Read KO E TOH TAPU KATOA TONGA KO 2 TU‘I 2 Bible Online

KO 2 TU‘I 2 - KO E TOH TAPU KATOA TONGA bible

KO 2 TU‘I 2

¹PEA ‘i he faifai pea hoko ‘a e ‘ohake ‘o ‘Ilaisiā ‘e Sihova ki he langi ‘aki ha ‘ahiohio, na‘e fononga ‘a ‘Ilaisiā mo ‘Ilaisa mei Kilikali.

²Pea lea ‘a ‘Ilaisiā kia ‘Ilaisa, Nofo heni mu‘a; he kuo fekau au ‘e Sihova ke u ‘alu ki Pēteli. Ka ka tali ‘e ‘Ilaisa, Tangi mo‘oni ‘a e ‘Eiki, pea tangi mo‘oni mo ho‘o mo‘ui, ha‘aku li‘aki koe.

³Ko ia na‘a na ō hifo ki Pēteli. Pea hū kitu‘a ‘a e kau tama palōfita na‘e ‘i Pēteli kia ‘Ilaisa, ‘o nau pehē kiate ia, ‘Oku ke ‘ilo ‘oku teu ‘ave he ‘aho ni ho ‘eiki mei he‘ene ‘ulu kiate koe? Pea ne tali, ‘Oku ou ‘ilo foki; ‘oua te mou lea.

⁴Pea lea ange ki ai ‘a ‘Ilaisiā, ‘E ‘Ilaisa, nofo mu‘a heni; he kuo fekau au ‘e he ‘Eiki ki Sielikō. Pea ne tali, Tangi mo‘oni ‘a e ‘Eiki, pea tangi mo‘oni ‘a ho‘o mo‘ui, ha‘aku li‘aki koe. Pea na ō ki Sielikō.

⁵Pea ‘unu‘unu mai kia ‘Ilaisa ‘a e kau tama palōfita na‘e ‘i Sielikō, ‘o nau pehē kiate ia, ‘Oku ke ‘ilo ‘oku teu ‘ave he ‘aho ni ‘e Sihova ho ‘eiki mei he‘ene ‘ulu kiate koe? Pea ne tali, ‘Oku ou ‘ilo foki; ‘oua te mou lea.

⁶Pea lea ange ‘e ‘Ilaisiā ki ai, Nofo mu‘a heni; he kuo fekau au ‘e Sihova ki Soatani. Pea ne tali, Tangi mo‘oni ‘a e ‘Eiki, pea tangi mo‘oni ho‘o mo‘ui, ha‘aku li‘aki koe. Ko ia na‘a na laka atu fakataha.

⁷Pea ko e toko nimangofulu ‘o e kau tama palōfita na‘a nau ō, ‘o tu‘u mei he mama‘o, ‘o hanga mai; ka ka tu‘u kinaua ‘i ve‘e Soatani.

⁸Pea to‘o ‘e ‘Ilaisiā hono pulupulu, ‘o ne takai, ‘o ne taa‘i ‘aki ‘a e vai; pea mavaeua ia ki hē mo ē, ka ka a‘a atu kinaua ‘i he mōmoa.

⁹Pea kuo na laka atu leva, pea pehē ‘e ‘Ilaisiā kia ‘Ilaisa, Tala mai pe ko e hā te u fai ma‘au ‘i he te‘eki ke ‘ave au mei he‘eta kau. Pea tali ‘e ‘Ilaisa, Tuku mu‘a ke tō kiate au ha ‘inasi lōua mei ho laumālie.[4]

¹⁰Pea ne tali, Kuo ke kole ki ha me‘a faingata‘a; ka ‘o kapau te ke sio kiate au ‘i hoku ‘ave meiate koe, pea ‘e hoko atu; pea kapau ‘e ‘ikai, pea ‘e ‘ikai hoko atu.

¹¹Pea ‘i he‘ena ō ō atu pē mo talanoa, ‘iloange, ko e sāliote afi ena mo e fanga hoosi afi, ‘o fakamāvae kinaua; pea na‘e ‘ohake ‘a ‘Ilaisiā ‘e he ‘ahiohio ki he langi.

¹²Pea sio ki ai ‘a ‘Ilaisa, ‘o ne mo‘u kalanga pē, ‘Eku tamai! ‘eku tamai! ko e tau sāliote ‘a ‘Isileli mo ‘ene tau hoosi! Pea na‘e ‘ikai te ne toe sio ki ai.

¹³Pea ne puke hono kofu ‘o‘ona, ‘o hae ua hifo. Pea ne hapai hake ‘a e pulupulu ‘o ‘Ilaisiā ‘a ia ne tō hifo meiate ia, ‘o ne foki, ‘o tu‘u ‘i he ngutuvai ‘o Soatani.

¹⁴Pea ne to‘o ‘a e pulupulu ‘o ‘Ilaisiā, ‘a ia ne tō meiate ia, ‘o ne taa‘i ‘aki ‘a e vai, ‘o ne pehē, Ko e fē ‘a Sihova ko e ‘Otua ‘o ‘Ilaisiā? Na‘a ne mātu‘aki fai, ‘o ne taa‘i ‘a e vai; pea mavaeua ia ki hē mo ē, pea a‘a atu ‘a ‘Ilaisa.

¹⁵Pea ‘i he mamata kiate ia ‘a e kau tama palōfita na‘e ‘i Sielikō ‘o hanga mai, na‘a nau pehē, Kuo toka kia ‘Ilaisa ‘a e laumālie ‘o ‘Ilaisiā. Pea nau ha‘u ‘o fakafetaulaki kiate ia, ‘o nau faka‘apa‘apa kiate ia ‘o a‘u ki he kelekele.

¹⁶Pea nau pehē kiate ia, ‘Eni, ‘oku ‘i ho‘o kau tamaio‘eiki ko kimautolu ha tu‘unga me‘a ‘e toko nimangofulu ‘oku mālohi; ke nau ‘alu mu‘a, ‘o ha‘ao ki ho ‘eiki na: na‘a kuo ‘ave ia ‘e he Laumālie ‘o Sihova, pea ‘ene tokaange ha mo‘unga pe tele‘a kuo ne tuku ia ki ai. Pea ne tali, ‘Oua te mou fekau atu ha ni‘ihi.

¹⁷Pea nau fai mālohi kiate ia kae‘oua ke ne mā, ‘o ne toki pehē, Fekau pē. Ko ia na‘a nau fekau atu ha toko nimangofulu; pea na‘e ‘aho tolu mo ‘enau kumi kae ‘ikai ‘ilo ia.

¹⁸Pea na‘a nau toki foki kiate ia, he na‘a ne nofo pē ‘i Sielikō; pea ne pehē kiate kinautolu, ‘Ikai na‘a ku tala atu, ‘Oua te mou fekau?

¹⁹Pea fakatau folofola kia ‘Ilaisa ‘a e kau tangata ‘o e kolo, ‘Eni, ko e tu‘unga ‘o e kolo ‘oku lelei, hangē ko ia ‘oku me‘a ki ai ‘a e Feitu‘u na; ka ‘oku vai kovi, pea ‘oku tamatō ai ‘a e fonua.

²⁰Pea ne tali, ‘Omi kiate au ha saka[5] fo‘ou, ‘o ‘ai ki ai ha māsima. Pea nau ‘omi kiate ia.

²¹Pea ne ‘alu atu ki he matavai, ‘o ne lī ha māsima ki ai, ‘o ne pehē, Ko e folofola eni ‘a Sihova, Kuo u faito‘o ‘a e vai ni; ‘e ‘ikai toe tupu mei ai ha mate pe ha tamatō.

²²Pea na‘e lelei ‘a e vai, pea talu ai pē, ‘o hangē ko e lea ‘a ‘Ilaisa na‘a ne fai.

²³Pea ne ‘alu hake mei ai ki Pēteli: pea ‘i he‘ene fononga ‘i he hala, na‘e hū ki tu‘a ha kau tamaiki mei he kolo, ‘o nau taukae‘i ia he‘enau pehē, Hiki mo e tula! Hiki mo e tula!

²⁴Pea ne tafoki ki mui, ‘o sio kiate kinautolu, ‘o ne tukitala‘i kinautolu ‘i he huafa ‘o Sihova. Pea hū mai mei he vao ha ongo pea fefine, ‘o na hae ha toko fāngofulu mā ua ‘o e tamaiki ko ia.

²⁵Pea ne toki foki mei ai ki Mo‘unga Kāmeli, ‘o ne foki mei he potu ko ia ki Samēlia.