Read KO E TOH TAPU KATOA TONGA 1 Kal 16 Bible Online

1 Kal 16 - KO E TOH TAPU KATOA TONGA bible

1 Kal 16

¹PEA nau fakahū mai ‘a e ‘A‘ake ‘o ‘Elohimi, ‘o tuku hifo ‘i he loto tēniti kuo fokotu‘u ‘e Tēvita ki ai: pea nau ‘atu ha ngaahi feilaulau-mōifua mo e ngaahi feilaulau-‘ofa ‘i he ‘ao ‘o ‘Elohimi.

²Pea kuo faka‘osi ‘e Tēvita ‘ene fai feilaulau-mōifua mo ‘ofa, na‘a ne tāpuaki‘i ‘a e kakai ‘i he huafa ‘o Sihova.

³Pea na‘a ne tufa ki he ‘Isileli takitaha, ‘a e tangata mo e fefine fakatou‘osi, ‘o takitaha ha fo‘i mā, mo ha ‘inasi,[52] mo ha takaonga kālepi tauaki.

⁴Pea ne tuku ha ni‘ihi ‘o e kau Līvai ke fai ngāue ‘i he ‘ao ‘o e ‘A‘ake ‘o Sihova, pea ke fai ‘a e fakamanatu, mo e tuku kolōlia, mo e hiva halelu‘ia kia Sihova ko e ‘Otua ‘o ‘Isileli.

⁵Ko ‘Ēsafe na‘e ‘uluaki, pea hoko kiate ia ‘a Sākalaia, Sieli, mo Semilamoti, mo Sīheli, mo Matitaia, mo ‘Eliapi, mo Penaia, mo ‘Ōpeti-itomi, mo Sieli, ‘oku nau fakahelefilo mo fakaha‘ape; pea ko ‘Ēsafe na‘e fakasimipale ke fakaongo atu.

⁶Pea ko Penaia mo ‘Iakasili, ko e ongo taula‘eiki, na‘e fakatalupite ma‘u pē ‘i he ‘ao ‘o e ‘A‘ake ‘o e Kovinānite ‘o ‘Elohimi.

⁷Ko e ‘aho ko ia na‘e fua tuku ai ‘e Tēvita ki he nima ‘o ‘Ēsafe mo hono kāinga ‘a e fai ‘o e fakafeta‘i ki he ‘Eiki.

⁸Fakafeta‘i kia Sihova, kailavaki hono huafa; Faka‘ilo ‘ene ngaahi ngāue ki he ngaahi fa‘ahinga.

⁹Hiva ki He‘ene ‘Afio, tā ha‘ape ki He‘ene ‘Afio; Talanoa ki he‘ene ngaahi ngāue fakaofo.

¹⁰Pōlepole ‘i hono huafa tāpuhā: Ke fiefia ‘a e loto ‘o ha‘a kumi kia Sihova.

¹¹Huhū kia Sihova, mo hono fu‘u ngū; Kumi ki hono fōtunga ‘o ‘oua ‘e tuku,

¹²Manatua ‘a e ngaahi me‘a fakaofo kuo ne fai; ‘A ‘ene ngaahi faka‘ilonga, mo e ngaahi fakamaau kuo ne pu‘aki;

¹³‘E kimoutolu ko e hako ‘o ‘Isileli ko ‘ene tamaio‘eiki, ‘A e fānau ‘a Sēkope kuo ne fili.

¹⁴Ko ia ia hotau ‘Otua, ‘a Sihova: Ko ‘ene ngaahi fakamaau ‘oku ‘i māmani kotoa.

¹⁵Manatu ai pē ki he‘ene fuakava, ‘A e folofola na‘a ne fakapapau ki he afe‘i to‘utangata.

¹⁶‘a e kovinānite na‘a ne fai mo ‘Epalahame, Mo e me‘a na‘a ne fuakava kia ‘Aisake;

¹⁷Pea ne fakapapau kia Sēkope ko e tu‘utu‘uni, Ko e fuakava ta‘engata ma‘a ‘Isileli.

¹⁸He‘ene pehē, “Te u ‘atu mo‘ou ‘a Kēnani na, Ko e laine ia homou tofi‘a,” ‘Osi, ko e falukunga kakai;

¹⁹‘Io, ko e toko si‘i, pea muli ki ai.

²⁰Pea nau fe‘alu‘aki mei he fa‘ahinga ki he fa‘ahinga, Mei he pule‘anga ko ē ki he kakai ‘e taha.

²¹Na‘e ‘ikai te ne tuku ke fai ‘e ha ‘eiki honau fakaehaua; ‘Io, na‘a ne valoki ‘ani tu‘i koe‘uhi ko kinautolu na.

²²“Oua ‘e ala ki he‘eku kau pani, Pea ‘oua ‘e fai ha kovi ki he‘eku kau palōfita ni.”

²³Hiva kia Sihova ‘a māmani kotoa; Ongoongo ‘i he ‘aho kotoa ‘ene fakamo‘ui na.

²⁴‘A‘au ki he ngaahi pule‘anga hono kolōlia, ‘Ene ngāue fakaofo ‘i he ngaahi fa‘ahinga.

²⁵He ‘oku lahi ‘a Sihova, pea ‘oku totonu ke lahi hono fakamālō‘ia: ‘Oku hulu hono ngeia ‘i he ngaahi ‘Otua kotoa.

²⁶He ko e ‘aitoli[53] pē ‘a e ngaahi ‘otua ‘o e ngaahi fa‘ahinga. Ka na‘e ngaohi ‘a e langi ‘e Sihova.

²⁷Ko e ngeia mo e lāngilangi ‘oku fe‘ao mo ia: Ko e ivi mo e fiefia ‘oku ‘i hono ‘afio‘anga,

²⁸Tuku kia Sihova, si‘i ngaahi fāmili ‘o e ngaahi fa‘ahinga, Tuku kia Sihova ‘a e kolōlia mo e mālohinga.

²⁹Tuku kia Sihova ‘a e kolōlia ‘o hono huafa: To‘o me‘a‘ofa ‘o ha‘u ki hono ‘ao na: Hū kia Sihova ‘i he teunga tāpuhā.[54]

³⁰Ke tete ‘i hono ‘ao, ‘a e fonua kotoa; Tā kuo fokotu‘u ‘a māmani, ‘o ta‘emauea.

³¹Ke fiefia ‘a e langi, pea tome‘e mo e fonua; Pea ke nau lea ki he ngaahi fa‘ahinga, Kuo tu‘i ‘a Sihova.

³²Ke ‘u‘ulu ‘a e tahi, mo hono fu‘u fonu na; Pātapata ‘a e vao mo hono me‘a kotoa.

³³Toki fai ‘e he ‘akau ‘o e lala ‘enau fu‘u mavava ‘I he ‘ao ‘o Sihova, He ‘oku ne hā‘ele mai ke fakamaau ‘a e fonua.

³⁴Fakafeta‘i kia Sihova; he ‘oku lelei ia: He ‘oku tolonga ‘o ta‘engata ‘ene ‘alo‘ofa.

³⁵Pea mou pehē mu‘a, “Fakamo‘ui kimautolu, ‘e homau ‘Otua Fakamo‘ui‘anga, ‘O tānaki mo hamusi mei he ngaahi pule‘anga, Ke mau fakafeta‘ia ho huafa tāpuhā, ‘O fepolepolei he tala ‘a e mālō ‘o e ‘Afiona.

³⁶Ko e fakamālō ‘o Sihova ko e ‘Otua ‘o ‘Isileli Ke fai mei ‘ītāniti ki ‘ītāniti. Pea na‘e pehē ‘e he kakai kotoa, ‘Ēmeni! pea nau fai ‘a e fakamālō ‘o Sihova.

³⁷Ko ia, na‘a ne tuku ai ‘i he ‘ao ‘o e ‘A‘ake ‘o e Kovinānite ‘o Sihova ‘a ‘Ēsafe mo hono kāinga, ke fai tauhi ‘i he ‘ao ‘o e ‘A‘ake ma‘u ai pē, ‘a e me‘a ‘o e ‘aho ‘i hono ‘aho.

³⁸Ko ‘Ōpeti-itomi foki mo honau kāinga ko e toko onongofulu mo e toko valu; pea ko ‘Ōpeti-itomi foha ‘o Situtuni pea mo Hosa ke le‘o matapā.

³⁹Pea ko e taula‘eiki ko Sātoki mo hono kāinga taula‘eiki ke nau ‘i he ‘ao ‘o e Tāpanekale ‘o Sihova ‘oku ‘i he sia ‘i Kipione,

⁴⁰ke ‘atu feilaulau-mōifua kia Sihova ‘i he ‘ōlita feilaulau‘anga ma‘u pē, pongipongi mo e efiafi; ‘io, ‘o fakatatau ki he me‘a kotoa kuo tohi ‘i he Lao ‘a Sihova, ‘a ia na‘a ne tu‘utu‘uni ma‘a ‘Isileli.

⁴¹Pea ke kau mo kinautolu ‘a Hēmani mo Situtuni, mo hono toe ‘o e kakai na‘e fili, ‘a ia na‘e lau honau hingoa, ke fai ‘a e fakafeta‘i kia Sihova “He ‘oku tolonga ‘o ta‘engata ‘ene ‘alo‘ofa.”

⁴²Pea na‘e ‘iate kinaua, ‘ia Hēmani mo Situtuni, ‘a e ngaahi talupite, mo e simipale, ma‘anautolu na‘e fai ‘a e fakaongo atu, mo e nāunau ki he ngaahi himi ‘o ‘Elohimi; mo e hako ‘o Situtuni ke le‘o matapā.

⁴³Pea ‘alu ‘a e kakai takitaha ki hono fale; pea foki ‘a Tēvita ke tāpuaki‘i hono fāmili ‘o‘ona.