Read KO E TOH TAPU KATOA TONGA 2 Kal 28 Bible Online

2 Kal 28 - KO E TOH TAPU KATOA TONGA bible

2 Kal 28

¹NA‘E uofulu ta‘u ‘a ‘Āhasi ‘i he‘ene kamata pule, pea na‘e hongofulu mā ono ta‘u ‘ene hau ‘i Selusalema. Pea na‘e ‘ikai te ne fai ‘a e me‘a na‘e hoa mo e finangalo ‘o Sihova hangē ko ‘ene kui ko Tēvita:

²ka ka fou ia ‘i he ‘alunga ‘o e ngaahi Tu‘i ‘Isileli; pea ne haka foki ‘a e ngaahi ‘īmisi ‘o e ngaahi Peali.

³‘Io, na‘e tutu ‘inisēnisi ‘a e toko taha ko ia ‘i Kihena ‘o ne tuku ‘ene fānau ke ‘asi ‘i he afi, ‘o hangē ko e fai fakalielia ‘a e hīteni na‘e kapusi ‘e Sihova mei he ‘ao ‘o ha‘a ‘Isileli.

⁴Na‘a ne fai feilaulau foki mo tutu ‘inisēnisi ‘i he ngaahi ‘esi mo e ngaahi sia, pea mo e lolo ‘akau mata kehekehe.

⁵Ko ia ai, na‘e tukuange ia ‘e Sihova ko hono ‘Otua ki he nima ‘o e Tu‘i Sīlia: pea na‘a nau taa‘i ia, ‘o nau taki pōpula ha fu‘ufu‘unga fononga ‘o hono kakai, ‘o ‘omi ki Tāmasikusi. Pea na‘e tukuange foki ia ki he nima ‘o e Tu‘i ‘Isileli, ‘a ia na‘a ne taa‘i ‘aki ha tā lahi.

⁶He ko Peka foha ‘o Lemalaia na‘a ne fakaeve ‘i Siuta ha toko taha kilu mā toko ua mano ‘i ha ‘aho pē taha, ko e kau to‘a kotoa pē; koe‘uhi kuo nau li‘aki ‘a Sihova ko e ‘Otua ‘o honau tupu‘anga.

⁷Pea ko Sikeli ko e to‘a ‘Ifalemi na‘a ne tāmate‘i ‘a Ma‘aseia ko e foha ‘o e tu‘i, mo ‘Aselikami ko e pule ‘o Loto‘ā, mo ‘Elikena ‘a e palēmia.

⁸Pea na‘e taki pōpula ‘e ha‘a ‘Isileli honau kāinga ko e toko ua kilu, ‘a e kau fefine, mo e tamaiki tangata, mo e tamaiki fefine, pea nau ma‘u mo ha vete lahi, ‘o nau ha‘u mo kinautolu ki Samēlia.

⁹Ka na‘e ‘i ai ha palōfita ‘a Sihova ‘i he potu ko ia na‘e hingoa ko ‘Ōteti; pea ‘alu atu ia ke fakafetaulaki ki he hōsitē na‘e ha‘u ki Samēlia, ‘o ne pehē kiate kinautolu; Vakai, ko e me‘a ‘i he tuputāmaki ‘a Sihova ko e ‘Otua ‘o homou tupu‘anga ki Siuta na‘a ne tukuange kinautolu ki homou nima, pea kuo mou fakaeve kinautolu ‘i ha ‘ita kuo pā ki langi.

¹⁰Pea ko eni ‘oku mou lau ke fakaehaua ‘a ha‘a Siuta mo Selusalema ke tamaio‘eiki mo kaunanga kiate kimoutolu: ka ‘ikai ‘oku ‘iate kimoutolu foki ‘a ho‘omou ngaahi hia kia Sihova ko homou ‘Otua?

¹¹Pea ko eni, fanongo kiate au, pea fakafoki ‘a e kau pōpula kuo mou taki pōpula mai mei homou kāinga: he ‘oku ‘iate kimoutolu ‘a e houhau kakaha ‘o Sihova.

¹²Pea toki hanga ha tu‘unga me‘a mei he hou‘eiki ‘o ha‘a ‘Ifalemi — ‘a ‘Asalaia foha ‘o Siohanani, Pelekaia foha ‘o Mesilemoti, mo Hesekaia foha ‘o Sālumi, mo ‘Āmasa foha ‘o Hatelai — ‘o nau tu‘u ke ta‘ofi ‘a kinautolu na‘e ha‘u mei he tau.

¹³Pea nau pehē kiate kinautolu, ‘E ‘ikai te mou ‘omi ‘a e kau pōpula ki heni, he ko ho‘omou fai ke hilifaki kiate kitautolu ‘a e hia kia Sihova, ke fakalahi ‘etau angahala mo ‘etau halaia: he ko ‘etau hia ko e me‘a lahi, pea ‘oku toka ki ‘Isileli ha houhau kakaha.

¹⁴Pea hiki ‘a e kau tau, ‘o tuku ‘a e kau pōpula mo e vete ‘i he ‘ao ‘o e hou‘eiki mo e fu‘u fakataha.

¹⁵Pea tutu‘u ‘a e tu‘unga me‘a kuo lau honau hingoa, ‘o nau puke ‘a e kau pōpula, pea ‘ilonga kinautolu na‘e telefua na‘a nau fakakofu mei he vete, mo fakasū kinautolu, pea nau fafanga mo fakainu, pea nau tākai kinautolu, pea ‘ilonga ‘a e vaivai he ‘alu na‘a nau fakaheka ‘asi, pea nau ‘omi kinautolu ki Sielikō ko e kolo paame, ko e feitu‘u ‘o honau kāinga: pea nau toki foki ki Samēlia.

¹⁶‘I he taimi ko ia na‘e ‘alu ‘a e fekau ‘a Kingi ‘Āhasi ki he ngaahi Tu‘i ‘Āsilia ko e kole tokoni.

¹⁷He kuo toe omi ‘a e kau ‘Ītomi, ‘o taa‘i ‘a Siuta, ‘o ‘ave ha kau pōpula.

¹⁸Kuo ‘ohofia foki ‘e he kau Filisitia ‘a e ngaahi kolo ‘i Sēfela‘a, mo e potu ‘o Tonga na‘e kau ki Siuta, pea kuo nau hamu ‘a Pete-semesi, mo ‘Esialoni, mo Keteloti, pea mo Soko mo hono ngaahi kolo fakaongo, mo Tīmina mo hono ngaahi kolo fakaongo; ko Kīmiso foki mo hono ngaahi kolo fakaongo: pea nau nofo ai.

¹⁹He kuo fakamā‘ulalo ‘e Sihova ‘a Siuta koe‘uhi ko ‘Āhasi ko e Tu‘i ‘Isileli; he kuo ne fai ta‘emalao‘i ‘i Siuta, pea kuo ne mātu‘aki hia kia Sihova.

²⁰Pea ha‘u kiate ia ‘a Tilikati-pilinesa ko e Tu‘i ‘Āsilia; ka na‘a ne fakafaingata‘a‘ia ia, ‘o ‘ikai te ne tokoni‘i.

²¹He na‘e to‘o ha me‘a ‘e ‘Āhasi mei he fale ‘o e ‘Eiki, mo e fale ‘o e tu‘i, mo e hou‘eiki, ‘o ne ‘ange ki he Tu‘i ‘Āsilia; ka tala‘ehai na‘e ma‘u ai ha tokoni.

²²Pea ‘i he taimi ‘o ‘ene faingata‘a‘ia na‘e fakautuutu ai ‘ene hia kia Sihova ‘a e Kingi ‘Āhasi ko eni.

²³He na‘a ne fai feilaulau ki he ngaahi ‘otua ‘o Tāmasikusi, ‘a kinautolu kuo taa‘i ia: ‘o ne pehē tokua, Ko e ngaahi ‘otua ‘o e ngaahi Tu‘i Sīlia na‘a nau tokoni‘i kinautolu; ko ia te u fai feilaulau ki ai ‘e au ke nau tokoni mai. Ka ko e me‘a ia na‘a ne maumau ai mo ‘Isileli kātoa.

²⁴Pea tānaki ‘e ‘Āhasi ‘a e nāunau ‘o e fale ‘o ‘Elohimi, ‘o ne tofi ‘a e nāunau ‘o e fale ‘o ‘Elohimi, ‘o ne songo ‘a e ngaahi matapā ‘o e fale ‘a Sihova, ‘o ne ngaohi ‘ōlita ma‘ana ‘i he tuliki kotoa pē ‘o Selusalema.

²⁵Pea ‘i he kolo takitaha ‘o Siuta na‘a ne ngaohi ‘esi, ke tutu ‘inisēnisi ai ki he ngaahi ‘otua kehe, ‘o ne fakahouhau‘i ‘a Sihova ko e ‘Otua ‘o hono tupu‘anga.

²⁶Pea ko hono toe ‘o ‘ene ngāue, mo hono ngaahi ‘alunga, mei he ‘uluaki ‘o fai ki mui, vakai kuo tohi ia ‘i he Puka ‘o e Ngaahi Tu‘i Siuta mo ‘Isileli.

²⁷Pea toka ‘a ‘Āhasi mo ‘ene ngaahi kui, pea nau telio ia ‘i kolo, ‘i Selusalema; he na‘e ‘ikai te nau ‘omi ia ki he fa‘itoka ‘o e ngaahi Tu‘i ‘Isileli: pea na‘e fetongi ia ‘i he pule ‘o hono foha ko Hesekaia.