Read KO E TOH TAPU KATOA TONGA KO 2 TU‘I 3 Bible Online

KO 2 TU‘I 3 - KO E TOH TAPU KATOA TONGA bible

KO 2 TU‘I 3

¹PEA ko Siholame foha ‘o ‘Ēhapi na‘a ne hoko ‘o Tu‘i ‘Isileli ‘i Samēlia ‘i he hongofulu mā valu ta‘u ‘o Sihosafate ko e Tu‘i Siuta, pea na‘e hongofulu mā ua ta‘u ‘ene hau.

²Pea fai ‘e ia ‘a e me‘a na‘e tau kovi ki he finangalo ‘o Sihova; kae ‘ikai tatau mo ‘ene tamai mo ‘ene fa‘ē: he na‘a ne ‘ave ‘a e Pou ‘a Peali ne ngaohi ‘e he‘ene tamai.

³Ka na‘a ne piki pē ki he ngaahi angahala ‘a Selopoame foha ‘o Nīpati, ‘a ia na‘a ne fakaangahala ‘aki ‘a ‘Isileli: na‘e ‘ikai te ne hiki mei he me‘a ko ia.

⁴Pea ko Mesa ko e Tu‘i Moape ko e ‘eiki fanga manu; pea ko ‘ene tukuhau ki he Tu‘i ‘Isileli ko e lami ‘e taha kilu, mo e sipi tangata ‘e taha kilu — ‘a e fulufulu.

⁵Ka ‘i he faifai pea pekia ‘a ‘Ēhapi, na‘e tu‘u ‘a e Tu‘i Moape ki he Tu‘i ‘Isileli.

⁶Pea hū ki tu‘a mei Samēlia ‘a Kingi Siholame ‘i he taimi ko ia, ‘o ne lau mo fokotu‘u ‘a ‘Isileli kātoa.

⁷Pea ne kamata laka atu; pea ‘alu ‘ene fekau kia Sihosafate ko e Tu‘i Siuta ke fakahā, Kuo tu‘u kiate au ‘a e Tu‘i Moape: te ke ‘alu ke ta ō mo au ki Moape ke tau‘i? Pea ne tali, Te u ‘alu pē: ‘oku ta taha pē, taha hota kakai, taha ‘eta tau hoosi.

⁸Pea ne me‘a mai, Ko e hala fē te ta ō ai? Pea tali ange ‘e ia, Ko e hala ‘oku fou ‘i he Toafa ‘o ‘Ītomi.

⁹Ko ia na‘e ō ‘a e Tu‘i ‘Isileli, mo e Tu‘i Siuta, mo e Tu‘i ‘Ītomi: pea nau ‘alu takai ko e vaa‘i hala ‘o e ‘aho ‘e fitu: pea na‘e ‘ikai ha vai ki he tau, pe ki he fanga manu na‘e muimui mai.

¹⁰Pea me‘a ‘a e Tu‘i ‘Isileli, ‘Oiauē! tā kuo ui mai ‘e he ‘Eiki ‘a e tu‘i ni ‘e toko tolu ke tuku ki he nima ‘o Moape! Ka ka tali ‘e Sihosafate, ‘Oku ‘ikai koā heni ha palōfita ‘a Sihova, ke tau huhū ai ki he ‘Eiki?

¹¹Pea tali ‘e he toko taha ‘i he kau tamaio‘eiki ‘a e Tu‘i ‘Isileli, ‘o ne fakatau folofola hake, ‘Oku ‘i heni ‘a ‘Ilaisa foha ‘o Sāfati, ‘a ia na‘a ne tauhi kia ‘Ilaisiā.

¹²Pea me‘a mai ‘a Sihosafate, Kuo pau ‘oku ai ha folofola ‘a Sihova ‘iate ia. Ko ia na‘e hā‘ele hifo ki ai ‘a e Tu‘i ‘Isileli, mo Sihosafate, mo e Tu‘i ‘Ītomi.

¹³Pea pehē ‘e ‘Ilaisa ki he Tu‘i ‘Isileli, Ko ho hā au? ‘alu ki he kau palōfita ‘a ho‘o tamai, mo e kau palōfita ‘a ho‘o fa‘ē. Pea me‘a ange ki ai ‘a e Tu‘i ‘Isileli, ‘Oua foki: he kuo ui mai ‘e Sihova ‘a e tu‘i ni ‘e toko tolu ke tuku kinautolu ki he nima ‘o Moape.

¹⁴Pea tali ‘e ‘Ilaisa, Tangi mo‘oni ‘a Sihova Sāpaoti, ‘a ia ko hono ‘ao ‘oku ou tu‘u ai, ka ne ta‘e‘oua ‘eku toka‘i ‘a Sihosafate ko e Tu‘i Siuta, ‘e ‘ikai te u hanga kia koe, pe tokanga atu.

¹⁵Ka ko eni, ‘omi ha tama helefilo. Pea lolotonga ‘a e fai ‘e he helefilo ‘ene tā, ‘iloange na‘e ala mai ‘a e nima ‘o Sihova.

¹⁶Pea ne pehē, Ko eni ‘a e folofola ‘a Sihova, Ngaohi ‘a e tele‘a ni ke luo‘ia.

¹⁷He ko eni ‘a e folofola ‘a Sihova: ‘E ‘ikai te mou ‘ilo ha matangi, pea ‘e ‘ikai te mou sio ki ha ‘uha, ka ko e tele‘a ni ‘e fonu ‘i he vai: pea te mou ma‘u inu, ‘a kimoutolu mo ho‘omou monumanu.

¹⁸Ka ko e va‘inga ia ‘i he ‘ao ‘o e ‘Eiki: he te ne tuku foki ‘a e kau Moape ki homou nima.

¹⁹Pea te mou taa‘i ‘a e kolo ‘aa‘i kotoa pē, mo e kolo tu‘utai fua pē; pea ‘ilonga ha ‘akau lelei te mou tā, pea ‘ilonga ha matavai te mou pupunu, pea ‘ilonga ha ‘api lelei te mou laku maka ki ai ke maumau‘i.

²⁰Pea pongipongi hake, fe‘unga mo e ‘oatu ‘o e feilaulau, ‘iloange ko e vai ‘oku ha‘u, ‘o fou mei ‘Ītomi, pea na‘e fonu ‘a e fonua ‘i he vai.

²¹Pea ‘i he fanongo ‘e Moape kātoa kuo ha‘u ‘a e ngaahi tu‘i ke fai tau kiate kinautolu, na‘e fanongonongo ke kātoa mai ‘a kinautolu fua pē na‘e ala tau mahafu, ‘o fai hake, pea nau tutu‘u ‘i he tafafonua.

²²Pea ‘i he‘enau ‘ā hengihengi, na‘e falala ‘a e la‘ā ki he vai, pea na‘e sio ‘a e kau Moape ki he vai ‘oku hanga mai ‘oku kulokula hangē ko e toto.

²³Pea nau fepehē‘aki, Ko e toto ia; kuo pau kuo fekainaki ‘a e ngaahi tu‘i na, pea kuo nau taa‘i takitaha hono hoa: pea ko eni, ‘a e Moape, tu‘u ki he vete!

²⁴Pea ‘i he‘enau a‘u ki he ‘apitanga ‘o ‘Isileli, na‘e tutu‘u ‘a e kau ‘Isileli, ‘o taa‘i ‘a Moape, pea nau feholaki: pea nau mōia atu, ‘o taa‘i ai pē ‘a e Moape.[6]

²⁵Pea nau holoki ‘a e ngaahi kolo, pea ‘ilonga ha ‘api lelei na‘a nau takitaha ha maka ‘e lī ki ai mōno ‘ufi‘ufi; pea ‘ilonga ha matavai na‘a nau pupunu, pea ‘ilonga ha ‘akau lelei na‘a nau tā. Ko Kili-haleseti[7]; ka na‘a mo ia na‘e kapui ‘e he kau makatā ‘o nau makataa‘i.

²⁶Pea ‘i he vakai ‘e he Tu‘i Moape ‘oku mālohi fau ‘a e tau, na‘a ne ‘alu mo ia ha toko fitungeau ‘oku to‘o heletā ke fakapuke ki he Tu‘i ‘Ītomi:[8] ka na‘e ‘ikai te nau lava.

²⁷Pea ne toki to‘o hono foha lahi, ‘a ia na‘e totonu ke fetongi ia ‘i he pule, ‘o ne feia ko e feilaulau tutu ‘i he funga ‘ā. Pea na‘e hoko ha fu‘u ‘ita[9] ki ‘Isileli: pea na‘a nau hiki meiate ia, ‘o foki ki honau fonua.