Read KO E TOH TAPU KATOA TONGA 1 Kal 10 Bible Online

1 Kal 10 - KO E TOH TAPU KATOA TONGA bible

1 Kal 10

¹PEA fai tau ‘a e kau Filisitia ki ‘Isileli; pea hola ‘a e tau ‘Isileli mei he ‘ao ‘o e kau Filisitia, pea na‘e ai ha tō ‘i Mo‘unga Kilipoa.

²Pea tata‘o mai ‘a e kau Filisitia, ‘o nau mui tulia ‘a Saula mo hono ngaahi foha; ‘o nau taa‘i ‘a Sionatane, mo ‘Apinatape, mo Malikisua, ko e ngaahi foha ‘o Saula.

³Pea na‘e mamafa ‘a e tau kia Saula, pea na‘e ma‘u ia ‘e he kau tangata fana ngahau; pea na‘a ne mamahi lahi ‘i he fai ‘a e kau fana.

⁴Pea pehē ‘e Saula ki he‘ene fua mahafu, Unuhi ho‘o heletā, ‘o tui ‘aki au; na‘a a‘u mai ‘a e ta‘ekamu na ‘o fakatakataka ‘aki au. Ka na‘e ‘ikai fie fai ‘e he‘ene fua mahafu ko ‘ene manavahē lahi; ko ia na‘e to‘o ‘e Saula ‘ene heletā ‘a‘ana, ‘o ne fakahinga ki ai.

⁵Pea ‘i he vakai ‘e he‘ene fua mahafu kuo pekia ‘a Saula, na‘a ne fakahinga mo ia ki he‘ene heletā, ‘o ne mate.

⁶Ko ia na‘e pekia ‘a Saula mo hono foha ‘e toko tolu; pea ko hono fale kotoa foki na‘a nau pekia fakataha.

⁷Pea ko e kau tangata ‘Isileli na‘e ‘i he lautoka ‘i he‘enau vakai ‘oku nau hola, pea kuo pekia ‘a Saula mo hono ngaahi foha, na‘a nau li‘aki honau ngaahi kolo, ‘o nau hola; pea ha‘u ‘a e kau Filisitia, ‘o nofo ai.

⁸Pea ‘i he ha‘u ‘a e kau Filisitia ‘apongipongi ke vete ‘a e pekia, na‘a nau ‘ilo ‘a Saula mo hono ngaahi foha ‘oku nau fetākoto‘i ‘i Mo‘unga Kilipoa.

⁹Pea nau vete ‘ene mahafu, pea nau ‘ave holo hono ‘ulu ‘i he fonua ‘o e kau Filisitia, ke ongoongo ‘a e me‘a ki honau fale ‘aitoli mo e kakai.

¹⁰Pea nau tuku ‘ene mahafu ‘i he fale ‘o honau ngaahi fa‘ahikehe, pea ko hono ‘ulu na‘e fakama‘u fakau‘u ‘i he fale ‘o Tākoni.

¹¹Pea ‘i he fanongo ‘e he nofo Siepesi-kiliati kotoa ‘a e ngaahi me‘a kuo fai ‘e he kau Filisitia kia Saula,

¹²pea tutu‘u ‘a e kau to‘a kotoa pē, pea nau to‘o ‘a e ‘anga‘anga ‘o Saula, mo e ngaahi ‘anga‘anga ‘o ‘ene fānau, pea nau ha‘u mo kinautolu ki Siepesi, pea nau tanu honau ngaahi hui ‘i he lalo ‘oke ‘oku ‘i Siepesi, ‘o nau ‘aukai ‘o ‘aho fitu.

¹³Ko ia, na‘e pekia ‘a Saula ‘i he angahala na‘a ne fai kia Sihova, koe‘uhi ko e folofola ‘a Sihova, ‘a ia na‘e ‘ikai te ne tokanga ki ai; kae‘uma‘ā foki na‘a ne huhū ‘i ha toko taha na‘e fakahā‘ele fa‘ahi kehe ke fehu‘i me‘a ai, ‘o ‘ikai te ne fehu‘i kia Sihova:

¹⁴ko ia na‘a ne tāmate‘i ia, ‘o ne fakaafe ‘a e pule‘anga kia Tēvita ko e foha ‘o Sese.