Read KO E TOH TAPU KATOA TONGA 2 Kal 15 Bible Online

2 Kal 15 - KO E TOH TAPU KATOA TONGA bible

2 Kal 15

¹PEA hā‘ele ‘a e Laumālie ‘o e ‘Otua kia ‘Asalaia foha ‘o ‘Ōteti:

²pea ne hū ki tu‘a ke fakafetaulaki kia ‘Asa, ‘o ne fakatau folofola ki ai, Fanongo mai, ‘Asa, mo Siuta kātoa mo Penisimani: ‘oku kau mo kimoutolu ‘a Sihova lolotonga ‘oku mou kau mo ia; pea kapau te mou kumi ia te ne tuku ke mou ‘ilo; ka ‘o kapau te mou li‘aki ia, te ne li‘aki kimoutolu.

³Pea kuo fuoloa mo e ‘ikai ma‘u ‘e ‘Isileli ‘a e ‘Otua mo‘oni, mo ha taula‘eiki fai ako, mo ha lao:

⁴ka ‘i he‘enau tafoki kia Sihova ko e ‘Otua ‘o ‘Isileli ‘i he‘enau faingata‘a‘ia, mo nau kumi kiate ia, na‘a ne tuku ke ma‘u ia ‘e kinautolu.

⁵Pea ‘i he ngaahi taimi ko ia na‘e ‘ikai ha melino kiate ia na‘e hū ki tu‘a, mo ia na‘e hū mai, ka na‘e lahi ‘a e fakahoha‘asi ‘o e kau nofo he ngaahi fonua.

⁶Pea na‘e felaiki‘aki ‘a e pule‘anga mo e pule‘anga, ‘a e kolo mo e kolo: he na‘e fakahoha‘asi kinautolu ‘e he ‘Otua ‘aki ‘a e ngaahi faingata‘a kehekehe.

⁷Ka ko kimoutolu, mou mālohi pē, ‘o ‘oua te mou fakalouhi‘imofisi: he ai ha totongi ki ho‘omou fita‘a.

⁸Pea ‘i he fanongo ‘e ‘Asa ki he ngaahi lea ko ia, ‘io, ki he palofisai ‘a e palōfita ko ‘Ōteti,[22] na‘a ne fakato‘oto‘a, ‘o ne ‘ave ‘a e ngaahi fakalielia mei he fonua kotoa ‘o Siuta mo Penisimani, pea mei he ngaahi kolo kuo ne puke ‘i Mo‘unga ‘Ifalemi; pea ne fakafo‘ou ‘a e ‘ōlita ‘o Sihova, ‘a ia na‘e tu‘u ‘i he matafale hū‘anga ‘o e ‘Eiki.

⁹Pea ne fakataha mai ‘a Siuta kātoa mo Penisimani, mo e kakai na‘e ‘āunofo mai kiate kinautolu mei ‘Ifalemi mo Manase, pea mei Simione: he na‘e tō ha tokolahi kiate ia ‘o ‘Isileli, he‘enau vakai ‘oku kau mo ia ‘a Sihova ko hono ‘Otua.

¹⁰Pea na‘a nau fakataha ki Selusalema ‘i hono tolu ‘o e māhina, ‘i hono hongofulu mā nima ta‘u ‘o e pule ‘a ‘Asa.

¹¹Pea na‘a nau fai feilaulau kia Sihova ‘i he ‘aho ko ia mei he vete kuo nau ‘omi, ko e pulu ‘e toko fitungeau mo e sipi ‘e toko fitu afe.

¹²Pea na‘a nau fokotu‘u ha fuakava ke kumi kia Sihova ko e ‘Otua ‘o ‘enau ngaahi kui ‘aki honau loto kotoa mo honau laumālie kotoa;

¹³pea ka ‘ilonga ‘a ia ‘e ‘ikai kumi kia Sihova ko e ‘Otua ‘o ‘Isileli ‘e tāmate‘i, pe ko e si‘i pe ko e lahi, pe ko e tangata pe ko e fefine.

¹⁴Pea na‘a nau fuakava kia Sihova le‘o lahi, fai mo e mavava, mo e ifi talupite, mo e nifo‘i manu.

¹⁵Pea fefiefia‘i ‘a Siuta kātoa ‘i he funga ‘o e fuakava; he kuo nau fuakava ‘aki honau loto kātoa, pea kuo nau kumi kiate ia ‘aki ‘a e kotoa ‘o ‘enau feinga; pea na‘a ne tuku ke nau ‘ilo ia: pea na‘e fakanonga kinautolu ‘e Sihova mei he potu takatakai.

¹⁶Pea ko Mā‘aka foki, ko e fa‘ē ‘a Kingi ‘Asa, na‘a ne hifo ia mei he‘ene ma‘itaki, koe‘uhi kuo ne ngaohi ha ‘īmisi fakalielia ma‘ane ‘āsela; pea tā ‘e ‘Asa ‘ene ‘īmisi, ‘o ne tuki ke efu, ‘o ne tutu ‘i he vai ko Kitiloni.

¹⁷Ka na‘e ‘ikai mole ‘a e ngaahi sia mei ‘Isileli: ka neongo ia ka na‘e haohaoa ‘a e loto ‘o ‘Asa lolotonga ‘ene mo‘ui.

¹⁸Pea ne fakahū ki he fale ‘o ‘Elohimi ‘a e ngaahi me‘a ne fakatāpui ‘e he‘ene tamai, mo e ngaahi me‘a ne fakatāpui ‘e ia, ‘a e siliva mo e koula mo e nāunau.

¹⁹Pea na‘e ‘ikai toe ‘i ai ha tau, ‘o a‘u ki hono tolungofulu mā nima ta‘u ‘o e pule ‘a ‘Asa.