Read KO E TOH TAPU KATOA TONGA 1 Kal 18 Bible Online

1 Kal 18 - KO E TOH TAPU KATOA TONGA bible

1 Kal 18

¹PEA hili ia tokua na‘e taa‘i ‘e Tēvita ‘a e kau Filisitia, ‘o ne fakavaivai‘i kinautolu, ‘o ne to‘o ‘a Kati mo hono ngaahi kolo fakaongo mei he nima ‘o e kau Filisitia.

²Pea ne taa‘i ‘a Moape; pea hoko ‘a Moape ko e kau tamaio‘eiki ‘a Tēvita, ‘o nau ‘omi tukuhau.

³Pea taa‘i ‘e Tēvita ‘a Hetatesa ko e Tu‘i Sopa, ‘o a‘u ki Hēmati, ‘i he‘ene ‘alu ke fokotu‘u ‘ene pule ‘i he vaitafe ko ‘Eufaletesi.

⁴Pea na‘e to‘o ‘e Tēvita meiate ia ha sāliote ‘e taha afe, mo ha kau heka hoosi ‘e toko fitu afe, mo e tau hā‘ele ‘e toko ua mano: pea hele uoua ‘e Tēvita ‘a e fanga hoosi toho sāliote, ka ne ta‘ofi pē ha fanga hoosi fe‘unga mo e sāliote ‘e teau.

⁵Pea ‘alu ‘a Sīlia Tāmasikusi ke tokoni kia Hetatesa ko e Tu‘i Sopa; pea taa‘i ‘e Tēvita ha toko ua mano mā ua afe ‘o e kau Sīlia.

⁶Pea tuku ‘e Tēvita ha kau le‘o ki Sīlia Tāmasikusi, pea hoko ‘a Sīlia ko e kau tamaio‘eiki ‘a Tēvita, ‘o nau ‘omi tukuhau. Pea na‘e fakatu‘umālie‘i ‘a Tēvita ‘e he ‘Eiki ‘i he‘ene ngaahi ‘alu kotoa pē.

⁷Pea to‘o ‘e Tēvita ‘a e ngaahi pā koula na‘e ‘i he kau tamaio‘eiki ‘a Hetatesa, ‘o ne ha‘u mo ia ki Selusalema.

⁸Pea na‘e ma‘u ‘e Tēvita ha kapa lahi ‘aupito mei Tīpati mo Kuni ko e ongo kolo ‘o Hetatesa, ‘a ia na‘e ngaohi ‘aki ‘e Solomone ‘a e Tahi Palasa, mo e ngaahi pou, mo e nāunau palasa.

⁹Pea ‘i he fanongo ‘e Tou ko e Tu‘i Hēmati kuo taa‘i ‘e Tēvita ‘a e hōsitē kotoa ‘a Hetatesa ko e Tu‘i Sopa,

¹⁰na‘a ne fekau hono foha ko Hatolami kia Kingi Tēvita ke fetapa ki ai, pea ke fakamālō‘ia, koe‘uhi ko ‘ene tau mo Hetatesa mo taa‘i ia; (he na‘a na vātau ‘a Tou mo Hetatesa) pea ne to‘o ha nāunau kehekehe na‘e koula mo siliva mo kapa.

¹¹Pea na‘e fakatāpui mo ia foki ‘e Kingi Tēvita ma‘a Sihova, fakataha mo e siliva mo e koula kuo ne ‘omi mei he ngaahi pule‘anga kehekehe; mei ‘Ītomi, pea mei Moape, pea meia ha‘a ‘Āmoni, pea mei he kau Filisitia, pea mei ‘Amaleki.

¹²Pea ko ‘Apisai, ko e tama ‘a Seluvaia, na‘a ne taa‘i ‘a ‘Ītomi ‘i he Tele‘a Māsima, ko e toko taha mano mā toko valu afe.

¹³Pea na‘a ne tuku ha ngaahi kau le‘o ‘i ‘Ītomi: pea na‘e hoko ‘a e kau ‘Ītomi kotoa pē ko e kau tamaio‘eiki ‘a Tēvita. Pea na‘e fakatu‘umālie ‘e he ‘Eiki ‘a Tēvita ‘i he‘ene ngaahi ‘alu kotoa.

¹⁴Pea na‘e pule ‘a Tēvita ki ‘Isileli kātoa, pea ne feia ‘a e fakamaau mo e fakatonutonu ma‘a hono kakai kotoa.

¹⁵Pea ko Sioape ko e tama ‘a Seluvaia na‘e ‘eikitau; pea ko Sihosafate foha ‘o ‘Ahiluti na‘e ‘a‘ana ‘a e tohi Kalonikali.

¹⁶Pea ko Sātoki foha ‘o ‘Ahitupi mo ‘Ahimeleki foha ‘o ‘Āpaiata na‘e taula‘eiki; pea ko Sausa[56] na‘e sikalaipe.

¹⁷Pea ko Penaia foha ‘o Sihoiata na‘a ne pule ki ha‘a Kēleti mo Pēliti; pea ko e ngaahi foha ‘o Tēvita na‘a nau mu‘omu‘a ‘i he kau tokoni ki he tu‘i.