Read KO E TOH TAPU KATOA TONGA 1 Kal 19 Bible Online

1 Kal 19 - KO E TOH TAPU KATOA TONGA bible

1 Kal 19

¹PEA hili ia tokua na‘e pekia ‘a Nā‘asi ko e Tu‘i Ha‘a ‘Āmoni, pea fetongi ia ‘e hone foha.

²Pea pehē ‘e Tēvita, Te u fai ‘ofa kia Hānuni foha ‘o Nā‘asi, he na‘e fai ‘ofa ‘e he‘ene tamai kiate au. Ko ia na‘e tuku atu ‘e Tēvita ha kau talafekau ke fakalelulelu kiate ia koe‘uhi ko ‘ene tamai. Pea na‘e a‘u ‘a e kau tamaio‘eiki ‘a Tēvita ki he fonua ‘o ha‘a ‘Āmoni kia Hānuni, ke fakalelulelu kiate ia.

³Pea lea ‘a e hou‘eiki ‘o ha‘a ‘Āmoni kia Hānuni ‘o pehē, ‘Oku ke mahalo ko e fakahīkihiki‘i ‘e Tēvita ‘a ho‘o tamai ‘ene fekau mai ha kau fakalelulelu? ‘Ikai kuo ha‘u ‘ene kau tamaio‘eiki kia koe ke hakule mo hamu mo mataki‘i ‘a e fonua?

⁴Ko ia na‘e puke ‘e Hānuni ‘a e kau tamaio‘eiki ‘a Tēvita, ‘o ne tele kinautolu, mo ne tu‘usi honau kofu fe‘unga mo e kongaloto ke hā ‘a e tu‘ungaiku, ‘o ne fekau ke nau ‘alu.

⁵Pea ō ha ni‘ihi, ‘o fakahā kia Tēvita ‘a e me‘a kuo fai ki he kau tangata. Pea ne tuku atu ha talafekau ke fakafetaulaki kiate kinautolu; he na‘e mā ‘aupito ‘a e tu‘unga me‘a. Pea folofola ‘a e tu‘i, Tatali pē ‘i Sielikō kae‘oua ke tupu homou kava, pea mou toki foki mai.

⁶Pea ‘i he vakai ‘e ha‘a ‘Āmoni kuo nau fakanamukuu‘i kinautolu ‘i he ‘ao ‘o Tēvita, na‘e tuku atu ‘e Hānuni mo ha‘a ‘Āmoni ‘a e taleniti siliva ‘e afe ke nō sāliote mai, mo ha kau heka hoosi mei Mesopotēmia, pea mei Sīlia-Mā‘aka, pea mei Sopa.

⁷Ko ia, na‘a nau nō mai ha sāliote ‘e tolu mano mā ua afe, pea mo e Tu‘i Mā‘aka mo hono kakai; ‘a ia na‘a nau omi, ‘o ‘apitanga ‘i he potu hahake ‘o Mētepa. Na‘e fakataha mai foki ‘a ha‘a ‘Āmoni mei honau ngaahi kolo, ‘o nau ha‘u ki he tau.

⁸Pea ‘i he fanongo ki ai ‘e Tēvita, na‘a ne fekau atu ‘a Sioape mo e Hōsitē kotoa ‘o e kau to‘a.

⁹Pea hū kitu‘a ‘a ha‘a ‘Āmoni, ‘o nau fakatē tau ‘i he hū‘anga ki kolo; pea ko e ngaahi tu‘i kuo omi na‘a nau ‘i ha potu kehe mei ‘uta.

¹⁰Pea ‘i he vakai ‘e Sioape ‘oku tu‘u mai ‘a e matatau mei ‘ao mo tu‘a, na‘a ne fili ha ni‘ihi mei he lelei ‘o ‘Isileli, ‘o ne fakatē ke tali ‘a Sīlia.

¹¹Ka ko hono toe ‘o e kakai na‘a ne tuku ki he nima ‘o hono tokoua ko ‘Apisai, ‘o nau fakatē ke tali ‘a ha‘a ‘Āmoni.

¹²Pea ne pehē, Kapau ‘e mālohi fau kiate au ‘a Sīlia, pea te ke tokoni mai: pea kapau ‘e mālohi fau ‘a ha‘a ‘Āmoni kiate koe, pea te u tokoni atu.

¹³Tu‘u hifo ka tau fai ngali tangata, telia hotau kakai, pea telia ‘a e ngaahi kolo ‘o hotau ‘Otua: pea ke fai ā ‘e Sihova ‘a e me‘a ‘oku hā lelei kiate ia.

¹⁴Pea ‘unu‘unu atu ‘a Sioape mo e kakai na‘e ‘iate ia ki he ‘ao ‘o e kau Sīlia ke fakahoko ‘a e tau: pea na‘a nau hola mei hono ‘ao.

¹⁵Pea ‘i he vakai ‘e ‘Āmoni ‘oku hola ‘a Sīlia, pea nau hola ‘e kinautolu foki mei he ‘ao ‘o hono tokoua ko ‘Apisai, ‘o nau hū ki kolo. Toki ha‘u ‘a Sioape ki Selusalema.

¹⁶Pea ‘i he vakai ‘e Sīlia kuo nau vaivai ‘i he ‘ao ‘o ‘Isileli, na‘a nau tuku atu ha kau talafekau, ‘o nau fakahū kitu‘a ‘a Sīlia na‘e nofo ki tu‘a Vaitafe, pea taki ‘e Sōfaki ko e ‘eikitau ‘a Hetatesa.

¹⁷Pea na‘e fakahā kia Tēvita; pea ne tānaki ‘a ‘Isileli kātoa ‘o ne a‘a ‘i Soatani, ‘o ne a‘u kiate kinautolu, ‘o ne fakatē tau ki ai. Pea kuo fakatē ‘e Tēvita ‘ene tau ke tali ‘a Sīlia; pea nau fakahoko tau mo ia.

¹⁸Pea na‘e hola ‘a Sīlia mei he ‘ao ‘o ‘Isileli; pea na‘e tāmate‘i ‘e Tēvita ‘i he kau Sīlia ‘a e tau sāliote ‘e fitu afe, mo e tau hā‘ele ‘e toko fā mano: ‘o ne tāmate‘i ‘a Sōfaki ko e ‘eikitau.

¹⁹Pea ‘i he vakai ‘e he kau tamaio‘eiki ‘a Hetatesa kuo nau vaivai ‘i he ‘ao ‘o ‘Isileli, na‘a nau fakalelei mo Tēvita, ‘o nau fakaongo ki ai: pea na‘e ‘ikai loto ‘a e kau Sīlia ke toe tokoni ki ha‘a ‘Āmoni.