Read KO E TOH TAPU KATOA TONGA 2 Kal 25 Bible Online

2 Kal 25 - KO E TOH TAPU KATOA TONGA bible

2 Kal 25

¹NA‘E tu‘i ‘a ‘Amasaia kuo ne uofulu mā nima ta‘u; pea na‘e uofulu mā hiva ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sihoatani mei Selusalema.

²Pea na‘a ne fai ‘a e me‘a na‘e hā totonu ki he finangalo ‘o Sihova, kae ‘ikai ‘aki ha loto haohaoa.

³Pea ‘i he kaukaua leva hono hau, na‘a ne hanga ‘o taa‘i ‘ene kau tamaio‘eiki kuo nau te‘ia ‘a e tu‘i ko ‘ene tamai.

⁴Ka ko ‘enau fānau na‘e ‘ikai te ne tāmate‘i, hangē ko ia kuo tohi ‘i he Puka ‘a Mōsese, ‘a ia na‘e tu‘utu‘uni ‘e Sihova, ‘o pehē, ‘E ‘ikai mate ‘a e mātu‘a koe‘uhi ko e fānau, pea ‘e ‘ikai mate ‘a e fānau koe‘uhi ko e mātu‘a; ‘e mate takitaha koe‘uhi ko ‘ene angahala ‘a‘ana.

⁵Pea fakataha ‘e ‘Amasaia ‘a Siuta, ‘o ne fokotu‘u kinautolu ‘o fakatatau ki honau ngaahi ‘ulumotu‘a, ‘o pule‘i ‘e he ngaahi kapiteni-toko‘i-afe mo e ngaahi kapiteni toko‘i-teau, ‘io, ‘a Siuta kātoa mo Penisimani: ‘o ne lau kinautolu ‘o kamata mei he uofulu ta‘u ‘o fai hake: pea tā na‘e ai ha toko tolu kilu na‘e taau ke ‘alu ‘i he tau, ‘o ala to‘o ‘a e tao mo e pā.

⁶Pea ne nō mei ‘Isileli ha to‘a ‘e toko kilu ‘aki ‘a e taleniti siliva ‘e teau.

⁷Pea ha‘u kiate ia ha tangata ‘o ‘Elohimi, ‘o ne fakatau folofola ki ai, ‘o pehē, ‘Ēī, ke ‘oua ‘e ‘alu mo koe ‘a e tau ‘Isileli; he ‘oku ‘ikai ke kau ‘a Sihova mo ‘Isileli; ‘io, mo ha‘a ‘Ifalemi kātoa.

⁸Ka ‘oka kuo pau ho loto ke ‘alu mo kinautolu, fai; tānaki ho ivi ki he tau:[36] ‘e lī koe ki lalo ‘e ‘Elohimi ‘i he ‘ao ‘o e fili: he ‘oku mālohi ‘a e ‘Otua ke tokoni, pea ke sī ki lalo.

⁹Pea folofola ‘a ‘Amasaia ki he tangata ‘o ‘Elohimi, Ka ko e hā ‘e fai ki he teau‘i taleniti, ‘a ia kuo u ‘atu ki he kongakau ‘Isileli? Pea tali ‘a e tangata ‘o ‘Elohimi, ‘Oku mafai ‘e Sihova ke foaki kiate koe ‘o lahi hake ‘i hena.

¹⁰Ko ia na‘e vahe‘i kinautolu ‘e ‘Amasaia, ‘a e kongakau na‘e ha‘u kiate ia mei ‘Ifalemi, ke nau foki ki honau feitu‘u: ko ia na‘e tō ‘enau ‘ita ki Siuta ‘o lahi, ‘o nau foki ki ‘api kuo nau mamahi.

¹¹Ka ka fakato‘oto‘a ‘a ‘Amasaia, ‘o ne taki atu hono kakai, ‘o nau ‘alu atu ki Tele‘a Māsima, ‘o ne taa‘i ha toko mano ‘o ha‘a Seia.

¹²Pea ko e toko mano ‘e taha na‘e ‘ave mo‘ui ‘e ha‘a Siuta, ‘o nau ‘omi ki he funga makatu‘u, ‘o lī hifo kinautolu mei he funga makatu‘u,[37] pea nau lailai kotoa.

¹³Ka ko e kau tangata ‘o e kongakau na‘e fakafoki ‘e ‘Amasaia ke ‘oua te nau ō mo ia ki he tau, na‘a nau hanga ‘o tau‘i ‘a e ngaahi kolo ‘o Siuta, mei Samēlia ‘o a‘u ki Pete-holoni, pea nau tāmate‘i honau toko tolu afe, ‘o ‘ave ha vete lahi.

¹⁴Pea ‘i he faifai pea foki ‘a ‘Amasaia mei he taa‘i ‘o e kau ‘Ītomi, na‘a ne ha‘u mo ia ‘a e ngaahi ‘otua ‘o ha‘a Seia, ‘o ne fokotu‘u kinautolu ke ne ‘otua ‘aki, ‘o ne fai lotu ‘i honau ‘ao, mo tutu ‘inisēnisi ki ai.

¹⁵Ko ia na‘e tuputāmaki ‘a Sihova kia ‘Amasaia, ‘o ne fekau atu ki ai ha palōfita, ‘a ia na‘a ne fakatau folofola hake, ‘o pehē, Ko e hā kuo ke huhū ki he ngaahi ‘otua ‘o e kakai ni, ‘a ia na‘e ‘ikai te nau hamusi honau kakai mei ho nima?

¹⁶Pea ‘i he‘ena fefolofolai, ‘iloange na‘e folofola mai ia, He kuo fakanofo koe ke fale‘i ‘a e tu‘i? ta‘ofi koe; koe‘uma‘ā ho taa‘i? Pea ta‘ofi ‘e he palōfita he‘ene pehē, ‘Oku ou ‘ilo kuo tu‘utu‘uni ‘a e ‘Otua ke faka‘auha koe, koe‘uhi ko ho‘o fai ‘a e me‘a ko eni, ‘o ‘ikai te ke tokanga ki he‘eku fale‘i koe.

¹⁷Pea fai ‘e ‘Amasaia ko e Tu‘i Siuta ‘enau fakataha alea, pea ‘alu atu ‘ene fekau kia Soasi foha ‘o Sihoa‘asi foha ‘o Sehu ko e Tu‘i ‘Isileli ke fakahā, Ha‘u ā, ke ta tau‘aki sio.[38]

¹⁸Pea ‘alu ‘a e fekau ‘a Soasi ko e Tu‘i ‘Isileli kia ‘Amasaia ko e Tu‘i Siuta ke fakahā, Tokua ko e Talatala ‘oku ‘i Lepanoni na‘e fekau atu ki he Sita ‘oku ‘i Lepanoni, ‘o pehē, Tuku mai ho ‘ōfefine ke nonofo mo hoku foha: pea na‘e laka ange ha manu fekai na‘e ‘i Lepanoni, ‘o ne malaki ‘a e Talatala.

¹⁹‘Oku ke taku kuo ke taa‘i ‘a ‘Ītomi; pea kuo hiki ai ho loto, ‘o ke fakausousa: pe‘i nofo ‘i ‘api; koe‘uma‘ā ho‘o o‘io‘i pea kovi, ka ke tō ai koe pea mo Siuta foki.

²⁰Ka ka ‘ikai tokanga ‘a ‘Amasaia, he na‘e meia ‘Elohimi ia, koe‘uhi ke ne tukuange kinautolu ki he nima ‘o honau ngaahi fili, koe‘uhi ko ‘enau huhū ki he ngaahi ‘otua ‘Ītomi.

²¹Ko ia, na‘e ‘alu hake ‘a Soasi ko e Tu‘i ‘Isileli, ‘o na tau‘aki sio, ‘a ia mo ‘Amasaia ko e Tu‘i Siuta ‘i Pete-semesi, ‘a ia ‘oku kau ki Siuta.

²²Pea vaivai ‘a Siuta ‘i he ‘ao ‘o ‘Isileli, ‘o nau hola takitaha ki hono tēniti.

²³Pea ko e me‘a kia ‘Amasaia Tu‘i Siuta, ko e foha ‘o Soasi foha ‘o Sihoa‘asi, na‘e puke ia ‘e Soasi Tu‘i ‘Isileli ‘i Pete-semesi, ‘o ne ha‘u mo ia ki Selusalema, ‘o ne holoki ‘a e ‘ā ‘o Selusalema mei he matanikolo ko ‘Ifalemi ‘o a‘u ki he matanikolo ‘o e tuliki, ko e kiupite ‘e fāngeau.

²⁴Pea ne to‘o ‘a e koula kotoa mo e siliva, mo e nāunau kehekehe na‘e ‘ilo ki ai ‘i he fale ‘o ‘Elohimi, ‘a ia na‘e tauhi ‘e ‘Ōpeti-‘Ītomi, mo e koloa ‘i he fale ‘o e tu‘i, pea mo e kau talifaki, ‘o ne foki ki Samēlia.

²⁵Pea mo‘ui ‘atu ‘a ‘Amasaia foha ‘o Soasi ko e Tu‘i Siuta hili ‘a e pekia ‘a Soasi foha ‘o Sihoa‘asi ko e Tu‘i ‘Isileli, ‘o hongofulu mā nima ta‘u.

²⁶Ko hono toe ‘o e ngāue ‘a ‘Amasaia mei he kamata‘anga ‘o a‘u ki mui, vakai, ‘ikai kuo tohi ‘i he Puka ‘o e Ngaahi Tu‘i Siuta mo ‘Isileli?

²⁷Pea talu ‘a e afe ‘a ‘Amasaia mei he muimui kia Sihova, mo ‘enau puleaki‘i ia ‘i Selusalema; pea ne hola ki Lākisi: pea nau fekau atu ha ni‘ihi ke tulimui atu ki ai ki Lākisi, pea na‘a nau tāmate‘i ia ‘i ai.

²⁸Pea na‘a nau fakaheka ia ki ha fanga hoosi, ‘o nau telio ia fakataha mo ‘ene ngaahi kui ‘i Kolo-‘o-Siuta.