Read KO E TOH TAPU KATOA TONGA 1 Kal 5 Bible Online

1 Kal 5 - KO E TOH TAPU KATOA TONGA bible

1 Kal 5

¹PEA ko e hako ‘o Lūpeni ko e ‘uluaki foha ‘o ‘Isileli, (he ko e ‘uluaki; ka ko e me‘a ‘i he‘ene ‘uli‘i ‘a e mohenga ‘o ‘ene tamai na‘e tuku ‘a e tu‘unga ‘o e ‘uluaki ki he hako ‘o Siosifa ko e foha ‘o ‘Isileli: ka ‘e ‘ikai fai ‘a e tohi hohoko ‘i he tu‘unga ‘o e ‘uluaki,

²he na‘e mālohi ‘a Siuta ‘i hono ngaahi tokoua, pea na‘e mei ai ‘a e ‘eiki; ka ko e tu‘unga hoko na‘e ‘ia Siosifa) —

³ko e hako ‘o Lūpeni ko e ‘uluaki foha ‘o ‘Isileli; ko ‘Īnoke mo Fala, ko Heseloni mo Kālimi.

⁴Ko e hako ‘o Sioeli; ko Sēmaia hono foha, ko Koki hono foha ‘o‘ona, ko Simi hono foha ‘o‘ona;

⁵ko Maika hono foha ‘o‘ona, ko Laia hono foha ‘o‘ona, ko Peali hono foha ‘o‘ona;

⁶ko Pea hono foha ‘o‘ona, ‘a ia na‘e taki pōpula ‘e Tilikati Pilinesa ko e Tu‘i ‘Āsilia: ko e ‘eiki ia ‘o ha‘a Lūpeni.

⁷Pea ko hono kāinga ‘i he lau fakafāmili ‘i he fai honau tohi hohoko, ko e tu‘ukimu‘a ko Sieli, mo Sākalaia;

⁸mo Pela ko e foha ‘o ‘Āsasi, foha ‘o Sema, foha ‘o Sioeli, ‘a ia na‘e nofo ‘i ‘Aloeli, ‘o fai atu ki Nipo, mo Peali-meoni:

⁹pea ‘i he fai ki hahake na‘e a‘u ‘ene nofo ki he kamata‘anga ‘o e toafa ‘oku mole mai mei he vaitafe ko ‘Eufaletesi; he kuo tupu ‘enau monumanu ‘i he fonua ko Kiliati.

¹⁰Pea ‘i he kuonga ‘o Saula na‘a nau fai tau mo e ha‘a Heka‘ā, ‘a ia na‘e tō ‘i he‘enau tā: pea nau nofo‘ia honau ngaahi tēniti ‘i he mata hahake kātoa ‘o Kiliati.

¹¹Pea ko ha‘a Kata na‘e nofo fehangahangai mo kinautolu, ‘i he fonua ko Pēsani, ‘o a‘u ki Sālika:

¹²ko Sioeli ‘a e tu‘ukimu‘a, pea hoko ‘a Sāfami, mo ‘Ianai, mo Sāfati ‘i Pēsani:

¹³pea ko honau kāinga ‘i he ‘ulumotu‘a: ko Maikeli mo Mēsuilame, mo Sipa, mo Siolai, mo ‘Iakani, mo Sia, mo Hepelū; ko e toko fitu.

¹⁴Ko e hako eni ia ‘o ‘Apihaili foha ‘o Huli, foha ‘o ‘Īloa, foha ‘o Kiliati, foha ‘o Maikeli, foha ‘o ‘Isisai, foha ‘o ‘Iato, foha ‘o Pusa:

¹⁵ko ‘Ahi foha ‘o ‘Apitieli, foha ‘o Kuni, ko e tu‘ukimu‘a ‘i honau ‘ulumotu‘a.

¹⁶Pea na‘a nau nofo ‘i Kiliati ‘i Pēsani, pea ‘i hona ngaahi kolo fakaongo, pea ‘i he ngaahi feitu‘u kolo kotoa ‘o Sāloni kitu‘a ‘i honau fa‘ahi ki ‘uta.

¹⁷Ko kinautolu ni kotoa pē na‘e hohoko ‘i he kuonga ‘o Siotame ko e Tu‘i Siuta mo e kuonga ‘o Selopoame ko e Tu‘i ‘Isileli.

¹⁸Ko e ha‘a Lūpeni, mo e ha‘a Kata, mo e vaeua ‘o e matakali ‘o Manase, ko honau kau to‘a ko e tu‘unga me‘a na‘e ala to‘o ‘a e pā mo e heletā, pea na‘e poto ‘i he fana, pea kuo ako tau, na‘a nau toko fā mano mā toko fā afe, mo toko fitungeau, mā toko onongofulu na‘e tu‘u ‘i he tau.

¹⁹Pea na‘a nau fai tau mo e ha‘a Heka‘ā, mo ‘Ietuli, mo Nāfisi, mo Nōtapi.

²⁰Pea na‘e tokoni‘i kinautolu ‘i he‘enau fai ki ai, pea na‘e tuku ‘a e kau Heka‘ā ki honau nima, mo kinautolu kotoa na‘e kau ai: he na‘a nau tautapa ki he ‘Otua ‘i he fepaki, pea tuku ‘e he ‘Afio ke tau mai ‘enau hū, koe‘uhi na‘a nau tu‘u ‘enau falala kiate ia.

²¹Pea na‘a nau ‘ave ‘enau monumanu; ko ‘enau kāmeli ‘e toko nima mano, pea ko e fanga sipi mo kosi ‘e toko ua kilu mā toko nima mano, mo e fanga ‘asi ‘e toko ua afe, pea ko e kakai mo‘ui ‘e toko kilu.

²²He na‘e tokolahi ‘a e tō koe‘uhi na‘e meia ‘Elohimi ‘a e tau. Pea nau nofo ‘i honau feitu‘u, ‘o a‘u ki he Takipōpula.[22]

²³Pea ko e hako ‘o e vaeua ‘o Manase na‘a nau nofo‘i ‘a e fonua: na‘a nau mafola mei Pēsani ki Peali-Heamoni mo Sēnili mo Mo‘unga Heamoni.

²⁴Pea ko eni honau ngaahi ‘ulumotu‘a; ‘io, ko ‘Ēfeli, mo ‘Isi, mo ‘Eliela, mo ‘Asilili, mo Selemaia, mo Hota-vaia, mo ‘Iatiela, ko e kau to‘a tete‘e, ko e kakai ongoongo, ko e kau ‘ulumotu‘a.

²⁵Ka na‘a nau fai kākā ki he ‘Otua ‘o honau tupu‘anga, ‘o nau tangofi ‘a e ngaahi fa‘ahikehe ‘o e ngaahi kakai ‘o e fonua, ‘a kinautolu na‘e faka‘auha ‘e he ‘Otua ‘i honau ‘ao.

²⁶Pea ue‘i ‘e he ‘Otua ‘o ‘Isileli ‘a e laumālie ‘o Puli ko e Tu‘i ‘Āsilia, mo e laumālie ‘o Tilikati Pilinesa ko e Tu‘i ‘Āsilia, pea ne taki pōpula kinautolu, ‘a ha‘a Lūpeni, mo e ha‘a Kata, mo e vaeua ‘o Manase, ‘o ne ‘ave kinautolu ki Hala, mo Kāpoa mo Hāla‘a, pea ki he vaitafe ko Kōsani, pea talu ai pē.