Read KO E TOH TAPU KATOA TONGA 2 Kal 2 Bible Online

2 Kal 2 - KO E TOH TAPU KATOA TONGA bible

2 Kal 2

¹PEA pehē ‘e Solomone ke langa ha fale ki he huafa ‘o Sihova, pea mo ha fale pule‘anga.

²Pea lau ‘e Solomone ha toko fitu mano ki he kavenga, mo e toko valu mano ke fai ta‘anga ‘i he mo‘unga, mo e toko tolu afe mā onongeau ke matāpule kiate kinautolu.

³Pea ‘alu ‘a e fekau ‘a Solomone kia Hūlame ko e Tu‘i Taia ke fakahā, Pehēange ā ke hangē ko ho‘o fai kia Tēvita ko ‘eku tamai, ho‘o ‘omi sita kiate ia ke langa ‘aki hono fale ke nofo ai.

⁴Ko au eni ‘oku ou teu langa fale ki he huafa ‘o Sihova ko hoku ‘Otua, ke fakatāpui ia mo‘ona, ke tutu ‘i hono ‘ao ‘a e ‘inisēnisi namu kakala, pea ki he mā-fono tu‘uma‘u, ki he feilaulau-mōifua pongipongi mo e efiafi, ‘i he ngaahi Sāpate mo e ngaahi māhina fo‘ou, mo e ngaahi ‘aho tu‘utu‘uni ‘a Sihova ko homau ‘Otua, Ko e me‘a ta‘engata ia ki ‘Isileli.

⁵Pea ko e fale ‘oku ou teu langa ko e fale lahi: he ‘oku lahi homau ‘Otua ‘i he ‘otua kotoa pē.

⁶Ka ko hai ‘oku kākunga ke ma‘u ivi ke langa mo‘ona ha fale; ‘osi, ‘oku ‘ikai te ne haofia ‘i he langi, pe ‘i he langi taupotu? pea ko hai tū au ke u langa mo‘ona ha fale, ngata pē ha fale ke tutu ‘inisēnisi ki ai?

⁷Pea ko ia, ke ke tuku mai ha tangata ‘oku poto ‘i he tufunga koula, mo e siliva, mo e palasa, mo e ‘aione, mo e kula-po‘upo‘uli, mo e kula-‘aho‘aho, mo e lanu langi, pea ‘oku ne mafai ke tongi ‘a e ngaahi tongi, ke ne ngāue fakataha mo e kau poto ‘oku ‘iate au ‘i Siuta mo Selusalema, ‘a ia na‘e tokonaki ‘e Tēvita ko ‘eku tamai.

⁸Pea ke tuku mai foki ‘a e ngaahi sita, mo e paini, mo e ahi mei Lepanoni; he ‘oku ou ‘ilo ‘oku poto ho‘o kau tamaio‘eiki he fai ta‘anga ‘i Lepanoni; pea vakai, ‘e kau ‘eku kau tamaio‘eiki mo ho‘o kau tamaio‘eiki, ‘io, ke teuteu mai ‘a e ‘akau ke lahi:

⁹he ko e fale ‘oku ou teu langa ‘e lahi fakamanavahē.

¹⁰Pea vakai, te u ‘atu ki ho‘o tamaio‘eiki, ‘a e kau tufunga ‘oku fai ‘a e ta‘anga, ha efa ‘e ua kilu ‘o e uite kuo haha, mo e efa ‘e ua kilu ‘o e pa‘ale, mo e pate uaine ‘e ua mano, mo e pate lolo ‘e ua mano.

¹¹Pea tali ‘e Hūlame ko e Tu‘i Taia ‘i ha tohi, ‘a ia na‘a ne fekau atu kia Solomone. Tā ‘oku ‘ofa ‘a Sihova ki hono kakai, ‘a ē ā kuo ne tuku ai koe ke tu‘i kiate kinautolu.

¹²Pea fai atu ‘e Hūlame, Mālō mo Sihova ko e ‘Otua ‘o ‘Isileli, ‘a ‘Ene ‘Afio na‘a ne ngaohi ‘a e langi mo māmani, ‘ene tuku kia Kingi Tēvita ha foha poto, ha taha loto matala mo mohu fakakaukau, ke ne langa ha fale mo‘o Sihova, mo e fale pule‘anga.

¹³Pea ko eni kuo u fekau atu ha tangata poto pea mohu fakakaukau, ‘io, ‘a Hūlame ‘oku ou tamai ‘aki[2]

¹⁴(Ko e tama ‘a ha fefine mei ha‘a Tani, ka ko ‘ene tamai ko e tangata Taia), ko e tufunga koula, mo e siliva, mo e palasa, mo e ‘aione, mo e maka, mo e ‘akau, mo e kula pōpō‘uli, mo e lanu langi, mo e tupenu hina, mo e kula-‘aho‘aho; pea poto ‘i he tongi ‘a e ngaahi tongi, pea ‘i he fakakaukau‘i ‘a e anga ‘o e ngaahi me‘a: pea ko e toko taha ko ia te ke tu‘utu‘uni hano potu fakataha mo ho‘o kau poto, mo e kau poto ‘o hoku ‘eiki ko Tēvita ko ho‘o tamai.

¹⁵Pea ko ia, ko e uite mo e pa‘ale, ‘a e lolo mo e uaine, ‘a ia kuo me‘a ki ai ‘a e ‘afiona, ke ke tuku mai ia ki ho‘o kau tamaio‘eiki ko kimautolu:

¹⁶pea ko kimautolu te mau tā ‘akau mei Lepanoni, ha me‘a pē ‘oku ke tangi ki ai: pea te mau taki ki Siopa, kuo fa‘u fakavakavaka‘āmei; kae ‘a‘au hono ‘ohake ki Selusalema.

¹⁷Pea na‘e lau ‘e Solomone ‘a e kau tangata muli na‘e ‘i he fonua ‘o ‘Isileli, ‘o fai ki he lau na‘e fai ‘e he‘ene tamai ko Tēvita; pea ko hono tokolahi ko e toko taha kilu mā nima mano mā tolu afe mā onongeau.

¹⁸Pea ne tuku honau toko fitu mano ke fua kavenga, mo e toko valu mano ke fai ta‘anga ‘i he mo‘unga, pea ko e toko tolu afe mā onongeau ke matāpule ke o‘i ‘a e ngāue ‘a e kakai,