Read KO E TOH TAPU KATOA TONGA KO 2 SĀMIUELA 6 Bible Online

KO 2 SĀMIUELA 6 - KO E TOH TAPU KATOA TONGA bible

KO 2 SĀMIUELA 6

¹PEA toe fakataha ‘e Tēvita ‘a e kakai fili ‘o ‘Isileli, ko e toko tolu mano.

²Pea tu‘u ‘a Tēvita mo e kakai kotoa na‘e ‘iate ia, ‘o nau hā‘ele mei Peale-Siuta,[8] ke ‘omi mei ai ‘a e ‘A‘ake ‘o ‘Elohimi, ‘a ia ‘oku ui‘aki ‘a e Huafa, ‘a e huafa ko Sihova Sāpaoti, ‘a ia ‘oku ne ‘afioa ‘a e ongo Selupimi[9] ‘i hono funga.

³Pea nau fakaheka ‘a e ‘A‘ake ‘o ‘Elohimi ki ha sāliote fo‘ou, ‘o nau ‘omi mei he fale ‘o ‘Apinatape, ‘a ia na‘e ‘i he sia: pea ko ‘Usa mo ‘Ahio, ko e ongo foha ‘o ‘Apinatape, na‘a na fakateka ‘a e sāliote fo‘ou,

⁴pea na ‘omi ia mei he fale ‘o ‘Apinatape na‘e tu‘u ‘i he sia he fakafeangai ki he ‘A‘ake ‘o ‘Elohimi: pea ko ‘Ahio na‘e hā‘ele mu‘omu‘a ki he ‘A‘ake.

⁵Pea ko Tēvita mo e fale kotoa ‘o ‘Isileli na‘a nau me‘e[10] ‘i he ‘ao ‘o Sihova, ‘o nau to‘o e ngaahi me‘a hiva kehekehe na‘e ngaohi ‘aki ‘a e fea, mo e ngaahi ha‘ape, mo e ngaahi helefilo, mo e ngaahi nafa, mo e ngaahi fāngongo, mo e ngaahi simipale.[11]

⁶Pea ‘i he‘enau a‘u ki he haha‘anga ‘o Nākoni, na‘e ala ‘e ‘Usa ki he ‘A‘ake ‘o ‘Elohimi, ‘o ne puke ki ai; he na‘e humu ‘a e ongo pulu.

⁷Pea tupu ai ‘a e houhau ‘o Sihova kia ‘Usa; pea na‘e taa‘i ia ‘e ‘Elohimi ‘i he potu ko ia, koe‘uhi ko ‘ene fai vale;[12] pea na‘a ne pekia ai pē, ofi ki he ‘A‘ake ‘o ‘Elohimi.

⁸Pea na‘e mamahi ‘a Tēvita; ko hono ‘uhinga ko e pā mai ‘a Sihova kia ‘Usa: pea ne fakahingoa ‘a e potu ko ia ko Felesi-‘usa (ko Pā-kia-‘Usa).[13]

⁹Pea ‘oku kei ui pehē. Pea na‘e manavahē ‘a Tēvita kia Sihova ‘i he ‘aho ko ia; ‘o ne pehē, ‘E ha‘u fēfē ai ‘a e ‘A‘ake ‘o Sihova kiate au?

¹⁰Ko ia na‘e ‘ikai loto ‘a Tēvita ke hiki ‘a e ‘A‘ake ‘o Sihova kiate ia ki Kolo-‘o-Tēvita; ka na‘a ne fakaafe ia. ki he fale ‘o ‘Ōpeti-‘ītomi ko e tangata Kati.

¹¹Pea na‘e nofo ‘a e ‘A‘ake ‘o Sihova ‘i he fale ‘o e Kati ko ‘Ōpeti-‘ītomi ko e māhina ‘e tolu: pea na‘e tāpuaki‘i ‘e he ‘Eiki ‘a ‘Ōpeti-‘ītomi mo hono fale kotoa.

¹²Pea na‘e fakahā kia Kingi Tēvita, tokua kuo tāpuaki‘i ‘e he ‘Eiki ‘a e fale ‘o ‘Ōpeti-‘ītomi mo ‘ene me‘a kotoa, koe‘uhi ko e ‘A‘ake ‘o ‘Elohimi. Pea ‘alu ‘a Tēvita, ‘o fakahā‘ele ‘a e ‘A‘ake ‘o ‘Elohimi mei he fale ‘o ‘Ōpeti-‘ītomi ki Kolo-‘o-Tēvita mo e fakafiefia.

¹³Pea ‘i he ‘iloange kuo lava ha laka ‘e ono, ‘a kinautolu na‘e kauala ‘a e ‘A‘ake ‘o Sihova, na‘a ne feilaulau ‘aki ha pulu mo ha kafi tali ‘eiki.

¹⁴Pea tūkuingata ‘e Tēvita ‘ene me‘e ‘i he ‘ao ‘o Sihova; pea kuo ne ‘ai ha ‘ēfoti tupenu.

¹⁵Pea ‘ohake ‘a e ‘A‘ake ‘o Sihova ‘e Tēvita mo e fale ‘o ‘Isileli kātoa mo e mavava mo e ifi talupite.

¹⁶Pea ‘i he hū ‘a e ‘A‘ake ‘o Sihova ki Kolo-‘o-Tēvita, na‘e fakasio kitu‘a ‘e Maikale ko e ‘ōfefine ‘o Saula ‘i he kātupa, ‘o ne mamata kia kingi Tēvita ‘oku ne hopohopo mo me‘e foli ‘i he ‘ao ‘o Sihova; pea ne maa‘i ia ‘i hono loto.

¹⁷Pea nau fakahū mai ‘a e ‘A‘ake ‘o Sihova, ‘o tuku hifo ‘i hono potu, ‘i he loto tēniti kuo fokotu‘u ‘e Tēvita ki ai: pea feia ‘e Tēvita ha ngaahi feilaulau-mōifua mo — ‘ofa ‘i he ‘ao ‘o Sihova.

¹⁸Pea kuo faka‘osi ‘e Tēvita ‘ene fai feilaulau-mōifua mo — ‘ofa, na‘a ne tāpuaki‘i ‘a e kakai ‘i he huafa ‘o Sihova Sāpaoti.

¹⁹Pea na‘a ne tufa ki he kakai kotoa, ‘io, ki he hōsitē kātoa ‘o ‘Isileli, ‘a e tangata mo e fefine fakatou‘osi, ‘o takitaha ha keke mā mo ha ‘inasi,[14] mo ha takaonga kālepi tauaki. Pea toki ‘alu ‘a e kakai takitaha ki hono ‘api.

²⁰Pea foki ‘a Tēvita ke tāpuaki‘i hono ‘api ‘o‘ona. Pea hū kitu‘a ‘a Maikale ko e ‘ōfefine ‘o Saula ke fakafetaulaki kia Tēvita, ‘o ne pehē, Hono ‘ikai lāngilangi‘ia ‘a e Tu‘i ‘Isileli ‘anenai, he‘ene fakatelefua ia ‘anenai ‘i he ‘ao ‘o e ngaahi kaunanga ‘a ‘ene kau tamaio‘eiki, ‘o hangē ko e fielelei ‘a ha siana tākatu‘u, ‘o ne fakatelefua ia!

²¹Pea tali ‘e Tēvita kia Maikale, Ko e ‘ao ‘o Sihova ia, ‘a ia na‘a ne fili au, ‘o tuku ho‘o tamai mo hono fale kotoa, ‘o ne tu‘utu‘uni au ke u ‘eiki ki hono kakai ki ‘Isileli: ko ia te u me‘e ‘i he ‘ao ‘o Sihova.

²²‘Io, te u ‘ai ke toe taha atu hoku ta‘etoka‘i, ‘io, te u a‘u ki ha me‘a te u fakalielia‘i ai au:[15] ka ko e ngaahi kaunanga ‘oku ke lea ki ai ko kinautolu te nau lāngilangi‘ia ‘iate au.

²³Pea ko Maikale ko e ‘ōfefine ‘o Saula na‘e ‘ikai ha‘ane tamasi‘i ‘o a‘u ki he ‘aho ‘o ‘ene pekia.