Read KO E TOH TAPU KATOA TONGA KO 2 TU‘I 8 Bible Online

KO 2 TU‘I 8 - KO E TOH TAPU KATOA TONGA bible

KO 2 TU‘I 8

¹PEA kuo tala ‘e ‘Ilaisa ki he fefine, ‘a ia ko ‘ene tama na‘a ne fakamo‘ui, ‘o pehē, Tu‘u ‘o ‘alu, ‘a koe mo ho fāmili, pea ke ‘āunofo ki ha potu te ke lava ke ‘āunofo ai; he kuo ui mai ‘e Sihova ha honge; pea ‘e hoko ia ki he fonua ‘o fitu ta‘u.

²Pea tu‘u ‘a e fefine, ‘o ne fai ‘o hangē ko e tala ‘a e tangata ‘o ‘Elohimi: pea ne fononga ‘e ia mo hono fāmili, ‘o ‘āunofo ‘i he fonua ‘o e kau Filisitia ‘o fitu ta‘u.

³Pea ‘i he faifai pea ‘osi ‘a e fitu ta‘u, pea foki ‘a e fefine mei he fonua ‘o e kau Filisitia; pea na‘a ne ‘alu atu ke tangi ki he tu‘i ke ma‘u hono fale mo hono ‘api.

⁴Pea ko e tu‘i ‘oku na lolotonga talanoa mo Kēhesi ko e talavou ‘a e tangata ‘o ‘Elohimi, pea ne pehē ki ai, ‘A‘au mu‘a kiate au ‘a e ngaahi fu‘u me‘a ne fai ‘e ‘Ilaisa.

⁵Pea lolotonga ‘ene fakamatala ki he tu‘i ‘ene fakamo‘ui ‘a ia na‘e pekia, pea ‘iloange ko e finemotu‘a, ‘a ia ko ‘ene tama na‘a ne fakamo‘ui, na‘a ne tangi mai ki he tu‘i, telia hono fale mo hono ‘api. Pea fakatau folofola hake ‘e Kēhesi, ‘Ēī ‘a e ‘afiona, ko e fefine ‘eni, pea ko ‘ene tama ena na‘e fakamo‘ui ‘e ‘Ilaisa.

⁶Pea ‘eke ‘e he tu‘i ki he fefine, pea ne fakamatala ki he‘ene ‘afio. Pea tu‘utu‘uni ‘e he tu‘i ha ‘ōfisa ke tokanga ki he‘ene me‘a, he‘ene pehē, Fakafoki kiate ia ‘a e me‘a kotoa pē na‘e ‘a‘ana, mo e fua kotoa ‘o e kelekele talu e ‘aho na‘a ne li‘aki ‘a e fonua, ‘o a‘u ki he taimi ni.

⁷Pea a‘u ‘a ‘Ilaisa ki Tāmasikusi; pea ko Peni-hētati ko e Tu‘i Sīlia na‘e toka; pea na‘e fakahā kiate ia ‘o pehē, Kuo ha‘u ki heni ‘a e tangata ‘o ‘Elohimi.

⁸Pea fekau ‘e he tu‘i kia Hesaeli, To‘o ha me‘a‘ofa, pea ‘alu ‘o fakafetaulaki ki he tangata ‘o ‘Elohimi, ‘o huhū kia Sihova ‘iate ia, ‘o pehē, Te u mo‘ui koā mei he mahaki ni?

⁹Pea ‘alu ‘a Hesaeli ke fakafetaulaki kiate ia, pea ne to‘o ‘o ‘alu mo ia ha me‘a‘ofa, ‘io, ‘ilonga ha mata ‘o Tāmasikusi, ko e uta ‘a e kāmeli ‘e fāngofulu, ‘o ne a‘u ‘o tu‘u ‘i hono ‘ao, ‘o ne pehē, Ko ho foha ko Peni-hētati ko e Tu‘i Sīlia kuo ne fekau mai au kiate koe ke fehu‘i, pe te u mo‘ui koā mei hoku mahaki ni?

¹⁰Pea tali ‘e ‘Ilaisa ki ai, ‘Alu ‘o tala ki ai, Te ke mātu‘aki lava ke mo‘ui; ka neongo ia ka kuo fakahā ‘e he ‘Eiki kiate au te ne mātu‘aki pekia.

¹¹Pea ne sio fakamatea ia kae‘oua ke ne fu‘u mā; pea tutulu ‘a e tangata ‘o ‘Elohimi.

¹²Pea lea mai ‘a Hesaeli, Ko e hā ‘oku tutulu ai ‘a e Feitu‘u na? Pea tali ‘e ia, Koe‘uhi ‘oku ou ‘ilo ‘a e kovi te ke fai ki ha‘a ‘Isileli: te ke tutu honau ngaahi talitau‘anga, pea ko ‘enau kau talavou te ke tāmate‘i ‘aki ‘a e heletā, pea ko ‘enau fānau iiki te ke laiki, pea tafa ‘enau kau fefine feitama.

¹³Pea pehē ‘e Hesaeli, He ko e hā ‘a e kulī ni, ‘a e me‘avale ko au, ke u fai ‘a e ngaahi fu‘u me‘a pehē? Kae tali ‘e ‘Ilaisa, Kuo fakahā ‘e he ‘Eiki kiate au te ke Tu‘i Sīlia.

¹⁴Pea ne ‘alu meia ‘Ilaisa, ‘o ne a‘u ki hono ‘eiki. Pea fehu‘i mai ‘e ia, Ko e hā ‘a e lau ‘a ‘Ilaisa kiate koe? Pea ne tali, Na‘a ne fakahā kiate au, Te ke mātu‘aki lava ke mo‘ui.

¹⁵Pea pongipongi hake na‘a ne to‘o ha sipi matolu, ‘o ne unu ki ha vai, ‘o ne fofola ki hono fofonga, pea ne pekia: pea na‘e fetongi ia ‘e Hesaeli ‘i he tu‘i.

¹⁶Pea ‘i hono nima ta‘u ‘o Siolame foha ‘o ‘Ēhapi ko e Tu‘i ‘Isileli, pea lolotonga ‘oku Tu‘i Siuta ‘a Sihosafate,[19] na‘e kamata pule ‘a Siholame ko e foha ‘o Sihosafate ko e Tu‘i Siuta.

¹⁷Na‘a ne tolungofulu mā ua ta‘u ‘i he‘ene kamata pule, pea na‘e valu ta‘u ‘ene hau ‘i Selusalema.

¹⁸Pea ne fou ‘i he ‘alunga ‘o e ngaahi Tu‘i ‘Isileli, ‘o hangē ko e fai ‘a e fale ‘o ‘Ēhapi: he na‘a ne ma‘u ‘a e ‘ōfefine ‘o ‘Ēhapi mōno ‘unoho: ‘io, na‘a ne fai ‘a e me‘a na‘e tau kovi ki he finangalo ‘o Sihova.

¹⁹Ka na‘e mamae ‘a Sihova ke faka‘auha ‘a Siuta, telia ‘ene sevāniti ko Tēvita, hono kuo ne tala‘ofa ki ai, ‘e tuku ha‘ane maama kiate ia mo hono hako ma‘u ai pē.

²⁰‘I hono taimi ‘o‘ona na‘e tu‘u ‘a ‘Ītomi mei he fakaongo ki Siuta, ‘o nau fakanofo hanau tu‘i ‘onautolu pē.

²¹Pea laka atu ‘a Siholame ki Saia,[20] ‘o ne ‘alu mo ia ‘ene tau sāliote kotoa: kae ‘iloange na‘a ne tu‘u hake po‘uli, ‘o ne taa‘i ‘a e kau ‘Ītomi na‘e kapui ia, mo e ngaahi kapiteni ‘o e tau sāliote: ka ka hola ‘a e kakai ki honau ngaahi tēniti.

²²Ko ia, na‘e tu‘u ‘a ‘Ītomi mei he fakaongo ki[21] Siuta, pea talu ai pē ‘o a‘u ki he ‘aho ni. Na‘e toki tu‘u foki ‘a Līpina ‘i he taimi ko ia.

²³Pea ko hono toe ‘o e ngāue ‘a Siholame, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i Siuta?

²⁴Pea toka ‘a Siholame mo ‘ene ngaahi kui, pea na‘e telio ia mo ‘ene ngaahi kui ‘i Kolo-‘o-Tēvita; pea na‘e fetongi ia ‘i he pule ‘e hono foha ko ‘Ahasaia.

²⁵‘I hono hongofulu mā ua, ta‘u ‘o Siolame foha ‘o ‘Ēhapi ko e Tu‘i ‘Isileli na‘e hoko ‘o Tu‘i Siuta ‘a ‘Ahasaia foha ‘o Siholame.

²⁶Na‘e uofulu mā ua ta‘u ‘a ‘Ahasaia ‘i he‘ene kamata pule, pea na‘e taha ta‘u ‘ene hau ‘i Selusalema; pea ko e hingoa ‘o ‘ene fa‘ē ko ‘Atalaia, ko e mokopuna ‘o ‘Omilai ko e Tu‘i ‘Isileli.

²⁷Pea ne fou ‘i he ‘alunga ‘o e fale ‘o ‘Ēhapi, ‘o ne fai ‘a e me‘a na‘e tau kovi ki he finangalo ‘o Sihova, ‘o hangē ko e fale ‘o ‘Ēhapi: he kuo ne mali ki ai.

²⁸Pea ne ne ‘alu mo Siolame, foha ‘o ‘Ēhapi, ki he tau mo Hesaeli ko e Tu‘i Sīlia ‘i Lemoti-Kiliati; pea na‘e kafo ‘a Siolame ‘i he kau Sīlia,

²⁹pea foki ‘a Kingi Siolame ke faito‘o ‘i Sisilili hono ngaahi kafo ‘i he kau Sīlia ‘i Lemoti, ‘i he‘ene fai tau mo Hesaeli ko e Tu‘i Sīlia.

³⁰Pea ‘alu hifo ‘a ‘Ahasaia foha ‘o Siholame ko e Tu‘i Siuta ke ‘a‘ahi kia Siolame foha ‘o ‘Ēhapi ki Sisilili; he kuo toka ai.