Read KO E TOH TAPU KATOA TONGA KO 1 TU‘I 20 Bible Online

KO 1 TU‘I 20 - KO E TOH TAPU KATOA TONGA bible

KO 1 TU‘I 20

¹PEA ko Peni-hētati ko e Tu‘i Sīlia na‘a ne fakataha ‘ene tau kotoa: pea na‘e ‘iate ia ha tu‘i ‘e toko tolungofulu mā ua, mo e tau hoosi, mo e tau sāliote: pea ne ‘alu hake ‘o kapui ‘a Sāmaha, ‘o fai tau ki ai.

²Pea ‘alu ‘ene kau talafekau kia ‘Ēhapi ko e Tu‘i ‘Isileli ki kolo, ‘o ne pehē ki ai, Ko e folofola eni ‘a Peni-hetati,

³‘Oku ‘a‘aku ho‘o siliva mo ho‘o koula; ‘oku ‘o‘oku foki mo ho ngaahi ‘unoho, mo ho‘o fānau, ‘io, ‘a kinautolu ‘oku faka‘ofo‘ofa lahi, ‘oku ‘a‘aku kotoa.

⁴Pea tali ‘e he Tu‘i ‘Isileli, ‘o pehē, ‘Ēī ‘a e ‘afiona, ‘oku mo‘oni ho‘o folofola: ‘oku ‘a‘au au mo e me‘a kotoa pē ‘oku ou ma‘u.

⁵Pea toe ha‘u ‘a e kau talafekau ‘o nau pehē, Ko e folofola eni ‘a Peni-hetati, Na‘a ku fekau atu ke fakahā te ke tuku kiate au ho‘o siliva mo ho‘o koula, mo ho ngaahi ‘unoho, mo ho‘o fānau;

⁶ka ko eni foki, fe‘unga mo e feitu‘ula‘ā ni ‘a pongipongi te u fekau atu ‘eku kau tamaio‘eiki pea te nau hakule ho fale, mo e ngaahi fale ‘o ho‘o kau tamaio‘eiki, pea ‘ilonga ha me‘a ‘oku ke mahu‘inga‘ia ai te nau to‘o, ‘o ‘ave.

⁷Pea ui ange ‘e he Tu‘i ‘Isileli ‘a e kau mātu‘a ‘o e fonua, ‘o ne pehē, Mou me‘a mu‘a ‘o vakai ki he holi ‘a e tangata ni ke kovi: he na‘a ne fekau mai ke u ‘atu hoku ngaahi ‘unoho, mo ‘eku fānau, mo ‘eku siliva, mo ‘eku koula, pea na‘e ‘ikai te u ta‘ofi meiate ia.

⁸Pea tali kiate ia ‘e he kau mātu‘a mo e kakai kotoa, ‘Oua ‘e fakaongo kiate ia, pea ‘oua ‘e momo‘i loto ki he‘ene me‘a.

⁹Ko ia na‘a ne tali ki he kau talafekau ‘a Peni-hetati, Mo u fakahā ki he ‘afio ‘a e tu‘i, Ko e me‘a kotoa na‘a ke ‘uluaki fekau ki ho‘o tamaio‘eiki ko au te u fai: ka ko e me‘a ko eni ‘e ‘ikai te u lava ke fai, pea ‘alu ‘a e kau talafekau, ‘o ‘ave ‘a e tali kiate ia.

¹⁰Pea ‘alu ‘a e fekau ‘a Peni-hētati ki ai ke fakahā, ‘Ilo ‘e au ‘o lahi hake, ‘o kapau ‘e fe‘unga ‘a e efu ‘o Samēlia ke takitaha ha falukunga ‘a e kakai ‘oku tali ‘eku angi.

¹¹Pea tali ‘a e Tu‘i ‘Isileli, ‘o pehē, Mou fakahā ki ai, Ke ‘oua ‘e pōlepole ‘a e tukupā, ka ko ia pē kuo lava.

¹²Pea ‘i he‘ene fanongo leva ki he lea ko ia, (‘oku ne lolotonga inu kava, ‘a ia mo e ngaahi tu‘i, ‘i he ngaahi fale lou‘akau), na‘a ne folofola ki he‘ene kau tamaio‘eiki, Mou fokotu‘u ai. Pea na‘a nau fokotu‘u ke tau‘i ‘a e kolo.

¹³Pea ‘iloange na‘e ‘unu‘unu mai ha palōfita ‘e taha kia ‘Ēhapi, ko e Tu‘i ‘Isileli, ‘o ne pehē, Ko e folofola eni ‘a Sihova, Kuo ke vakai koā ‘a e fu‘ufu‘unga kakai ni? vakai te u tuku ia ki ho nima he ‘aho ni; ka ke ‘ilo ko Sihova au.

¹⁴Pea me‘a mai ‘a ‘Ēhapi, ‘Ia hai? Pea ne fakatau folofola hake, Ko eni ‘a e folofola ‘a Sihova, ‘I he kau talavou ‘a e hou‘eiki ‘o e ngaahi vahefonua. Pea ne me‘a mai, Ko hai ‘e fakahoko ‘a e tau? Pea ne tali, Ko koe.

¹⁵Pea ne lau mo fokotu‘u ‘a e kau talavou ‘a e hou‘eiki ‘o e ngaahi vahefonua, pea tā ko e toko uangeau mā tolungofulu mā ua: pea ne lau mo fokotu‘u mei honau tu‘a ‘a e kakai kotoa, ‘io, ‘a ha‘a ‘Isileli kātoa, ko e toko fitu afe.

¹⁶Pea nau hū ki tu‘a fe‘unga mo e ho‘atā. Pea ko Peni-hētati ‘oku fai ‘ene inu ke konā ‘i he ngaahi fale lou‘akau, ‘a ia mo e ngaahi tu‘i, ‘a e toko tolungofulu-mā-ua‘i tu‘i na‘e tokoni kiate ia.

¹⁷Pea ‘i he ‘alu ki tu‘a na‘e taki ‘a e kau talavou ‘a e hou‘eiki ‘o e ngaahi vahefonua; pea ‘alu ha asiasi ‘a Peni-hētati ki ai, pea nau fakahā kiate ia, ‘o pehē, ‘Oku ai ha kau tangata ‘oku hū mai mei Samēlia.

¹⁸Pea ne folofola mai, Kapau ko e hū mai melino, puke mo‘ui pē; pea kapau ko e hū mai ke tau, puke mo‘ui pē.

¹⁹Pea hū mai mei he kolo ‘a ē, ‘a e kau talavou ‘a e hou‘eiki ‘o e ngaahi vahefonua, mo e tau na‘e muimui mai.

²⁰Pea nau taa‘i takitaha hono hoa, pea feholaki ‘a e kau Sīlia, pea tuli kinautolu ‘e ‘Isileli, pea hao ‘a Peni-hētati ko e Tu‘i Sīlia ‘i ha hoosi mo ha tau hoosi.

²¹Pea hū ki tu‘a ‘a e Tu‘i ‘Isileli, ‘o ne taa‘i[65] ‘a e tau hoosi, mo e tau sāliote.

²²Pea ne have‘i ‘a e tau Sīlia. Pea ‘unu‘unu mai ‘a e palōfita ki he Tu‘i ‘Isileli, ‘o ne fakatau folofola ange, ‘Alu ‘o kumi ivi, pea tokanga lelei ki he me‘a ‘oku ke fai; he ka toe hoko hono fa‘ahita‘u, ‘e ha‘u ‘a e Tu‘i Sīlia ke tau‘i koe.

²³Pea fakatau folofola ange ‘e he kau tamaio‘eiki ‘a e Tu‘i Sīlia, Ko honau ‘otua ko e ‘otua mo‘unga; ko hono ‘uhinga ia na‘a nau mālohi ange ai ‘iate kitautolu: ka ke tau fai tau mo kinautolu ‘i he tokalelei, pea kuo pau te tau mālohi ange.

²⁴Pea ke ke fai mo e me‘a ni foki; ‘ave ‘a e ngaahi tu‘i na mei honau tu‘unga, ‘o fetongi ‘aki ‘a e ngaahi kapiteni;

²⁵pea ke lau hao tau hangē ko e tau kuo mole meiate koe, ko e tau hoosi ki he tau hoosi, mo e tau sāliote ki he tau sāliote; pea ke tau fai tau mo kinautolu ‘i he tokalelei, pea kuo pau te tau lava‘i kinautolu, pea ne tokanga ki he‘enau lea, ‘o ne fai pehē.

²⁶Pea ‘i he faifai pea toe hoko hono fa‘ahita‘u, na‘e lau mo fokotu‘u ‘e Peni-hētati ‘a e kau Sīlia, ‘o ne ‘alu hake ki ‘Ēfeki ke fai tau mo ‘Isileli.

²⁷Pea na‘e lau mo fokotu‘u ‘a ha‘a ‘Isileli, ‘o nau ma‘u ‘oho, ‘o nau ‘alu atu ke fakafetaulaki kiate kinautolu: pea na‘e ‘apitanga ‘a ha‘a ‘Isileli ki honau matatau, ‘o hā hangē ha ongo moveve ‘i ha fu‘u tākanga kosi; ka ko e kau Sīlia na‘a nau fakafonu ‘a e fonua.

²⁸Pea ‘unu‘unu mai ha tangata ‘o ‘Elohimi, ‘o ne fakatau folofola ki he Tu‘i ‘Isileli, ‘o pehē, Ko e folofola eni ‘a Sihova, Ko e me‘a ‘i he pehē ‘a e kau Sīlia ko Sihova ko e ‘Otua ‘o e mo‘unga, ka ‘oku ‘ikai ko e ‘Otua ‘o e lautoka, ko ia te u tuku ‘a e fu‘ufu‘unga kakai ni kotoa ki ho nima, ka mou ‘ilo ko Sihova au.

²⁹Pea nau ‘apitanga ai pē ‘o ‘aho fitu, ‘o fehangahangai pē. Pea ‘i hono ‘aho fitu na‘e fakahoko ‘a e tau, pea na‘e taa‘i ‘e ha‘a ‘Isileli ‘a e kau Sīlia, ‘o tō ha tau hā‘ele ‘e toko taha kilu ‘i he ‘aho pē taha.

³⁰Pea hola ‘a e toe ki ‘Ēfeki ki he kolo, pea holo ‘a e ‘ā ki honau toko ua mano mā fitu afe. Pea hola mo Peni-hetati, ‘o ne hū ki he kolo ki he loki lotoloto.

³¹Pea fakatau folofola kiate ia ‘e he‘ene kau tamaio‘eiki, Eni, kuo mau fanongo ko e hou‘eiki ‘ofa ‘a e ngaahi tu‘i ‘o e fale ‘o ‘Isileli: tau ‘ai tauanga‘a mu‘a, mo kahoa maea, pea tau hū kitu‘a ki he Tu‘i ‘Isileli, hei‘ilo te ne tuku ‘a e ‘afiona ke mo‘ui,

³²ko ia na‘a nau no‘o tauanga‘a mo kahoa maea, ‘o nau a‘u ki he Tu‘i ‘Isileli, ‘o nau pehē, ‘Oku fakatau folofola mai ‘e ho‘o tamaio‘eiki ko Peni-hetati, Ke u mo‘ui mu‘a. Pea ne tali, ‘Oku ne kei mo‘ui koā? ko hoku tokoua ia.

³³Pea lau ‘e he kau tangata ko e monū, pea nau fakavave ke mahino mai ha me‘a meiate ia, pea nau pehē, ‘Io, ko ho tokoua ko Peni-hetati. Pea ne me‘a mai, Hū ki kolo, ‘o ‘omi ia. Pea hū ki tu‘a ‘a Peni-hētati kiate ia; pea ne fekau ke ne heka mai ki he‘ene sāliote.

³⁴Pea ne pehē kiate ia, Ko e ngaahi kolo na‘e to‘o ‘e he‘eku tamai mei ho‘o tamai te u fakafoki atu, pea te ke fokotu‘u hao ngaahi hala ‘i Tāmasikusi, hangē na‘e fokotu‘u ‘e he‘eku tamai ‘i Samēlia. “Pea ko au foki te u tuku atu koe ‘i he talite ko ia” (ko ‘Ēhapi ia). Pea ne fai ha talite mo ia ‘o tukuange.

³⁵Pea ko e toko taha ‘i he ha‘a palōfita na‘a ne lea ki hono kaume‘a ‘i he funga ‘o e folofola ‘a Sihova, Ke ke taa‘i au mu‘a. Pea na‘e fakafisi ‘a e tangata ke taa‘i ia.

³⁶Pea ne pehē ki ai, Ko e me‘a ‘i he ‘ikai te ke fakaongo ki he le‘o ‘o Sihova, vakai, ko ‘eta māvae leva, pea ‘e taa‘i koe ‘e ha laione. Pea ‘i he‘ene tafoki atu, na‘e ma‘u ia ‘e ha Saione, ‘o tāmate‘i.

³⁷Pea ne ma‘u ha tangata ‘e taha, ‘o ne pehē, Taa‘i au mu‘a. Pea taa‘i ia ‘e he tangata, ‘o taa‘i ke ne kafo.

³⁸Pea ‘alu ‘a e palōfita, ‘o tatali he hala ki he tu‘i, ‘o ne ‘ai hono fa‘u ki hono mata ke fakapuli.

³⁹Pea ‘i he faifai pea hā‘ele ange ‘a e tu‘i, na‘a ne tautapa ki ai, ‘o ne pehē, Na‘e ‘alu ho‘o tamaio‘eiki ko au ki he lotolotonga ‘o e tau; pea ‘iloange na‘e afe mai ha tangata, ‘o ne ha‘u mo ia ha tangata kiate au, ‘o ne pehē, Ke ke tauhi ‘a e tangata ni: kapau ‘e mole, pea ko ho‘o mo‘ui ‘e fetongi ‘ene mo‘ui, pe te ke totongi mai ha taleniti siliva.

⁴⁰Pea ‘i he fai ki hē mo fai ki hē ‘a ho‘o tamaio‘eiki ko au, ‘iloange na‘e ‘ikai ‘a e tangata. Pea me‘a mai ‘a e Tu‘i ‘Isileli ki ai, Ko ho mo‘ua ia: kuo ke tu‘utu‘uni ia ‘e koe.

⁴¹Pea ne fai vave, ‘o to‘o ‘a e fa‘u mei hono mata, pea tokanga‘i ia ‘e he tu‘i ‘Isileli ko e toko taha ia ‘i he kau palōfita.

⁴²Pea ne fakatau folofola hake, Ko e folofola eni ‘a Sihova, Ko e me‘a ‘i ho‘o tuku atu mei ho nima ‘a e tangata kuo u mōifua, ko ia ‘e fetongi ‘ene mo‘ui ‘aki ho‘o mo‘ui, pea ko hono kakai ‘aki ho kakai.

⁴³Pea ‘alu ‘a e Tu‘i ‘Isileli ki hono fale ‘oku ne fakamāmāhu‘i mo ‘ita, pea ne a‘u pehē ki Samēlia.