Read KO E TOH TAPU KATOA TONGA KO 1 TU‘I 8 Bible Online

KO 1 TU‘I 8 - KO E TOH TAPU KATOA TONGA bible

KO 1 TU‘I 8

¹TOKI fakataha ‘e Solomone ‘a e mātu‘a ‘Isileli, mo e tāimu‘a ‘o e ngaahi matakali, ko e hou‘eiki ‘ulumotu‘a ‘o ha‘a ‘Isileli, ke nau omi ki he ‘afio ‘a Solomone ‘i Selusalema, ke fakahā‘ele ‘a e ‘A‘ake ‘o e Kovinānite ‘o Sihova mei Kolo-‘o-Tēvita, ‘a ia ko Saione.

²Ko ia na‘e fakataha kia Kingi Solomone ‘a e kau tangata ‘Isileli kotoa pē ‘i he māhina ko ‘Etanimi, ‘i he Kātoanga (ko e fitu māhina ia).

³Pea omi ‘a e mātu‘a ‘Isileli kotoa pē, pea kauala ‘a e ‘A‘ake ‘e he kau taula‘eiki,

⁴pea nau fakahā‘ele ‘a e ‘A‘ake ‘o Sihova mo e Tēniti Fe‘iloaki‘anga, mo e nāunau tapu kotoa pē na‘e ‘i he Tēniti; ‘io, na‘e ‘ohake ia ‘e ha‘a taula‘eiki mo ha‘a Līvai.

⁵Pea na‘e ‘i he ‘ao ‘o e ‘A‘ake ‘a Kingi Solomone, pea tu‘u mo ia ‘a e fu‘u kau ‘Isileli kuo fakataha kiate ia, ‘oku nau feia sipi mo pulu ‘a ia na‘e ‘ikai lava hano fakamatala pe lau ko ‘ene lahi.

⁶Pea na‘e fakahū ‘e he kau taula‘eiki ‘a e ‘A‘ake ‘o e Kovinānite ‘o Sihova ki hono feitu‘u, ki he folofola‘anga ‘o e fale ki he Potu Toputapu, ki he lalo kapakau ‘o e selupimi.

⁷He na‘e mafola ‘a e kapakau ‘o e selupimi ‘i he potu ‘o e ‘A‘ake, pea fakamalumalu ‘e he ongo selupimi mei ‘olunga ‘a e ‘A‘ake mo hono ‘akau ha‘amo.

⁸Pea na‘a nau toloaki mai ‘a e ongo ‘akau ha‘amo, ko ia na‘e ala sio ki he mui ‘akau ha‘amo mei he potu Tapu, ‘i he mata folofola‘anga, ka na‘e ‘ikai hā kitu‘a: pea ‘oku na ‘i ai pē ‘o a‘u ki he taimi ni.

⁹Na‘e ‘ikai ha me‘a ‘i he ‘A‘ake, ngata pē ‘i he ongo makatohi na‘e fa‘o ‘e Mōsese ‘i Hōlepi, ‘a ia na‘e kovinānite ai ‘e Sihova mo ha‘a ‘Isileli, ‘i he‘enau omi mei ‘Isipite.

¹⁰Pea ‘iloange, ‘i he hū mai ‘a e kau taula‘eiki mei he Potu Toputapu, na‘e fakafonu ‘a e fale ‘o Sihova ‘i he ‘Ao:

¹¹ko ia na‘e ‘ikai lava ‘a e kau taula‘eiki ke tu‘u ke fai honau fatongia ko e pehē fau ‘a e ‘Ao, he na‘e fonu ‘a e fale ‘o e ‘Eiki ‘i he kolōlia ‘o Sihova.

¹²Toki me‘a ‘a Solomone ‘o pehē,[37] Ne folofola ‘a Sihova ke nofo ‘i he po‘uli matolu.

¹³Tā kuo u lava ha fale nofo‘anga mo‘ou, ha potu ke ke ‘afio ai ‘o ta‘engata.

¹⁴Pea tafoki ‘a e tu‘i, ‘o ne tāpuaki‘i ‘a e fakataha kotoa ‘o ‘Isileli, pea ko e fu‘u fakataha ‘o ‘Isileli na‘e tu‘u pē.

¹⁵Pea folofola mai ia, Mālō mo Sihova ko e ‘Otua ‘o ‘Isileli, ‘a ia na‘e folofola hono fofonga ki he‘eku ‘eiki ko Tēvita (‘io, kuo fakaai ‘e hono nima foki), ‘o pehē,

¹⁶Talu he ‘aho na‘a ku ‘omi ai hoku kakai ‘Isileli mei ‘Isipite, kuo te‘eki ke u fili ha kolo ‘i he ngaahi matakali ‘Isileli ke langa ha fale ke ‘i ai hoku hingoa; ka na‘a ku fili pē ‘a Tēvita ke pule ki hoku kakai ‘Isileli.

¹⁷Pea ko eni, na‘e ‘i he loto ‘o ‘eku ‘eiki ko Tēvita ke langa ha fale mo‘o e huafa ‘o Sihova, ko e ‘Otua ‘o ‘Isileli.

¹⁸Ka na‘e folofola ‘a Sihova kia Tēvita ko ‘eku ‘eiki, Ko e me‘a ‘i he‘ene ‘i ho loto ke langa ha fale ki hoku hingoa, mālō ‘ene ‘i ho loto:

¹⁹ka ‘e ‘ikai te ke langa ‘a e fale ‘e koe, ka ko ho foha pē, ‘a ia te ne tupu mei ho mānava, ko ia ia te ne langa ‘a e fale ki hoku hingoa.

²⁰Pea kuo fakaai ‘e Sihova ‘a e folofola na‘a ne fai, he kuo u tu‘u au ke fetongi ‘eku tamai ko Tēvita, pea ‘oku ou nofo ‘i he taloni ‘o ‘Isileli ‘o hangē ko e folofola ‘a e ‘Eiki, pea kuo u langa ‘a e fale mo‘o e huafa ‘o Sihova, ko e ‘Otua ‘o ‘Isileli.

²¹Pea kuo u tuku ai ha potu ki he ‘A‘ake, ‘a ia ‘oku ‘i ai ‘a e kovinānite ‘o Sihova, na‘a ne fai mo ‘etau ngaahi kui, ‘i he‘ene ‘omi kinautolu mei ‘Isipite.

²²Pea tu‘u ‘a Solomone ‘i he mata ‘ōlita ‘o Sihova, ‘i he ‘ao ‘o e fakataha kotoa ‘o ‘Isileli, pea ne folahi hono nima ki he langi:

²³pea ne pehē, ‘E Sihova, ‘Otua ‘o ‘Isileli, ‘oku ‘ikai ha ‘Otua hangē ko koe, ‘i langi ‘i ‘olunga na, pe ‘i maama ‘i lalo ni, he fakaai fuakava mo meesi ki ho‘o kau tamaio‘eiki ‘oku taka ‘i ho ‘ao mo honau loto kotoa.

²⁴‘a e ‘Afiona kuo ke fakahoko ki ho‘o tamaio‘eiki ko Tēvita, ko ‘eku tamai, ‘a e me‘a na‘a ke tala‘ofa ki ai: ‘io, na‘e folofola ‘e ho fofonga, pea kuo fakaai ‘e ho nima, hangē ko ia he ‘aho ni.

²⁵Pea ko eni, ‘e Sihova, ‘Otua ‘o ‘Isileli, fai ki ho‘o tamaio‘eiki ko Tēvita, ko ‘eku tamai, ‘a e me‘a na‘a ke folofola‘aki kiate ia, ‘o pehē, ‘E ‘ikai hala hao tangata ke fakafeangai kiate au ‘i he taloni ‘o ‘Isileli; ko hono me‘a pē, ‘o kapau ‘e ta‘ofi ‘e ho‘o fānau ki honau ngaahi founga, ke fai ‘enau fakafeangai kiate au, ‘o hangē ko ho‘o fai ‘au.

²⁶Pea ko eni, ‘Otua ‘o ‘Isileli, ke fakamo‘oni mu‘a ‘a e folofola na‘a ke fai ki ho‘o tamaio‘eiki ko Tēvita, ko ‘eku tamai.

²⁷Ka ‘e nofo mo‘oni koā ‘a e ‘Otua ‘i māmani? Vakai, na‘a mo e langi, ‘io, mo e langi ‘o e ngaahi langi, ka ‘oku ‘ikai hao ai ‘a e ‘Afiona; kae huanoa ‘a e fale ni kuo u langa!

²⁸Ka neongo ia, ka ke hāngai fofonga mai ki he lotu ‘a ho‘o tamaio‘eiki ko au, pea ki he‘eku hū, ‘e Sihova ko hoku ‘Otua, mo ke fakaongo ki he fakafeta‘i mo e lotu ‘oku feia ‘e ho‘o tamaio‘eiki ‘i ho ‘ao he ‘aho ni:

²⁹kae ‘ā ho fofonga ki he fale ni ‘i he pō mo e ‘aho, ‘io, ki he potu na‘a ke folofola ai, ‘E ‘i ai hoku hingoa: kae fakaongo ki he lotu ‘e fai ‘e ho‘o tamaio‘eiki ko au ki he potu ni.

³⁰‘Io, ke ke tali ‘a e hū ‘a ho‘o tamaio‘eiki mo ho kakai ‘Isileli, ‘a ia te nau fai ki he potu ni: ‘io, ke fanongo mai ‘a e ‘Afiona mei he potu ‘oku ke ‘afio ai ko langi na, pea ‘i ho‘o fanongo, pea ke fakamolemole.

³¹Ka ai ha taha kuo hia ki hono kaungā‘api, pea kuo hilifaki kiate ia ha fuakava ke fai, pea ne ha‘u ‘o fuakava ‘i he ‘ao ‘o ho ‘ōlita ‘i he fale ni:

³²pea ke fanongo ‘a e ‘Afiona mei langi, ‘o fakaai, ‘o ke fakamāu‘i ho‘o kau tamaio‘eiki, ke fakahalaia‘i ‘a e halaia, ‘o fakatō ki hono tumu‘aki hono hala; ka ke fakatonuhia ‘a e faitotonu, mo ke ‘ange kiate ia ‘o taau mo ‘ene faitotonu.

³³Ka te‘ia ho kakai ‘Isileli ‘i he ‘ao ‘o e fili, ko e me‘a ‘i he‘enau hia ki he ‘Afiona; pea nau tafoki kiate koe, mo hu‘ekina ho huafa, mo fai ‘enau lotu mo hū ki he ‘Afiona ‘i he fale ni:

³⁴pea ke fanongo ‘a e ‘Afiona mei langi, ‘o fakamolemole ‘a e hia ‘a ho kakai ‘Isileli, pea ke fakafoki kinautolu ki he kelekele na‘a ke foaki ki he‘enau ngaahi kui.

³⁵Ka tāpuni ‘a e langi, ‘o ‘ikai ha ‘uha, koe‘uhi kuo nau angahala kiate koe; ka nau ka lotu ki he potu ni, mo hu‘ekina ho huafa, mo tafoki mei he‘enau angahala, he kuo ke fakavaivai‘i kinautolu:

³⁶pea ke fanongo ‘a e ‘Afiona mei langi, mo ke fakamolemole ‘a e hia ‘a ho‘o kau tamaio‘eiki, ‘io, ‘a ho kakai ‘Isileli, he ‘oku ke ako kinautolu ‘a e hala lelei ke nau fou ai; pea ke hifo mai ‘e he ‘Afiona ha ‘uha ki ho kelekele, ‘a ia kuo ke foaki ki ho kakai monau tofi‘a.

³⁷Kapau ‘e hoko ki he fonua ‘a e honge, ‘a e mahaki faka‘auha; kapau ‘e ‘i ai ‘a e mahunu pe kekena, ‘a e he‘e pe ‘unufe; kapau ‘e ‘ākolo‘i kinautolu ‘e honau fili, ‘o a‘u ki he kelekele ‘o honau matanikolo; pe ko e hā ha tā pe mahaki ‘e fai;

³⁸‘ilonga ha lotu, ‘ilonga ha hū ‘e fai ‘e ha tangata pe ko ho kakai ‘Isileli kotoa, ‘enau ongo‘i takitaha ‘a e tā kuo tō ki hono loto — ‘io, ka ne ka folahi hono nima ki he fale ni:

³⁹pea ke fanongo ‘a e ‘Afiona mei langi ko ho ‘afio‘anga, pea ke fakamolemole mo fakaai, pea ke ‘ange ki he tangata takitaha ‘a e tuha ‘o hono ngaahi ‘alunga ‘i ho‘o ‘afio‘i hono loto; (he ko koe toko taha tofu pē ‘oku ke mea‘i ‘a e loto fua pē ‘o e hako‘i tangata);

⁴⁰koe‘uhiā ke nau ‘apasia kiate koe ‘i he ‘aho kotoa pē ‘oku nau nofo ai ‘i he funga kelekele na‘a ke foaki ki he‘emau ngaahi kui.

⁴¹Pea koe‘uhi ko e muli foki, ‘a ia ‘oku ‘ikai ke kau ki ho kakai ‘Isileli, ka ha‘u ia mei ha fonua mama‘o koe‘uhi ko ho huafa;

⁴²(he te nau fanongo ki ho fu‘u huafa, mo ho nima mālohi, mo ho nima kuo hiki ta); ‘io, ka ha‘u ia ‘o lotu ki he fale ni;

⁴³ke fanongo ‘a e ‘Afiona mei langi ko ho ‘afio‘anga, pea ke fakaai ‘a e ngaahi me‘a ‘oku tautapa ai kiate koe ‘e si‘i muli: koe‘uhiā ke ‘ilo ho huafa ‘e he ngaahi kakai ‘o māmani, ke nau ‘apasia ki he ‘Afiona, ‘o hangē ko ho kakai ‘Isileli; pea ke nau ‘ilo ko ho huafa ‘oku ui‘aki ‘a e fale ko eni kuo u langa.

⁴⁴Ka hū ki tu‘a ho kakai ke fai tau mo honau fili, pe ko e hā ‘a e fononga te ke fekau ai kinautolu, pea nau lotu kia Sihova, he hanga ki he kolo kuo ke fili ki ai, mo e fale kuo u langa ki ho huafa:

⁴⁵pea ke fanongo mei langi ki he‘enau lotu, mo ‘enau hū, ‘o taukapo‘i ‘enau me‘a.

⁴⁶Kapau te nau hia ki he ‘Afiona, (he ‘oku ‘ikai ha tangata ‘oku ta‘ehia pea ke tuputāmaki kiate kinautolu, ‘o tuku kinautolu ki he fili, pea nau taki pōpula kinautolu ki he fonua ‘o e fili, ha mama‘o pe ofi;

⁴⁷ka ‘oka fifili ki ai honau loto ‘i he fonua ‘oku ‘ave kinautolu ki ai, pea nau tafoki ‘o hū ki he ‘Afiona ‘i he fonua ‘o e kakai ‘oku nau pōpula ki ai, ‘o nau pehē, Kuo mau hia, pea kuo mau faikovi, pea kuo mau talangata‘a;

⁴⁸ka nau ka foki ki he ‘Afiona ‘aki honau loto kotoa mo honau laumālie kotoa he fonua ‘o honau ngaahi fili kuo nau pōpula ki ai, pea nau lotu ki he ‘Afiona, he hanga ki honau fonua, ‘a ia na‘a ke foaki ki he‘enau ngaahi kui, ki he kolo na‘a ke fili, mo e fale kuo u langa ki ho huafa:

⁴⁹pea ke fanongo mei langi ko ho ‘afio‘anga na ki he‘enau lotu mo ‘enau hū, pea ke taukapo‘i ‘enau me‘a;

⁵⁰pea ke fakamolemole ho kakai kuo hia ki he ‘Afiona, ‘io, fakamolemole ‘enau ngaahi talangata‘a kuo fai atu; pea tuku ke nau ‘ofeina ‘i he ‘ao ‘o e kakai ‘oku nau pōpula ki ai, ke nau ‘ofa‘i kinautolu —

⁵¹he ko ho kakai kinautolu, mo ho tofi‘a, ‘a ia na‘a ke ‘omi mei ‘Isipite, mei he loto fōnise haka ‘aione.

⁵²Ke ‘ā ho fofonga ki he hū ‘a ho‘o tamaio‘eiki ko au, pea ki he hū ‘a ho kakai ‘Isileli, ke ongo‘i kinautolu ‘i he me‘a kotoa pē te nau tautapa ai ki he ‘Afiona.

⁵³He kuo ke vahe‘i kinautolu mei he ngaahi kakai ‘o māmani mo‘ao tofi‘a, ‘o hangē ko ho‘o folofola na‘e fakafai ‘i ho‘o tamaio‘eiki ko Mōsese, ‘i ho‘o ‘omi ‘enau ngaahi kui mei ‘Isipite ‘Ātonai Sihova ē!

⁵⁴Pea ‘i he ‘osi leva ‘e Solomone ‘ene fai kia Sihova ‘a e fu‘u lotu ni mo hū, na‘a ne me‘a hake mei he mata ‘ōlita ‘o e ‘Eiki, mei he‘ene tū‘ulutui mo fola hono nima ki langi.

⁵⁵Pea ne tu‘u, ‘o tāpuaki‘i ‘a e fakataha kotoa ‘o ‘Isileli, le‘olahi, he‘ene pehē,

⁵⁶Mālō mo Sihova ‘ene foaki mālōlō ki hono kakai ‘Isileli, ‘o tatau tofu pē mo ‘ene folofola: kuo ‘ikai tō ha momo‘i me‘a ‘e taha ‘i he ngaahi tala lelei na‘a ne fakafai ‘i he‘ene sevāniti ko Mōsese.

⁵⁷‘Ofa ke ‘iate kitautolu ‘a e ‘Eiki ko hotau ‘Otua, ‘o hangē ko ‘ene ‘i he‘etau ngaahi kui: ke ‘oua te ne li‘aki kitautolu, pe fakatukuhāusia‘i:

⁵⁸ka ne ofe‘i hotau loto kiate ia ke foua hono ngaahi hala kotoa, pea ke tauhi ‘ene ngaahi fekau mo tu‘utu‘uni mo konisitūtone, ‘a ia na‘a ne tu‘utu‘uni ki he‘etau ngaahi kui.

⁵⁹Pea ko e ngaahi lea ni ‘a‘aku, ‘a ia kuo u hū ‘aki ‘i he ‘ao ‘o Sihova, ‘ofa ke nau lafi ki he ‘Eiki ko hotau ‘Otua he ‘aho mo e pō, ka ne taukapo‘i ‘a e me‘a ‘a ‘ene sevāniti ko au, mo e me‘a ‘a hono kakai ‘Isileli, ‘a e me‘a ‘o e ‘aho ‘i hono ‘aho:

⁶⁰koe‘uhiā ke ‘ilo ‘e he ngaahi kakai kotoa pē ‘o māmani ko Sihova ko ia ‘a e ‘Otua; ‘oku ‘ikai hano ua.

⁶¹Ko ia, ke haohaoa homou loto ‘i he fakafeangai kia Sihova ko hotau ‘Otua, ke fou ‘i he‘ene ngaahi tu‘utu‘uni, mo tauhi ‘ene ngaahi fekau, ‘o hangē ko ia he ‘aho ni.

⁶²Pea ko e tu‘i mo ‘Isileli kātoa na‘a nau lavaki fai feilaulau ki he ‘ao ‘o Sihova.

⁶³Pea ko e feilaulau-‘ofa na‘e fai ‘e Solomone kia Sihova, na‘a ne feia ai ha pulu ‘e toko ua mano mā ua afe, mo e sipi ‘e toko taha kilu mā ua mano. Ko hono huufi ē ‘o e fale ‘o Sihova ‘e he tu‘i mo ‘Isileli kātoa.

⁶⁴‘I he ‘aho pē ko ia na‘e tapui ‘e he tu‘i ‘a e loto‘ā kotoa ‘oku ‘i he mata fale ‘o e ‘Eiki; he na‘a ne fai ai ‘a e feilaulau-mōifua mo e feilaulau-me‘akai, mo e ngako ‘o e feilaulau-‘ofa: he na‘e si‘i fau ‘a e ‘ōlita palasa na‘e ‘i he ‘ao ‘o e ‘Eiki ke tali ‘a e feilaulau-mōifua, mo e feilaulau-me‘akai, mo e ngako ‘o e feilaulau-‘ofa.

⁶⁵Pea fai ‘e Solomone ‘i ho taimi ko ia ‘a e Kātoanga ‘e ia mo ‘Isileli kātoa, ko e kātoanga kakai ‘aupito, ko e ha‘u mei he Hū‘anga ki Hēmati ‘o a‘u ki he vaitafe ‘o ‘Isipite (ko e fai ‘i he ‘ao ‘o Sihova ko hotau ‘Otua), ko e uike mo e uike, ko e ‘aho ‘e hongofulu mā fā.[38]

⁶⁶‘I hono ‘aho valu na‘a ne tukuange ‘a e kakai, pea na‘a nau talamonū ki he tu‘i, ‘o nau ō ki honau ngaahi tēniti ‘oku nau fiefia, pea lelei honau loto ‘i he fu‘u lelei kuo fai ‘e he ‘Eiki ki he‘ene tamaio‘eiki ko Tēvita, pea mo ‘Isileli ko hono kakai.