Read KO E TOH TAPU KATOA TONGA 2 Kal 17 Bible Online

2 Kal 17 - KO E TOH TAPU KATOA TONGA bible

2 Kal 17

¹PEA na‘e fetongi ia ‘i he tu‘i ‘e Sihosafate ko hono foha; pea hanga ‘e ia ‘o kumi ivi telia ‘a ‘Isileli.

²Pea ne tuku ha tau ki he ngaahi kolo ‘o Siuta na‘e talitau‘anga, ‘o ne tuku ‘ani le‘o ‘i he fonua ‘o Siuta, pea ‘i he ngaahi kolo ‘o ‘Ifalemi ne puke ‘e he‘ene tamai ko ‘Asa.

³Pea na‘e kau ‘a e ‘Eiki mo Sihosafate, koe‘uhi na‘a ne fou ‘i he ngaahi ‘alunga ‘o ‘ene kui ko Tēvita, ‘a e ngaahi motu‘a ‘alunga, pea na‘e ‘ikai te ne tokanga ke ‘alu ki he ngaahi Peali;

⁴ka ko e ‘Otua ‘o ‘ene tamai na‘a ne feinga ki ai, pea ko ‘ene ngaahi tu‘utu‘uni ia na‘a ne fou ai, ‘o ‘ikai te ne fai ki he ngaahi ngāue ‘a ‘Isileli.

⁵Ko ia, na‘e fokotu‘u ma‘u ‘e Sihova ‘a e pule‘anga ‘i hono nima; pea na‘e ‘omi me‘a‘ofa kia Sihosafate ‘e Siuta kātoa; pea na‘e lahi ‘ene koloa mo e ongoongo.

⁶Pea poupou hake hono loto ‘i he ngaahi ‘alunga ‘o Sihova, pea ne mōia atu, ‘o ‘ave ‘a e ngaahi ‘esi mo e ngaahi ‘āsela mei Siuta.

⁷Pea ‘i he tolu ta‘u ‘o ‘ene pule na‘a ne fekau atu hono hou‘eiki, ‘a Peni-haili, mo ‘Opataia, mo Sākalaia, mo Nātaniela, mo Mikaia, ke faiako ‘i he ngaahi kolo ‘o Siuta;

⁸pea ō mo kinautolu ‘ani Līvai, ‘a Sēmaia, mo Netanaia, mo Sepataia, mo ‘Asaeli, mo Semilamoti, mo Sihonatani, mo ‘Atunaisa, mo Topaia, mo Topatonaisa; ko e kau Līvai ia, pea ō mo kinautolu ‘a ‘Elisama, mo Siholame na‘e taula‘eiki.

⁹Pea na‘a nau faiako ‘i Siuta, pea nau ‘alu mo kinautolu ‘a e tohi Lao ‘a Sihova: ko ia na‘a nau foli ‘a e ngaahi kolo kotoa ‘o Siuta, ‘o ako ‘a e kakai.

¹⁰Pea na‘e tō ‘a e ngeia ‘o Sihova ki he ngaahi pule‘anga ‘o e ngaahi fonua na‘e takatakai ki Siuta, ko ia na‘e ‘ikai te nau fakalanga tau kia Sihosafate.

¹¹Pea ko e kau Filisitia ni‘ihi na‘a nau toutou ‘omi me‘a‘ofa kia Sihosafate, mo e pa‘anga tukuhau.[25] Pea ‘omi monumanu ‘e he kau ‘Ālepea, ko e sipi tangata ‘e fitu afe mā fitungeau, mo e kosi tangata ‘e fitu afe mā fitungeau.

¹²Ko ia, na‘e fakautuutu ‘aupito ‘a e mā‘olunga ‘o Sihosafate; pea ne langa ‘i Siuta ‘ani taua moni kolo feleoko.

¹³Pea na‘e lahi ‘ene koloa[26] ‘i he ngaahi kolo ‘o Siuta; mo e kakai tau ‘i Selusalema, ko e kau tangata to‘a.

¹⁴Pea ko honau lau eni ‘o fakatatau ki honau ‘ulumotu‘a: ‘i ha‘a Siuta, ko e ngaahi kapiteni-toko‘i-afe…… ko ‘Ātina ko e kapiteni lahi, pea na‘e ‘iate ia ha toko tolu kilu ko e kau tangata to‘a.

¹⁵Pea hoko mo ia ‘a Sihohanani ko e kapiteni lahi, pea ‘iate ia ha toko ua kilu mā valu mano.

¹⁶Pea hoko mo ia ‘a ‘Amasaia foha ‘o Sikeli, ‘a ia na‘a ne me‘a‘ofa ‘aki ia kia Sihova; pea na‘e ‘iate ia ha toko ua kilu ko e kakai to‘a.

¹⁷Pea mei ha‘a Penisimani, ‘a e to‘a tete‘e ko ‘Eliata, pea ‘iate ia ha toko ua kilu na‘e to‘o kaufana mo e pā.

¹⁸Pea hoko mo ia ‘a Sihosapati; pea ‘iate ia ha toko taha kilu mā valu mano kuo ‘osi sauni ki he tau.

¹⁹Ko kinautolu ia na‘e tauhi ki he tu‘i, tukukehe ‘a kinautolu na‘e vahe ‘e he tu‘i ki he ngaahi kolo talitau‘anga ‘i Siuta kātoa.