Read KO E TOH TAPU KATOA TONGA 2 Kal 26 Bible Online

2 Kal 26 - KO E TOH TAPU KATOA TONGA bible

2 Kal 26

¹PEA hanga ‘a e kakai Siuta kotoa, ‘o nau puke ‘a ‘Ūsaia (‘oku hongofulu mā ono hono ta‘u), ‘o nau fakanofo ia ke tu‘i ke fetongi ‘ene tamai ko ‘Amasaia,

²na‘e langa ‘e ia ‘a ‘Ēlati, ‘o fakafoki ia ki Siuta, hili ‘a e toka ‘a e tu‘i mo ‘ene ngaahi kui.

³Na‘e hongofulu mā ono ta‘u ‘a ‘Ūsaia ‘i he‘ene kamata pule; pea na‘e nimangofulu mā ua ta‘u ‘ene hau ‘i Selusalema; pea ko e hingoa ‘o ‘ene fa‘ē ko Sekolaia mei Selusalema.

⁴Pea fai ‘e ia ‘a e me‘a na‘e hoa mo e finangalo ‘o Sihova, ‘o hangē tofu pē ‘a e fai ‘a ‘ene tamai ko ‘Amasaia.

⁵Pea nofo ia ke kumi ki he ‘Otua ‘i he taimi ‘o Sākalaia, ‘a ia na‘e ako ia ‘i he manavahē kia ‘Elohimi:[39] pea lolotonga ‘ene kumi kia Sihova na‘e fakamonū‘ia ia ‘e ‘Elohimi.

⁶Pea ne ‘alu atu ‘o tau‘i ‘a e kau Filisitia, ‘o ne holoki ‘a e ‘ā ‘o Kati, pea mo e ‘ā ‘o Siapini, mo e ‘ā ‘o ‘Asitoti; pea ne langa ‘ani kolo ‘i he fonua ‘o ‘Asitoti mo e kau Filisitia.

⁷Pea na‘e tokoni‘i ia ‘e ‘Elohimi ‘i he fai mo e kau Filisitia, mo e kau ‘Ālepea na‘e nofo ‘i Kulipeali, pea ‘i he fai mo e kau Meuni.

⁸Pea ‘omi tukuhau ‘e ha‘a ‘Āmoni kia ‘Ūsaia: pea na‘e mafola hono ongoongo ‘o a‘u ki he hū‘anga ki ‘Isipite; he na‘a ne hoko ‘o kaukaua ‘aupito.

⁹Pea na‘e langa ‘e ‘Ūsaia ‘a e ngaahi taua ‘i Selusalema ‘i he matanikolo ‘o e tuliki, pea ‘i he matanikolo ‘o e tele‘a; mo e potu ‘oku moka ai ‘a e ‘ā, ‘o ne ngaohi ke talitau‘anga.

¹⁰Pea na langa mo e ngaahi taua ‘i he toafa, ‘o ne foa ‘a e ngaahi lepa lahi, he na‘e lahi ‘ene fanga manu; pehē mo ‘ene fai ‘i Sēfela‘a mo Misoa; pea na‘e ai ‘ene kau fa‘a mo ‘ene kau tauhi ngoue vaine ‘i he ngaahi mo‘unga pea ‘i Kāmeli; he ko e taha manako ngoue ia.

¹¹Na‘e ma‘u foki ‘e ‘Ūsaia ha hōsitē ‘o e kakai fai tau, na‘e ‘alu ki he tau fakakongakau ‘o fakatatau ki honau lau na‘e fika‘i ‘e Sieli ko e sikalaipe mo Ma‘aseia ko e ‘ōfisa, ‘o na fakaongo kia ‘Ananaia ko e taha ‘i he ngaahi kapiteni ‘a e tu‘i.

¹²Ko e lau kotoa ‘o e hou‘eiki ‘ulumotu‘a, ‘a e kau to‘a tete‘e, ko e toko ua afe mā onongeau.

¹³Pea na‘e fakaongo kiate kinautolu ‘a e sino ‘o e hōsitē, ko e toko tolu kilu mā fitu afe mā nimangeau, ko e kau ivi lahi ia ‘i he tau ke tokoni ki he tu‘i ‘i he fai mo e fili.

¹⁴Pea teu ‘e ‘Ūsaia ma‘anautolu, ‘io, ma‘a e hōsitē kotoa, ‘a e ngaahi pā, mo e tao, mo e tatā tau, mo e kofu tau, mo e ngaahi kaufana, mo e maka ki he makatā.

¹⁵Pea ne ngaohi ‘i Selusalema ‘eni mīsini na‘e fakakaukau‘i ‘e he kau tama poto, ke tu‘u ‘i he ngaahi taua mo e funga ‘ā, ke fana ngahau mo e ngaahi maka lalahi. Pea na‘e mafola atu hono ongoongo ‘o mama‘o; he na‘e fakaofo hono tokoni‘i, ‘o ne fu‘u kaukaua ai.

¹⁶Ka ‘i he‘ene mālohi na‘e mahiki hono loto, ke fai ‘a e ngaahi me‘a te ne maumau ai, pea ne hia kia Sihova ko hono ‘Otua; he na‘a ne hū ki he Temipale ‘o e ‘Eiki ke tutu ‘inisēnisi ‘i he ‘ōlita tutu‘anga-‘inisēnisi.

¹⁷Pea tulimui ki ai ‘a ‘Asalaia ko e taula‘eiki, fakataha mo e toko valungofulu ‘i he kau taula‘eiki ‘a Sihova, ko e kau to‘a:

¹⁸pea nau tu‘u ke ta‘ofi ‘a Kingi ‘Ūsaia, ‘o nau fakatau folofola kiate ia, ‘Oku ‘ikai ‘iate koe, ‘Ūsaia, ke tutu ‘inisēnisi kia Sihova; he ko e me‘a ia ‘a e kau taula‘eiki pē ko e hako ‘o ‘Ēlone, ‘a ia kuo fakatāpui ke tutu ‘inisēnisi: me‘a atu mei he Potu Tapu; he kuo ke hia: pea ‘e ‘ikai te ke hā lāngilangi ai kia Sihova ‘Elohimi.

¹⁹Pea tuputāmaki ai ‘a ‘Ūsaia; he na‘e ‘i hono nima ha ‘ai‘anga ‘inisēnisi ke tutu: pea lolotonga ‘ene ‘itangi ‘a e kau taula‘eiki, na‘e fisiki mai ‘a e kilia ‘i hono la‘e ‘i he ‘ao ‘o e kau taula‘eiki, ‘i he fale ‘o Sihova, ‘i he‘ene tu‘u ‘i he tafa‘aki ‘ōlita tutu‘anga ‘inisēnisi.

²⁰Pea hanga ki ai ‘a ‘Asalaia ko e taula‘eiki lahi, mo e kau taula‘eiki kotoa pē, pea tā kuo ma‘u ‘e he kilia hono la‘e, pea na‘a nau kapusi ia mei ai, ‘io, na‘a ne fakavave mo ia ke ‘alu ki tu‘a; he kuo taa‘i ‘e he ‘Eiki.

²¹Pea ne kilia ‘a Kingi ‘Ūsaia ‘o a‘u ki he‘ene pekia, pea ne nofo ki ha fale mavahe he ko e kilia; pea na‘e tapui ia mei he fale ‘o e ‘Eiki: pea ko hono foha ko Siotame na‘e pule ki Loto‘ā, ‘o fai ‘a e fakamaau ‘o e kakai ‘o e fonua.

²²Pea ko hono toe ‘o e ngāue ‘a ‘Ūsaia, mei he ‘uluaki ‘o fai kimui, na‘e tohi ‘e ‘Aisea foha ‘o ‘Āmosi ko e palōfita.

²³Pea toka ‘a ‘Ūsaia mo ‘ene ngaahi kui pea na‘a nau telio ia mo ‘ene ngaahi kui ‘i he tu‘a fa‘itoka ‘o e ngaahi tu‘i; he na‘a nau pehē, Ko e kilia ia: pea na‘e fetongi ia ‘i he pule ‘e Siotame ko hono foha.