Read KO E TOH TAPU KATOA TONGA 2 Kal 11 Bible Online

2 Kal 11 - KO E TOH TAPU KATOA TONGA bible

2 Kal 11

¹PEA ha‘u ‘a Lehopoame ki Selusalema, ‘o ne fakatahataha ‘a e fale ‘o Siuta mo Penisimani, ko e toko taha kilu mā valu mano na‘e fili ko ‘enau poto ‘i he tau, ke fai tau mo ‘Isileli, ke fakafoki ‘a e pule‘anga kia Lehopoame.

²Ka ka hoko ‘a e folofola ‘a Sihova kia Sēmaia ko e tangata ‘o ‘Elohimi, ‘o pehē,

³Lea kia Lehopoame foha ‘o Solomone ko e Tu‘i Siuta, pea ki he kau ‘Isileli ‘oku ‘i Siuta mo Penisimani, ‘o pehē,

⁴Ko eni ‘a e folofola ‘a Sihova, ‘Oua te mou ‘alu hake, pea ‘oua te mou fai tau mo homou kāinga: foki takitaha ki hono fale; he ‘oku meiate au ‘a e me‘a ni. Pea nau fakaongo ki he folofola ‘a Sihova, ‘o nau foki mei he ‘alu ke tau‘i ‘a Selopoame.

⁵Pea nofo ‘a Lehopoame ‘i Selusalema, ‘o ne ngaohi ha ngaahi kolo ‘i Siuta ke fakapinepine.

⁶‘Io, na‘e ne ngaohi ‘a Pētelihema, mo ‘Eitami, mo Tekoa,

⁷pea mo Petesua, mo Soko, mo ‘Atulami,

⁸pea mo Kati, mo Mālesa, mo Sifi,

⁹pea mo ‘Atolaimi, mo Lākisi, mo ‘Āseka,

¹⁰pea mo Sola, mo ‘Esialoni, mo Hepeloni, ‘a ia ‘oku nau ‘i Siuta mo Penisimani:

¹¹ko e ngaahi kolo ‘aa‘i, pea na‘a ne ‘ai ke mālohi ‘a e ngaahi kolotau, ‘o ne tuku ai ha ngaahi kapiteni mo e tokonaki me‘akai, mo e lolo mo e uaine.

¹²Pea ‘i he kolo kotoa pē na‘e pā‘ia mo tao‘ia; pea ne ngaohi ke mālohi ‘aupito. Pea na‘e kau kiate ia ‘a Siuta mo Penisimani.

¹³Pea ko e kau taula‘eiki mo e kau Līvai na‘e ‘i ‘Isileli kātoa na‘a nau fakatefua mai kiate ia mei honau ngaahi feitu‘u.

¹⁴He na‘e li‘aki ‘e he kau Līvai honau ngaahi ‘api tu‘a kolo, mo honau ngaahi tofi‘a, ‘o nau ha‘u ki Siuta mo Selusalema: he na‘e fakahifo kinautolu ‘e Selopoame mo ‘ene fānau mei he‘enau taula‘eiki kia Sihova:

¹⁵‘o ne fokotu‘u ha‘ane kau taula‘eiki ki he ngaahi sia, pea ki he ha‘a Sātulō,[16] pea ki he ongo kafi kuo ne ngaohi.

¹⁶Pea hili ‘enau omi ‘anautolu, pea ‘ilonga ha ni‘ihi ‘i he ngaahi matakali ‘Isileli na‘e tuku honau loto ke kumi kia Sihova, ko e ‘Otua ‘o ‘Isileli, na‘a nau omi ki Selusalema ke feilaulau kia Sihova, ko e ‘Otua ‘o ‘enau ngaahi kui.

¹⁷Pea na‘e kaukaua ai ‘a e pule‘anga ‘o Siuta, pea nau poupou ‘a Lehopoame foha ‘o Solomone, ‘o ta‘u tolu: he na‘e tolu ta‘u ‘enau fou ‘i he ‘alunga ‘o Tēvita mo Solomone.

¹⁸Pea na‘e to‘o ‘e Lehopoame hano uaifi, ko Mahalati, ko e ‘ōfefine ‘o ‘Ilimoti foha ‘o Tēvita-‘Apihaili ko e ‘ōfefine ‘o ‘Eliapi foha ‘o Sese;

¹⁹pea ne fā‘ele‘i kiate ia ha ngaahi foha; ko Siusi, mo Semalaia, mo Sāhami.

²⁰Pea hili ia na‘a ne to‘o ‘a Mā‘aka ko e ‘ōfefine ‘o ‘Apisalome; pea ne fā‘ele‘i kiate ia ‘a ‘Āpaia, mo ‘Ātai, mo Sisa, mo Selomiti.

²¹Pea ‘ofa lahi ‘a Lehopoame kia Mā‘aka ‘ōfefine ‘o ‘Apisalome ‘i hono ngaahi uaifi kotoa mo ‘ene kau sinifu: (he na‘a ne ma‘u ha uaifi ‘e toko hongofulu mā valu, mo e sinifu ‘e toko onongofulu, ‘o ne fakatupu ha fānau tangata ‘e toko uofulu mā valu, mo e fānau fefine ‘e toko onongofulu).

²²Pea tu‘utu‘uni ‘e Lehopoame ke ‘uluaki ‘a ‘Āpaia tama ‘a Mā‘aka, ‘io, ke pilinisi ia ‘i he fale‘alo ka ne hoko ‘amui.

²³Pea ne fai fakapotopoto, ‘o ne tufaki hono ngaahi foha ke nofo ‘i he ngaahi feitu‘u kehekehe ‘o Siuta mo Penisimani, ‘io, ‘i he ngaahi kolo ‘aa‘i kehekehe: ‘o ne tokonaki ha‘anau me‘akai ke lahi. Pea ne holi ki ha fu‘ufu‘unga uaifi.