Read KO E TOH TAPU KATOA TONGA 2 Kal 32 Bible Online

2 Kal 32 - KO E TOH TAPU KATOA TONGA bible

2 Kal 32

¹PEA hili ‘a e ngaahi me‘a ko ia, mo e fai tōnunga ko ia, na‘e ha‘u ‘a Senakalipe ko e Tu‘i ‘Āsilia, ‘o ne hū ki Siuta, ‘o ne nofo‘i ‘a e ngaahi kolo kuo ‘aa‘i, ‘o ne lau ke hamu mo‘ona.

²Pea ‘i he vakai ‘e Hesekaia kuo ha‘u ‘a Senakalipe, pea ‘oku ne hanga tau ki Selusalema,

³na‘a ne alea mo hono hou‘eiki mo ‘ene kau mafi ke fufū ‘a e vai na‘e tafe mei he ngaahi matavai na‘e ‘i tua‘ā kolo: pea na‘a nau tokoni kiate ia.

⁴Ko ia na‘e fakataha mai ha fu‘u kakai, pea na‘a nau fufū ‘a e ngaahi matavai kotoa, mo e vaitafe na‘e tafe ‘i loto fonua, he‘enau pehē, Koe‘uma‘ā ke omi ‘a e ngaahi Tu‘i ‘Āsilia, ‘o ma‘u vai lahi?

⁵Pea ne fakato‘oto‘a, ‘o toe langa hake ‘a e ngaahi feitu‘u ‘o e ‘ā kuo holoki, pea ne ngaohi ‘i hono funga ‘ani taua,[46] pea pehē mo e ‘ā ‘e taha ki tu‘a, ‘o ne ngaohi ke mālohi ‘a Milo ‘i Kolo-‘o-Tēvita, ‘o ne ngaohi mahafu ke lahi, kae‘uma‘ā ‘a e ngaahi pā.

⁶Pea ne fakanofo ‘eikitau ke angi ki he kakai, pea ne fakataha mai kinautolu ki he mala‘e ‘o e matanikolo, ‘o ne lea ke fakamanavalahi‘i kinautolu, ‘o pehē, Mou lototo‘a, mo tu‘u kalikali.

⁷‘Oua ‘e manavahē, pea ‘oua ‘e lotosi‘i koe‘uhi ko e Tu‘i ‘Āsilia, pe koe‘uhi ko e fu‘u hōsitē ‘oku ha‘u mo ia; he ‘oku lahi ho‘otautolu ‘i ho‘ona.

⁸‘Oku ‘iate ia ha nima kakano pē, ka ‘oku ‘iate kitautolu ‘a Sihova ko hotau ‘Otua ke tokoni kiate kitautolu, pea ke fai ‘etau tau. Pea na‘e faaki ‘a e kakai ki he lea ‘a Hesekaia ko e Tu‘i Siuta.

⁹Hili ia na‘e fekau ‘e Senakalipe ha‘ane kau tamaio‘eiki ke ‘alu ki Selusalema (he ‘oku ne nofo‘i ‘a Lākisi, ‘e ia mo ‘ene tau kotoa), ko e ‘ave ‘ene fekau kia Hesekaia ko e Tu‘i Siuta, pea ki he kau Siuta kotoa na‘e ‘i Selusalema, ‘o pehē,

¹⁰Ko e folofola eni ‘a Senakalipe ko e Tu‘i ‘Āsilia, Ko ho‘omou falala ki he hā ho‘omou nofo ‘i he talitau‘anga ‘i Selusalema?

¹¹‘Ikai ‘oku fakaloto‘i kimoutolu ‘e Hesekaia ke tuku kimoutolu ke mate ‘i he fiekaia mo e fie inua, he‘ene pehē, Ko Sihova ko hotau ‘Otua te ne fakahaofi kitautolu mei he nima ‘o e Tu‘i ‘Āsilia?

¹²‘Ā, ‘ikai ko Hesekaia kuo ne ‘ave hono ngaahi ‘esi mo hono ngaahi ‘ōlita, pea kuo ne fekau ‘a Siuta mo Selusalema, ‘o pehē, Ko e ‘ōlita pē taha te mou fai ho‘omou hū ki ai, ‘o tutu ‘inisēnisi ‘i hono funga?

¹³‘Ikai ‘oku mou ‘ilo ‘a e me‘a kuo u fai, ‘e au mo ‘eku ngaahi kui, ki he kakai kehekehe ‘o e ngaahi fonua? Ne momo‘i lava koā ‘a e ngaahi ‘otua ‘o e ngaahi kakai ‘o e ngaahi fonua ko ē ke fakahaofi honau fonua mei hoku nima?

¹⁴Hono ai ha taha ‘a e ngaahi ‘otua ‘o e ngaahi kakai ko ē na‘e mōifua ‘e he‘eku ngaahi kui, ‘a ia na‘e lava ke fakahaofi hono kakai mei hoku nima, ke ngali lava ai ‘e homou ‘otua ke fakahaofi kimoutolu mei hoku nima?

¹⁵Pea ko ia ke ‘oua na‘a fakahehema‘i kimoutolu ‘e Hesekaia, pe ke ne fakaloto‘i pehē kimoutolu, pea ‘oua te mou tui ki ai; he kuo te‘eki ha ‘otua ‘o ha kakai pe ha pule‘anga te ne lava ke fakahaofi hono kakai mei hoku nima, pe ko e nima ‘o ‘eku ngaahi kui: kae huanoa homou ‘otua ha‘ane fakahaofi kimoutolu mei hoku nima.

¹⁶Pea mōia atu ‘e he‘ene kau tamaio‘eiki he‘enau tālalakulaku kia Sihova ‘Elohimi, pea kia Hesekaia ko ‘ene sevāniti.

¹⁷Na‘a ne fai tohi foki ke talakaa‘i ‘a Sihova ko e ‘Otua ‘o ‘Isileli, pea ke lau‘i ia, ‘o pehē, hangē na‘e ‘ikai fakahaofi ‘e he ngaahi ‘otua ‘o e ngaahi kakai ‘o e ngaahi fonua honau kakai mei hoku nima, pehē ‘e ‘ikai fakahaofi ‘e he ‘Otua ‘o Hesekaia hono kakai mei hoku nima.

¹⁸Pea nau kalanga le‘o lahi foki ‘i he lea faka-Siuta ke ongo‘i ‘e he kakai Selusalema na‘e ‘i he funga ‘ā, ke fakailifia‘i kinautolu, pea ke fakapuputu‘u; koe‘uhi ke nau hamu ‘a e kolo.

¹⁹Pea nau lau ki he ‘Otua ‘o Selusalema ‘o hangē ko ‘enau lau ki he ngaahi ‘otua ‘o e ngaahi kakai ‘o māmani, ‘a ia ko e ngāue pē ‘a e nima ‘o e tangata.

²⁰Pea hufekina ‘e Hesekaia ko e tu‘i mo ‘Aisea foha ‘o ‘Āmosi ko e palōfita koe‘uhi ko e me‘a ko ia, ‘o na tautapa ki Langi.

²¹Pea fekau ‘e Sihova ha ‘āngelo, ‘o ne faka‘auha ‘a e kau tangata to‘a kotoa, mo e angi, mo e hou‘eiki ‘i he ‘apitanga tau ‘o e Tu‘i ‘Āsilia. Ko ia, na‘a ne foki mā ki hono fonua, pea ‘i he‘ene hū ki he fale ‘o hono ‘otua, pea ko kinautolu na‘e tupu mei hono manava na‘a nau fakapoongi ia ‘i ai ‘aki ‘a e heletā.

²²Ko ia na‘e fakahaofi ai ‘e Sihova ‘a Hesekaia mo e nofo Selusalema mei he nima ‘o Senakalipe ko e Tu‘i ‘Āsilia, pea mei he nima kotoa pē, ‘o ne fakahao kinautolu mei he me‘a ‘i he potu kotoa pē,[47]

²³pea ‘omi me‘a‘ofa ‘e he tokolahi kia Sihova ki Selusalema, mo e ngaahi me‘a mahu‘inga kia Hesekaia ko e Tu‘i Siuta; pea talu ai mo ‘ene fotu ‘i he ‘ao ‘o e ngaahi pule‘anga.

²⁴‘I he taimi ko ia na‘e toka ‘a Hesekaia, ‘o vaivai; ko ia na‘a ne lotu kia Sihova, pea ne folofola mai ki ai, ‘o ne tuku ha faka‘ilonga ki ai.

²⁵Ka na‘e ‘ikai fakahounga‘i ‘e Hesekaia ‘a e ‘ofa kuo fai kiate ia; he kuo hiki hono loto: ko ia na‘e tō ha houhau kiate ia, pea mo Siuta mei Selusalema.

²⁶Ka na‘e fakavaivai‘i ‘e Hesekaia ‘ene lotohiki ko ia, ‘e ia mo e nofo Selusalema; ko ia na‘e ‘ikai hoko kiate kinautolu ‘a e houhau ‘o Sihova ‘i he taimi ‘o Hesekaia.

²⁷Pea na‘e ma‘u ‘e Hesekaia ‘a e koloa mo e lāngilangi, ‘o lahi ‘aupito, pea ne ngaohi mo‘ona ‘a e ngaahi fale koloa ki he siliva, mo e koula, mo e maka mahu‘inga, mo e me‘a namu-kakala, mo e ngaahi pā, mo e nāunau mahu‘inga kehekehe;

²⁸ko e ngaahi feleoko foki ki he tupu ‘o e koane mo e uaine mo e lolo, mo e ngaahi fale manu ki he ngaahi fa‘ahinga monumanu lalahi mo e monumanu iiki ‘i he ngaahi loto‘ā.

²⁹Pea ne ngaohi mai ha ngaahi kolo le‘o, pea mo e koloa sipi mo e pulu ‘o lahi; pea na‘e tuku ‘e he ‘Otua ke ne mo‘umo‘ua lahi ‘aupito.

³⁰Ko Hesekaia foki ia na‘a ne fufū ‘a e matavai ‘olunga ‘o Vai Kihoni, ‘o fakatafe totonu hifo ‘i he potu lulunga ‘o Kolo-‘o-Tēvita. Pea na‘e lakaimonū ‘a Hesekaia ‘i he‘ene ngaahi me‘a kotoa pē.

³¹Pea ko ia, ‘i he me‘a ‘a e kau fakafofonga ‘o e hou‘eiki Pāpilone na‘e fekau mai kiate ia, ke ‘eke ‘a e me‘a fakaofo kuo hoko ‘i he fonua, na‘e li‘aki ai ia ‘e ‘Elohimi ko hono sivi, ke hā mai hono loto kotoa.

³²Pea ko hono toe ‘o e ngāue ‘a Hesekaia, mo ‘ene ‘ofa ki he lotu, vakai kuo tohi ia ‘i he Vīsone ‘a ‘Aisea foha ‘o ‘Āmosi ko e Palōfita, ‘i he Puka ‘o e Ngaahi Tu‘i Siuta mo ‘Isileli.

³³Pea toka ‘a Hesekaia mo ‘ene ngaahi kui, pea nau telio ia ‘i he funga[48] ‘o e ngaahi toka‘anga ‘o ha‘a Tēvita: pea na‘e fai mo‘ona ha feipulua lahi ‘e Siuta kotoa mo e nofo Selusalema. Pea na‘e fetongi ia ‘i he tu‘i ‘e hono foha ko Manase.