēvita, ‘o ne pehē, Taumaiā ke ‘omi haku inu mei he vaikeli ‘o Pētelihema, ‘a ia ‘i he matanikolo!

¹⁶Pea fakapuke ‘e he Tolu‘i Helo ki he tau Filisitia, ‘o nau touvai mei he vaikeli ‘i Pētelihema, ‘a ia ‘i he matanikolo, ‘o nau fetuku ‘o ‘ave kia Tēvita: ka ka ‘ikai loto ia ke inu, ka ne hua‘i pē kia Sihova.

¹⁷‘O ne pehē, Molekemama‘o, ‘Eiki, ha‘aku fai pehē: ka u inu koā ‘a e toto ‘o e kakai na‘e ‘alu ‘aki ‘enau mo‘ui? Ko ia na‘e ‘ikai te ne loto ke inu ia. Ko e me‘a ia na‘e fai ‘e he Tolu‘i Helo.

¹⁸Pea ko ‘Apisai, ko e tokoua ‘o Sioape, ko e tama ‘a Seluvaia, ko e ‘ulu ia ‘o e Toko Tolu. Pea ‘ohofia ‘e ia ‘aki hono tao ha toko tolungeau, mo tāmate‘i, pea na‘e tu‘u hono hingoa ‘i he Toko Tolu.[76]

¹⁹‘Ikai na‘e ongoongoa taha ia ‘i he Toko Tolu?[77] ko ia na‘a ne hoko ko honau kapiteni: ka na‘e ‘ikai te ne a‘u ki he Toko Tolu ko ē.

²⁰Pea ko Penaia foki foha ‘o Sihoiata, ko e hako ‘o ha tangata to‘a ‘o Kapesili, kuo fai me‘a lalahi — na‘e taa‘i ‘e ia ha ongo loto fakalaione ‘o Moape: kae‘uma‘ā na‘a ne ‘alu hifo, ‘o taa‘i ha laione ‘i he lepa ‘i ha ‘aho na‘e sinou.

²¹Ko ia foki na‘a ne taa‘i ‘a e motu‘a ‘Isipite, ‘a ia ko e tangata faka‘ofo‘ofa; pea na‘e to‘o ‘e he ‘Isipite ha fu‘u tao; ka ka ‘alu hifo ia ki ai ‘aki ha tokotoko pē, ‘o ne heu‘i ‘a e tao mei he nima ‘o e ‘Isipite, ‘o ne tāmate‘i ia ‘aki hono tao ‘o‘ona.

²²Ko e ngaahi me‘a ia na‘e fai ‘e Penaia foha ‘o Sihoiata, pea na‘e tu‘u hono hingoa ‘i he Tolu‘i Helo.

²³Na‘a ne ongoongoa ange ‘i he kau Tolungofulu, ka na‘e ‘ikai te ne a‘u ki he Tolu ko ē. Pea na‘e fakakau ia ‘e Tēvita ki he‘ene fakataha tokoni.

²⁴Ko ‘Asaeli ko e tokoua ‘o Sioape; ko e taha ia ‘i he kau Tolungofulu, ko ‘Elanani foha ‘o Toto ko e Pētelihema;

²⁵ko Sama ko e Hāloti, ko ‘Ēlika ko e Hāloti;

²⁶ko Hēlesi ko e Pāleti, ko ‘Ila foha ‘o ‘Īkesi ko e Tekoa;

²⁷ko ‘Apiesa ko e ‘Anatoti, ko Mepunai ko e Husa;

²⁸ko Salamona ko e ‘Ahoa‘a, ko Mahalai ko e Nētofa;

²⁹ko Hēlepi foha ‘o Pā‘ana ko e Nētofa, ko ‘Ītai foha ‘o Lipai mei Kipea-ha‘a-Penisimani;

³⁰ko Penaia ko e Pilatoni, ko Hītai mei he ngaahi tele‘a ‘o Kaasi;

³¹ko ‘Apialiponi ko e ‘Alapā, ko ‘Asimaueta ko e Palahumi;

³²ko ‘Elihapa ko e Sa‘aliponi, ko e hako ‘o ‘Iaseni, ko Sionatane;[78]

³³ko Sama ko e Hālali, ko ‘Ahiami foha ‘o Sālali ko e ‘Ālali;

³⁴ko ‘Elifeleti foha ‘o ‘Āhasipai, ko e hako‘i Maaka; ko ‘Eliami foha ‘o e Kilo ko ‘Ehitofeli;

³⁵ko Hēselo ko e Kāmeli, ko Pa‘alai ko e ‘Ālapi;

³⁶ko ‘Īkali foha ‘o Nētane mei Sopa, ko Pani ko e Kata;

³⁷ko Sēleke ko e ‘Āmoni, ko Nahalai ko e Piheloti, ko e fua mahafu ‘a Sioape

³⁸Ko e tama ‘a Seluvaia; ko ‘Ila ko e Sēteli, ko Kālepi ko e Sēteli;

³⁹ko ‘Ūlaia ko e Heti: kātokatoa ko e toko tolungofulu mā toko fitu.