Read KO E TOH TAPU KATOA TONGA KO 2 TU‘I 22 Bible Online

KO 2 TU‘I 22 - KO E TOH TAPU KATOA TONGA bible

KO 2 TU‘I 22

¹NA‘E valu ta‘u ‘a Siosaia ‘i he‘ene kamata pule, pea na‘e tolungofulu mā taha ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sītita ko e ‘ōfefine ‘o ‘Āsaia mei Posikata.

²Pea fai ‘e ia ‘a e me‘a na‘e hoa mo e finangalo ‘o Sihova, ‘o ne fou ‘i he ngaahi ‘alunga ‘o ‘ene kui ko Tēvita, ‘o ‘ikai te ne afe ki to‘omata‘u, pe ki to‘ohema.

³Pea ‘i he hongofulu mā valu ta‘u ‘o Kingi Siosaia na‘a ne fekau ‘a Sāfani foha ‘o ‘Asialaia, foha ‘o Mēsuilame, ko e sikalaipe, ke ‘alu ki he fale ‘o Sihova, he‘ene pehē,

⁴‘Alu kia Hilikaia ko e taula‘eiki lahi, ke ne fakamā‘opo‘opo ‘a e pa‘anga kuo ‘omi ki he fale ‘o Sihova, ‘a ia kuo tānaki ‘e he kau tauhi matapā mei he kakai:

⁵pea ke nau ‘ange ia ki he kau ngāue ‘oku angi ‘i he fale ‘o Sihova: ka nau ‘atu ia ki he kakai ‘oku fai ‘a e ngāue, ‘a ia ‘oku nau ‘i he fale ‘o Sihova, ke monomono ‘a e ngaahi maumau ‘o e fale;

⁶ki he kau kapetā, mo e kau langa fale, mo e kau fakatoka-maka, pea ke fakatau ‘a e ‘akau mo e maka kuo hele ke monomono ‘aki ‘a e fale.

⁷Ko hono me‘a pē na‘e ‘ikai sivi kinautolu ‘i he pa‘anga na‘e ‘ange ki honau nima; he na‘e fai mo‘oni ‘a e fa‘ahinga ko ia.

⁸Pea lea ‘a Hilikaia ko e taula‘eiki lahi kia Sāfani ko e sikalaipe, Kuo u ‘ilo ‘a e Puka ‘o e Lao ‘i he fale ‘o Sihova. Pea ‘ange ‘e Hilikaia ‘a e tohi kia Sāfani, ‘o ne lau.

⁹Pea foki ‘a Sāfani ko e sikalaipe ki he tu‘i, ‘o ne fakamatala ‘ene fekau, ‘o ne pehē, Kuo lilingi ‘e ho‘o kau tamaio‘eiki ‘a e pa‘anga na‘e ma‘u ‘i he fale, pea kuo mau tuku ki he nima ‘o e kakai ‘oku fai ‘a e ngāue, ‘a kinautolu ‘oku angi ‘i he fale ‘o Sihova.

¹⁰Pea fakahā ‘e Sāfani ko e sikalaipe ki he tu‘i, ‘o pehē, ‘Oku ai ha tohi kuo ‘omi kiate au ‘e Hilikaia ko e taula‘eiki.

¹¹Pea ne lau ia ‘i he ‘ao ‘o e tu‘i. Pea ‘i he fanongo leva ‘e he tu‘i ki he ngaahi lea ‘o e Tohi Lao na‘a ne hae hifo hono kofu.

¹²Pea fekau ‘e he tu‘i ‘a Hilikaia ko e taula‘eiki, mo ‘Ahikami foha ‘o Sāfani, mo ‘Akepoa foha ‘o Mikaia, mo Sāfani ko e sikalaipe, mo ‘Āsaia ko e tamaio‘eiki ‘a e tu‘i, ‘o ne pehē,

¹³Mou ‘alu, ‘o huhū kia Sihova koe‘uhi ko au, pea koe‘uhi ko e kakai, pea koe‘uhi ko Siuta kātoa, ‘i he ngaahi tala ‘a e tohi ni kuo ‘ilo: he kuo lahi ‘a e houhau ‘o Sihova, ‘a ia kuo tafunaki kiate kitautolu, koe‘uhi na‘e ‘ikai ke tokanga ‘e he‘etau ngaahi kui ki he ngaahi tala ‘a e tohi ni ke fai ‘a e ngaahi me‘a kuo tohi ai ma‘atautolu.

¹⁴Ko ia ko Hilikaia ko e taula‘eiki mo ‘Ahikami, mo ‘Akepoa, mo Sāfani, mo ‘Āsaia, na‘a nau ō kia Hūlita ko e fefine palōfita, ko e uaifi ‘o Sālumi foha ‘o Tīkua foha ‘o Hā‘asi, ko e tauhi ‘o e ngaahi kofu; (na‘e nofo ‘a e fefine ‘i Selusalema ‘i Kolofo‘ou[57]) pea na‘a nau alea mo ia.

¹⁵Pea tali ‘a e fefine kiate kinautolu, Ko eni ‘a e folofola ‘a Sihova ko e ‘Otua ‘o ‘Isileli, Tala ki he tangata na‘e fekau mai kimoutolu kiate au.

¹⁶Ko e folofola eni ‘a Sihova, Ko au eni ‘oku ou ‘omi ha kovi ki he potu ni, pea ki he kakai ‘oku nofo ai, ‘a e ngaahi me‘a ‘oku tu‘u ‘i he tohi ‘a ia kuo lau ‘e he Tu‘i Siuta:

¹⁷ko e totongi ‘o ‘enau li‘aki au, mo tutu ‘inisēnisi ki he ngaahi ‘otua kehe, koe‘uhi ke nau langa‘i ‘eku ‘ita ‘i he ngāue kehekehe ‘a honau nima; ko ia ‘e kakaha hoku houhau ki he potu ni, ‘o ‘ikai matāmate‘i.

¹⁸Ka ko e me‘a ki he Tu‘i Siuta ne fekau mai kimoutolu ke huhū ki he ‘Eiki, te mou lea kiate ia, ‘o pehē, Ko e folofola eni ‘a Sihova ko e ‘Otua ‘o ‘Isileli; Koe‘uhi ko e ngaahi lea kuo ke fanongo ki ai,

¹⁹ko e me‘a ‘i he ongongofua ho loto, mo ho‘o fakavaivai‘i koe ‘i he ‘ao ‘o Sihova ‘i ho‘o fanongo ki he ngaahi tala na‘a ku fai ki he potu ni, pea ki he kakai ‘oku nofo ai, ‘o pehē te nau hoko ko e me‘a ke fai ai ha ofo, pea mo ha koto mala‘ia; pea kuo ke hae ho kofu, mo tangi ‘i hoku ‘ao; ko ia ko au foki kuo u ongo‘i koe — ko e tala ia ‘e Sihova mei he ta‘ehāmai.

²⁰Ko ia, vakai, te u fakataha koe mo ho‘o ngaahi kui, pea ‘e ‘ave koe ki ho fa‘itoka ‘i he tu‘umālie, pea ‘e ‘ikai sio ho mata ki he ngaahi fu‘u kovi ‘oku ou ‘omi ki he potu ni. Pea nau foki mo e tala ko ia ki he tu‘i.