Read KO E TOH TAPU KATOA TONGA 2 Kal 27 Bible Online

2 Kal 27 - KO E TOH TAPU KATOA TONGA bible

2 Kal 27

¹NA‘E uofulu mā nima ta‘u ‘a Siotame ‘i he‘ene kamata pule, pea na‘e hongofulu mā ono ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sīlusa ko e ‘ōfefine ‘o Sātoki.

²Pea fai ‘e ia ‘a e me‘a na‘e hoa mo e finangalo ‘o Sihova, ‘o tatau tofu pē mo e fai ‘a ‘ene tamai ko ‘Ūsaia: kae ngata pē na‘e ‘ikai te ne hū ki he temipale ‘o Sihova.[40] Pea na‘e kei fai ‘e he kakai ‘a e ngaahi me‘a te nau maumau ai.

³Na‘e ngaohi ‘e ia ‘a e matanikolo ‘olunga ‘i he fale ‘o Sihova, pea lahi ‘a e me‘a na‘a ne langa ‘i he ‘ā ‘o ‘Ōfeli.

⁴Na‘a ne langa kolo foki ‘i he fonua mo‘unga ‘o Siuta, pea ne langa ‘ani taua moni fale le‘o ‘i he ngaahi vao tātā.

⁵Pea ne fai tau foki mo Tu‘i Ha‘a ‘Āmoni, ‘o ne lava‘i kinautolu. Pea ko e ta‘u ko ia na‘e tukuhau kiate ia ‘e ha‘a ‘Āmoni, ko e teau‘i taleniti siliva, mo e kilu‘i efa uite, mo e kilu‘i efa pa‘ale. Na‘e pehē mo e tukuhau ‘a ha‘a ‘Āmoni ‘i hono ua ta‘u foki, mo hono tolu.

⁶Ko ia na‘e kaukaua ‘a Siotame, koe‘uhi na‘a ne teu hono ngaahi ‘alunga ke ‘ao mo Sihova ko hono ‘Otua.

⁷Pea ko hono toe ‘o e ngāue ‘a Siotame, mo ‘ene ngaahi tau, mo hono ngaahi founga, vakai kuo tohi ia ‘i he Puka ‘o e Ngaahi Tu‘i ‘Isileli mo Siuta.

⁸Na‘a ne uofulu mā nima ta‘u ‘i he‘ene kamata pule, pea na‘e hongofulu mā ono ta‘u ‘ene hau ‘i Selusalema.

⁹Pea toka ‘a Siotame mo ‘ene ngaahi kui, pea na‘a nau telio ia ‘i Kolo-‘o-Tēvita; pea na‘e fetongi ia ‘i he pule ‘e hono foha ko ‘Āhasi.