Read KO E TOH TAPU KATOA TONGA 2 Kal 24 Bible Online

2 Kal 24 - KO E TOH TAPU KATOA TONGA bible

2 Kal 24

¹NA‘E fitu ta‘u ‘a Soasi ‘i he‘ene kamata pule; pea na‘e fāngofulu ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sipeia mei Peasipa.

²Pea na‘e fai ‘e Soasi ‘a e me‘a na‘e hā totonu ki he finangalo ‘o Sihova lolotonga ‘a e mo‘ui ‘a Sihoiata ko e taula‘eiki.

³Pea fai ‘e Sihoiata ‘ene mali mo e fefine ‘e toko ua; pea ne ma‘u ha fānau tangata mo e fānau fefine.

⁴Pea na‘e faifai pea loto ‘a Soasi ke fakafo‘ou ‘a e ngaahi me‘a kuo motu‘a ‘i he fale ‘o Sihova.

⁵Ko ia, na‘a ne fakataha ai ‘a e kau taula‘eiki mo e kau Līvai, ‘o ne folofola kiate kinautolu, Mou ‘a‘ahi ki he ngaahi kolo ‘o Siuta, ‘o tānaki pa‘anga mei ‘Isileli kātoa mōno ngaohi ‘o e fale ‘o homou ‘Otua, mei he me‘a ‘oku ‘omi ‘i he ta‘u mo e ta‘u; pea mou fakavave ‘a e me‘a, Ka na‘e ‘ikai fakavave ‘a e me‘a ‘e he kau Līvai.

⁶Pea ui mai ‘e he tu‘i ‘a Sihoiata ko honau pule, ‘o ne folofola ki ai, Ko e hā na‘e ‘ikai te ke ‘eke ai ki he kau Līvai ke nau ‘omi mei Siuta mo Selusalema ‘a e tukuhau na‘e hilifaki ki ‘Isileli[35] ‘e Mōsese ko e sevāniti ‘o Sihova, pea mo e fakataha, ma‘a e tēniti Fakamo‘oni‘anga?

⁷He ko e fānau ‘a ‘Atalaia ‘a e fefine pau‘u ko ia, kuo nau maumau‘i ‘a e fale ‘o ‘Elohimi; pea ko e ngaahi me‘a foki ‘a e fale ‘o Sihova kuo fakatāpui kuo nau ngāue‘aki ma‘a ha‘a Peali.

⁸Ko ia, na‘e fekau ‘e he tu‘i pea nau ngaohi ha puha, ‘o nau tuku ia ‘i he hū‘anga ki he fale ‘o Sihova ‘i tu‘a.

⁹Pea na‘e fanongonongo ‘i Siuta mo Selusalema ke ‘omi ma‘a e ‘Eiki ‘a e tukuhau na‘e hilifaki ki ‘Isileli ‘i he Toafa ‘e Mōsese ko e sevāniti ‘o ‘Elohimi.

¹⁰Pea na‘e fiefia ‘a e hou‘eiki mo e kakai kotoa, pea nau ‘omi, ‘o lī ki he puha kae‘oua ke ‘osi.

¹¹Pea ka ‘iloange na‘e ‘omi ‘a e puha ki he potu kuo tu‘utu‘uni ‘e he tu‘i ‘i he fekau ‘a e kau Līvai, pea ka nau ka vakai ‘oku lahi ‘a e pa‘anga ai, pea na‘e ha‘u ‘a e sikalaipe ‘a e tu‘i mo e fakafofonga ‘o e taula‘eiki pule, pea na‘e vakili ‘a e puha, ‘o na hiki ‘o toe fokotu‘u ki hono potu. Na‘e pehē ‘ena fai ‘i he ‘aho kotoa pē, ‘o nau tānaki pa‘anga ke lahi.

¹²Pea na‘e ‘ange ia ‘e he tu‘i mo Sihoiata kiate kinautolu na‘e fai ‘a e ngaahi lakanga tauhi ‘i he fale ‘o Sihova; pea ko kinautolu na‘a nau nō ‘aki ha kau fakatoka maka, mo ha kau tufunga, ke fakafo‘ou ‘a e me‘a kuo maumau ‘i he fale ‘o Sihova; pea ki he kau tufunga ‘aione foki mo palasa, ke monomono ‘a e fale ‘o Sihova.

¹³Ko ia na‘e ngāue ‘a e ngaahi fa‘ahinga ngāue, pea na‘e fai atu ‘a e monomono ‘i he‘enau fakafitefita‘a; pea nau fokotu‘u ‘a e fale ‘o ‘Elohimi ‘i hono anga totonu, ‘o ngaohi ke mālohi.

¹⁴Pea kuo nau ‘osi, pea nau ‘omi ki he ‘ao ‘o e tu‘i mo Sihoiata hono toe ‘o e pa‘anga. Pea na‘e ngaohi nāunau ‘aki ki he fale ‘o Sihova, ko e nāunau ‘o e ngāue tauhi, mo e fai feilaulau, mo e ngaahi sēpuni, mo e ipu koula mo siliva. Pea na‘a nau ‘atu feilaulau-mōifua ma‘u pē ‘i he fale ‘o Sihova lolotonga ‘a e mo‘ui ‘a Sihoiata.

¹⁵Ka na‘e faka‘au ke motu‘a ‘a Sihoiata, mo a‘ua‘u, ‘o ne pekia; na‘a ne teau mā tolungofulu ta‘u ‘i he‘ene pekia.

¹⁶Pea na‘e telio ia ‘i Kolo-‘o-Tēvita, fakataha mo e ngaahi tu‘i; he kuo ne fai lelei ma‘a ‘Isileli, pea ‘i he fakafeangai kia ‘Elohimi, pea ki he fale ‘o ‘ene ‘Afio.

¹⁷Pea hili ‘a e pekia ‘a Sihoiata na‘e omi ‘a e hou‘eiki Siuta, ‘o hū ki he tu‘i. Toki fakaongo ‘a e tu‘i kiate kinautolu.

¹⁸Pea na‘a nau li‘aki ‘a e fale ‘o Sihova ko e ‘Otua ‘o honau tupu‘anga, pea na‘a nau tauhi ‘a e ngaahi ‘āsela mo e ngaahi ‘aitoli: pea hoko ha houhau ki Siuta mo Selusalema koe‘uhi ko ‘enau faihala ko ia.

¹⁹Ka na‘a Ne fekau kiate kinautolu ‘ani palōfita ke fakafoki kinautolu ki he ‘Eiki; pea na‘a nau na‘isia kinautolu: kae ‘ikai te nau fie fanongo.

²⁰Pea ko e Laumālie ‘o e ‘Otua na‘a ne kofu ‘a Sākalaia foha ‘o Sihoiata ko e taula‘eiki; pea ne tu‘u ‘o lea hifo ki he kakai, ‘o pehē, Ko e folofola eni ‘a ‘Elohimi, Ko e hā ‘oku mou laka kehe ai mo e ngaahi tu‘utu‘uni ‘a Sihova, ‘o ta‘ofi ai ho‘omou tu‘umālie? he kuo mou li‘aki ‘a Sihova, pea kuo ne li‘aki kimoutolu.

²¹Pea na‘a nau puleaki‘i ia, ‘o tolomaka‘i ‘i he fekau ‘a e tu‘i, ‘i he loto‘ā ‘o e fale ‘o Sihova.

²²Ko ia, na‘e ‘ikai manatu ‘e Kingi Soasi ‘a e ‘ofa na‘e fai kiate ia ‘e he‘ene tamai ko Sihoiata, ka ne fakapoongi ‘a hono foha. Pea ‘i he‘ene hokotaki na‘a ne pehē, Ke vakai ‘a e ‘Eiki ki ai, ‘o ne ‘eke!

²³Pea ‘i he faifai pea ‘osi ‘a e ta‘u, na‘e ‘alu hake ‘a e hōsitē Sīlia ke tau‘i ia: pea nau a‘u ki Siuta mo Selusalema, pea nau faka‘auha ‘a e hou‘eiki kotoa pē mei he lotolotonga ‘o e kakai, pea nau ‘ave ‘a e vete kotoa pē ki he Tu‘i Tāmasikusi.

²⁴He na‘e toko si‘i ‘a e hōsitē Sīlia na‘e ha‘u; ka na‘e tuku ‘e Sihova ki honau nima ha hōsitē lahi ‘aupito, koe‘uhi kuo nau li‘aki ‘a Sihova ko e ‘Otua ‘o honau tupu‘anga. Ko ‘enau fai ē ‘a e fakamāu‘i ‘o Soasi.

²⁵Pea kuo nau mahu‘i meiate ia (seuke na‘a nau tuku ia kuo kafo lahi), na‘e puleaki‘i ia ‘e he‘ene kau tamaio‘eiki ‘a‘ana, koe‘uhi ko ‘ene fakapoongi ‘a e hako ‘o Sihoiata ko e taula‘eiki, pea nau lapasi ia ‘i hono mohenga, ‘o ne pekia ai: pea nau telio ia ‘i Kolo-‘o-Tēvita; ka na‘e ‘ikai fai ia ‘i he fa‘itoka ‘o e ngaahi tu‘i.

²⁶Pea ko eni ia na‘e fai hono puleaki‘i; ko Sāpati tama ‘a Sīmati ko e fefine ‘Āmoni, mo Sihosapati tama ‘a Similiti ko e fefine Moape.

²⁷Pea ko e me‘a ki hono ngaahi foha, mo e lahi ‘o e kavenga na‘e hilifaki kiate ia, mo e fokotu‘u ‘o e fale ‘o e ‘Otua, vakai ‘oku tu‘u ‘i he tohi fakamatala ‘o e Tohi ‘o e Ngaahi Tu‘i. Pea na‘e fetongi ia ‘i he tu‘i ‘e hono foha ko ‘Amasaia.