Read KO E TOH TAPU KATOA TONGA 1 Kal 21 Bible Online

1 Kal 21 - KO E TOH TAPU KATOA TONGA bible

1 Kal 21

¹PEA tu‘u ‘a Sētane ke fai ha me‘a ki ‘Isileli, ‘o ne ue‘i ‘a Tēvita ke lau ‘a ‘Isileli.

²Pea folofola ‘a Tēvita kia Sioape mo e hou‘eiki ‘o e kakai, ‘Alu, ‘o tohi ‘a ‘Isileli mei Peasipa ‘o a‘u ki Tani; pea ‘omi kiate au ke u ‘ilo honau tokolahi.

³Pea fakatau folofola ‘e Sioape, ‘o pehē, ‘Ofa ange ‘a Sihova ke ne fakatupu hono kakai ke tu‘o teau ange honau tokolahi: Ka ko eni, ‘Ēī, ‘ikai ‘oku nau nofo mai kotoa pē ke tali fatongia ki he Feitu‘u na? Ko e hā ‘oku tangi ai ‘a e ‘Afio ki he me‘a ni? koe‘uma‘ā ke hoko ‘a e ‘Afio ko e fakatupu halaia‘anga ki ‘Isileli?

⁴Ka na‘e mamafa ‘a e folofola ‘a e tu‘i ‘i ha‘a Sioape. Ko ia, na‘e hū kitu‘a ‘a Sioape, ‘o ne fe‘alu‘aki ‘i ‘Isileli kātoa, ‘o ne toki ha‘u ki Selusalema.

⁵Pea ‘atu ‘e Sioape kia Tēvita ‘a e tohi ‘o e lau ‘o e kakai. Pea tā ko ‘Isileli kātoa na‘e to‘o heletā, ko e toko taha miliona mo e toko taha kilu; pea ko e Siuta na‘e to‘o heletā na‘e toko fā kilu mā toko fitu mano.

⁶Ka ko Līvai mo Penisimani na‘e ‘ikai te ne lau; he ko e me‘a ‘a e tu‘i na‘e mousa‘a‘ia ai ‘a Sioape.

⁷Pea na‘e tau kovi ‘a e me‘a ni ki he finangalo ‘o ‘Elohimi, pea ne taa‘i ‘a ‘Isileli.

⁸Pea fakatau folofola ‘e Tēvita kia ‘Elohimi, Kuo u mātu‘aki hia ‘i he‘eku fai ‘a e me‘a ni; ka ko eni, ke ke fakamolemole mu‘a ‘a e kovi ‘a ho‘o tamaio‘eiki; he kuo u fai vale ‘aupito.

⁹Pea folofola ‘a Sihova kia Kata ko e tongafisi ‘a Tēvita, ‘o pehē,

¹⁰‘Alu ‘o lea kia Tēvita, ‘o pehē, Ko eni ‘a e folofola ‘a Sihova, ‘Oku ou humaki atu ha me‘a ‘e tolu: fili hanau taha ma‘au ke u fai kiate koe.

¹¹Ko ia, na‘e hū ‘a Kata kia Tēvita, ‘o ne pehē ange, Ko e folofola eni ‘a Sihova:

¹²To‘o ‘a e me‘a ‘oku ke loto ki ai; ha tolu‘i ta‘u ke honge; pe ha tolu‘i māhina ke keina koe ‘e ho kau fakamamahi, mo e tuli tā pē ‘e ho ngaahi fili; pe ko e tolu‘i ‘aho ‘a e fai ‘e he heletā ‘a Sihova, ‘io, ‘a e mahaki faka‘auha ‘i he fonua, mo e ‘āngelo ‘a Sihova ‘oku ne fakaeve ‘i he feitu‘u kotoa ‘o ‘Isileli. Pea ko eni, ke ke vakai pe ko e hā ‘a e tali te u foki mo au kiate ia na‘e fai hoku fekau.

¹³Pea pehē, ‘e Tēvita kia Kata, Kuo u ‘efihia ‘aupito: ka u tō mu‘a ki he nima ‘o e ‘Eiki, he ‘oku lahi ‘aupito ha‘ana ‘alo‘ofa; kae ‘oua na‘a ku tō ki he nima ‘o e tangata.

¹⁴Ko ia na‘e tuku atu ‘e Sihova ha mahaki faka‘auha ki ‘Isileli, pea na‘e tō ‘i ‘Isileli ha kau tangata ‘e toko fitu mano.

¹⁵Pea fekau ‘e ‘Elohimi ha ‘āngelo ki Selusalema ke faka‘auha ia: ka ‘i he‘ene fai ke faka‘auha na‘e me‘a ki ai ‘a Sihova, ‘o ne momou ‘i he kovi, ‘o ne folofola ki he ‘āngelo na‘e fai ‘a e faka‘auha, Ma‘u ā: ta‘ofi eni ho nima. Pea ‘oku tu‘u ‘a e ‘āngelo ‘a Sihova fe‘unga mo e haha‘anga ‘o e Siepusi ko ‘Olanani.

¹⁶Pea tāngaki hake ‘a Tēvita, ‘o ne vakai ‘a e ‘āngelo ‘a Sihova ‘oku ne tu‘u ‘i he vaha‘a ‘o langi mo māmani, pea kuo ne ofa ‘ene heletā, ‘o mafao atu ‘i ‘olunga ki Selusalema. Pea tō fo‘ohifo ‘a Tēvita mo e kau mātu‘a kuo nau ‘ai tauanga‘a.

¹⁷Pea fakatau folofola ‘a Tēvita kia ‘Elohimi, ‘Ikai ko au na‘e fekau ke lau ‘a e kakai? ‘Io, ko au ia: kuo u hia mo fai kovi ‘aupito; ka ko e fanga sipi na ko e hā ‘anautolu kuo fai? ‘E Sihova, ko hoku ‘Otua, ke tō mu‘a ho‘o tā kiate au, pea ki he fale ‘o ‘eku tamai, kae ‘oua ‘e tō ‘a e mala ki he kakai.

¹⁸Toki lea ‘a e ‘āngelo ‘a Sihova kia Kata ke ne tala kia Tēvita ke ne ‘alu hake, ‘o langa ha ‘ōlita kia Sihova ‘i he haha‘anga ‘o e Siepusi ko ‘Olanani.

¹⁹Ko ia na‘e ‘alu hake ‘a Tēvita ‘i he lea na‘e fai ‘e Kata ‘i he huafa ‘o Sihova.

²⁰Pea sītu‘a ‘a ‘Olanani, ‘o sio ki he ‘āngelo, pea toi leva hono foha ‘e toko fā na‘e ‘iate ia. Pea ‘oku fai ‘e ‘Olanani ‘ene haha uite.

²¹Pea ‘i he ha‘u ‘a Tēvita kia ‘Olanani, pea tokanga atu ‘a ‘Olanani, ‘o ne vakai tā ko Tēvita, pea ne hū kitu‘a mei he haha‘anga, ‘o ne tō fo‘ohifo, ‘o fai ‘ene faka‘apa‘apa kia Tēvita. Pea me‘a ‘e Tēvita kia ‘Olanani.

²²Tuku mai ‘a e tu‘unga haha‘anga ka u langa ai ha ‘ōlita kia Sihova: te ke tuku mai ka u ‘atu hono pa‘anga totonu; kae ta‘ofi ‘a e mala mei he kakai.

²³Pea fakatau folofola ‘e ‘Olanani kia Tēvita, Ma‘u pē ‘e he ‘afiona, pea ke fai ‘e he ‘afio ‘a e tu‘i ‘a e me‘a ‘oku ne finangalo ki ai: vakai, ‘oku ou ‘atu ‘a e fanga pulu mo‘o feilaulau mōifua, mo e ngaahi me‘a haha ke fefie‘aki, mo e uite mo‘o feilaulau me‘akai: ‘oku ou ‘atu hono kotoa.

²⁴Pea folofola ‘a Kingi Tēvita kia ‘Olanani, ‘Ikai; ka te u mātu‘aki fakatau ‘aki hono pa‘anga totonu; ‘e ‘ikai te u ‘atu ki he ‘Eiki ‘a e me‘a ‘a‘au, pe feia ha ngaahi feilaulau kuo u ma‘u fakafiemālie.

²⁵Ko ia na‘e ‘ange ‘e Tēvita kia ‘Olanani ki he tu‘unga ha onongeau‘i sikeli koula na‘e fua.

²⁶Pea langa ‘e Tēvita ‘i he potu ko ia ha ‘ōlita kia Sihova, ‘o ne feia ai ‘ani feilaulau-mōifua mo ‘ofa, ‘o ne tautapa kia Sihova; pea ne tali ‘aki ha afi na‘e hifo mei he langi ki he ‘ōlita feilaulau.

²⁷Pea folofola ‘e Sihova ki he ‘āngelo, ‘o ne fakafoki ‘ene heletā ki hono ‘ai‘anga.

²⁸‘I he taimi ko ia, ‘i he vakai ‘e Tēvita ne tali ia ‘e he ‘Eiki ‘i he haha‘anga ‘o e Siepusi ko ‘Olanani; pea ne hanga ‘o fai feilaulau ‘i he potu ko ia.

²⁹He ko e Tāpanekale ‘o Sihova, ‘a ia na‘e ngaohi ‘e Mōsese ‘i he Toafa, pea mo e ‘ōlita tutu‘anga feilaulau, na‘e ‘i he sia ‘i Kipione ‘i he taimi ko ia.

³⁰Ka na‘e ‘ikai lava ‘e Tēvita ke ‘alu ki ai ke fai ‘ene huhū ki he ‘Otua, he na‘a ne manavahē telia ‘a e heletā ‘a e ‘āngelo ‘a e ‘Eiki. Pea folofola ‘a Tēvita, Ko eni ‘a e fale ‘o Sihova ‘Elohimi, pea ko eni ia ‘a e ‘ōlita tutu‘anga feilaulau ma‘a ‘Isileli.