Read KO E TOH TAPU KATOA TONGA KO 1 TU‘I 7 Bible Online

KO 1 TU‘I 7 - KO E TOH TAPU KATOA TONGA bible

KO 1 TU‘I 7

¹PEA ko e me‘a ki hono fale, na‘e hongofulu mā tolu ta‘u hono langa ‘e Solomone, pea toki ‘osi ai hono fale kotoa.

²Pea na‘a ne langa ‘a e fale ko Vao Lepanoni;[23] ko e teau‘i kiupite hono lōloa, pea ko e nimangofulu‘i kiupite hono māukupu, pea tolungofulu‘i kiupite hono mā‘olunga; na‘e pou sita, ko e ‘otu ‘e fā,[24] pea na‘e sita ‘a e lalango ‘i he funga pou.

³Pea na‘a ne ‘ato sita ‘a e ngaahi loki mei ‘olunga na‘e tu‘u ‘i he funga pou; ko e fāngofulu mā nima, ko e taki hongofulu mā nima ‘a e ‘otu.

⁴Ai mo e ngaahi fakavangavanga ko e ‘otu ‘e tolu, pea fe‘unga ‘a e sio‘anga mo e sio‘anga tu‘o tolu.

⁵Pea ko e ngaahi matapā kotoa pē mo e ngaahi sio‘anga[25] na‘e tapafā vangavanga,[26] pea ko e sio‘anga na‘e fehangahangai mo e sio‘anga, tu‘o tolu.[27]

⁶Pea ne ngaohi foki ‘a e Falehala Pou‘ia; ko e nimangofulu‘i kiupite hono lōloa, pea tolungofulu‘i kiupite hono māukupu, pea ai mo ha hū‘anga ki ai; pea pou‘ia mo ia, pea ai hono tu‘unga matapā.

⁷Pea na‘a ne ngaohi mo e Falehala Taloni ke ne fakamaau ai, ko e Falehala Fakamāu‘anga; pea na‘e ‘ato sita mei he faliki ko ē ki he faliki ko ē.[28]

⁸Mo hono fale foki ke ne nofo ai; ko ha loto‘ā ‘e taha na‘e tu‘u ki loto ‘i he falehala ko ē na‘e ngaohi hangē ko ia. Na‘a ne ngaohi foki ha fale mo‘o e ‘ōfefine ‘o Felo (‘a ia kuo to‘o ‘e Solomone), ‘o hangē ko e falehala ko ē.

⁹Ko e ngaahi me‘a kotoa ko ia na‘e fai‘aki ‘a e maka mahu‘inga, ko e ngaahi maka na‘e tā fakafuofua, na‘e hele ‘aki ‘a e kili ‘i loto mo tu‘a, ‘o fai mei he tu‘unga ‘o a‘u ki he taupotu ‘i ‘olunga, pea mei tu‘a ki he loto‘ā lahi.

¹⁰Pea na‘e fakatoka ‘a e tu‘unga ‘aki ‘a e ngaahi maka mahu‘inga, ko e ngaahi maka lalahi, ko e ngaahi maka na‘e hongofulu‘i kiupite mo e ngaahi maka na‘e valu‘i kiupite.

¹¹Pea fatatoka ai ‘i ‘olunga ‘a e ngaahi maka mahu‘inga na‘e tā fakafuofua, mo e sita foki;

¹²pea ko e loto‘ā lahi na‘e takai ‘aki ia ha ‘otu maka tātā ‘e tolu, mo e ‘otu sita ‘e taha na‘e hele, ‘o hangē ko e loto‘ā loto ‘o e fale ‘o Sihova, pea mo e falehala ‘o e fale.

¹³Pea fekau ‘e Kingi Solomone ‘o ‘omi ‘a Hailame mei Taia.

¹⁴Ko e tama ia ‘a e fefine uitou ‘i he matakali ‘o Nafitalai, pea ko ‘ene tamai ko e tangata Taia ko e tufunga palasa; pea kuo fakafonu ia ‘i he ‘atamai mo e poto mo e loto matala ke ne ngaohi ‘a e nāunau palasa kotoa. Pea ne ha‘u kia Kingi Solomone, ‘o ne fai ‘ene ngāue kotoa.

¹⁵Pea na‘a ne ngaohi ‘a e ongo pou palasa, na‘e taki kiupite ‘e hongofulu mā valu hona mā‘olunga; pea ko e afo na‘e fua takai ‘aki na‘e kiupite ‘e hongofulu mā ua.[29]

¹⁶Pea ne haka palasa ha ongo teunga ke ‘ai ki he ‘ulu‘i pou: pea ko e mā‘olunga ‘o e teunga ‘e taha ko e kiupite ‘e nima, pea nima mo e mā‘olunga ‘o e taha.

¹⁷Ko ha ngaahi kupenga tā fakakupenga, mo ha ngaahi pao tā fakaafo, ma‘a e teunga ‘i he ‘ulu‘i pou; ko e kupenga ki he teunga ko ē mo e kupenga ki he teunga ko ē.[30]

¹⁸Pea ne ngaohi ‘a e ngaahi pomikānite, ‘io, ko e ‘otu ‘e ua takatakai ki he kupenga ‘e taha, ke funga ‘aki ‘a e teunga ‘ulu‘i pou: pea pehē ‘ene fai ki he teunga ‘e taha.

¹⁹Ko ha ongo teunga foki ki he ongo ‘ulu‘i pou na‘e tā fakalile ‘o a‘u ki he fale hū‘anga, ko e kiupite ‘e fā.

²⁰Moni teunga foki ki he funga ‘o e ongo pou mei ‘olunga ‘o hoko mo e kete ‘i he potu takitaha ‘o e kupenga: na‘e uangeau ‘a e ngaahi pomikānite, ‘o tu‘u faka‘otu takatakai ‘i he teunga ‘e taha.[31]

²¹Pea ne fokotu‘u ‘a e ongo pou ‘i he hū‘anga ‘o e temipale: pea ‘i he‘ene fokotu‘u ‘a e pou to‘omata‘u, na‘a ne fakahingoa ia ko Siakini:[32] pea ‘i he‘ene fokotu‘u ‘a e pou to‘ohema, na‘a ne fakahingoa ko Poasi.[33]

²²Pea ‘i he ongo funga pou na‘e tā fakalile: pea ‘osi ai ‘a e ngaohi ‘o e ongo pou.

²³Pea ne ngaohi ‘a e Tahi Ukamea, ko e kiupite ‘e hongofulu hono fua mei he ngutu ko ē ‘o a‘u ki he ngutu ko ē: na‘e fuopotopoto pea kiupite ‘e nima hono loloto: pea ‘i hono fua takai ‘aki ‘a e kafa na‘e tolungofulu‘i kiupite.

²⁴Pea ‘i hono lalo ngutu na‘e ai ‘a e ngaahi fangu, ‘o ‘alu takai ‘aupito,[34] ko e hongofulu ki he kiupite: na‘e ‘otu ua ‘a e ngaahi fangu, ‘o takai ki he Tahi, pea na‘e haka fakataha mo ia.

²⁵Na‘e hilifaki ki he pulu ‘e hongofulu mā ua, ‘a ia na‘e hanga ‘a e tolu ki he tokelau, mo e tolu ki lulunga, mo e tolu ki he tonga, mo e tolu ki hahake: pea na‘e ‘ai ‘a e Tahi ‘i ‘olunga ‘iate kinautolu, pea na‘e hu‘u ki loto honau tu‘ungaiku kātoa.

²⁶Pea ko hono matolu ko e kau‘inima fā; pea ko hono ngutu na‘e tā hangē ko e ngutu‘i ipu, hangē ko e fisi‘i lile: na‘e fe‘unga mo e pate ‘e ua afe.

²⁷Pea na‘a ne ngaohi ‘a e ngaahi tu‘unga fakasāliote palasa ‘e hongofulu: ko e kiupite ‘e fā hono lōloa ‘o e tu‘unga ‘e taha, pea ko e kiupite ‘e fā hono māukupu, pea ko e kiupite ‘e tolu hono mā‘olunga.

²⁸Pea ko e anga eni ‘o e ngaohi ‘o e ngaahi tu‘unga; na‘e ‘i ai ha ngaahi tafa‘aki: mo e ngaahi pāneli ‘i he ngaahi vaha‘a kiato:

²⁹pea ‘i he ngaahi pāneli ‘i he ngaahi vaha‘a kiato na‘e tā ai ‘a e ngaahi Saione, pulu, mo e selupimi; pea ‘i he funga kiato na‘e ai ha tu‘unga, pea ‘i lalo ‘i he ngaahi laione mo e pulu na‘e ai ha ngaahi pale na‘e tāupe.

³⁰Pea na‘e takitaha ‘a e ngaahi tu‘unga ha ve‘eteka palasa ‘e fā: ‘o palasa honau kiato: pea ko hono va‘e ‘e fā na‘e tu‘u ai ha ngaahi fakauma: na‘e haka ‘a e ngaahi fakauma ke tu‘u mei he lalo kumete, ‘o tu‘u ha ngaahi pale mo ia takitaha.

³¹Pea ko hono ava ‘i he loto tu‘unga pea ‘i ‘olunga na‘e kiupite; pea ko hono ava ‘o‘ona na‘e fuopotopoto, ‘o tā hangē ha tefito‘i pou, ko e kiupite mo e haafe; pea na‘e tā foki hono ngutu, ‘ani fakatātā, pea ko honau pāneli na‘e tapafā, na‘e ‘ikai fuopotopoto.

³²Pea ko e me‘a teka ‘e fā na‘e ‘i he lalo pāneli; pea ko e ngaahi puke‘anga ‘o e me‘a teka na‘e kau ki he tu‘unga: pea ko e mā‘olunga ‘o e me‘a teka ko e kiupite mo e haafe.

³³Pea ko e ngaohi ‘o e ngaahi me‘a teka na‘e ngaohi hangē ko e ngaohi ‘o e me‘a teka ‘o e sāliote: ko honau puke‘anga, mo honau aoniu, mo honau ngaahi huelo, mo honau ngaahi pito, na‘e haka kotoa.

³⁴Pea na‘e ai ha fakauma ‘e fā ‘i he tuliki ‘e fā ‘o e tu‘unga takitaha: na‘e taha pē mo e tu‘unga ‘a e ngaahi fakauma.

³⁵Pea ‘i he funga tu‘unga na‘e fakahopo hake fakaseakale ko e haafe kiupite hono mā‘olunga: pea ‘i he funga tu‘unga na‘e ai hono puke‘anga mo hono ngaahi pāneli na‘e taha mo ia?

³⁶Pea ne tā selupimi, Saione, mo e paame, ‘i he ngaahi potu lafalafa ‘o e ngaahi puke‘anga mo e pāneli, ‘o fakatatau ki he potu ‘oku ‘atā, pea ai mo e ngaahi pale takatakai.

³⁷Na‘e hangē ko ia ‘ene ngaohi ‘a e hongofulu‘i tu‘unga: na‘e tatau pē honau haka, taha honau fua mo honau sīpinga kotoa pē.

³⁸Pea ne ngaohi ha kumete palasa ‘e hongofulu: na‘e fe‘unga ha kumete ‘e taha mo e pate ‘e fāngofulu: na‘e kiupite ‘e fā ‘a e kumete takitaha, pea na‘e takitaha ha kumete ‘a e hongofulu‘i tu‘unga.

³⁹Pea ne tuku ‘a e ngaahi tu‘unga ko e nima ki he tafa‘aki to‘omata‘u ‘o e fale, mo e nima ki he tafa‘aki to‘ohema: ka ko e Tahi na‘a ne tuku ki he tafa‘aki to‘omata‘u ‘o e fale ki hahake mo e tonga.

⁴⁰Pea ngaohi ‘e Hailame ‘a e ngaahi kane;[35] mo e ngaahi huo lafalafa, mo e ngaahi pēsoni: pea faka‘osi ‘e Hailame hono nafa ngāue kotoa, ‘a ia na‘a ne fai ma‘a Kingi Solomone ‘i he fale ‘o Sihova;

⁴¹‘a e ongo pou, mo e ongo fakanikoniko ‘o e teunga ‘o e ongo ‘ulu‘i pou; mo e ongo kupenga ke fungani ‘aki ‘a e ongo fakanikoniko ‘o e ‘ulu‘i pou;

⁴²mo e fāngeau‘i pomikānite ki he ongo kupenga, ‘o taki ua ‘a e ‘otu pomikānite ‘a e kupenga, ke fungani ‘aki ‘a e fakanikoniko ‘o e teunga na‘e ‘i he tu‘a pou;

⁴³mo e hongofulu‘i tu‘unga, mo e hongofulu‘i kumete na‘e fakaheka ki ai:

⁴⁴mo e taha‘i Tahi, mo e hongofulu-mā-ua‘i pulumokau ‘i he lalo Tahi;

⁴⁵mo e ngaahi kane, mo e ngaahi huo lafalafa mo e ngaahi pēsoni: pea ko e ngaahi nāunau ko eni ‘a ia na‘e ngaohi ‘e Hailame ma‘a Kingi Solomone ki he fale ‘o Sihova na‘e ngaohi ‘aki ‘a e palasa ngingila.

⁴⁶Na‘e haka ia ‘e he tu‘i ‘i he Seakale ‘o Soatani, ‘i he kelekele malaki[36] ‘i he vaha‘a ‘o Sūkote mo Saletani.

⁴⁷Pea na‘e tuku pē ‘e Solomone ‘a e nāunau kehekehe, he na‘e lahi faufau; pea na‘e ‘ikai ‘eke ‘a e mamafa ‘o e palasa.

⁴⁸Pea na‘e ngaohi ‘e Solomone ‘a e nāunau kehekehe na‘e ‘i he fale ‘o Sihova: ‘a e ‘ōlita koula, mo e tēpile na‘e hilifaki ki ai ‘a e mā fono, na‘e koula ia;

⁴⁹mo e ngaahi tu‘unga maama, ko e nima ‘i he to‘omata‘u mo e nima ‘i he to‘ohema ‘i he ‘ao ‘o e folofola‘anga, ko e koula ma‘opo‘opo ia; mo e ngaahi fisi‘i ‘akau, mo e ngaahi nge‘esi maama, mo e ngaahi helekosi, ko e koula pē;

⁵⁰mo e ngaahi ipu, mo e ngaahi hikofi, mo e ngaahi pēsoni, mo e ngaahi sēpuni, mo e ngaahi ‘ainga malala, ko e koula ma‘opo‘opo ia; ko e ngaahi hīnisi foki ‘o e ngaahi matapā ‘o e faleloto, ‘o e Potu Toputapu, pea ‘o e ngaahi matapā ‘o e fale temipale, ko e koula ia.

⁵¹Toki ‘osi‘osingamālie ‘a e tu‘utu‘uni ‘o e ngāue na‘e fai ‘e Kingi Solomone ki he fale ‘o Sihova. Pea na‘e fakahū mai ‘e Solomone ‘a e ngaahi me‘a na‘e fakatāpui ‘e he‘ene ‘eiki ko Tēvita, ‘a e siliva mo e koula, mo e nāunau kehekehe, ‘o ne tuku ia ‘i he ngaahi fale koloa ‘o e fale ‘o Sihova.