Read KO E TOH TAPU KATOA TONGA 1 Kal 9 Bible Online

1 Kal 9 - KO E TOH TAPU KATOA TONGA bible

1 Kal 9

¹PEA ko ia na‘e hohoko ‘a ‘Isileli kātoa; pea vakai kuo tohi kinautolu ‘i he Puka ‘o e ngaahi Tu‘i ‘Isileli: pea ko Siuta na‘e taki pōpula ki Pāpilone koe‘uhi ko ‘enau angahala.

²Pea ko e kakai na‘e fuofua nofo tofi‘a ‘i honau ngaahi kolo ko e kau ‘Isileli, ko e kau Taula‘eiki, ko e kau Līvai, mo e kau Netinimi.

³Pea ‘i Selusalema na‘e nofo ha ni‘ihi ‘o ha‘a Siuta mo ha‘a Penisimani, pea mo ha‘a ‘Ifalemi mo Manase;

⁴ko ‘Ūtai foha ‘o ‘Amihuti, foha ‘o ‘Omilai, foha ‘o ‘Imilai, foha ‘o Pani, ‘oku kau ki he hako ‘o Felesi ko e foha ‘o Siuta.

⁵Pea ‘i he ha‘a Sailo; ko ‘Āsaia ko e ‘uluaki, pea mo ‘ene fānau.

⁶Pea ‘i ha‘a Sala; ko Seueli, mo honau kāinga, ko e toko onongeau mā hivangofulu.

⁷Pea ‘i ha‘a Penisimani; ko Salu, foha ‘o Mēsuilame, foha ‘o Hotavaia, foha ‘o Hasenua;

⁸mo ‘Ipenaia, foha ‘o ‘Ilohame, mo ‘Ela foha ‘o ‘Osi, foha ‘o Mīkeli, mo Mēsuilame foha ‘o Sefataia, foha ‘o Leueli, foha ‘o ‘Ipinaisa;

⁹pea ko honau kāinga ‘i honau tohi hohoko ko e toko hivangeau mā nimangofulu mā ono. Ko e tu‘unga me‘a kotoa ia na‘e ‘ulumotu‘a ‘i honau ngaahi fāmili.

¹⁰Pea ‘i ha‘a taula‘eiki; ko ‘Ītaia, mo Sihoialipi, mo Siakini;

¹¹mo ‘Asalaia foha ‘o Hilikaia, foha ‘o Mēsuilame, foha ‘o Sātoki, foha ‘o Melaioti, foha ‘o ‘Ahitupi, ko e pule ‘o e fale ‘o ‘Elohimi;

¹²mo ‘Āsaia foha ‘o ‘Ilohame, foha ‘o Pāsua, foha ‘o Malakaia; mo Ma‘asai foha ‘o ‘Atiela, foha ‘o Siasala, foha ‘o Mēsuilame, foha ‘o Mesilemiti, foha ‘o ‘Īmeli;

¹³pea ko honau kāinga ‘ulumotu‘a ko e toko taha afe mā fitungeau mā onongofulu; ko e kakai fita ‘i he fai ‘o e ngāue ‘i he fale ‘o ‘Elohimi.

¹⁴Pea ‘i he ha‘a Līvai; ko Sēmaia foha ‘o Hāsupi, foha ‘o ‘Asilikami, foha ‘o Hasapaia, ‘i he hako ‘o Mēlali;

¹⁵mo Pakipaka, Hēlesi, mo Kālali, mo Matanaia foha ‘o Mika, foha ‘o Sikeli, foha ‘o ‘Ēsafe;

¹⁶mo ‘Opataia foha ‘o Sēmaia, foha ‘o Kālali, foha ‘o Situtuni, mo Pelekaia foha ‘o ‘Asa, foha ‘o ‘Elikena, ‘a ia na‘e nofo ‘i he ngaahi vilisi ‘o ha‘a Nētofa.

¹⁷Pea ko e kau le‘o-matapā; ko Sālumi, mo ‘Ākupi, mo Talemoni, mo ‘Ahimani, mo honau kāinga: ko Sālumi na‘e pule;

¹⁸‘a ia kuo ne ‘i he matapā ‘o e tu‘i[35] mei hahake ‘o a‘u ki he taimi ni: ko kinautolu ‘a e kau le‘o-matapā ma‘a e ‘apitanga ‘o ha‘a Līvai.

¹⁹Pea ko Sālumi foha ‘o Kole, foha ‘o ‘Epiesafe, foha ‘o Kola, mo hono kāinga ‘i he ‘ulumotu‘a ‘o ha‘a Kola, na‘a nau pule ki he ngaahi lakanga ngāue, ko e kau tauhi ‘o e ngaahi hū‘anga ‘o e Tēniti: pea ko ‘enau ngaahi kui na‘a nau pule ki he ‘apitanga ‘o Sihova, ko e kau tauhi ‘o e hū‘anga;

²⁰pea ko Finiasi foha ‘o ‘Eliesa ‘a honau ‘eiki ‘i mu‘a: na‘e kau ‘a Sihova mo ia.

²¹Ko Sākalaia foha ‘o Meselemaia ko e le‘o-matapā ‘o e Tēniti Fe‘iloaki‘anga.

²²Ko kinautolu kotoa na‘e fili ke le‘o ‘i he ngaahi hū‘anga ko e toko uangeau mā hongofulu mā ua. Na‘e tohi kinautolu ‘i honau ngaahi tohi hohoko ‘i honau ngaahi vilisi, ko kinautolu na‘e fakanofo ‘e Tēvita mo Sāmiuela ko e matalōloa ki honau tu‘anakinga.

²³Ko ia, ko kinautolu mo ‘enau fānau na‘a nau pule ki he ngaahi matapā ‘o e fale ‘o Sihova, ‘a e fale Tēniti, ‘o fakalakanga ‘o fakafeitu‘u-ngāue.

²⁴Na‘e tu‘u ‘a e kau le‘o ‘i he tafa‘aki ‘e fā, ‘i hahake, hihifo, tokelau, mo e tonga.

²⁵Pea ko honau kāinga na‘e nofo ‘i honau ngaahi vilisi, na‘a nau ha‘u ‘o fakahili ‘aho fitu ke nofo mo kinautolu.

²⁶He ko kinautolu ‘a e toko fā, ko e to‘a ‘o e kau le‘o, pea ko e kau Līvai foki, na‘a nau ma‘u lakanga tu‘anakinga, pea na‘a nau pule ki he ngaahi loki mo e ngaahi fale koloa ‘o e fale ‘o ‘Elohimi.

²⁷Pea nau ‘apitanga takatakai ki he fale ‘o ‘Elohimi, koe‘uhi na‘e ‘anautolu hono tauhi, pea ko kinautolu na‘e tokanga ki hono fakaava ‘i he pongipongi kotoa pē.

²⁸Pea ko honau ni‘ihi na‘e tauhi ‘a e nāunau ‘o e ngāue; he na‘e lau hono fakahū mai, pea na‘e lau hono fakahū ki tu‘a.

²⁹Pea ko honau ni‘ihi foki na‘e tu‘utu‘uni ke vakai ‘a e nāunau, ‘io, ‘a e nāunau kotoa ‘o e Fale Tapu, mo e mahoa‘a, mo e uaine, mo e lolo, mo e laipeno, mo e me‘a namu-kakala.

³⁰Pea ko e ni‘ihi ‘i ha‘a taula‘eiki na‘a nau ngaohi ‘a e lolo kakala.

³¹Pea ko Matitaia, ko e toko taha ‘i he kau Līvai, ‘a ia ko e ‘uluaki ‘o Sālumi ko e ha‘a Kola, na‘e ‘a‘ana ‘a e tu‘anakinga ki he ngaahi me‘a ‘oku ta‘o tini.[36]

³²Pea ko e ni‘ihi ‘o ha‘a Kōhate, ko honau kāinga, na‘e ‘anautolu ‘a e mā fono[37] ke fokotu‘u ‘i he Sāpate kotoa pē.

³³Pea ko eni ‘a e kau hiva, ko e ngaahi ‘ulumotu‘a ‘o Līvai, ‘a ia na‘e nofo ‘i he ngaahi loki, ‘o ‘atā mei he ngāue: he na‘a nau mo‘ua ‘i honau lakanga ‘i he ‘aho mo e pō.

³⁴Ko e ngaahi ‘ulumotu‘a ia ‘o Līvai ‘i honau tohi hohoko; ko e hou‘eiki ia: na‘e nofo kinautolu ‘i Selusalema.

³⁵Pea ‘i Kipione na‘e nofo ‘a e tupu‘anga ‘o Kipione, ko Sieli, pea ko e hingoa ‘o hono uaifi ko Mā‘aka;

³⁶pea ko hono ‘uluaki foha ko ‘Apitoni, mo Siuli, mo Kisi, mo Peali, mo Nā, mo Nātapi;

³⁷mo Kētoa, mo ‘Ahio, mo Sākalaia, mo Mikeloti.

³⁸Pea tupu ‘ia Mikeloti ‘a Sīmami. Pea ko kinautolu foki na‘a nau nofo mo honau kāinga ‘i Selusalema, ‘o fehangahangai mo honau kāinga.

³⁹Pea tupu ‘ia Nā ‘a Kisi, pea tupu ‘ia Kisi ‘a Saula, pea tupu ‘ia Saula ‘a Sionatane mo Malikisua, mo ‘Apinatape, mo ‘Esipeali.[38]

⁴⁰Pea ko e foha ‘o Sionatane ko Melipi-Peali;[39] pea tupu ‘ia Melipi-Peali ‘a Maika.

⁴¹Pea ko e hako ‘o Maika ko Pītoni, mo Meleki, mo Tālea.[40]

⁴²Pea tupu ‘ia ‘Āhasi ‘a Siala; pea tupu ‘ia Siala ‘a ‘Alemeti, mo ‘Asimaueta, mo Similai; pea tupu ‘ia Similai ‘a Mosia.

⁴³Pea tupu ‘ia Mosia ‘a Pina: mo Lefaia hono foha ‘o‘ona, ko ‘Ēlasa hono foha ‘o‘ona, ko ‘Āsili hono foha ‘o‘ona: pea ma‘u ‘e ‘Āsili ha foha ‘e toko ono, pea ko honau hingoa eni; ko ‘Aselikami, ko Pōkelu, mo ‘Isime‘eli, mo Salaia, mo ‘Opataia, mo Hānani: ko e hako ia ‘o ‘Āsili.