Read KO E TOH TAPU KATOA TONGA 1 Kal 2 Bible Online

1 Kal 2 - KO E TOH TAPU KATOA TONGA bible

1 Kal 2

¹KO E ha‘a ‘Isileli eni; ko Lūpeni, Simione, Līvai, mo Siuta, ko ‘Īsaka mo Sepulone;

²ko Tani, Siosifa mo Penisimani, ko Nafitalai, Kata, mo ‘Āseli.

³Ko e ha‘a Siuta; ko ‘Ea, mo ‘Ōnani, mo Sela; ko e toko tolu ko ia na‘e fā‘ele‘i kiate ia ‘e Patisua ko e fefine Kēnani. Pea ko ‘Ea ko e ‘uluaki foha ‘o Siuta ko e tangata kovi ‘i he ‘afio ‘a Sihova.

⁴Pea ko Tema ko e uaifi ‘o hono foha na‘a ne fā‘ele‘i kiate ia ‘a Felesi, mo Sala. Ko e lau kotoa ‘o e ngaahi foha ‘o Siuta ko e toko nima.

⁵Ko e ha‘a Felesi; ko Heseloni, mo Hāmuli.

⁶Pea ko e ha‘a Sala; ko Similai, mo ‘Ētani, mo Hēmani, mo Kalikoli, mo Tala: kātoa ko e toko nima.

⁷Pea ko e ha‘a Kālimi; ko ‘Ākali ko e Fakamamahi ‘o ‘Isileli, ‘a ia na‘a ne fai kākā ‘i he me‘a kuo tapui.

⁸Pea ko e ha‘a ‘Ētani; ko ‘Asalaia.

⁹Pea ko e ha‘a Heseloni, ‘a e ngaahi foha ‘o Heseloni na‘e fā‘ele‘i kiate ia; ko ‘Ilame‘eli, mo Lame, pea mo Kelupai.

¹⁰Pea tupu ‘ia Lame ‘a ‘Aminatape; pea tupu ‘ia ‘Aminatape ‘a Na‘asoni, ko e ‘eiki ‘o ha‘a Siuta;

¹¹pea tupu ‘ia Na‘asoni ‘a Salema, pea tupu ‘ia Salema ‘a Poasi;

¹²pea tupu ‘ia Poasi ‘a ‘Ōpeti, pea tupu ‘ia ‘Ōpeti ‘a Sese.

¹³Pea tupu ‘ia Sese ‘a ‘Eliapi; ko hono ‘uluaki ia, mo ‘Aminatape ko hono ua, mo Sima ko hono tolu;

¹⁴ko Nātaniela ko hono fā, ko Latai hono nima;

¹⁵ko ‘Ōsemi hono ono, ko Tēvita ko hono toko fitu:

¹⁶pea ko honau tuofāfine ‘a Seluvaia mo ‘Apikale. Pea ko e hako ‘o Seluvaia ko ‘Apisai mo Sioape, mo ‘Asaeli, ko e toko tolu.

¹⁷Pea fanau‘i ‘e ‘Apikale ‘a ‘Āmasa; pea ko e tamai ‘a ‘Āmasa ‘a e ‘Isime‘eli ko Sēteli.

¹⁸Pea ko Kēlepi foha ‘o Heseloni na‘a ne ma‘u fānau ‘ia ‘Āsupa (ko hono uaifi ia), pea ‘ia Siliote: pea ko eni ‘a e fānau ‘a e fefine ko ē;[7] ko Sēseli, mo Sōpapi, mo A‘atoni.

¹⁹Pea pekia ‘a ‘Āsupa, pea mali ‘a Kēlepi mo ‘Efalata, ‘a ia na‘a ne fanau‘i kiate ia ‘a Hua.

²⁰Pea tupu ‘ia Hua ‘a ‘Uli, pea tupu ‘ia ‘Uli ‘a Pesalili.

²¹Pea hili ia na‘e ‘alu ‘a Heseloni ki he ‘ōfefine ‘o Mākili ko e tupu‘anga ‘o Kiliati, ‘o ne mali mo ia kuo ne onongofulu ta‘u; pea ne fanau‘i kiate ia ‘a Sēkupi.

²²Pea tupu ‘ia Sēkupi ‘a Siaili, ‘a ia na‘a ne ma‘u[8] ha kolo ‘e uofulu mā tolu ‘i he fonua ko Kiliati.

²³Ka ko Kēsuli mo Sīlia na‘a nau to‘o meiate kinautolu ‘a e ‘ū vilisi ‘o Siaili, mo Kēnati mo hono ngaahi kolo fakaongo, ko e kolo ‘e onongofulu. Ko e hako kotoa pē eni ia ‘o Mākili ko e tupu‘anga ‘o Kiliati.

²⁴Pea hili ‘a e pekia ‘a Heseloni ‘i Kēlepi-‘Efalata, pea fanau kiate ia ‘e hono uaifi ko ‘Āpaia[9] ‘a ‘Asihua ko e tupu‘anga ‘o Tekoa.

²⁵Pea ko e hako ‘o ‘Ilame‘eli, ko e ‘uluaki foha ‘o Heseloni, ko Lame ‘a e ‘uluaki, mo Puna, mo ‘Ōleni, mo ‘Ōsemi ‘ia ‘Āhaia.

²⁶Ka na‘e ma‘u ‘e ‘Ilame‘eli mo ha ‘unoho ‘e taha na‘e hingoa ko ‘Ātala; ko e fa‘ē ia ‘a ‘Ōnami.

²⁷Pea ko e hako ‘o Lame, ko e ‘uluaki foha ‘o ‘Ilame‘eli, ko Mā‘asi, mo Siamini, mo ‘Ēkeli.

²⁸Pea ko e hako ‘o ‘Ōnami; ko Samai, mo ‘Iata: pea ko e hako ‘o Samai ko Nātapi, mo ‘Apisuli.

²⁹Pea ko e hingoa ‘o e uaifi ‘o ‘Apisuli ko ‘Apihaili; pea ne fanau kiate ia ‘a ‘Ahipani mo Mōlita.

³⁰Pea ko e hako ‘o Nātapi; ko Sēleti mo ‘Apaimi: ka na‘e pekia ‘a Sēleti ta‘eha‘ane fānau.

³¹Pea ko e hako ‘o ‘Apaimi ko ‘Isi. Pea ko e hako ‘o ‘Isi ko Sēsani. Pea ko e hako ‘o Sēsani; ko A‘alai.

³²Pea ko e hako ‘o ‘Iata, ko e tehina ‘o Samai, ko Sēteli mo Sionatane: pea pekia ‘a Sēteli ta‘eha‘ane fānau.

³³Pea ko e hako ‘o Sionatane; ko Pēleti mo Sasa. Ko eni ia ‘a e hako ‘o ‘Ilame‘eli.

³⁴Pea ko Sēsani na‘e ‘ikai hano foha, ko e fānau fefine pē. Ka na‘e ai ‘ene tamaio‘eiki ko e motu‘a ‘Isipite na‘e hingoa ko Siala‘a.

³⁵Pea ‘ange ‘e Sēsani hono ‘ōfefine ki he‘ene tamaio‘eiki ko Siala‘a ke na nonofo; pea ne fanau kiate ia ‘a ‘Ātai.

³⁶Pea tupu ‘ia ‘Ātai ‘a Nētane, pea tupu ‘ia Nētane ‘a Sāpati;

³⁷pea tupu ‘ia Sāpati ‘a ‘Efilali, pea tupu ‘ia ‘Efilali ‘a ‘Ōpeti;

³⁸pea tupu ‘ia ‘Ōpeti ‘a Sehu, pea tupu ‘ia Sehu ‘a ‘Asalaia;

³⁹pea tupu ‘ia ‘Asalaia ‘a Hēlesi,

⁴⁰pea tupu ‘ia Hēlesi ‘a ‘Ēlasa; pea tupu ‘ia ‘Ēlasa ‘a Sisimai, pea tupu ‘ia Sisimai ‘a Sālumi;

⁴¹pea tupu ‘ia Sālumi ‘a ‘Ikamaia, pea tupu ‘ia ‘Ikamaia ‘a ‘Elisama.

⁴²Pea ko e hako ‘o Kēlepi ko e tehina ‘o ‘Ilame‘eli; ko Mēsa‘a ‘a e ‘uluaki, ‘a ia ko e tupu‘anga ‘o Sifi; pea ko e hako ‘o Sifi ko Mālesa ko e tupu‘anga ‘o Hepeloni.[10]

⁴³Pea ko e hako ‘o Hepeloni; ko Kola, mo Tapua, mo Lēkemi, mo Sema.

⁴⁴Pea tupu ‘ia Sema ‘a Lāhami ko e tupu‘anga ‘o Siokeami; pea tupu ‘ia Lēkemi ‘a Samai.

⁴⁵Pea ko e foha ‘o Samai ko Maoni; pea ko Maoni ko e tupu‘anga ‘o Pete-Sua.

⁴⁶Pea ko ‘Efa, ko e sinifu ‘a Kēlepi, na‘a ne fanau‘i ‘a Kālana, mo Mosia, mo Kāsesa: pea tupu ‘ia Kālana ‘a Kāsesa.

⁴⁷Pea ko e hako ‘o ‘Iatai; ko Lēkemi mo Siotame, mo Keisani, mo Pēleti, mo ‘Efa, mo Sā‘afi.

⁴⁸Ko e sinifu ‘a Kēlepi ko Mā‘aka na‘a ne fanau‘i ‘a Sēpeli, mo Tīlana.

⁴⁹Na‘a ne fanau‘i foki ‘a Sā‘afi ko e tupu‘anga ‘o Matemana ‘a Seua ko e tupu‘anga ‘o Makapena, mo e tupu‘anga ‘o Kipea; pea ko e ‘ōfefine ‘o Kēlepi ko ‘Ākesa. Ko eni ia ‘a e hako ‘o Kēlepi.

⁵⁰Ko e hako ‘o Hua, ko e ‘uluaki tama ‘a ‘Efalata, ko Sōpale ko e tupu‘anga ‘o Kiliati-Sialimi;

⁵¹ko Salema ko e tupu‘anga ‘o Pētelihema, ko Hālefa ko e tupu‘anga ‘o Pete-kāteli.

⁵²Pea na‘e ai ha hako ‘o Sōpale ko e tupu‘anga ‘o Kiliati-sialimi; ko Hāloe ko e vaeua ‘o ha‘a Mēnuha.

⁵³Pea ko e ngaahi fāmili ‘o Kiliati-sialimi; ko e ha‘a Sēteli, mo e ha‘a Puhi, mo e ha‘a Sūmaha, mo ha‘a Misila‘a; na‘e tupu meiate kinautolu ‘a e ha‘a Sola, pea mo e ha‘a ‘Esitaoli.

⁵⁴Ko e hako ‘o Salema ko Pētelihema, mo e ha‘a Nētofa, ko ‘Ataloti-Pete-Sioape, mo e vaeua ‘o ha‘a Mānaha, ko e ha‘a Sola.

⁵⁵Pea ko e ngaahi fāmili sikalaipe na‘e nofo ‘i Siepesi; ko e kau Tīla‘a, ko e kau Sīma‘a, ko e kau Suka. Ko kinautolu ‘a e kau Kieni na‘e tupu meia Hāmati ko e tupu‘anga ‘o e fale ‘o Lēkapi.