Read KO E TOH TAPU KATOA TONGA 2 Kal 19 Bible Online

2 Kal 19 - KO E TOH TAPU KATOA TONGA bible

2 Kal 19

¹PEA na‘e foki lelei ‘a Sihosafate ‘a e Tu‘i Siuta ki hono fale ki Selusalema.

²Pea ‘alu ‘a Sehu foha ‘o Hānani ko e tongafisi ke fakafetaulaki kiate ia, ‘o ne fakatau folofola kia Kingi Sihosafate, ‘o pehē, He te ke tokoni ki he kau angahala, ‘o ‘ofa kiate kinautolu ‘oku fehi‘a kia Sihova? Ko ia ai, ‘oku tu‘u mai ha houhau meia Sihova kiate koe.

³Ka neongo ia ka ‘oku ai ha ngaahi me‘a lelei kuo ‘ilo ‘iate koe: he kuo ke fakaeve mei he fonua ‘a e ngaahi ‘āsela, pea kuo ke ta‘ofi ho loto ke kumi kia ‘Elohimi.

⁴Pea nofo ‘a Sihosafate ‘i Selusalema: pea na‘a ne toe ‘alu atu ki he kakai, ‘o ne foli ‘a e fonua mei Peasipa ki Mo‘unga ‘Ifalemi, ‘o ne fakafoki kinautolu kia Sihova ko e ‘Otua ‘o honau tupu‘anga.

⁵Pea ne tuku ha kau fakamaau ‘i he fonua ‘i he ngaahi kolo takitaha ‘o Siuta na‘e talitau‘anga.

⁶Pea ne folofola ki he kau fakamaau, Tokanga ki he me‘a ‘oku mou fai; he ko ho‘omou fakamaau ‘oku ‘ikai ma‘a e tangata, ka ma‘a Sihova; pea ‘oku ne ‘afio mo kimoutolu ‘i he fai fakamaau.

⁷Pea ko ia, ke ‘iate kimoutolu ‘a e ngeia ‘o Sihova: tokanga pea fai; he ‘oku ‘ikai ke ō ‘a angahala mo Sihova ko hotau ‘Otua, pe ha hūmataniu, pe ha tali fā.

⁸Pea na‘e fakanofo ‘e Sihosafate ‘i Selusalema foki ha ni‘ihi ‘o e kau Līvai, mo e kau taula‘eiki, mo ha ni‘ihi mei he kau ‘ulumotu‘a ‘o ‘Isileli, ke fai ‘a e fakamaau ‘a Sihova, pea koe‘uhi ko e ngaahi tangi. (Pea nau foki ki Selusalema.)[27]

⁹Pea ne tu‘utu‘uni kiate kinautolu, ‘o pehē, Ko e anga eni ‘o ho‘omou fai: te mou fai mo e ‘apasia kia Sihova, pea ‘i he mo‘oni, pea ‘aki ‘a e loto haohaoa.

¹⁰Pea ka ‘ilonga ha tangi ‘oku fai kiate kimoutolu ‘e homou kāinga ‘oku nofo ‘i honau ngaahi kolo; pe ko ha fakapō, pe ko ha me‘a ‘oku kau ki ha lao, pe ha tu‘utu‘uni, pe ha fekau, pe ha konisitūtone, te ke ako kiate kinautolu ke ‘oua te nau hia kia Sihova, kae tō ha houhau kiate kimoutolu pe ki homou kāinga: fai pehē, pea ‘e ‘ikai te mou hia.

¹¹Pea ko eni ko e taula‘eiki lahi ko ‘Amalaia ko homou pule ‘i he ngaahi me‘a ‘a e ‘Eiki: pea ‘i he ngaahi me‘a ‘a e tu‘i ko Sepataia foha ‘o ‘Isime‘eli, ko e ‘eiki ‘o e fale ‘o Siuta: pea ko e kau Līvai foki ‘e ‘ōfisa ‘i homou ‘ao. Mou lototo‘a, ‘o fai; pea ke kau ‘a Sihova mo e failelei.