Read KO E TOH TAPU KATOA TONGA KO 2 SĀMIUELA 9 Bible Online

KO 2 SĀMIUELA 9 - KO E TOH TAPU KATOA TONGA bible

KO 2 SĀMIUELA 9

¹PEA me‘a ‘a Tēvita, ‘Oku pehē koā? ‘Oku kei toe ha taha ‘i he fale ‘o Saula, ke u fai ‘ofa ki ai koe‘uhi ko Sionatane?

²Pea na‘e ‘i ai ha tamaio‘eiki ‘i he fale ‘o Saula na‘e hingoa ko Sipa, pea nau ui ange ke ha‘u kia Tēvita; pea me‘a ‘a e tu‘i ki ai, Ko Sipa koe? Pea ne tali, Ko au ho‘o tamaio‘eiki ko ia.

³Pea folofola ‘a e tu‘i, ‘Oku ‘ikai ‘aupito ke toe ha taha ‘i he fale ‘o Saula, ke u fai ki ai ‘a e ‘ofa faka‘otua? Pea fakatau folofola ‘a Sipa ki he tu‘i, ‘Oku toe ha foha kia Sionatane, ko e motu‘a ‘oku heke.

⁴Pea me‘a ki ai ‘a e tu‘i, ‘Oku ‘i fē ia? Pea tali ‘e Sipa ki he tu‘i, Ko ena ia ‘i he fale ‘o Mākili foha ‘o ‘Amieli, ‘i Lō-tipale.

⁵Pea fekau ‘e Kingi Tēvita, ‘o ne ‘omi ia mei he fale ‘o Mākili foha ‘o ‘Amieli mei Lō-tipale.

⁶Pea ha‘u kia Tēvita ‘a Mefiposeti foha ‘o Sionatane foha ‘o Saula, ‘o ne tō fo‘ohifo, ‘o fai ‘ene hū, pea folofola ‘a Tēvita, Ko Mefiposeti koā? Pea ne tali, Ko au ho‘o tamaio‘eiki.

⁷Pea me‘a ki ai ‘a Tēvita, ‘Oua te ke manavahē: he te u mātu‘aki fai ‘ofa kiate koe, koe‘uhi ko ho‘o ‘eiki ko Sionatane, pea te u fakafoki kiate koe ‘a e ‘api kotoa ‘o ho‘o kui ko Saula; ka ko koe te ke tokoni ‘i hoku tēpile ma‘u pē.

⁸Pea ne fai ‘ene faka‘apa‘apa, ‘o ne fakatau folofola hake, Ko e hā tū ho‘o tamaio‘eiki ko au ke ke fie hanga ai ki ha kulī mate hangē ko au?

⁹Pea ui ange ‘e he tu‘i ‘a Sipa ko e matāpule ‘a Saula, ‘o ne me‘a ki ai, ‘Ilonga ha me‘a na‘e kau kia Saula mo hono fale kotoa kuo u tuku ki he foha ‘o ho ‘eiki.

¹⁰Pea te ke ngāue‘i ‘a e kelekele ma‘ana, ‘a koe mo ho‘o fānau mo ho‘o kau tamaio‘eiki, pea te ke taufetuku mei ai ke ma‘u me‘a tokoni ‘e he foha ‘o ho ‘eiki; ka ko Mefiposeti ko e foha ‘o ho ‘eiki te ne tokoni ma‘u pē ‘i hoku tēpile. (Pea ko eni, na‘e ‘ia Sipa ha foha ‘e toko hongofulu mā nima, mo e tamaio‘eiki ‘e toko uofulu.)

¹¹Pea tali ‘e Sipa ki he tu‘i, Ko ia kotoa pē kuo me‘a ki ai ‘a e ‘Afio ‘a e tu‘i ki he‘ene tamaio‘eiki ko au, te u fai “Ka ko Mefiposeti te ne tokoni ma‘u pē ‘i hoku tēpile,[26] ‘o hangē ko e foha ‘o e tu‘i” (ko e tu‘i ia).

¹²Pea na‘e ma‘u ‘e Mefiposeti ha ki‘i foha na‘e hingoa ko Maika. Ko kinautolu kotoa na‘e nofo ‘i he fale ‘o Sipa na‘e tamaio‘eiki kia Mefiposeti.

¹³Ko ia na‘e nofo ‘a Mefiposeti ‘i Selusalema, he na‘a ne tokoni ma‘u pē ‘i he tēpile ‘o e tu‘i; pea na‘e heke hono ongo va‘e fakatou‘osi.