Read KO E TOH TAPU KATOA TONGA 1 Kal 24 Bible Online

1 Kal 24 - KO E TOH TAPU KATOA TONGA bible

1 Kal 24

¹PEA ko e me‘a ki he ngaahi lakanga ‘o ha‘a ‘Ēlone. Ko e ngaahi foha ‘o ‘Ēlone; ko Nātapi mo ‘Āpiu, ko ‘Eliesa mo ‘Ītama.

²Ka na‘e pekia ‘a Nātapi mo ‘Āpiu ‘i he kei lelei ‘ena tamai, ‘o ‘ikai ha‘ana fānau: ko ia na‘e fai ‘a e ngāue fakataula‘eiki ‘e ‘Eliesa mo ‘Ītama.

³Pea na‘e vahe pē kinautolu ‘e Tēvita, ‘o fakatatau ki he hokohoko ‘enau ngāue, ‘o kau ai ‘a Sātoki mei he fāmili ‘o ‘Eliesa, pea mo ‘Ahimeleki mei he fāmili ‘o ‘Ītama.

⁴Pea ko e kau ‘ulumotu‘a na‘e ma‘u ‘i ha‘a ‘Eliesa na‘e lahi ‘i ha‘a ‘Ītama; ko ia na‘e pehē honau vahevahe: ‘i ha‘a ‘Eliesa ko e ‘ulumotu‘a ‘e hongofulu mā ono; pea ‘i ha‘a ‘Ītama ko e ‘ulumotu‘a ‘e valu.

⁵Pea na‘e talotalo tatau pē ki hē mo ē ‘i honau vahevahe; he kuo ‘i ai ha hou‘eiki ‘o e Fale Tapu, mo e hou‘eiki ‘o ‘Elohimi mei ha‘a ‘Eliesa mo ha‘a ‘Ītama fakatou‘osi.

⁶Pea ko Sēmaia foha ‘o Nātaniela ‘a e sikalaipe, ‘a ia ko e tangata Līvai, na‘a ne tohi kinautolu ‘i he ‘ao ‘o e tu‘i mo e hou‘eiki, mo Sātoki ko e taula‘eiki mo ‘Ahimeleki foha ‘o ‘Āpaiata, mo e kau ‘ulumotu‘a ‘o ha‘a taula‘eiki mo ha‘a Līvai: pea na‘e to‘o mai ha ‘ulumotu‘a ‘e taha ma‘a ‘Eliesa, mo ha ‘ulumotu‘a ‘e taha ma‘a ‘Ītama, ‘o pehē pē.

⁷Pea na‘e tonu ‘a e ‘uluaki kia Sihoialipi, pea ko hono ua kia ‘Ītaia,

⁸ko hono tolu kia Hālimi, ko hono fā kia Sōlimi,

⁹ko hono nima kia Malakaia, ko hono ono kia Misiamini,

¹⁰ko hono fitu kia Hākosi, ko hono valu kia ‘Āpaia,

¹¹ko hono hiva kia Sisua, ko hono hongofulu kia Sekonaia,

¹²ko hono hongofulu mā taha kia ‘Eliasipi, ko hono hongofulu mā ua kia ‘Iakimi,

¹³ko hono hongofulu mā tolu kia Hupa, ko hono hongofulu mā fā kia Sesepapi;

¹⁴ko hono hongofulu mā nima kia Pīleka, ko hono hongofulu mā ono kia ‘Īmeli,

¹⁵ko hono hongofulu mā fitu kia Hēsili, ko hono hongofulu mā valu kia Hapisesi,

¹⁶ko hono hongofulu mā hiva kia Petahaia, ko hono uofulu kia ‘Isikeli,

¹⁷ko hono uofulu mā taha kia Siakini, ko hono uofulu mā ua kia Kāmuli,

¹⁸ko hono uofulu mā tolu kia Telaia, ko hono uofulu mā fā kia Ma‘asaia.

¹⁹Ko e hokohoko ia ‘o ‘enau ngāue, ke hū ki he fale ‘o Sihova hangē ko e konisitūtone na‘e ‘ange ‘e he‘enau kui ko ‘Ēlone, ‘i he funga ‘o hono fekau ‘e Sihova ko e ‘Otua ‘o ‘Isileli.

²⁰Pea ko e me‘a ki hono toe ‘o ha‘a Līvai: ‘i he hako ‘o ‘Amilami, ko Supaeli; ‘i he hako ‘o Supaeli ko ‘Iehetaia.

²¹‘Ia Lehapaia: ‘i he ha‘a Lehapaia, ko ‘Īsaia na‘e ‘uluaki:

²²‘i he ha‘a ‘Īsa‘a, ko Selomoti; ‘i he ha‘a Selomoti, ko ‘Iahati.

²³Pea ko e ha‘a…. ko ‘Ielaia…. ko ‘Amalaia hono ua, ko ‘Iakasili hono tolu, ko Sikamami hono fā.

²⁴Ko e hako ‘o ‘Osieli, ko Maika; ‘i he ha‘a Maika, ko Sāmili.

²⁵Ko e tokoua ‘o Maika ko ‘Īsaia: ‘i he ha‘a ‘Īsaia, ko Sākalaia.

²⁶Ko e hako ‘o Mēlali; ko Māhali mo Musi: ko e hako ‘o ‘Ia‘asaia; ko Peno.

²⁷Ko e hako ‘o Mēlali; ‘ia ‘Ia‘asaia; ko Peno mo Sōhami, mo Sākuli mo ‘Īpeli.

²⁸‘Ia Māhali; ko ‘Eliesa, ka na‘e ‘ikai hano foha.

²⁹‘Ia Kisi; ko e ha‘a Kisi, ko ‘Ilame‘eli.

³⁰Pea ko e hako ‘o Musi; ko Māhali, mo ‘Ēteli, mo ‘Ilimoti. Ko ha‘a Līvai ia, ‘o faka-e-honau-ngaahi-‘ulumotu‘a.

³¹Pea na‘e fai talotalo ‘a kinautolu foki, ‘o hangē ko honau kāinga ko ha‘a ‘Ēlone ‘i he ‘ao ‘o Kingi Tēvita, mo Sātoki, mo ‘Apimeleki, mo e ngaahi ‘ulumotu‘a ‘o ha‘a taula‘eiki mo ha‘a Līvai: ‘o ‘ulu tatau ‘a e ta‘okete mo e tehina.