Read KO E TOH TAPU KATOA TONGA KO 1 TU‘I 16 Bible Online

KO 1 TU‘I 16 - KO E TOH TAPU KATOA TONGA bible

KO 1 TU‘I 16

¹PEA hoko ‘a e folofola ‘a Sihova kia Sehu foha ‘o Hānani, ‘o kau kovi kia Pā‘asa, he‘ene pehē,

²Ko e me‘a ‘i he‘eku hākeaki‘i koe mei he efu, pea u tuku koe ke ‘eiki ki hoku kakai ‘Isileli: ka kuo ke fou ‘i he ‘alunga ‘o Selopoame, pea kuo ke fakaangahala‘i hoku kakai ‘Isileli, ke nau fakatupu ‘eku ‘ita ‘aki ‘enau angahala;

³vakai, ko au ‘oku ou teu tafi‘i atu ‘a Pā‘asa mo hono fale, pea te u ‘ai ho fale ke hangē ko e fale ‘o Selopoame foha ‘o Nīpati.

⁴Ko ha‘a Pā‘asa ‘oku pekia ‘i he kolo ‘e keina ‘e he fanga kulī, pea ko ia ‘oku mate ‘i he vao ‘e keina ‘e he manupuna ‘o e ‘atā.

⁵Pea ko hono toe ‘o e ngāue ‘a Pā‘asa, mo e me‘a na‘a ne fai, mo hono fu‘u ivi, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?

⁶Pea toka ‘a Pā‘asa mo ‘ene ngaahi kui, pea na‘e telio ia ‘i Tīlisa, pea na‘e fetongi ia ‘i he pule ‘e hono foha ko ‘Ela.

⁷(Kae‘uma‘ā foki na‘e fakafai ‘ia Sehu foha ‘o Hānani ko e palōfita ha folofola ‘a e ‘Eiki, ‘o kau kia Pā‘asa mo hono fale, pea koe‘uhi ko e kovi kehekehe na‘a ne fai ‘i he ‘ao ‘o Sihova ke fakatupu ‘ene houhau ‘aki ‘a e ngāue ‘a hono nima, he‘ene hoko hangē ko e fale ‘o Selopoame, pea koe‘uhi ko ‘ene taa‘i ia foki.)

⁸‘I he uofulu mā ono ta‘u ‘o ‘Asa ko e Tu‘i Siuta, na‘e hoko ‘o Tu‘i ‘Isileli ‘a ‘Ela ko e foha ‘o Pā‘asa, ‘o ne hau ‘i Tīlisa ko e ua ta‘u.

⁹Pea puleaki‘i ia ‘e he‘ene tamaio‘eiki ko Similai, ko e kapiteni ‘o e vaeua ‘o ‘ene tau sāliote: pea kuo ‘i Tīlisa ia, ‘o fai ‘ene inu kava ke konā ‘i he fale ‘o ‘Ālesa, ‘a ia na‘e pule ki he loto‘ā ‘i Tīlisa:

¹⁰pea hū ‘a Similai, ‘o taa‘i ia, mo tāmate‘i, ‘i he uofulu mā fitu ta‘u ‘o ‘Asa ko e Tu‘i Siuta, ‘o ne fetongi ia ‘i he pule.

¹¹Pea ‘i he‘ene ma‘u ‘a e pule, ‘io, ‘i he‘ene nofo leva ki he taloni, na‘a ne taa‘i ‘a e fale kotoa ‘o Pā‘asa: na‘e ‘ikai te ne fakatoe kiate ia ha momo‘i tamasi‘i, pe ko hano koeli, pe ka hano fe‘iloaki.

¹²‘Io, na‘e faka‘auha ‘e Similai ‘a e fale kotoa ‘o Pā‘asa, hangē ko e folofola ‘a Sihova kia Pā‘asa, ‘a ia na‘a ne fakafai ‘i he palōfita ko Sehu,

¹³ko e me‘a ‘i he angahala ‘a Pā‘asa, mo e ngaahi angahala ‘a hono foha ko ‘Ela, ‘a ia na‘a na fai ‘e kinaua, pea na fakaangahala ‘aki ‘a ‘Isileli foki, ‘o langa‘i ‘a e houhau ‘o Sihova ko e ‘Otua ‘o ‘Isileli ‘aki ‘enau muna.

¹⁴Pea ko hono toe ‘o e ngāue ‘a ‘Ela, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?

¹⁵‘I he uofulu mā fitu ta‘u ‘o ‘Asa ko e Tu‘i Siuta, na‘e hau ‘a Similai ‘i Tīlisa, ‘o ‘aho fitu. Pea ‘oku ‘apitanga ‘a e kakai hono tau‘i ‘o Kipetoni, ‘a ia na‘e ‘o e kau Filisitia.

¹⁶Pea fanongo ‘a e kakai na‘e ‘apitanga ai, ‘o pehē, Tokua kuo fai ‘e Similai ha puleaki, pea kuo ne taa‘i foki ‘a e tu‘i: ko ia na‘e hanga ai leva ‘e ‘Isileli kātoa, ‘o nau fakanofo ‘i he ‘apitanga ke Tu‘i ‘Isileli ‘a ‘Omilai ko e ‘eikitau.

¹⁷Pea ‘alu hake ‘a ‘Omilai mo ‘Isileli kātoa mei Kipetoni, ‘o nau ‘ākolo‘i ‘a Tīlisa.

¹⁸Pea ‘i he faifai pea vakai ‘e Similai kuo kapa ‘a e kolo, na‘a ne hū ki he taua ‘o e fale ‘o e tu‘i, ‘o fakamomofi ‘a e fale ‘o e tu‘i ‘oku ne ‘i ai, pea ne pekia;

¹⁹koe‘uhi ko e ngaahi angahala kuo ne fai, he‘ene feia ‘a e me‘a na‘e tau kovi ki he finangalo ‘o Sihova, ‘a ‘ene fou ‘i he ‘alunga ‘o Selopoame, mo ‘ene angahala ‘a ia na‘a ne fai ke fakaangahala ‘aki ‘a ‘Isileli.

²⁰Pea ko hono toe ‘o e me‘a ‘a Similai, mo e puleaki na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?

²¹Na‘e toki vaeua ‘a e kakai ‘Isileli; na‘e muimui ‘a hono vaeua kia Tipinai foha ‘o Kīnati, ke fakanofo ia, ka ko e vaeua na‘e muimui kia ‘Omilai.

²²Ka na‘e mālohi ‘a e kakai na‘e ‘ia ‘Omilai ‘i he kakai na‘e ‘ia Tipinai foha ‘o Kīnati: ko ia na‘e pekia ‘a Tipinai kae pule ‘a ‘Omilai.

²³‘I he tolungofulu mā taha ta‘u ‘o ‘Asa ko e Tu‘i Siuta na‘e ma‘u ‘e ‘Omilai ‘a e pule ki ‘Isileli, pea na‘e hongofulu mā ua ta‘u ‘ene hau: na‘e ono ta‘u ‘ene pule ‘i Tīlisa.

²⁴Pea na‘a ne fakatau ‘a e mo‘unga ko Samēlia meia Sāmeli ‘aki ‘a e taleniti siliva ‘e ua, pea ne langa kolo ‘i he mo‘unga, pea ne fakahingoa ‘a e kolo na‘a ne ngaohi kia Sāmeli ko e ‘eiki ‘o e mo‘unga — ko Samēlia.

²⁵Pea fai ‘e ‘Omilai ‘a e me‘a na‘e tau kovi ki he finangalo ‘o Sihova, ‘io, na‘e hulu ‘ene fai kovi ‘iate kinautolu na‘e mu‘omu‘a ‘iate ia.

²⁶He na‘a ne fou ‘i he ‘alunga ‘o Selopoame foha ‘o Nīpati, mo ‘ene ngaahi angahala ‘a ia na‘a ne fakaangahala ‘aki ‘a ‘Isileli, ke langa‘i ‘a e houhau ‘o Sihova ko e ‘Otua ‘o ‘Isileli ‘aki ‘enau ngaahi muna.

²⁷Pea ko hono toe ‘o e ngaahi me‘a ‘a ‘Omilai na‘a ne fai, mo hono fu‘u ivi na‘e hā, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?

²⁸Pea toka ‘a ‘Omilai mo ‘ene ngaahi kui, pea na‘e telio ia ‘i Samēlia, pea na‘e fetongi ia ‘i he pule ‘e hono foha ko ‘Ēhapi.

²⁹Pea na‘e hoko ‘o Tu‘i ‘Isileli ‘a ‘Ēhapi foha ‘o ‘Omilai ‘i he tolungofulu mā valu ta‘u ‘o ‘Asa ko e Tu‘i Siuta: pea na‘e pule ki ‘Isileli ‘i Samēlia ‘a ‘Ēhapi foha ‘o ‘Omilai ko e ta‘u ‘e uofulu mā ua.

³⁰Pea na‘e fai ‘e ‘Ēhapi foha ‘o ‘Omilai ‘a e me‘a na‘e tau kovi ki he finangalo ‘o Sihova, ‘o hulu ‘iate kinautolu kotoa pē na‘e holomu‘a ‘iate ia.

³¹Pea tā na‘e ngali ma‘ama‘a ‘apē kiate ia ke fou ‘i he ngaahi angahala ‘a Selopoame foha ‘o Nīpati, he na‘a ne hanga ‘o mali mo Sisipeli ‘ōfefine ‘o ‘Eti-peali ko e Tu‘i Saitoni, ‘o ne ‘alu ‘o tauhi kia Peali, mo lotu ki ai.

³²Pea ne fokotu‘u ha ‘ōlita kia Peali ‘i he fale ‘o Peali kuo ne langa ‘i Samēlia.

³³Pea ngaohi ‘e ‘Ēhapi ‘a e ‘āsela; pea na‘e fakautuutu ‘ene ngāue ke langa‘i ‘a e houhau ‘o Sihova ko e ‘Otua ‘o ‘Isileli, ‘o hulu atu ‘i he ngaahi Tu‘i ‘Isileli kotoa pē na‘e holomu‘a ‘iate ia.

³⁴‘I hono taimi ‘o‘ona na‘e langa kolo ‘a Sielikō ‘e Hieli ko e tangata Pēteli: na‘e fai hono tanu pou ‘aki hono ‘uluaki foha ko ‘Apilami, ‘o ne fokotu‘u ‘aki hono ngaahi matanikolo hono foha ki mui ko Sēkupi; ‘o hangē ko e folofola ‘a Sihova na‘a ne fakafai ‘ia Siosiua foha ‘o Nuni.