Read KO E TOH TAPU KATOA TONGA KO 1 TU‘I 3 Bible Online

KO 1 TU‘I 3 - KO E TOH TAPU KATOA TONGA bible

KO 1 TU‘I 3

¹PEA mali ‘a Solomone ki he fāmili ‘o Felo ko e Tu‘i ‘Isipite, ‘o ne to‘o ‘a e ‘ōfefine ‘o Felo, ‘o ‘omi ia ki Kolo-‘o-Tēvita, kae‘oua ke ‘osi ‘a e langa ‘o hono fale mo e fale ‘o e ‘Eiki, mo e ‘ā ‘o Selusalema takatakai.

²Ko hono me‘a pē na‘e kei feilaulau ‘a e kakai ‘i he ngaahi sia, he kuo te‘eki langa ha fale ‘i he huafa ‘o Sihova ‘o a‘u ki he taimi ko ia.

³Pea na‘e ‘ofa ‘a Solomone ki he ‘Eiki, he‘ene fou ‘i he ngaahi tu‘utu‘uni ‘a Tēvita ko ‘ene tamai: ko hono me‘a pē ‘ene fai feilaulau mo tutu ‘inisēnisi ‘i he ngaahi sia.

⁴Pea hā‘ele ‘a e tu‘i ki Kipione ke fai feilaulau ai: he ko e sia lahi ia: ko e afe‘i feilaulau-mōifua na‘e feia ‘e Solomone ‘i he ‘ōlita ko ē.

⁵‘I Kipione na‘e hā ‘a e ‘Eiki kia Solomone ‘i ha vīsone po‘uli: pea folofola ‘a e ‘Otua, Fai mai ha‘o kole pe ko e hā te u ‘atu.

⁶Pea pehē ‘e Solomone, Kuo ke fai ki ho‘o tamaio‘eiki ko Tēvita ko ‘eku tamai ha ‘ofa lahi, ke tuha mo ‘ene taka ‘i ho ‘ao ‘i he mo‘oni, mo e mā‘oni‘oni, mo e loto totonu, ‘i he‘ene fakafeangai ki he ‘afiona; pea kuo ke tauhi ma‘ana ‘a e fu‘u ‘ofa ni, ho‘o tuku hono foha ke nofo ‘i hono taloni, hangē ko ia he ‘aho ni.

⁷Pea ko eni, ‘Eiki ko hoku ‘Otua, kuo ke fakanofo ho‘o tamaio‘eiki ko au ke fetongi ‘eku tamai ko Tēvita ‘i he tu‘i: ka ko au ko e momo‘i tamasi‘i; hono kuo u ‘ilo ke hū ki tu‘a mo hū mai?

⁸Ka ko ho‘o tamaio‘eiki ko au ‘oku ou lotolotoi ‘i ho kakai kuo ke fili, ko e fu‘u kakai, ‘oku ‘ikai lava hono lau, pe hano tohi, ko ‘enau tokolahi.

⁹Ko ia ke ke foaki ki ho‘o tamaio‘eiki ko au ha loto tokanga, ke fakamaau ho kakai ni, ‘o sivi ‘a e lelei mo e kovi; he ko hai ‘oku fe‘unga ke fakamaau ho kakai ni kuo pehē fau?

¹⁰Pea na‘e tau lelei ‘a e lea ko ia ki he finangalo ‘o ‘Ātonai, ‘a e kole ‘e Solomone ‘a e me‘a ko ia.

¹¹Pea folofola ‘a e ‘Otua kiate ia, Ko e me‘a ‘i ho‘o kole ‘a e me‘a ni, ‘o ‘ikai te ke kole ma‘au ke ke mo‘ui fuoloa, ‘o ‘ikai te ke kole ma‘au ha fu‘u koloa, ‘o ‘ikai te ke kole ke ‘auha ho ngaahi fili; ka kuo ke kole ma‘au ‘a e poto ‘i he fanongo ki he fakamaau;

¹²vakai kuo u fai ki ho‘o lau; vakai kuo u ‘atu ha loto poto mo vavanga, ko ia kuo ‘ikai ha taha ‘i mu‘a ‘e tatau mo koe, pea ‘e ‘ikai tu‘u hake ha taha pehē ‘amui.

¹³Kae‘uma‘ā foki kuo u ‘atu kiate koe ‘a e me‘a na‘e ‘ikai te ke kolea, ‘a e fu‘u koloa mo e ongoongo fakatou‘osi, ko ia ‘e ‘ikai ha taha ‘i he ngaahi tu‘i ‘e tatau mo koe lolotonga ho‘o mo‘ui.

¹⁴Pea kapau te ke fou ‘i hoku ngaahi ‘alunga, ‘o tauhi ‘eku ngaahi tu‘utu‘uni mo fekau, ‘o hangē ko e fou ai ‘a Tēvita ko ho‘o tamai, pea te u toki fakalahi ho ngaahi ‘aho.

¹⁵Pea ‘ā ‘a Solomone, pea tā ko e misi: pea ne ha‘u ki Selusalema, ‘o ne tu‘u ‘i he ‘ao ‘o e ‘A‘ake ‘o e Kovinānite ‘o ‘Ātonai, ‘o ne feia ‘ani feilaulau-mōifua, ‘o ne fai mo e ngaahi feilaulau-‘ofa, ‘o ne kātoanga‘i ‘ene kau tamaio‘eiki kotoa pē.

¹⁶Toki omi ki he tu‘i ha ongo fafine fe‘auaki, ‘o na tutu‘u ‘i hono ‘ao

¹⁷Pea pehē ‘e he finemotu‘a ‘e taha, ‘Ēī, ‘oku ai ha me‘a ‘oku ma felelei mai ai. Ko au mo e finemotu‘a ni ‘oku ma fale taha; pea u fā‘ele ‘i he fale ‘oku ne ‘i ai.

¹⁸Pea kuo ma pō tolu, pea fā‘ele mo e finemotu‘a ni foki; pea na‘a ma fakataha pē, he na‘e ‘ikai ha kehe ‘i he fale mo kimaua: na‘a ma toko ua matematē pē ‘i he fale.

¹⁹Pea na‘e pekia ‘a e tama ‘a e finemotu‘a ni ‘i he pō, he ne ne ta‘omi ia.

²⁰Pea tu‘u hake ia ‘i he tu‘uapō, ‘o ne to‘o ‘eku tama mei hoku tafa‘aki, lolotonga na‘e mohe ho‘o kaunanga ko au, ‘o ne ‘ai ia ‘i hono fatafata;

²¹ka ko ‘ene tama kuo mate na‘a ne ‘ai hoku fatafata ‘o‘oku. Pea ‘i he‘eku tu‘u hengihengi ke fakahuhu ‘eku tama, tā kuo pekia: ka ‘i he‘eku vakai ia pongipongi, tā na‘e ‘ikai ko ‘eku tama ia na‘a ku fā‘ele‘i.

²²Pea lea mai ‘a e finemotu‘a ‘e taha, ‘Ikai; ka ko e tama mo‘ui ‘oku ‘aku, ka ‘oku ‘a‘au ‘a e tama mate. Kae lea mai ē, ‘Ikai; ko ha‘au ia ‘a e mate, ka ko ‘eku tama ‘a e mo‘ui. Na‘e pehē ‘ena fakamatala ‘i he ‘ao ‘o e tu‘i.

²³Pea folofola ‘a e tu‘i, ‘Oku pehē ‘e ē, Ko ‘eku tama ē ‘a e mo‘ui, pea ko ha‘au ‘a e mate: ka ‘oku pehē ‘e ē, ‘Ikai; ka ko ha‘au ‘a e mate, pea ko ‘eku tama ‘a e mo‘ui.

²⁴Pea folofola ‘a e tu‘i, ‘Omi ha heletā. Pea nau ‘omi ha heletā ki he ‘ao ‘o e tu‘i.

²⁵Pea folofola ‘a e tu‘i, Fahi ua ‘a e tamasi‘i ‘oku mo‘ui, ‘o ‘ange ke na takitaha ‘a e konga.

²⁶Pea fakatau folofola ki he tu‘i ‘a e finemotu‘a na‘e ‘ana ‘a e tamasi‘i ‘oku mo‘ui, he na‘e ngaue hono fatu telia ‘ene tama, ‘o ne pehē ‘e ia, Fakamolemole ‘a e ‘afiona: tuku kiate ia ‘a e tamasi‘i ‘oku mo‘ui, ‘o ‘oua ‘aupito ‘e tāmate‘i. Kae lea mai ē, ‘Oua ‘e ‘a‘aku, pe ‘a‘au: fahi ua pē.

²⁷Toki tali ‘e he tu‘i, ‘o ne pehē, ‘Ange kiate ia ‘a e tamasi‘i ‘oku mo‘ui, ‘o ‘oua ‘aupito ‘e tāmate‘i: ko ‘ene fa‘ē mo‘oni ia.

²⁸Pea fanongo ‘e ‘Isileli kātoa ki he fakamaau kuo fai ‘e he tu‘i; pea nau manavahē ke ‘i he ‘ao ‘o e tu‘i: he na‘a nau vakai kuo ‘iate ia ‘a e poto ‘o e ‘Otua ke fai fakamaau.