Read KO E TOH TAPU KATOA TONGA 1 Kal 12 Bible Online

1 Kal 12 - KO E TOH TAPU KATOA TONGA bible

1 Kal 12

¹PEA ko eni ‘a kinautolu na‘e ha‘u kia Tēvita ki Sikilaki, lolotonga ‘oku kei ta‘ofi ia meia Saula foha ‘o Kisi: pea na‘a nau ‘i he kau helo na‘e tokoni kiate ia ‘i he tau.

²Ko e kau fakakaufana kinautolu: na‘a nau fakatouanga, ‘o ngāue‘aki ‘a e to‘omata‘u mo e to‘ohema ‘i he makatā mo e fana ngahau: na‘a nau kau ki he kāinga ‘o Saula, ki ha‘a Penisimani.

³Ko honau ‘ulu ‘a ‘Ahiesa, pea hoko ai ‘a Soasi; ko e ongo foha ‘o Sēma‘a ko e Kipea: mo ‘Isieli, mo Pēleti, ko e hako ‘o ‘Asimaueta; mo Pēlaka, mo Sehu ko e ‘Anatoti;

⁴mo ‘Isimaia ko e Kipione, ko e to‘a ‘o e Kau Tolungofulu, pea ko honau pule; mo Selemaia, mo ‘Iakasili, mo Siohanani, mo Siosapati ko e Kētela;

⁵ko ‘Elusai, mo ‘Ilimoti, mo Pealia, mo Semalaia, mo Sefataia, ko e Hālufi;

⁶ko ‘Elikena, mo ‘Īsaia, mo ‘Asaleli, mo Sioesa, mo ‘Iasopeami, ko e kau Kola;

⁷mo Sioela, mo Sepataia, ko e hako ‘o ‘Ilohame mei Kētoa.

⁸Pea mei ha‘a Kata na‘e hiki ha ni‘ihi ‘o nofo kia Tēvita, ‘o ‘alu ki he talitau‘anga ‘i he toafa, ko e kau to‘a tete‘e ko e kau tangata kuo ako tau, ‘oku nau lava ke fai‘aki ‘a e pā mo e tao; ko e kau mata fakalaione, pea ve‘evave hangē ko e fanga tia nofo mo‘unga:

⁹ko ‘Ēseli ‘a e ‘uluaki, ko ‘Opataia hono ua, ko ‘Eliapi hono tolu,

¹⁰ko Misimana hono fā, ko Selemaia hono nima,

¹¹ko ‘Ātai hono ono, ko ‘Eliela hono fitu,

¹²ko Siohanani hono valu, ko ‘Elisapati hono hiva,

¹³ko Selemaia hono hongofulu, ko Makapanai hono hongofulu mā taha.

¹⁴Ko kinautolu ni mei ha‘a Kata ko e kau tāimu‘a ‘i he tau: ko ia na‘e si‘i na‘e pule[47] ki he teau, ka ko e lahi ki he toko afe.

¹⁵Ko kinautolu ia na‘e a‘a ‘i Soatani ‘i he ‘uluaki māhina; ka kuo mahua mai ia, ‘o lōmekina hono ngaahi ngutuvai; pea nau tuli taa‘i ‘a e kakai ‘o e ngaahi lautoka ‘i hahake mo hihifo.

¹⁶Pea na‘e omi ha ni‘ihi mei ha‘a Penisimani mo Siuta ki he tali tau‘anga kia Tēvita.

¹⁷Pea ‘alu atu ‘a Tēvita ke fakafetaulaki kiate kinautolu, ‘o ne tali ki ai ‘o pehē, Kapau ko ho‘omou omi melino kiate au ke tokoni mai, pea ‘e fefiofi hoku loto mo kimoutolu: ka ‘o kapau ko e lavaki‘i au ki hoku ngaahi fili; ‘osi, kuo ‘ikai ha‘aku fakamālohi kuo fai atu, pea ‘ofa ke ‘afio ki ai ‘a e ‘Otua ‘o ‘etau ngaahi kui, ‘o sauni.

¹⁸Pea kofu ‘aki ‘a e Laumālie ‘a ‘Amasai ko e pule ‘o e kau Tolungofulu, ‘o ne pehē, ‘Oku ‘a‘au, Tēvita, ‘a kimautolu; pea ‘oku tau kau mo koe, Foha ‘o Sese: ko e melino pē; ‘ofa ke tu‘umālie koe, pea ke tu‘umālie ho kau tokoni, he ‘oku tokoni koe ‘e ho ‘Otua. Na‘e toki tali kinautolu ‘e Tēvita, ‘o ne fakanofo ki he ngaahi tu‘unga pule ‘i he kongakau.

¹⁹Na‘e tō mo ha ni‘ihi kia Tēvita meia ha‘a Manase, ‘i he taimi na‘a ne ha‘u mo e kau Filisitia ke tau‘i ‘a Saula, ka na‘e ‘ikai te nau kau mo kinautolu; he na‘e fale‘i ‘a e kau ‘ulu ‘o e kau Filisitia, ‘o nau fakafoki ia, he‘enau pehē, Te ne toe tō ki hono ‘eiki ko Saula, ‘o ne mōihū ‘aki hotau ‘ulu.

²⁰‘I he‘ene ‘alu ko ia ki Sikilaki, na‘e tō kiate ia meia ha‘a Manase ‘a ‘Ātina, mo Siosapati, mo ‘Itieli, mo Maikeli, mo Siosapati, mo ‘Ilaiū, mo Silitai; ko e kau pule ki he ngaahi toko afe ‘o Manase.

²¹Pea na‘e tokoni kia Tēvita ‘e kinautolu ni ‘i he‘ene fai mo e kongakau pāpani:[48] he ko e kau to‘a tete‘e kotoa pē, pea ko e hou‘eiki ‘o e hōsitē.

²²He na‘e omi kia Tēvita he ‘aho kotoa pē ha ni‘ihi ke tokoni, pea hoko ia ko e hōsitē lahi, ‘o hangē ha hōsitē ‘a e ‘Otua.

²³Pea ko eni ‘a e lau ‘o e kakai na‘e ‘osi teu ki he tau, ‘a ia na‘e ha‘u kia Tēvita ki Hepeloni, ke liliu ‘a e pule‘anga ‘o Saula kiate ia ‘i he funga ‘o e folofola ‘a Sihova.

²⁴Ko e ha‘a Siuta na‘e to‘o pā mo e tao ko e toko ono afe mā valungeau, kuo ‘osi teu kinautolu ki he tau.

²⁵Mei ha‘a Simione ko e kau to‘a tete‘e he fai tau, ko e toko fitu afe mā teau.

²⁶Mei ha‘a Līvai, ko e toko fā afe mā onongeau,

²⁷pea ko Sihoiata ‘a e ‘eiki ‘o ha‘a ‘Ēlone, pea na‘e ‘iate ia ‘a e toko tolu afe mā fitungeau;

²⁸mo Sātoki ko e talavou to‘a lahi, mo e kau kapiteni ‘e toko uofulu mā ua mei honau fāmili.

²⁹Pea mei ha‘a Penisimani, ko e kāinga ‘o Saula, ko e toko tolu afe: ka ko honau tokolahi kuo nau puke pē ‘a e hau ‘o ha‘a Saula, ‘o a‘u ki he taimi ni.

³⁰Pea mei ha‘a ‘Ifalemi ko e toko ua mano mā valungeau, ko e kau to‘a tete‘e, ko e kakai hingoa talā ‘i honau ngaahi fāmili,

³¹pea mei he vaeua ‘o e matakali ‘o Manase ko e toko taha mano mā valu afe, ‘a ia na‘e lau honau hingoa ke ‘alu ki he fakanofo ‘o Tēvita.

³²Pea mei ha‘a ‘Īsaka, ko e kakai na‘e poto ‘i he vavalo‘i ‘a e me‘a ‘o e taimi, mo e ‘ilo ‘o e me‘a ke fai ‘e ‘Isileli, ko honau tu‘ukimu‘a ko e toko uangeau; pea na‘e tali honau angi ‘e honau kāinga kotoa.

³³Mei ha‘a Sepulone ko e kakai na‘e tu‘u ‘i he tau, ‘o poto ‘i he faka‘otu, ‘o maheni mo e mahafu kehekehe, ko e toko nima mano; ‘oku nau tauhi ‘a e laine ‘o ‘ikai lotolotoua.

³⁴Pea mei ha‘a Nafitalai na‘e ai ha kapiteni ‘e toko afe, pea ha‘u mo kinautolu ha toko tolu mano mā fitu afe ‘oku nau fakapā mo fakatao.

³⁵Pea mei ha‘a Tani ko e toko ua mano mā valu afe mā onongeau na‘e lava ke tu‘u faka‘otu.

³⁶Pea mei ha‘a ‘Āseli ko e kakai na‘e tu‘u ‘i he tau, ‘o tauhi ‘a e faka‘otu, ko e toko fā mano.

³⁷Pea mei Tu‘a-Soatani, mei ha‘a Lūpeni, mo ha‘a Kata, mo e vaeua ‘o Manase, ko e toko taha kilu mā toko ua mano ‘oku nau to‘o ‘a e fa‘ahinga mahafu kehekehe.

³⁸Ko kinautolu ni kotoa ko e kau tau na‘e poto ‘i he tauhi ‘o e laine, ko e fa‘ahinga lotoma‘u, na‘a nau omi ki Hepeloni ke fakanofo ‘a Tēvita ke tu‘i ki ‘Isileli kātoa; pea ko hono toe foki ‘o e kakai ‘Isileli, na‘a nau lototaha ke fakanofo ‘a Tēvita.

³⁹Pea na‘a nau ‘i he potu ko ia mo Tēvita, ‘o ‘aho tolu, ‘o nau fai kātoanga; he kuo teu ma‘anautolu ‘e honau kāinga.

⁴⁰Pea ko kinautolu foki na‘e nofo ofi mai, ‘io, ‘o a‘u ki ‘Īsaka mo Sepulone mo Nafitalai, na‘a nau ha‘u mo kinautolu ha me‘akai kuo fakaheka ki he fanga ‘asi, mo e kāmeli, mo e miuli, mo e pulu, mo e mahoa‘a, mo e ngaahi takaonga fiki, mo e ngaahi fuhinga kālepi tauaki, mo e uaine, mo e lolo, mo e fanga pulu, mo e fanga sipi, ‘o fu‘u lahi: he na‘e ‘i ai ha fiefia ‘i ‘Isileli.