Read KO E TOH TAPU KATOA TONGA KO 2 SĀMIUELA 7 Bible Online

KO 2 SĀMIUELA 7 - KO E TOH TAPU KATOA TONGA bible

KO 2 SĀMIUELA 7

¹PEA faifai pea kuo nofo ‘a e tu‘i ki hono fale, pea kuo fakanonga ia ‘e Sihova mei hono ngaahi fili takatakai;

²pea folofola ‘a e tu‘i kia Nētane ko e palōfita, ‘o pehē, Vakai ange, ko au ‘oku ou nofo ‘i ha fale sita, ka ko e ‘A‘ake ‘o ‘Elohimi ‘oku nofo ‘i ha fale tupenu.

³Pea tali ‘e Nētane ki he tu‘i, ‘Ilonga ha me‘a ‘oku ‘i ho loto, ‘alu ‘o fai; he ‘oku ‘iate koe ‘a e ‘eiki.

⁴Pea ‘iloange ‘i he pō ko ia, na‘e hoko ‘a e folofola ‘a Sihova kia Nētane, ‘o pehē,

⁵‘Alu ‘o tala ki he‘eku sevāniti ko Tēvita, ko eni ‘a e folofola ‘a Sihova, te ke langa koā ‘e koe ha fale mo‘oku ke u nofo ai?

⁶he kuo te‘eki ke u nofo fale talu e ‘aho na‘a ku ‘omi ai ‘a ha‘a ‘Isileli mei ‘Isipite, ‘o a‘u mai ki he ‘aho ni; ka kuo u taka tēniti mo ha tāpanekale.

⁷‘I he ngaahi potu kehekehe na‘a ku taka ai ‘i he lotolotonga ‘o ha‘a ‘Isileli, he na‘a ku momo‘i lea ki ha matakali ‘Isileli ‘e taha[16] ‘a ia na‘a ku tu‘utu‘uni ke tauhi hoku kakai ‘Isileli, ‘o pehē, Ko e hā kuo ‘ikai te mou langa ai mo‘oku ha fale sita.

⁸Pea ko eni te ke lea ki he‘eku tamaio‘eiki ko Tēvita, ‘o pehē, Ko e folofola eni ‘a Sihova Sāpaoti, Na‘a ku to‘o koe ‘e au mei he loto‘ā sipi, mei he muimui ki he fanga sipi, ke ke hoko ko e ‘eiki ki hoku kakai, ki ‘Isileli:

⁹pea kuo u ‘iate koe ‘i ho ngaahi fononga kotoa, pea kuo u tu‘usi ho ngaahi fili kotoa mei ho ‘ao; pea te u ‘ai ke lahi ho hingoa, ‘o hangē ko e hingoa ‘o e kakai ongoongo, ‘oku ‘i māmani.

¹⁰Pea te u tu‘utu‘uni ha potu ki hoku kakai, ki ‘Isileli; pea te u fakalanga ‘o tō, pea te nau nofo‘i honau feitu‘u ‘onautolu, ‘o ‘oua ‘e toe hiki; pea ‘oua ‘e toe fakamamahi‘i kinautolu ‘e ha fa‘ahinga pau‘u, ‘o hangē ko ia ‘i he kamata‘anga,

¹¹pea mei he taimi na‘a ku tu‘utu‘uni ai ha kau fakamaau ki hoku kakai ‘Isileli, pea te u fakanonga koe mei ho ngaahi fili fua pē. Pea ‘oku fakahā atu foki ‘e he ‘Eiki te ne fakaai ho fale.

¹²Ka kakato ho ngaahi ‘aho, pea ke toka mo ho‘o ngaahi kui, pea te u fokotu‘u ke hoko mo koe ‘a ho hako, ‘a ia ‘e ‘alu atu mei he manava, pea te u fakapapau hono pule‘anga.

¹³Ko ia ia te ne langa ha fale ‘i hoku hingoa, pea te u fakapapau ‘a e taloni ‘o hono pule‘anga ‘o ta‘engata.

¹⁴Te u nofo au ko ‘ene tamai, pea ‘e nofo ia ko hoku foha: kapau te ne afe, te u tautea ia ‘aki ‘a e me‘a kinisi ‘a e kakai, pea ‘aki ‘a e fa‘ahinga tā ‘o e hako‘i tangata;

¹⁵kae ‘ikai mahu‘i ‘eku ‘ofa meiate ia, ‘o hangē ko ‘eku hiki meia Saula, ‘a ia na‘a ku hiki mei ho ‘ao.

¹⁶Pea ‘e fakapapau ho fale mo ho pule‘anga kiate koe ‘o ta‘engata: ‘e fokotu‘u ho taloni ‘o ta‘engata.

¹⁷Hangē tofu pē ko e ngaahi lea ko ia, pea hangē ko e vīsone ko ia, na‘e pehē ‘a e fakamatala ‘a Nētane kia Tēvita.

¹⁸Pea hū ‘a Kingi Tēvita, ‘o nofo ‘i he ‘ao ‘o Sihova, ‘o ne pehē, ‘Eiki Sihova, Ko hai au, pea ko hai hoku fale, kuo ke ‘omi ai au ki he me‘a kuo u ‘i ai?

¹⁹Pea tā ‘oku ke lau ko e me‘a si‘i ia koā, ‘Eiki Sihova; pea ‘oku kau foki ho‘o folofola ki he tu‘u ‘a e fale ‘o ho‘o tamaio‘eiki ‘o mama‘o atu ‘aupito: pea ko e lao eni koā ‘o ha tangata,[17] ‘Eiki Sihova!

²⁰Pea ko e hā ha toe lea ‘a Tēvita ‘e fai atu ki he ‘Afiona? he ‘oku ke ‘afio‘i ho‘o tamaio‘eiki ko au, ‘Eiki Sihova.

²¹Telia pē ho‘o folofola, pea koe‘uhi pē ko ho tau ia, kuo ke fai ai ‘a e fu‘u me‘a ni, ke faka‘ilo pehē ki ho‘o tamaio‘eiki.

²²Ko ia, ko e lahi koe, ‘e Sihova ‘Elohimi: he ‘oku ‘ikai hao tatau, ‘io, ‘oku ‘ikai ha ‘Otua ngata ‘i he ‘afiona; ‘oku hā ia mei he me‘a kotoa kuo ongo mai ki homau telinga.

²³Pea ko e fe‘ia ha fo‘i kakai ‘i māmani hangē ko ho kakai, hangē ko ‘Isileli, ‘a ia na‘e hā‘ele atu ‘a e ‘Otua ke huhu‘i mōno kakai, pea ke ne fakaai hano huafa, pea ke fai me‘a lalahi ma‘amoutolu,[18] mo e ngaahi me‘a fakailifia ma‘a ho fonua,[19] ‘i he ‘ao ‘o ho kakai, ‘a ia na‘a ke huhu‘i ma‘au mei ‘Isipite, ‘a e ngaahi pule‘anga mo honau ngaahi ‘otua?

²⁴Pea kuo ke fokotu‘u ma‘au ho kakai ‘Isileli ma‘ao kakai ‘o ta‘engata; pea ko koe, ‘Eiki, na‘a ke hoko ko honau ‘Otua.

²⁵Pea ko eni, ‘e Sihova ‘Elohimi, ko e lea kuo ke folofola‘aki, ‘a ia ‘oku kau ki ho‘o tamaio‘eiki ko au, mo hoku fale, ke ke fokotu‘u ia ‘o ta‘engata, pea ke fai ‘o hangē ko ho‘o folofola.

²⁶Pea ke fakahīkihiki‘i ho huafa ‘o ta‘engata, ‘o pehē, Ko Sihova Sāpaoti ko e ‘Otua ia ki ‘Isileli: pea ko e fale ‘o ho‘o tamaio‘eiki ko Tēvita ‘e fokotu‘u ma‘u ‘i ho ‘ao.

²⁷He ko e ‘Afiona ko Sihova Sāpaoti, ko e ‘Otua ‘o ‘Isileli, kuo ke fanafana ki ho‘o sevāniti, ‘o pehē, Te u langa ha fale mo‘ou: ko hono ō ia kuo loto lahi ai ho‘o tamaio‘eiki ke feia ‘a e lotu ni ki he ‘Afiona.

²⁸Pea ko eni, ‘Ātonai Sihova, ko koe ‘a e ‘Otua, pea ko ho‘o folofola ko e mo‘oni, pea kuo ke tala‘ofa ‘a e lelei ni ki ho‘o tamaio‘eiki ko au:

²⁹pea ko ia ke lelei ki he ‘Afiona ke tāpuaki‘i ‘a e fale ‘o ho‘o tamaio‘eiki, ke tu‘u ia ‘i ho ‘ao ‘o ta‘engata; he ko koe, ‘Ātonai Sihova, kuo ke tala ia: pea ‘ofa ke tāpuaki‘i ‘a e fale ‘o ho‘o tamaio‘eiki ‘aki ho‘o tāpuaki ‘o ta‘engata.