Read KO E TOH TAPU KATOA TONGA 2 Kal 13 Bible Online

2 Kal 13 - KO E TOH TAPU KATOA TONGA bible

2 Kal 13

¹‘I HONO hongofulu mā valu ta‘u ‘o Kingi Selopoame na‘e kamata pule ‘a ‘Āpaia ki Siuta.

²Na‘e tolu ta‘u ‘ene hau ‘i Selusalema: pea ko e hingoa ‘o ‘ene fa‘ē ko Mikaia ko e ‘ōfefine ‘o ‘Ulieli mei Kipea. Pea na‘e tau ‘a e vaha‘a ‘o ‘Āpaia mo Selopoame.

³Pea taki ‘e ‘Āpaia ha kau tau to‘a ko e kau tangata ‘e toko fā kilu na‘e fili: pea fakatē ‘e Selopoame ha tau mei he potu ‘e taha, ko e toko valu kilu, ko e kakai kuo fili ko e kau to‘a.

⁴Pea tu‘u ‘a ‘Āpaia ‘i he tumu‘aki ‘o Mo‘unga Sima-laimi, ‘a ia ‘oku ‘i he fonua mo‘unga ‘o ‘Ifalemi, ‘o ne pehē, Fanongo mai ‘a Selopoame mo ‘Isileli kātoa.

⁵Na‘e mei taau ke mou ‘ilo, ko Sihova ko e ‘Otua ‘o ‘Isileli na‘a ne foaki ‘a e pule‘anga ‘o ‘Isileli kia Tēvita, ‘o ta‘engata, ‘io, kiate ia mo hono hako ‘i ha kovinānite māsima.

⁶Ka ka tu‘u ‘a Selopoame foha ‘o Nīpati, ‘a ia ko e tamaio‘eiki ‘a Solomone foha ‘o Tēvita, ‘o ne angatu‘u ki hono ‘eiki.

⁷Pea tānaki kiate ia ha kau siana vale, ko e hako‘i Pileali, ‘o nau fai mālohi kia Lehopoame foha ‘o Solomone, ka ko e talavou pē ‘a Lehopoame mo lotosi‘i, ‘o ‘ikai te ne matu‘u kiate kinautolu.

⁸Pea ‘oku mou pehē ‘apē eni ke tu‘uaki ‘a e pule‘anga ‘o Sihova ‘i he angi ‘a e hako ‘o Tēvita, pea ko e fu‘ufu‘unga kakai lahi kimoutolu, pea ‘oku ‘iate kimoutolu ‘a e ongo kafi koula, ‘a ia na‘e ngaohi ‘e Selopoame mo‘omou ‘Otua.

⁹‘Ikai kuo mou kapusi ‘a e kau taula‘eiki ‘a Sihova, ‘a e hako ‘o ‘Ēlone, mo e kau Līvai; pea kuo mou fakanofo hamou kau taula‘eiki, ‘o hangē ko e fai ‘a e kakai ‘i he ngaahi fonua ko ē? ‘Ilonga ia te ne ha‘u ‘aki ha pulu mui, mo ha fitu‘i sipi tangata mōno fakanofo, ko e taula‘eiki leva ia ‘o e ngaahi ‘ata‘i ‘otua.

¹⁰Ka ko e me‘a kiate kimautolu, ko homau ‘Otua ‘a Sihova, pea kuo ‘ikai te mau li‘aki ia; pea ko e kau taula‘eiki ē ‘oku fai ‘a e tauhi ‘o Sihova, ko e hako ‘o ‘Ēlone, mo e kau Līvai ‘i honau lakanga:

¹¹pea ‘oku nau tutu ki he ‘Eiki ‘i he pongipongi mo e pongipongi, ‘i he efiafi mo e efiafi, ‘a e ngaahi feilaulau-mōifua mo e ‘inisēnisi namu-kakala: mo e faka‘otu ē ‘a e mā ‘i he tēpile mā, mo e tu‘unga maama koula ē mo hono ngaahi nge‘esi maama ke tutu efiafi mo e efiafi: he ko kimautolu ‘oku mau tauhi ai pē ‘a e nafa ‘o Sihova ko homau ‘Otua, ka ko kimoutolu kuo mou li‘aki ia.

¹²Pea vakai ko ‘Elohimi ‘oku ‘iate kimautolu, ‘o taki, pea ko ‘ene kau taula‘eiki ē mo e ongo talupite fekau ke ifi fakalalipakola ke fai homou tau‘i. ‘E ha‘a ‘Isileli, ‘oua te mou fai tau mo Sihova ko e ‘Otua ‘o ho‘omou ngaahi kui: tala‘ehai te mou tu‘umālie.

¹³Ka ko Selopoame kuo ne fekau ke hala tutu‘u ha malumu, ‘o ha‘u mei honau tu‘a: ko ia na‘e ‘i ‘ao ē, pea ko e malumu na‘e ‘i honau tu‘a, pea ko Siuta na‘e ‘i loto.

¹⁴Pea kilo kitu‘a ‘a Siuta, pea tā ko e tau ē ‘i ‘ao mo tu‘a: pea na‘a nau tautapa kia Sihova, ka ka mo‘u ifi talupite pē ‘a e kau taula‘eiki.

¹⁵Pea hiki tuē mo mavava ‘a e tangata Siuta fua pē; pea ‘iloange ‘i he hiki tuē ‘a e kau tangata Siuta, pea taa‘i ‘e ‘Elohimi ‘a Selopoame mo e kau ‘Isileli ‘i he ‘ao ‘o ‘Āpaia mo e kau Siuta.

¹⁶Pea hola ‘a ha‘a ‘Isileli mei he ‘ao ‘o Siuta, pea na‘e tuku kinautolu ‘e he ‘Otua ki honau nima.

¹⁷Pea taa‘i kinautolu ‘e ‘Āpaia mo hono kakai ‘aki ha tā lahi: pea na‘e tō ‘i ‘Isileli ha toko nima kilu, ko e kakai fili ia.

¹⁸Ko ia na‘e fakavaivai‘i ‘a e kau ‘Isileli ‘i he taimi ko ia, pea na‘e mālohi ‘a ha‘a Siuta, koe‘uhi na‘a nau falala kia Sihova ko e ‘Otua ‘o ‘enau ngaahi kui.

¹⁹Pea tuli ‘e ‘Āpaia ‘a Selopoame, ‘o ne hamu ‘ani kolo meiate ia, ‘a Pēteli mo hono ngaahi kolo fakaongo, mo ‘Iesana mo hono ngaahi kolo fakaongo, mo ‘Efiloni mo hono ngaahi kolo fakaongo.

²⁰Pea na‘e ‘ikai toe taulanga ‘a Selopoame ‘i he taimi ‘o ‘Āpaia: pea na‘e taa‘i ia ‘e he ‘Eiki, ‘o ne pekia.

²¹Ka ka hoko ‘o kaukaua ‘a ‘Āpaia, ‘o ne mali mo ha uaifi ‘e toko hongofulu mā fā, ‘o ne fakatupu ha fānau tangata ‘e uofulu mā ua, mo e fānau fefine ‘e toko hongofulu mā ono.

²²Pea ko hono toe ‘o e ngāue ‘a ‘Āpaia, mo hono ngaahi ‘alunga, mo ‘ene ngaahi lea, kuo tohi ‘i he Fakamatala ‘a e palōfita ko ‘Ito.