Read KO E TOH TAPU KATOA TONGA KO 1 TU‘I 9 Bible Online

KO 1 TU‘I 9 - KO E TOH TAPU KATOA TONGA bible

KO 1 TU‘I 9

¹PEA ‘i he faka‘osi ‘e Solomone ‘a e langa ‘o e fale ‘o Sihova, mo e fale ‘o e tu‘i, mo e holi fua pē ‘a Solomone na‘e ne tokanga ke fai,

²pea na‘e toki hā ‘a e ‘Eiki kia Solomone ko hono tu‘o ua, ‘o hangē ko ‘ene hā kiate ia ‘i Kipione.

³Pea folofola ‘a Sihova kiate ia, Kuo u ongo‘i ‘a e lotu mo e hū kuo ke fai kiate au: kuo u tapui ‘a e fale na kuo ke langa, ke ‘ai ki ai hoku hingoa ‘o ta‘engata: pea ‘e ‘i ai hoku mata mo hoku loto ma‘u ai pē.

⁴Pea ko e me‘a kiate koe, kapau te ke taka ‘i hoku ‘ao, ‘o hangē ko e taka ‘a ho‘o tamai ko Tēvita ‘i he loto haohaoa mo e faitotonu, ke fai hono kotoa ‘o e me‘a kuo u tu‘utu‘uni atu, ‘o tauhi ‘eku ngaahi fekau mo konisitūtone;

⁵te u toki fakapapau ho taloni mo ho‘o pule ki ‘Isileli ‘o ta‘engata, ‘o hangē ko ‘eku tala‘ofa kia Tēvita ko ho‘o tamai, ‘o pehē, ‘E ‘ikai hala hao tangata ke nofo ki he taloni ‘o ‘Isileli.

⁶Ka ‘o kapau te mou mātu‘aki tafoki mei he muimui kiate au, ‘a kimoutolu pe ko ho‘omou fānau, ‘o ‘oua ‘e tauhi ‘eku ngaahi fekau, ‘a e ngaahi tu‘utu‘uni kuo u tuku ‘i homou ‘ao; ka mou ‘alu ‘o tauhi ‘otua kehe, ‘o lotu ki ai,

⁷pea te u toki tu‘usi ‘a ‘Isileli mei he funga ‘o e kelekele kuo u foaki kiate kinautolu; pea ko e fale ni, ‘a ia kuo u tapui ‘i hoku hingoa, te u li‘aki mei hoku ‘ao; pea ‘e hoko ‘a ‘Isileli ko e me‘a ke fakatokotokanaki ‘aki mo luma‘i ‘e he ngaahi kakai kotoa.

⁸Pea ko e fale ni ‘e mā‘olunga mo‘oni;[39] ‘ilonga ha taha ‘e ‘alu ai te ne ofo, mo faka‘ise‘isa; pea te ne pehē, Ko e hā kuo fai pehē ai ‘a Sihova ki he fonua ni mo e fale ni?

⁹Pea te nau tali, Koe‘uhi ā na‘a nau li‘aki ‘a Sihova ko honau ‘Otua, ‘a ia na‘a ne ‘omi ‘enau ngaahi kui mei ‘Isipite, pea nau piki ki he ngaahi ‘otua kehe, ‘o lotu ki ai, mo tauhi ia: ko hono ō ia kuo ‘omi ai ‘e Sihova ‘a e ngaahi fu‘u kovi ni kiate kinautolu.

¹⁰Pea ‘i he ‘osi ‘a e uofulu‘i ta‘u ‘a ia na‘e langa ai ‘e Solomone ‘a e ongo fale, ‘a e fale ‘o Sihova mo e fale ‘o e tu‘i

¹¹(Pea ko Hailame ko e Tu‘i Taia kuo ne tokonaki ma‘a Solomone ‘a e ‘akau sita, mo e paini, mo e koula — ha me‘a pē na‘a ne tangi ki ai), na‘e toki ‘ange ‘e Kingi Solomone kia Hailame ha uofulu‘i kolo ‘i he feitu‘u ko Kāleli.

¹²Pea hā‘ele atu ‘a Hailame mei Taia ke vakai ‘a e ngaahi kolo kuo ‘ange kiate ia ‘e Solomone; pea na‘e ‘ikai te ne sia‘a‘ia ai.

¹³Pea ne pehē, Ko e hā, ‘alā, ‘a e ngaahi kolo ko eni kuo ke ‘omi kiate au! Pea ne fakahingoa kinautolu ko e fonua ‘o Kāpuli,[40] pea talu ai pē.

¹⁴Pea kuo ‘atu ‘e Hailame ki he tu‘i ha taleniti koula ‘e teau mā uofulu.

¹⁵Pea ko hono ‘uhinga ‘eni ‘o e tu‘utu‘uni ngāue na‘e fai ‘e Kingi Solomone; koe‘uhiā ke langa ‘a e fale ‘o Sihova, mo hono fale ‘o‘ona, mo Milo, mo e ‘ā ‘o Selusalema, mo Hasoa, mo Mekito, mo Kēseli.

¹⁶Kuo ‘alu hake ‘a Felo ko e Tu‘i ‘Isipite, pea kuo ne hamu ‘a Kēseli, mo fakamomofi: pea kuo ne tāmate‘i ‘a e kau Kēnani na‘e nofo ‘i he kolo, pea ne ‘ange ke ‘ave ‘aki hono ‘ōfefine ke nonofo mo Solomone.

¹⁷Pea langa ‘e Solomone ‘a Kēseli, mo Pete-holoni-lalo,

¹⁸mo Pealati, pea mo Tatimoa ‘i he fonua mamate, ‘i he feitu‘u —

¹⁹pea mo e ngaahi kolo feleoko na‘e ma‘u ‘e Solomone, mo e ngaahi kolo sāliote, mo e ngaahi kolo tau hoosi; kae‘uma‘ā ‘a e mamana ‘a Solomone, ‘a ia na‘a ne langa ko ‘ene manako pē ‘i Selusalema, mo Lepanoni, mo e potu kehekehe ‘o hono pule‘anga.

²⁰Ko e me‘a ki he toenga kakai ‘Āmoli, Heti, Pēlisi, Hevi, pea mo e Siepusi; (‘a ia na‘e ‘ikai te nau kau ki ha‘a ‘Isileli);

²¹ko ‘enau fānau na‘e toe ‘i he fonua, ‘a kinautolu na‘e ‘ikai lava ‘e ha‘a ‘Isileli ke faka‘auha, na‘e fai ‘e Solomone ha tu‘utu‘uni ngāue fakahopoate kiate kinautolu, ‘a ia ‘oku kei fai ni.

²²Ka na‘e ‘ikai ngaohi ‘e Solomone ha ni‘ihi ‘o ha‘a ‘Isileli ke hopoate: ka ko kinautolu ko e kau pāte‘i tau, mo ‘ene kau tamaio‘eiki, mo ‘ene hou‘eiki, mo ‘ene ngaahi kapiteni, mo e angi ‘o ‘ene tau sāliote mo e tau hoosi.

²³Ko eni ‘a e kau ‘ōfisa lalahi na‘e angi ‘i he ngāue ‘a Solomone, ko e toko nimangeau mā nimangofulu, ‘a ia na‘a nau pule ki he kakai na‘e fai ‘a e ngāue.

²⁴Ka ka hā‘ele hake ‘a e ‘ōfefine ‘o Felo mei Kolo-‘o-Tēvita ki he fale na‘e langa mo‘ona, pea ne toki langa ‘a Milo.

²⁵Pea na‘e tu‘o tolu ‘i he ta‘u ‘a e feia ‘e Solomone ‘a e ngaahi feilaulau-mōifua mo ‘ofa ‘i he ‘ōlita kuo ne ngaohi mo‘o Sihova, ‘io, he‘ene tutu[41] ia ‘i he ‘ōlita na‘e ‘i he ‘ao ‘o Sihova. Ko ia ne faka‘osi ‘a e fale.

²⁶Pea na‘e fa‘u ‘e Kingi Solomone ha folau ‘i ‘Esioni-kepa, ‘a ia ‘oku ofi ki ‘Eliati, ‘i he matātahi Kulokula, ‘i he fonua ko ‘Ītomi.

²⁷Pea tuku mai ‘e Hailame ‘ene kau tamaio‘eiki ke ‘alu ‘i he folau, ko e kau toutai na‘e poto ‘i tahi, ke ō mo e kau tamaio‘eiki ‘a Solomone.

²⁸Pea nau a‘u ki ‘Ōfela, ‘o nau ‘omi koula mei ai, ko e taleniti ‘e fāngeau mā uofulu, ‘o nau uta mai kia Kingi Solomone.