Read KO E TOH TAPU KATOA TONGA 1 Kal 14 Bible Online

1 Kal 14 - KO E TOH TAPU KATOA TONGA bible

1 Kal 14

¹PEA tuku mai ‘e Hailame ko e Tu‘i Taia ha tu‘unga talafekau kia Tēvita, mo e ngaahi ‘akau ko e sita, mo e kau tufunga maka, mo e kau tufunga ‘akau, ke langa hono fale.

²Pea na‘e mahino kia Tēvita kuo fakapapau ‘e he ‘Eiki ‘ene Tu‘i ‘Isileli; he kuo hiki ki ‘olunga hono pule‘anga koe‘uhi ko hono kakai ‘Isileli.

³Pea toe ma‘u ‘e Tēvita ha ngaahi uaifi ‘i Selusalema: pea toe ma‘u ‘e Tēvita ha ngaahi foha mo ha ngaahi ‘ōfefine.

⁴Pea ko e ngaahi hingoa eni ‘o e fānau na‘a ne ma‘u ‘i Selusalema: ko Samua, mo Sōpapi, ko Nētane, mo Solomone;

⁵mo ‘Ipihale, mo ‘Elisua, mo ‘Elipeleti,

⁶mo Noka, mo Nēfeki, mo ‘Iafia,

⁷mo ‘Elisama, mo Peliata[50] mo ‘Elifeleti.

⁸Pea ‘i he fanongo ‘e he kau Filisitia kuo fakanofo ‘a Tēvita ko e Tu‘i ‘Isileli kātoa, na‘a nau ‘alu hake kotoa pē ko e kumi ‘o Tēvita. Pea fanongo ki ai ‘a Tēvita, ‘o ne ‘alu mu‘omu‘a kiate kinautolu.

⁹Pea kuo ha‘u ‘a e kau Filisitia ‘o fai tau ‘i he lautoka ‘o Lefaimi.

¹⁰Pea huhū ‘a Tēvita ki he ‘Otua, ‘o pehē, Ka u ‘alu hake koā ke u fai mo e kau Filisitia? pea te ke tuku kinautolu ki hoku nima? Pea tali ‘a e ‘Eiki kia Tēvita, ‘Alu hake pē, pea te u tuku kinautolu ki ho nima.

¹¹Pea nau ‘alu hake ki Peali-felesimi, pea taa‘i kinautolu ‘e Tēvita ‘i he potu ko ia; pea pehē ‘e Tēvita, Kuo pā atu ‘a ‘Elohimi ki hoku ngaahi fili ‘aki hoku nima, ‘o hangē ko e pā atu ha fu‘u vai. Ko ia, na‘a nau fakahingoa ai ‘a e potu ko ia ko Peali-felesimi (‘Eiki — ‘o e-ngaahi-pā-atu).

¹²Pea nau li‘aki honau ngaahi ‘otua ‘i he potu ko ia, pea fekau ‘e Tēvita, ‘o nau tutu ia.

¹³Pea toe fai ‘e he kau Filisitia ‘enau tau ‘i he lautoka.

¹⁴Pea toe huhū ‘e Tēvita kia ‘Elohimi; pea tali ki ai ‘e ‘Elohimi, ‘Oua te ke ‘alu fakahangatonu ki ai: afe atu, ‘o fakatakamilo kiate kinautolu, ‘o ha‘u kiate kinautolu fe‘unga mo e ‘ulu moli peli.

¹⁵Pea ka faifai pea ke ongo‘i ‘a e ngahaha ‘o ha ‘alu ‘i he funga moli peli, te ke toki fakahoko tau; he ko e hā‘ele atu ia ‘a ‘Elohimi ‘i ho ‘ao ke taa‘i ‘a e kau Filisitia.

¹⁶Pea na‘e fai ‘e Tēvita hangē ko e tu‘utu‘uni ‘a ‘Elohimi, ‘o nau taa‘i ‘a e tau Filisitia mei Kipione ‘o a‘u ki Kēseli.

¹⁷Pea pavake ‘a e ongoongo ‘o Tēvita ki he ngaahi fonua; pea tuku ‘e Sihova hono ngeia ki he pule‘anga kotoa pē.