Read KO E TOH TAPU KATOA TONGA 1 Kal 17 Bible Online

1 Kal 17 - KO E TOH TAPU KATOA TONGA bible

1 Kal 17

¹PEA faifai pea lolotonga na‘e nofo ‘a Tēvita ‘i hono fale, na‘a ne folofola kia Nētane ko e palōfita, ‘o pehē; Vakai, ‘oku ou nofo au ‘i ha fale sita, ka ko e ‘A‘ake ‘o e Kovinānite ‘o Sihova ‘i ha fale tupenu.

²Pea tali ‘e Nētane kia Tēvita, ‘Ilonga ha me‘a ‘oku ‘i ho loto, fai; he ‘oku ‘iate koe ‘a ‘Elohimi.

³Pea ‘iloange ‘i he pō ko ia na‘e hoko ‘a e folofola ‘a ‘Elohimi kia Nētane,

⁴‘o pehē, ‘Alu ‘o tala ki he‘eku sevāniti ko Tēvita, Ko eni ‘a e folofola ‘a Sihova, ‘E ‘ikai te ke langa ‘e koe ha fale mo‘oku ke u nofo ai:

⁵he kuo te‘eki ke u nofo ha fale mei he ‘aho na‘a ku ‘omi ai ‘a ‘Isileli, ‘o a‘u ki he ‘aho ni; ka kuo u hiki mei he tēniti ki he tēniti, pea mei he tāpanekale ki he tāpanekale.

⁶‘I he ngaahi potu kehekehe na‘a ku taka ai ‘i ho lotolotonga ‘o ‘Isileli, he na‘a ku momo‘i lea ki ha taha ‘o e kau Fakamaau ‘o ‘Isileli, ‘a ia na‘a ku tu‘utu‘uni ke tauhi hoku kakai, ‘o pehē, Ko e hā ‘oku ‘ikai te mou langa ai mo‘oku ha fale sita?

⁷Pea ko eni ke ke lea ki he‘eku tamaio‘eiki ko Tēvita, ‘o pehē, Ko e folofola eni ‘a Sihova Sāpaoti, Na‘a ku to‘o koe ‘e au mei he loto‘ā sipi, mei he muimui ki he fanga sipi, ke ke hoko ko e ‘eiki ki hoku kakai ‘Isileli.

⁸Pea kuo u ‘iate koe ‘i ho‘o ngaahi fononga kotoa, pea. kuo u tu‘usi ho ngaahi fili kotoa mei ho ‘ao; pea te u fakaai hao hingoa, hangē ko e hingoa ‘o e kakai ongoongo ‘oku ‘i māmani.

⁹Pea te u tu‘utu‘uni ha potu ki hoku kakai ‘Isileli, pea te u fakalanga, ‘o tō; pea te nau nofo ‘i honau feitu‘u ‘onautolu, ‘o ‘oua ‘e toe hiki, pea ‘oua ‘e toe maumau kinautolu ‘e he fa‘ahinga pau‘u, ‘o hangē ko ia ‘i he kamata‘anga,

¹⁰pea mei he taimi na‘a ku tu‘utu‘uni ai ha kau fakamaau ki hoku kakai ‘Isileli; pea te u fakamo‘ulaloa‘i ho ngaahi fili fua pē kae‘uma‘ā ‘oku ou fakahā atu ‘e fokotu‘u ‘e he ‘Eiki hao fale.

¹¹Pea ka faifai pea kakato ho ngaahi ‘aho, pea pau ke ke ‘alu ke fakataha mo ho‘o ngaahi kui, pea te u fokotu‘u ke hoko mo koe ‘a ho hako, ‘a ia ko e taha ‘o ho ngaahi foha; pea te u fakapapau hono pule‘anga.

¹²Ko ia ia te ne langa mo‘oku ha fale, pea te u fakapapau hono taloni ‘o ta‘engata.

¹³Te u nofo au ko ‘ene tamai, pea ‘e nofo ia ko hoku foha; pea ‘e ‘ikai mahu‘i ‘eku ‘ofa meiate ia, ‘o hangē ko ‘eku hiki meiate ia na‘e mu‘omu‘a ‘iate koe:

¹⁴ka te u fokotu‘u ma‘u ia ‘i hoku fale mo hoku pule‘anga ‘o ta‘engata: pea ‘e tu‘u ma‘u hono taloni ‘o ta‘engata.

¹⁵Hangē tofu pē ko e ngaahi lea ko ia, pea hangē ko e vīsone ko ia, na‘e pehē ‘a e fakamatala ‘a Nētane kia Tēvita.

¹⁶Pea hū ‘a Kingi Tēvita, ‘o nofo ‘i he ‘ao ‘o Sihova; ‘o ne pehē, ‘E Sihova ‘Elohimi, ko hai au, pea ko hai hoku fale, kuo ke ‘omi ai au ki he me‘a kuo u ‘i ai?

¹⁷Pea tā ‘oku lau ‘e he ‘Afiona ko e me‘a si‘i ia; pea ‘oku kau ho‘o folofola ki he tu‘u ‘a e fale ‘o ho‘o tamaio‘eiki, ‘o mama‘o ‘aupito; pea kuo ke tokanga‘i au ‘e Sihova ‘Elohimi, ‘o hangē ko e tangata mā‘olunga.[55]

¹⁸Ko e hā ha toe lea ‘a Tēvita ‘e fai atu ‘i he fakalāngilangi‘i ‘o ho‘o tamaio‘eiki ko au? he ‘oku ke ‘afio‘i ho‘o tamaio‘eiki ko au.

¹⁹‘E Sihova, koe‘uhi pē ko ho‘o tamaio‘eiki, pea koe‘uhi ko ho tau ia kuo ke fai ai ‘a e fu‘u me‘a ni, ke faka‘ilo ‘a e ngaahi fu‘u me‘a ni.

²⁰‘Eiki, ‘oku ‘ikai hao tatau; ‘io, ‘oku ‘ikai ha ‘Otua ngata ‘i he ‘Afiona: ‘oku hā ia ‘i he me‘a kotoa kuo ongo mai ki homau telinga.

²¹Pea ko e fē ha fo‘i kakai ‘i māmani hangē ko ho kakai ‘Isileli, ‘a ia na‘e hā‘ele atu ‘a ‘Elohimi ke huhu‘i mōno kakai, ke fakaai hao hingoa ‘aki ‘a e ngaahi me‘a lalahi mo fakailifia, ‘i he kapusi kakai mei he ‘ao ‘o ho kakai ‘a ia na‘a ke huhu‘i mei ‘Isipite?

²²He na‘a ke tuku ho kakai ‘Isileli ko ho kakai ‘o ta‘engata, pea ko koe, ‘Eiki, na‘a ke hoko ko honau ‘Otua.

²³Pea ko eni, ‘e Sihova, ko e lea kuo ke folofola‘aki ‘a ia ‘oku kau ki ho‘o tamaio‘eiki ko au, mo hoku fale, ke ke fakapapau ia ‘o ta‘engata; pea ke fai hangē ko ho‘o folofola.

²⁴‘Io, ke fakapapau ia, pea ke fakahīkihiki‘i, ‘Eiki, ho huafa ‘o ta‘engata ‘o pehē, Ko Sihova Sāpaoti ko e ‘Otua ‘o ‘Isileli, ‘io, ko e ‘Otua ki ‘Isileli: pea ko e fale ‘o Tēvita ko ho‘o tamaio‘eiki kuo fokotu‘u ma‘u ‘i ho ‘ao.

²⁵He ko e ‘Afiona ko hoku ‘Otua kuo ke fanafana ki ho‘o sevāniti te ke langa hoku fale: ko hono ō ia kuo loto ai ho‘o tamaio‘eiki ke lotu ‘i ho ‘ao.

²⁶Pea ko eni, ‘e Sihova, ko koe ‘a e ‘Otua, pea kuo ke tala‘ofa ‘a e lelei ni ki ho‘o tamaio‘eiki ko au:

²⁷pea ko eni kuo lelei ki he ‘Afiona ke tāpuaki‘i ‘a e fale ‘o ho‘o tamaio‘eiki ke tu‘u ia ‘i ho ‘ao ‘o ta‘engata; he ko koe, ‘Eiki, kuo ke tāpuaki‘i, pea kuo tāpuekina ‘o ta‘engata.