Read KO E TOH TAPU KATOA TONGA 2 Kal 21 Bible Online

2 Kal 21 - KO E TOH TAPU KATOA TONGA bible

2 Kal 21

¹PEA toka ‘a Sihosafate mo ‘ene ngaahi kui, pea na‘e telio ia fakataha mo ‘ene ngaahi kui ‘i Kolo-‘o-Tēvita: pea na‘e fetongi ia ‘i he tu‘i ‘e hono foha ko Siholame.

²Pea na‘e ai hono ngaahi tehina ko e fānau ‘a Sihosafate, ko ‘Asalaia, mo Sīheli, mo Sākalaia, mo ‘Asalaiahu, mo Maikeli, mo Sefataia: ko kinautolu kotoa ko e ngaahi foha ‘o Sihosafate ko e Tu‘i ‘Isileli.

³Pea na‘e ‘ange kiate kinautolu ‘e he‘enau tamai ha koloa lahi, ko e siliva mo e koula mo e ngaahi me‘a mahu‘inga, pea mo e ngaahi kolo talitau‘anga ‘i Siuta: ka ko e pule‘anga na‘a ne tuku kia Siholame he ko e ta‘okete ia.

⁴Pea ‘i he ma‘u ‘e Siholame ‘a e pule‘anga ‘o ‘ene tamai, ‘o ne fakama‘u hifo ai, pea ne hanga ‘o fakapoongi-heletaa‘i hono ngaahi tehina kotoa pē, mo e ni‘ihi foki ‘o e hou‘eiki ‘Isileli.

⁵Na‘e tolungofulu mā ua ta‘u ‘a Siholame ‘i he‘ene kamata pule, pea na‘e valu ta‘u ‘ene hau ‘i Selusalema.

⁶Pea ne fou ‘i he ‘alunga ‘o e ngaahi tu‘i ‘Isileli, ‘o hangē ko e fai ‘a e fale ‘o ‘Ēhapi: he na‘a ne ma‘u ‘a e ‘ōfefine ‘o ‘Ēhapi mōno ‘unoho: ‘io na‘a ne fai ‘a e me‘a na‘e tau kovi ki he finangalo ‘o Sihova.

⁷Ka na‘e mamae ‘a Sihova ke faka‘auha ‘a e fale ‘o Tēvita, telia ‘a e kovinānite kuo ne fai mo Tēvita, pea koe‘uhi kuo ne tala‘ofa ‘e tuku ha‘ane maama kiate ia. mo hono hako ma‘u ai pē.

⁸‘I hono taimi ‘o‘ona na‘e tu‘u ‘a ‘Ītomi mei he fakaongo ki Siuta, ‘o nau fakanofo hanau tu‘i ‘onautolu pē.

⁹Pea laka atu ‘a Siholame mo hono hou‘eiki mo ‘ene tau sāliote kātoa: pea ne tu‘u hake po‘uli, ‘o ne taa‘i ‘a ‘Ītomi, ‘a ia kuo nau ‘ākilotoa ia, mo e ngaahi kapiteni ‘o e tau sāliote.

¹⁰Ko ia, na‘e tu‘u ‘a ‘Ītomi mei he fakaongo ki[31] Siuta, pea talu ai pē ‘o a‘u ki he ‘aho ni: na‘e toki tu‘u foki ‘a Līpina ‘i he taimi ko ia mei he fakaongo kiate ia: koe‘uhi kuo ne li‘aki ‘a Sihova ko e ‘Otua ‘o hono tupu‘anga.

¹¹Ko ia foki na‘a ne ngaohi ‘a e ngaahi ‘esi ‘i he ngaahi mo‘unga ‘o Siuta, pea ne fakaloto‘i ‘a e nofo Selusalema ke tango ‘otua kehe, ‘o ne takihee‘i ‘a Siuta.

¹²Pea na‘e ‘omi kiate ia ha tohi mei he Palōfita ko ‘Ilaisiā, ‘o pehē, Ko e folofola eni ‘a Sihova ko e ‘Otua ‘o ho‘o kui ko Tēvita, Ko e me‘a ‘i he ‘ikai te ke fou ‘i he ngaahi ‘alunga ‘o ho‘o tamai ko Sihosafate, mo e ‘alunga ‘o ‘Asa Tu‘i Siuta;

¹³ka kuo ke fou ‘i he ‘alunga ‘o e ngaahi Tu‘i ‘Isileli, pea kuo ke fakaloto‘i ‘a Siuta mo e nofo Selusalema ke tango ‘otua kehe, hangē ko e fai ‘a e fale ‘o ‘Ēhapi; kae‘uma‘ā kuo ke fakapoongi foki ho ngaahi tehina ko e fāmili ‘o ho‘o tamai, ‘a ia na‘a nau lelei hake ‘iate koe:

¹⁴vakai, ‘e taa‘i ‘e Sihova ‘aki ha tā lahi ho kakai, mo ho‘o fānau, mo ho ngaahi uaifi, mo ho‘o koloa tu‘a kotoa.

¹⁵Ko koe foki te ke mo‘ua ha koto mahaki, ‘a ia ‘e mo‘ua ai ho to‘oto‘onga, kae‘oua ke totoekonga mai ho to‘oto‘onga ‘i he lahi ‘o e mahaki.

¹⁶Pea ue‘i ‘e Sihova ‘a e laumālie ‘o e kau Filisitia, pea mo e kau ‘Ālepea ‘oku nofo ‘i he tafa‘aki ‘o e kau Kusa,[32] ke tau mo Siholame.

¹⁷Pea na‘a nau ‘alu hake ki Siuta, ‘o nau lavaki ‘alu ai, pea nau ‘ave ‘a e koloa kotoa na‘e ‘ilo ‘i he fale ‘o e tu‘i, mo ‘ene fānau foki, mo hono ngaahi uaifi; ko ia na‘e ‘ikai toe hano foha, ko Sihoa‘asi pē ‘a hono foha si‘i.

¹⁸Pea hili ia kotoa na‘e taa‘i ia ‘e he ‘Eiki ‘aki ha mahaki ‘i hono to‘oto‘onga na‘e ‘ikai hano faito‘o.

¹⁹Pea kuo fuoloa, pea ‘i he mei ‘osi ha ta‘u ‘e ua, na‘e tō mai hono to‘oto‘onga ‘i he mahaki, pea ne pekia ‘i he mahaki kovi. Pea na‘e ‘ikai fai ‘e hono kakai ha fakamomofi ma‘ana, ‘o hangē ko e fakamomofi ma‘a ‘ene ngaahi kui.

²⁰Na‘a ne tolungofulu mā ua ta‘u ‘i he‘ene kamata pule, pea na‘e valu ta‘u ‘ene hau ‘i Selusalema; pea ne ‘alu ta‘efaka‘ānaua; pea na‘a nau telio ia ‘i Kolo-‘o-Tēvita, kae ‘ikai ‘i he fa‘itoka fakatu‘i.