Read KO E TOH TAPU KATOA TONGA 2 Kal 1 Bible Online

2 Kal 1 - KO E TOH TAPU KATOA TONGA bible

2 Kal 1

¹PEA na‘e tu‘u kaukaua ‘a e hau ‘o Solomone ‘alo ‘o Tēvita, pea na‘e kau mo ia ‘a hono ‘Otua ko Sihova, ‘o ne fakatau‘olunga ia.

²Pea fono ‘e Solomone ki ‘Isileli kātoa, ki he kau pule toko‘i afe mo e kau pule toko‘i teau, pea ki he kau fakamaau, pea ki he hou‘eiki kotoa pē ‘o ‘Isileli kātoa, ‘a e ngaahi ‘ulumotu‘a.

³Pea toki hā‘ele ‘a Solomone, pea ha‘ofia ia ‘e he fakataha kotoa, ‘o a‘u ki he sia ‘oku ‘i Kipione; he na‘e tu‘u ai ‘a e Tēniti Fe‘iloaki‘anga ‘o ‘Elohimi, ‘a ia na‘e ngaohi ‘e Mōsese ko e sevāniti ‘a Sihova ‘i he Toafa.

⁴Ka ko e ‘A‘ake ‘a ‘Elohimi kuo ‘ohake ‘e Tēvita mei Kiliati-sialimi ki he potu kuo teu ‘e Tēvita ki ai: he kuo ne hunuki hano tēniti ‘i Selusalema.

⁵Kae‘uma‘ā ko e ‘Ōlita Kapa, ‘a ia na‘e ngaohi ‘e Pesalili foha ‘o ‘Uli ko e hako ‘o Hua, na‘e tu‘u ia ‘i he mata Tāpanekale ‘o Sihova: pea fekumi ki ai ‘a Solomone mo e fakataha.

⁶‘Io, na‘e hā‘ele hake ki ai ‘a Solomone ki he ‘Ōlita Kapa ki he ‘ao ‘o Sihova, ‘a ia na‘e tu‘u mo e Tēniti Fe‘iloaki‘anga; ‘o ne feia ai ha afe‘i feilaulau-mōifua.

⁷‘I he pō ko ia na‘e hā ‘a e ‘Otua kia Solomone, ‘o ne folofola ki ai, Fai mai ha‘o kole pe ko e hā te u ‘atu.

⁸Pea fakatau folofola ‘a Solomone ki he ‘Otua, Kuo ke fai kia Tēvita ko ‘eku tamai ha ‘ofa lahi, pea kuo ke fakanofo au ke fetongi ia ‘i he tu‘i.

⁹Pea ko eni, ‘e Sihova ‘Elohimi, ke fakamo‘oni ho‘o folofola kia Tēvita ko ‘eku tamai: he kuo ke fakanofo au ke pule ki he kakai tokolahi, ‘o tatau mo e efu ‘o e kelekele.

¹⁰Ko ia ke ke foaki mai ha poto mo ha mohu fakakaukau, ke u mafai ke ‘alu atu mo hū mai ‘i he ‘ao ‘o e kakai ni: he ko hai te ne mafakamaau ‘a e kakai ni kuo fu‘u lahi pehē?

¹¹Pea folofola ‘a e ‘Otua kia Solomone, Ko e me‘a ‘i he ‘i ho loto ‘a e me‘a ni, ‘o ‘ikai te ke kole ha fu‘u pa‘anga lahi, mo e koloa kehekehe, pe ko e ongoongo, pe ko e ‘auha ‘a e kakai ‘oku fehi‘a kiate koe, pea na‘a mo e mo‘ui fuoloa na‘e ‘ikai te ke kole ki ai; ka kuo ke kole ma‘au ‘a e poto mo e mohu fakakaukau, ke ke lava ‘aki ‘a e fakamaau ‘o hoku kakai, ‘a ia kuo u fakanofo koe ko honau tu‘i:

¹²kuo tuku kiate koe ‘a e poto mo e mohu fakakaukau, pea te u ‘atu ‘a e pa‘anga lahi mo e koloa kehekehe mo e ongoongo, ‘a ia kuo te‘eki ke ma‘u ha taha ‘o e ngaahi tu‘i mu‘a, pea ‘e ‘ikai ha taha pehē ‘amui.

¹³Ko ia na‘e ha‘u ‘a Solomone mei he sia ‘oku ‘i Kipione ki Selusalema, mei he‘ene tu‘u ‘i he mata Tēniti Fe‘iloaki‘anga: pea ne hau ‘i ‘Isileli.

¹⁴Pea tānaki ‘e Solomone ha tau sāliote mo ha tau hoosi; pea na‘e ‘iate ia ha sāliote ‘e taha afe mā fāngeau, mo e tau hoosi ‘e toko taha mano mā ua afe, ‘o ne tufaki kinautolu ki he ngaahi kolo sāliote, pea ke fe‘ao foki mo e tu‘i ‘i Selusalema.

¹⁵Pea ‘i he ngāue ‘a e tu‘i na‘e tu‘una ‘a e koula mo e siliva ‘i Selusalema hangē koni maka pē, pea ko e ‘akau sita ke hangē ko e ngaahi sukamino ‘i Sēfela‘a.

¹⁶Pea ko e fanga hoosi na‘e ‘ia Solomone na‘e ‘omi mei ‘Isipite; na‘e tali kinautolu ‘e he kau fakatau ‘a e tu‘i, ‘o fakatākanga, ‘o totongi fakataha ki he tākanga.[1]

¹⁷Pea nau ‘omi mei ‘Isipite ‘o ‘atu ha sāliote ki he pa‘anga siliva ‘e onongeau, pea ko e hoosi ki he teau mā nimangofulu: pea na‘e pehē hono ma‘u mai ‘e he ngaahi tu‘i Heti, mo e ngaahi tu‘i Sīlia, ‘o fou ‘iate kinautolu,