Read KO E TOH TAPU KATOA TONGA KO 1 TU‘I 22 Bible Online

KO 1 TU‘I 22 - KO E TOH TAPU KATOA TONGA bible

KO 1 TU‘I 22

¹PEA na‘e tolu ta‘u ‘a e nofo ‘a Sīlia mo ‘Isileli, ‘o ‘ikai ha tau.

²Ka ‘i hono tolu ta‘u na‘e me‘a hifo ‘a Sihosafate ko e Tu‘i Siuta ki he Tu‘i ‘Isileli.

³Pea me‘a ‘a e Tu‘i ‘Isileli ki he‘ene kau tamaio‘eiki, ‘Oku mou ‘ilo foki ‘oku ‘otautolu ‘a Lemoti-kiliati, ka ‘oku tau nofo pē, ‘o ‘ikai te tau to‘o mei he nima ‘o e Tu‘i Sīlia.

⁴Pea ne pehē kia Sihosafate, Te ke ‘alu ke ta ō ke tau‘i ‘a Lemoti-kiliati? Pea tali ‘e Sihosafate ki he Tu‘i ‘Isileli, ‘Oku ta taha pē, pea taha hota kakai, pea taha ‘eta tau hoosi.

⁵Pea pehē ‘e Sihosafate ki he Tu‘i ‘Isileli, ‘Ē, tomu‘a huhū pe ko e hā ‘a e folofola ‘a Sihova.

⁶Ko ia na‘e fakatefua mai ‘e he Tu‘i ‘Isileli ‘a e kau palōfita ko e toko fāngeau nai, ‘o ne pehē kiate kinautolu, Te u ‘alu hake koā ki Lemoti-kiliati ke tau, pe te u ta‘ofi? Pea nau tali, ‘Alu pē, he ‘e tuku ia ‘e ‘Ātonai ki he nima ‘o e ‘afiona.

⁷Pea me‘a ‘a Sihosafate, ‘Oku ‘ikai ha toe palōfita ‘a Sihova heni ke ta fai ai ‘eta huhū?

⁸Pea tali ‘a e Tu‘i ‘Isileli kia Sihosafate, ‘Oku ai mo ha tangata ‘e taha ‘e lava ai mo ha‘ata huhū kia Sihova; ka ‘oku ou fehi‘a kiate ia, he ‘oku ‘ikai te ne palofisai kiate au ha lelei, ka ko e kovi pē: ko Maikaia ia foha ‘o ‘Īmila. Pea me‘a ai ‘a Sihosafate.

⁹‘Oua ‘e lau pehē ‘e he ‘afiona, pea ui mai ‘e he Tu‘i ‘Isileli ha ‘iunoke ‘e taha, ‘o ne fekau ki ai, Vave ‘aki mai ‘a Maikaia foha ‘o ‘Īmila.

¹⁰Pea ko e Tu‘i ‘Isileli mo Sihosafate ko e Tu‘i Siuta na‘a na ‘afio takitaha ‘i hono taloni kuo ‘ai hono teunga ‘i ha mala‘e[66] ‘i he matanikolo ‘o Samēlia; pea ko e kau palōfita na‘e fai ‘enau palofisai ‘i hona ‘ao.

¹¹Pea ko Setekaia foha ‘o Kena‘ana kuo ne ngaohi ha‘ane ongo nifo‘i manu ‘aki ‘a e ‘aione, ‘o ne pehē, Ko e folofola eni ‘a Sihova, Ko e ongo me‘a ni te ke heu ‘aki ‘a Sīlia kae‘oua ke nau ‘osi.

¹²Pea pehē mo e palofisai ‘a e kau palōfita kotoa pē he‘enau fekālanga‘i, ‘Alu hake ki Lemoti-kiliati, pea te ke monū‘ia, he ‘e tuku ia ‘e Sihova ki he nima ‘o e ‘afiona.

¹³Pea ko e talafekau na‘e ‘alu ke ui mai ‘a Maikaia, na‘a ne lea kiate ia, ‘o pehē, ‘Eni, ‘oku ngutu taha ‘a e lea lelei ‘a e kau palōfita ki he tu‘i; ko ia ke ke ‘ai mu‘a ho‘o lea ke tatau mo ha‘anautolu, ‘o lea lelei.

¹⁴Pea tali ‘e Maikaia, Tangi ‘a e mo‘ui ‘a Sihova, ka ko ia pē ‘oku folofola‘aki mai ‘e he ‘Eiki ko ia pē te u lea‘aki.

¹⁵Pea ne a‘u mai ki he tu‘i, pea folofola mai ‘a e tu‘i ki ai, ‘E Maikaia, te tau ō hake ki Lemoti-kiliati ke tau, pe te tau ta‘ofi? Pea fakatau folofola hake ‘e ia, ‘Alu hake, pea te ke monū‘ia, he ‘e tuku ia ‘e Sihova ki he nima ‘o e ‘afiona!

¹⁶Pea folofola ki ai ‘a e tu‘i, Kuo tātu‘ofiha atu pē ‘eku na‘isia koe ke ‘oua te ke fai mai ha lea, ka ko e totonu matematē ‘i he huafa ‘o Sihova?

¹⁷Pea fakatau folofola ia, Ne u mamata ki he kau ‘Isileli ‘oku movetevete ‘i he ngaahi mo‘unga hangē ha fanga sipi ‘oku ‘ikai hanau tauhi: mo e folofola mai ‘a Sihova, Si‘i tu‘unga me‘a ‘oku ‘ikai hanau ‘eiki; ke nau foki fiemālie takitaha ki hono ‘api.

¹⁸Pea me‘a ‘a e Tu‘i ‘Isileli kia Sihosafate, ‘Ikai na‘a ku tala atu ‘e ‘ikai te ne palofisai ha lelei ma‘aku, ka ko e kovi pē?

¹⁹Pea fakatau folofola ‘e he tangata, ‘Io, ko ia koā! pe‘i fanongo ā ki he folofola ‘a Sihova. Ne u mamata kia Sihova ‘oku ‘afio ‘i hono taloni, mo e hōsitē kotoa ‘o langi ‘oku nau tutu‘u ai mei hono to‘omata‘u mo e to‘ohema.

²⁰Pea folofola mai ‘a Sihova, Ko hai te ne fakaloto‘i ‘a ‘Ēhapi ke ne ‘alu ‘o tō ‘i Lemoti-kiliati? Pea lau ‘e ē ‘a ē, pea lau ‘e ē ki hē.

²¹Mo e laka mai ha laumālie ‘e taha, ‘o tu‘u ‘i he ‘ao ‘o e ‘Eiki, ‘o ne pehē, Ko au te u fakaloto‘i ia. Pea folofola mai ‘a Sihova, ‘I he hā?

²²Pea tali ‘e ia, Te u ‘alu atu ‘o hoko ko e laumālie kākā ‘i he ngutu ‘o ‘ene kau palōfita. Pea folofola ‘e ia, Te ke fakaloto‘i ia, pea te ke lava foki: ‘alu atu ‘o fai pehē.

²³Pea ko eni, uē, kuo ‘ai ‘e Sihova ha laumālie loi ki he ngutu ‘o ho‘o kau palōfita ni, ka ko e me‘a kuo tala ‘e Sihova kia koe ko e mala.

²⁴Toki ‘unu‘unu atu ‘a Setekaia foha ‘o Kena‘ana, ‘o ne taa‘i ‘a Maikaia ‘i hono kou‘ahe, ‘o ne pehē, Na‘e fou fakafēfē meiate au ‘a e Laumālie ‘o Sihova ke lea kiate koe?

²⁵Pea tali ‘e Maikaia, Tala atu, te ke toki ‘ilo ‘i he ‘aho ko ia te ke hū ai ki he loki lotoloto ke toi.

²⁶Pea folofola ‘a e Tu‘i ‘Isileli, Puke ‘a Maikaia, ‘o toe ‘ave kia ‘Āmoni ko e pule kolo, pea kia Soasi ko e foha ‘o e tu‘i:

²⁷pea te ke fakahā, Ko e fekau eni ‘a e tu‘i, ‘Ai ‘a e siana ni ki he fale pilīsone, pea ke fakama‘anga tauhi ‘ene kai mo inu, kae‘oua ke u foki lelei mai.

²⁸Pea tali ‘a Maikaia, Kapau te ke kākunga ke foki lelei mai, tā kuo ‘ikai folofola ‘a Sihova ‘iate au. Pea ne pehē, Mou fanongo mai ā, ‘a e ngaahi kakai kotoa.

²⁹Pea ‘alu hake ‘a e Tu‘i ‘Isileli mo Sihosafate ko e Tu‘i Siuta ki Lemoti-kiliati.

³⁰Pea lea ‘a e Tu‘i ‘Isileli kia Sihosafate, kau fakakehe au ‘i he‘eku ‘alu ki he tau, ka ke ‘ai ‘e koe ho‘o teu. Ko ia na‘e fakakehe ia ‘e he Tu‘i ‘Isileli, ‘o ne hū ki he tau.

³¹Ka ko e Tu‘i Sīlia kuo ne tu‘utu‘uni ‘a e hou‘eiki ‘o ‘ene tau sāliote, ‘a e toko tolungofulu mā toko ua, ‘o pehē, ‘Oua te mou tau ki he si‘i, pe ko e lahi, kae fai ki he Tu‘i ‘Isileli toko taha pē.

³²Ko ia ‘i he sio leva ‘e he hou‘eiki ‘o e tau heka hoosi kia Sihosafate, na‘a nau pehē, Tā ko e Tu‘i ‘Isileli ia; pea nau afe ke tau‘i ia: pea fai ‘e Sihosafate ‘ene tautapa.

³³Pea ‘i he vakai leva ‘e he hou‘eiki ‘o e tau heka hoosi ‘oku ‘ikai ko e Tu‘i ‘Isileli ia, na‘a nau foki meiate ia.

³⁴Pea ai ha tangata na‘a ne teke ‘ene kaufana, ‘o fana‘i fāinoa ‘a e Tu‘i ‘Isileli, ‘o tau ‘i he vaha‘a ‘o e no‘o tau, mo e sifa: pea ne pehē ki he‘ene tauhi sāliote, ‘Ala ho nima ke foki, ‘o fakahao au ki tu‘a mei he tau, he kuo u kafo lahi.

³⁵Pea na‘e fakautuutu ‘a e tau ‘i he ‘aho ko ia, pea na‘e poupou ‘a e tu‘i ‘i he‘ene sāliote ke fakapinepine ki Sīlia, ‘o ne toki pekia efiafi: pea na‘e tafe ‘a e toto mei he lavea ki he takele ‘o e sāliote.

³⁶Pea na‘e ‘alu ‘a e fanongonongo ‘i he ‘apitanga tau fe‘unga mo e tō ‘a e la‘ā, ‘o pehē, Takitaha ‘alu ki hono kolo, pea takitaha ‘alu ki hono fonua.

³⁷Pea na‘e pekia ‘a e tu‘i, pea na‘e ‘ave ia ki Samēlia, pea nau telio ‘a e tu‘i ‘i Samēlia.

³⁸Pea nau fufulu ‘a e sāliote ‘i he lepa ‘i Samēlia, pea na‘e ‘emo ‘e he fanga kulī ‘a e toto; (pea na‘e kaukau ai ‘a e kau fefine fe‘auaki); hangē ko e folofola ‘a e ‘Eiki na‘e fai.

³⁹Pea ko hono toe ‘o e ngāue ‘a ‘Ēhapi, mo e ngaahi me‘a na‘a ne fai, mo e fale lei na‘a ne langa, mo e ngaahi kolo na‘a ne ngaohi, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?

⁴⁰Pea toka ‘a ‘Ēhapi mo ‘ene ngaahi kui, pea na‘e fetongi ia ‘i he pule ‘e hono foha ko ‘Ahasaia.

⁴¹Pea ko Sihosafate foha ‘o ‘Asa na‘a ne hoko ‘o Tu‘i Siuta ‘i he fā ta‘u ‘o ‘Ēhapi ko e Tu‘i ‘Isileli.

⁴²Na‘e tolungofulu mā nima ta‘u ‘a Sihosafate ‘i he‘ene kamata pule; pea na‘e uofulu mā nima ta‘u ‘ene hau ‘i Selusalema. Pea ko e hingoa ‘o ‘ene fa‘ē ko ‘Āsupa ko e ‘ōfefine ‘o Sīlihi.

⁴³Pea na‘a ne fou ‘i he ‘alunga kotoa ‘o ‘ene tamai ko ‘Asa: na‘e ‘ikai te ne afe mei ai he fai ‘o e me‘a na‘e hā totonu ki he finangalo ‘o Sihova: ko hono me‘a pē na‘e ‘ikai li‘aki ‘a e ngaahi sia; na‘e kei fai feilaulau mo tutu ‘inisēnisi ‘a e kakai ‘i he ngaahi sia.

⁴⁴Pea na‘e alea melino ‘a Sihosafate mo e Tu‘i ‘Isileli.

⁴⁵Pea ko hono toe ‘o e ngāue ‘a Sihosafate, mo hono fu‘u ivi na‘e hā, mo e tau na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi tu‘i Siuta?

⁴⁶Pea ko hono toe ‘o e kau fakasōtoma na‘e toe mei he taimi ‘o ‘ene tamai ko ‘Asa na‘a ne ‘ave mei he fonua.

⁴⁷Pea na‘e ‘ikai ha tu‘i ‘i ‘Ītomi; ko e tu‘i fakale‘o pē.

⁴⁸Na‘e fa‘u ‘e Sihosafate ha folau faka-Tāsisi ke uta koula mei ‘Ōfela: ka na‘e ‘ikai ‘alu; he na‘e maumau ‘a e folau ‘i ‘Esioni-kepa.

⁴⁹Toki pehē ‘a ‘Ahasaia foha ‘o ‘Ēhapi kia Sihosafate, Tuku ‘eku kau tamaio‘eiki ke ō mo ho‘o kau tamaio‘eiki ‘i he folau. Ka na‘e ‘ikai loto ki ai ‘a Sihosafate.

⁵⁰Pea toka ‘a Sihosafate mo ‘ene ngaahi kui, pea na‘e telio mo ‘ene ngaahi kui ‘i he kolo ‘o ‘ene kui ko Tēvita: pea na‘e fetongi ia ‘i he pule ‘e hono foha ko Siholame.

⁵¹Ko ‘Ahasaia foha ‘o ‘Ēhapi na‘a he hoko ‘o Tu‘i ‘Isileli ‘i Samēlia, ‘i he hongofulu mā fitu ta‘u ‘o Sihosafate ko e Tu‘i Siuta, pea na‘e ua ta‘u ‘ene pule ki ‘Isileli.

⁵²Pea fai ‘e ia ‘a e me‘a na‘e tau kovi ki he finangalo ‘o Sihova, ‘o ne fou ‘i he ‘alunga ‘o ‘ene tamai mo e ‘alunga ‘o ‘ene fa‘ē, mo e ‘alunga ‘o Selopoame foha ‘o Nīpati, ‘a ia na‘a ne fakaangahala‘i ‘a ‘Isileli.

⁵³Pea ne tauhi ‘a Peali, ‘o lotu ki ai, ‘o ne fakahouhau‘i ‘a Sihova ko e ‘Otua ‘o ‘Isileli, ‘o hangē tofu pē ‘a e fai ‘a ‘ene tamai.